31. ČLANKO PROUČIBASE
ĐILI 12 O Jehova tano baro Devel
So ćerđa o Jehova te spasini e manušen?
O Devel odobor manglja o sveto so dinđa pe jedinobijande Ćhave (JOV. 3:16)
SO KA SIKLJOVA?
Ka dikha so o Jehova ćerđa te šaj te pomožini amen te borina amen protiv o greh. Isto ađahar, ka dikha sar omogućinđa amenđe te živina večno hem te ova oslobodime ando greh.
1-2. (a) Soj tano o greh hem sar šaj te borina amen protiv oleste? (Dikh o „Objasnime lafija“.) (b) Sostar ka vaćera ko akava hem ko avera člankija kola isi ko akava izdanje? (Dikh i „Napomena aso čitaocija“ ko akava izdanje.)
DA LI bi mangeja te đane kobor o Jehova mangela tut? O odgovor šaj te arakhe ađahar so ka sikljove odolestar so ćerđa te oslobodini amen ando greh hem meribe. O greh a tano but okrutno dušmani protiv kova našti kokri te borine tut. Sare amen svako dive grešinaja hem meraja sebepi o greh (Rimlj. 5:12). Ama, isi jekh šukar vest. O Jehova pana hari ka oslobodini amen ando greh hem ando meribe.
2 O Jehova oko 6 000 berš pomožini e manušenđe te borinen pe protiv o greh. Sose? Odolese so mangela amen. Pana kotar početka ov manglja e manušen, odolese ćerđa but buća te šaj te pomožini len te borinen pe protiv o greh. O Devel đanela so odova greh legari đi o meribe, a ov na mangela amen te mera, nego te živina večno (Rimlj. 6:23). Ko akava članko ka vaćera ando trin pućiba: (1) Savi nada o Jehova dinđa e nesavršeno manušenđe? (2) So o manuša ko purano vreme ćerđe te šaj te ugodinen e Jehovase? (3) So o Isus ćerđa te šaj te oslobodini e manušen?
SAVI NADA O JEHOVA DINĐA E NESAVRŠENO MANUŠENĐE?
3. So ulo e Adameja hem e Evaja ko Eden?
3 Ked o Jehova ćerđa e Adame hem e Eva, ov manglja te oven bahtale. Dinđa len šužo ćher, brak hem jekh zanimljivo zadatko. On valjanđe te pheren i phuv pe ćhavencar hem te ćeren la te ovel raj sar o Eden. Ama, dinđa len hem jekh zapovest. Ov upozorinđa len so ako na ićerena pe ki odija zapovest, on ka meren. Đanaja so ulo. Jekh nevidljivo duh, kova na manglja e Devle hem olen, ćhivđa len te na šunen odija zapovest. O Adam hem i Eva ćerđe odova so o Beng manglja. On na verujinđe pe Dadese kova mothovđa lenđe baro mangipe nego šunđe ole hem grešinđe. Tegani, ispuninđa pe odova so o Jehova phenđa. Kotar odova dive, on valjanđe te trpinen o posledice sar soj tane o phuripe hem o meribe (Post. 1:28, 29; 2:8, 9, 16-18; 3:1-6, 17-19, 24; 5:5).
4. Sose o Jehova mrzini o greh? (Rimljanima 8:20, 21)
4 O Jehova dinđa akava događaj te pisini pe aso amaro šukaripe. Odova pomožini amen te haljova sose odobor mrzini o greh. O greh rumini amaro amalipe oleja hem legari amen đi o meribe (Is. 59:2). O Satana mrzini e Jehova hem e manušen. Odolese, ćhivđa e Adame hem e Eva te grešinen, a odova hem avdije ćerela. Ov šaj mislinđa so pobedinđa e Jehova. Ama, na haljilo kobor baro mangipe o Devel isi le. O Jehova niked na meninđa pi namera aso Adamese hem e Evake potomkija. Ov mangela e manušen, odolese odmah dinđa len nada. (Čitin Rimljanima 8:20, 21.) O Jehova đanđa so ka oven manuša kola ka mangen le hem ka šunen le. Sar olengo Dad hem Stvoritelj, ov omogućinđa lenđe te oven paše oleja hem te oven oslobodime ando greh hem meribe. Sar ćerđa odova?
5. Ked o Jehova dinđa nada e manušenđe? Objasnin. (Postanak 3:15)
5 Čitin Postanak 3:15. O Jehova odmah phenđa so ka uništini e Satana hem dinđa nada e manušenđe. Ov prorekninđa so ka ovel jekh „potomstvo“ kova ka spasini e manušen. O glavno potomko ko krajo ka uništini e Satana hem ka cidel sa o problemija kola ćerđa ko Eden (1. Jov. 3:8). Ama, angleder odova, o Beng ka „ranini“ le, avere lafencar ka ćerel te merel. Odova ka anel bari dukh e Jehovase. Ama, ov hine spremno ko odova te šaj o manuša te oven oslobodime ando greh hem ando meribe.
