O apostol Pavle e hrišćanenđe ko Solun pisinđa: „Ako neko na šunela odova so phenđam ko akava lil, obeležinen le“ (2. Sol. 3:14). Angleder, phenđam so akija smernica tani aso starešine. On angleder ićerđe govor ando upozorenje ki skupština ako neko na manglja te prihvatini o savet andi Biblija. Palo odova, o objaviteljija na valjanđe više privatno te družinen pe okoleja so hine obeležimo.

Ama, akana alo đi i promena. Akana haljovaja so e Pavleso savet odnosini pe upro odova so svako objavitelj kokri pese odlučini so ka ćerel ko disave određena okolnostija. Odolese, o starešine na valjani više te ićeren govor ando upozorenje. Sose alo đi akija promena? Akana ka dikha sostar o Pavle vaćerđa ked dinđa akava savet.

O Pavle zapazinđa so disave ki skupština neuredno živinena. Ov dinđa len savet ando Devleso Lafi, ama on na šunđe le. Ked angleder posetinđa len, ov phenđa lenđe: „Ako neko na mangela te ćerel buti, tegani na valjani ni te hal.“ Ama, ipak disave hem ponodri na manglje te ćeren buti te šaj te izdržinen kokri pes, iako hine sposobna aso odova. Isto ađahar, mešinđe pe ko averenge privatna buća. Sar avera hrišćanija valjanđe te ponašinen pe premalo asavke? (2. Sol. 3:6, 10-12).

O Pavle phenđa: „Obeležinen le.“ Ki grčko ćhib akava lafi prenosini i misao ando odova te prepoznajini pe asavki osoba hem te ovel pe svesno ando olako lošno uticaj. O Pavle odija smernica dinđa celona skupštinaće, a na samo e starešinenđe (2. Sol. 1:1; 3:6). Odolese, svako ko bi primetini so jekh phral ja phen na šunela disavo savet ando Devleso Lafi, avera na družinđe pe više odola osobaja.

Da li odova značinđa so premali odija osoba valjanđe avera te ponašinen pe sar premalo nekaste ko nane više deo andi skupština? Na, sose o Pavle pana phenđa: „Hem ponodri savetujinen le sar phrale.“ Odolese, o phralja hem o phenja valjanđe hem ponodri te vaćeren odola osobaja ko sastankija hem te đan ki služba, ama na hem privatno te družinen pe olaja. Sose? O Pavle phenđa: „Te šaj te lađal.“ I svrha ando asavko obeležavanje hine o manuš te lađal sebepi po ponašanje hem te menini pe (2. Sol. 3:14, 15).

Sar šaj avdije te đana da li nekas te obeležina? Najangleder, valjani te ova sigurna so i osoba ćaće neuredno živini, sar so o Pavle phenđa. Ov na vaćerđa ando manuša kola ćerena o buća kola amari savest amenđe na dozvolini, a odola buća nane protiv e biblijake načelija. Isto ađahar, na vaćerđa ando okola kola tane jednostavno averćhane amendar ja ando okola kola povredinđe amen. O Pavle mislinđa upro okola kola dobinđe savet ando Devleso Lafi hem namerno na šunena le.

Ako primetinaja so jekh phral ja phen hem ponodri na ićeri pe ko savet kova dobinđa, a amen kokri ka odlučina više te na družina amen odola osobaja. Odolese so akija tani lično odluka, na valjani odolestar te vaćera averencar već samo amare ćherutnencar. Amen pana ka vaćera odola osobaja ko sastankija hem ka đa ki služba olaja. Ked oj ka menini pe, tegani šaj hem privatno te družina amen olaja.