Ko okova članko dikhljam so o Devel pana hari ka uništini sa e lošno manušen ki phuv hem ka rešini sa o problemija. Amen šaj te ova uverime so odova ćaće ka ovel. Sose? Odolese so ko e Devleso Lafi, ki Biblija, isi akava obećanje:

„A o sveto nakhela“ (1. JOVANOVA 2:17).

Isto ađahar, amen šaj te ova sigurna so ka oven okola kola ka preživinen o kraj sose ko dujto deo ando akava stih pisini:

„A okova kova ćerela e Devlesi volja aćhola zauvek.“

Odolese, ako mangaja te preživina o krajo amen mora te ćera e Devlesi volja. Ama, te šaj te ćera e Devlesi volja, najangleder mora te penđara koj tano o Devel.

O Isus phenđa: „A te šaj te dobinen večno životi, valjani šukar te penđaren tut, e jedino ćaćutne Devle“ (Jovan 17:3). Te šaj te preživina o krajo hem te živina večno amen valjani te „penđara e Devle“. Odova značini so nane dovoljno samo te verujina so isi Devel hem te đana samo nekobor buća olestar. Amen valjani te ova amala oleja. Te šaj te ova šukar amala nekasa valjani te arakha vreme olese. Isto tano hem e Devleja. Hajde te dikha sar disave ćaćipa kola sikljovaja andi Biblija šaj te pomožinen amen te ova e Devlese amala hem te aćhova paše oleja.

Amen redovno haja maro te šaj te aćhova đivde. O Isus phenđa: „O manuš na živini samo ando maro, nego hem ando svako lafi kova ikljola ando e Jehovaso muj“ (Matej 4:4).

Avdije, amen šaj te čitina e Jehovase lafija ki Biblija. Đi proučineja e Devleso Lafi tu ka sikljove so o Devel ćerđa ki prošlost, so ćerela akana hem so ka ćerel ki budućnost.

So šaj te ćere ako mangeja te šune e Devle, ama tano tuće pharo te ćhinave te ćere o buća kola tane lošna anglo olese jaćha? Tegani, ćaće šaj te pomožini tut ako šukar penđareja e Devle.

Razmislin andi jekh romni koja vićini pe Sakura, koja živinđa nemoralno. Ked počminđa te proučini i Biblija oj sikljilji e Devlesi zapovest: „Našen ando blud“ (1. Korinćanima 6:18). I Sakura molinđa pe e Devlese asi snaga, odolese šaj hine te aćhavi sa o lošna buća kola ćerđa. Ama, oj pana isi la iskušenja hem odolese borini pe. Oj phenela: „Ako avena maje nemoralna mislija ki godi me iskreno vaćerava e Jehovaja ki molitva odolese so đanava so našti kokri te borinav man. I molitva isi la bari snaga sose pomožini maje te ovav paše e Jehovaja.“ Sar i Sakura hem milionija avera manuša penđarena e Devle. Ov dela len snaga koja valjani lenđe te šaj te ćeren promene ko po životi hem te živinen premali olesi volja (Filipljanima 4:13).

So pobuter penđareja e Devle, tegani ov ka ovel sa popaše tuvaja hem ka ove šukar amal oleja (Galatima 4:9; Psalam 25:14). Sebepi odova, tu šaj te ove ko e Devleso nevo sveto. Ama, sar ka izgledini odova nevo sveto? Ko aver članko ka dikha odova.