SO O ĆERĐE O MANUŠA KO PURANO VREME TE ŠAJ TE UGODINEN E JEHOVASE?
6. So o Avelj, o Noje hem avera verna sluge ćerđe te šaj te oven paše e Jehovaja?
6 O Jehova hari pohari mothovđa sar o nesavršena manuša šaj te oven paše oleja. O Avelj, e Adameso hem e Evako dujto ćhavo, hine prvo manuš kova mothovđa vera ko Jehova pali pobuna ko Eden. Ov manglja e Jehova hem manglja te ovel paše oleja. O Avelj hine pastiri hem odolese lelja jekhe bakre hem dinđa le sar žrtva. O Jehova „hine zadovoljno e Aveljeja hem odoleja so dinđa sar žrtva“ (Post. 4:4). Olese hine ugodna hem o žrtve ando avera manuša kola manglje le hem verujinđe lese – sar soj tano o Noje (Post. 8:20, 21). Odoleja so prihvatinđa odola žrtve, o Jehova mothovđa so o nesavršena manuša šaj te ugodinen lese hem te oven olese amala. b
7. So sikljovaja odolestar so o Avraham hine spremno te žrtvujini pe ćhave?
7 O Avraham hine le bari vera. O Jehova phenđa lese te ćerel diso but pharo – te del pe ćhave, e Isake, sar žrtva. Odova na hine hić lokho. Ama, ov hine spremno te ćerel odova. Ked o Avraham valjanđa te del pe ćhave sar žrtva, o Devel ćhinavđa le. Akava primer mothovđa so o Jehova ka ćerel. Ov ka ovel spremno te del pe mangle Ćhave sar žrtva sose but mangela e manušen (Post. 22:1-18).
8. So mothovđe o žrtve kola o Izraelcija valjanđe te den? (Levitska 4:27-29; 17:11)
8 Ked dinđa o Zakon, o Jehova phenđa e Izraelcenđe te den životinjska žrtve te šaj te oven oprostime olenge grehija. (Čitin Levitska 4:27-29; 17:11.) Odola žrtve mothovđe so o Jehova ka del jekh pobari žrtva koja potpuno ka oslobodini e manušen ando greh. Ov phenđa pe prorokonenđe te pisinen ando obećimo potomstvo. On objasninđe so e Devleso Ćhavo ka patini hem ka merel. Ov ka ovel žrtvujimo sar bakro (Is. 53:1-12). Zamislin, o Jehova obećinđa so ka del pe mangle Ćhave sar žrtva te šaj te oslobodini sa e manušen – pa hem tut –ando greh hem meribe!
SO O ISUS ĆERĐA TE ŠAJ TE OSLOBODINI E MANUŠEN?
9. So o Jovan Krstitelj phenđa ando Isus? (Jevrejima 9:22; 10:1-4, 12)
9 Ko 29. berš ki n. e., o Jovan Krstitelj dikhlja e Isuse ando Nazaret hem phenđa: „Aće e Devleso Bakro kova cidela o greh ando sveto!“ (Jov. 1:29). Akala lafija mothovđe so o Isus tano o obećimo „potomstvo“. Ov ka del po životi sar žrtva. Konačno reslja o „potomstvo“ kova ka oslobodini e manušen ando greh. (Čitin Jevrejima 9:22; 10:1-4, 12.)
10. Sar o Isus mothovđa so alo te vićini „okolen soj tane grešna“?
10 O Isus posebno pažnja obratinđa upro manuša kola osetinđe pe but lošno sebepi o greh hem vićinđa len te oven olese sledbenikija. Ov đanđa so o glavno razlog sose o manuša patinena tano o greh. Odolese, đelo ko manuša kola hine penđarutne sar grešnikija. Ov koristinđa jekh poređenje hem phenđa: „Na valjani doktori e saste manušenđe, nego e nabormenđe.“ Pana phenđa: „Me na aljum te vićinav e pravedna manušen, nego okolen soj tane grešna“ (Mat. 9:12, 13). Odova o Isus hem ćerđa. Ked jekh romni thovđa lese pre pe asvencar, ov ljubazno vaćerđa olaja hem oprostinđa olake grehija (Luka 7:37-50). Isto ađahar, ov sikavđa e Samarićanka ando ćaćipe iako đanđa so o manuš koleja živini nane lako rom (Jov. 4:7, 17-19, 25, 26). O Devel čak dinđa le moć te uništini i najbari posledica ando greh – o meribe. Odova jasno dićhilo ked uskrsninđa disave manušen (Mat. 11:5).
