Pana ando vreme ked o Devel stvorinđa e manušen, ov vaćerđa e manušencar prekalo anđelija hem prorokija. Palo odova, ov odlučinđa olesi poruka hem olese obećanja te oven pisime. O Devel obećini so šaj te ova bahtale ki budućnost. Tegani, kaj šaj te arakha e Devlese obećanja avdije?

Ko e Devleso Lafi šaj te arakha olesi poruka (2. Timoteju 3:16). Sar o Devel koristinđa e prorokonen te pisinen olesi poruka? (2. Petrova 1:21) O Devel ćhivđa pe mislija ki olengi godi hem on pisinđe len ko lil. Šaj te koristina jekh primer te objasnina odova. Ked jekh direktori koristini pe sekretare te pisini poruka ko oleso anav, amen đanaja so odija poruka tani ando direktori. Isto ađahar, iako o Devel koristinđa e manušen te pisinen olesi poruka, šaj te phena so olestar avela akija knjiga.

E Devlesi poruka tani odobor važno so ov mangela sa o manuša te čitinen la hem te haljoven la. Avdije olesi „večno šukar vest“ šaj lokho te šunen o manuša kotar svako nacija, svako pleme hem svako ćhib (Otkrivenje 14:6). Uzi e Devlesi pomoć, olesi poruka šaj te čitini pe celo ili disave olake delovija ko pobuter ando 3 000 ćhibja. Nane aver knjiga ko sveto koja tani prevedimi ko odobor ćhibja.