11. Sose o grešnikija manglje e Isuse?
11 Amen šaj te haljova sose o manuša kola ćerđe lošna buća osetinđe pe šukar uzo Isus. Ov haljilo sar on osetinđe pe hem uvek hine ljubazno olencar. On na darandilje te vaćeren oleja (Luka 15:1, 2). O Isus pohvalinđa hem nagradinđa okolen so mothovđe vera koro leste (Luka 19:1-10). Isto ađahar, hine milosrdno sar po Dad (Jov. 14:9). Ko pe lafija hem ko pe delija mothovđa so oleso milosrdno Dad mangela e manušen hem mangela te pomožini len. O Isus pomožinđa e nesavršeno manušenđe te ovel len želja te meninen pe hem te sledinen le (Luka 5:27, 28).
12. So o Isus phenđa ando po meribe?
12 O Isus đanđa so valjani te del po životi sar žrtva amenđe. But putija, ov phenđa pe učenikonenđe so ka ovel izdajimo hem kovimo ko stubo (Mat. 17:22; 20:18, 19). Ov đanđa so olesi žrtva ka cidel o greh ando sveto, sar so o Jovan objavinđa hem o prorokija prorekninđe. Isto ađahar, phenđa so palo odova so ka merel, ov ka privucini nakro peste „sa o vrste ando manuša“ (Jov. 12:32). O grešna manuša šaj te oven paše e Jehovaja ako prihvatinena e Isuse sar pe Gospode hem đana palo olese korakija. Sebepi odova, šaj te oven „oslobodime ando greh“ (Rimlj. 6:14, 18, 22; Jov. 8:32). Odolese, o Isus hine hrabro hem odlučno te patini hem te merel amenđe (Jov. 10:17, 18).
13. Sar o Isus mulo hem so odova sikavi amen ando Jehova? (Dikh i slika.)
13 E Isuse izdajinđa oleso paše amal. Palo odova, o dušmanija astarđe le, vređinđe le hem lažno optužinđe le. On osudinđe le ko meribe hem palo odova but maltretirinđe le. Ko krajo, o vojnikija kovinđe le ko stubo. O Isus verno istrajinđa ko odola bare dukha. Ama, e Jehovase hine pana popharo đi dikhlja le sar patini. Iako o Jehova hine le moć sa odova te ćhinavi, ov na ćerđa odova. Sose dozvolinđa oleso manglo Ćhavo te patini hem te merel ko asavko način? Odolese so mangela amen. O Isus phenđa: „O Devel odobor manglja o sveto so dinđa pe jedinobijande Ćhave, te na ovel uništimo nijekh kova mothovi vera ano leste, nego te ovel le večno životi“ (Jov. 3:16).
O Jehova but patinđa đi dikhlja pe Ćhave sar merela te šaj amen te ova oslobodime ando greh hem ando meribe (Dikh o 13. odlomko)
14. Ko so uverini tut e Isusesi žrtva?
14 E Isusesi žrtva tani najbaro dokaz so o Jehova mangela e Adamese hem e Evake potomkonen. Odova tano dokaz kobor o Jehova mangela tut. Ov žrtvujinđa pe mangle Ćhave hem hine spremno te patini te šaj te spasini tut ando greh hem meribe (1. Jov. 4:9, 10). Ov mangela te pomožini amen te borina amen protiv o greh hem te pobedina.
15. So valjani te ćera te šaj te pomožini amenđe e Isusesi otkupno žrtva?
15 E Devleso poklon, i žrtva ando oleso jedinobijando Ćhavo, omogućini amenđe te oven amare grehija oprostime. Ama, te šaj o Devel te oprostini amenđe valjani diso te ćera. Soj tano odova? O Jovan Krstitelj hem o Isus Hrist dinđe amen odgovor: „Pokajinen tumen, sose o nebesko Kraljevstvo alo paše“ (Mat. 3:1, 2; 4:17). Odolese so hijam grešna, amen valjani te pokajina amen te šaj hem ponodri te služina e Jehovase hem te ova paše oleja. Ama, so značini te pokajina amen hem sar odova pomožini amenđe te ugodina e Jehovase, iako hijam grešna? Ko aver članko ka vaćera odolestar.
ĐILI 18 Zahvalna asi otkupnina
a OBJASNIME LAFIJA: Ki Biblija o lafi „greh“ šaj te odnosini pe ko delija kola o Jehova phenela te na ćera sose tane pogrešna ili ko odova so na ćeraja, a ov phenela so valjani ćera. Ama, o lafi „greh“ šaj te odnosini pe hem ki nesavršenost koja nasledinđam ando Adam. O nasledimo greh tano razlog sose amen meraja.
b O Jehova prihvatinđa sa o žrtve ando akala verna manuša odolese so đanđa so ki budućnost, o Isus Hrist ka del po životi sar žrtva te šaj te spasini sa e manušen ando greh hem meribe (Rimlj. 3:25).
