Bijandiljum ko 1927. berš ki jekh tikni diz uzo Čikago, ko Ilinois. Mo dad hem mi daj hine len panđ ćhave – i Džeta, o Don, me, o Karl hem i Džoj. Sare anđam odluka te služina e Jehovase celona dušaja. I Džeta hine ko dujto razred ki škola Galad ko 1943. berš. O Don hine vićimo ko Betel ko Bruklin ko 1944, o Karl ko 1947. hem i Džoj ko 1951. berš. Olengo šukar primer, sar hem o primer ando me roditeljija ohrabrinđa man hem te ćerav pana pobuter buća e Jehovase.

Mo dad hem mi daj čitinđe i Biblija hem manglje e Devle, a odova sikavđe hem amen. Ama, mo dad palo odova so irinđa pe ando Prvo svetsko rat našalđa po poštovanje premali crkva. Mi daj hine but zahvalno e Devlese so mo dad irinđa pe đivdo hem odolese phenđa lese: „Karl, hajde te đa ki crkva.“ Ov phenđa: „Me ka legarav tut, ama na ka khuvav.“ Oj pućlja le: „Sose na mangeja?“ Ov phenđa laće: „Đi trajinđa o maribe, o sveštenikija kotar isto religija blagoslovinđe e vojnikonen kola borinđe pe jekh protiv jekheste. Da li o Devel pomožini solduj strane?“

Jekh dive, đi mi daj hine ki crkva, duj Svedokija alje koro amende. On dinđe me dadese duj tomija andi knjiga Svetlo ko kola objasninđa pe i knjiga Otkrivenje. Me dade zaniminđa odova hem lelja o knjige. Ked mi daj dikhlja odola knjige hem oj počminđa te čitini len. Palo odova, jekh dive ko lokalna novine pisinđa so ko mangela šaj te avel te proučini i Biblija, akala knjige šaj te pomožinen le ko odova. Oj odlučinđa te đal. Ked reslja uduri, jekh phuri romni phravđa laće o udara. Mi daj hine la odola knjige ko vasta hem pućlja odola phurja: „Da li akate proučinena pe akala knjige?“ I romni phenđa: „Ja, mi ćhaj, šaj te khuve.“ Aver kurko mi daj legarđa hem amen. Palo odova, svako kurko đeljam uduri.

Ko jekh sastanko, o voditelj zamolinđa man te čitinav o Psalam 114:15, kuri pisini so okola kola služinena e Jehovase tane bahtale. But sviđinđa pe maje odova stih. Ama, hem o stih andi 1. Timoteju 1:11, kova phenela  so o Jehova tano „bahtalo Devel“ hem Efešanima 5:1 kuri hijam podstaknime te oponašina amare Devle. Haljiljum so valjani te ovav bahtalo so šaj te služinav e Devlese hem so valjani te ovav zahvalno so isi man čast te ćerav odova. Akala duj buća trudinđum man te ćerav celo mo životi.

Najpaše skupština hine 32 kilometrija dur, ko Čikago. Ama, amen đeljam ko sastankija hem ađahar pana pošukar haljiljum e Devleso Lafi. Setinava man jekh puti o phral dinđa e Džetaće te komentarišini. Đi šunđum la so vaćeri ano mande mislinđum: „Pa, hem me đanđum odova. Šaj hine hem me te vazdav mo vas.“ Ađahar počminđum pošukar te pripreminav man aso sastankija hem te komentarišinav. Soj tano považno, sar me duj phralja hem me duj phenja, hem me uljum popaše e Jehovaja. Krstinđum man ko 1941. berš.

Pana maje ki godi o kongres kova hine ko 1942. berš, ko Klivlend, ko Ohajo. Amari porodica hem but avera phralja hem phenja sućam ko šatorija uzo than kaj hine o kongres. A disave phralja hem phenja ko prekalo 50 dizja ki Amerika šunđe o program prekalo telefoni. Tegani hine o Dujto svetsko rat hem e Jehovase svedokija hine progonime. Raćate dikhljum sar nekobor grupe ando phralja parkirinena pe vorda ađahar so o svetlija hine usmerime premalo izlaz ando kamp. Dogovorinđe pe ko svako vorda te ovel po jekh phral kova ka arakhi amen celo rat. Ako bi ovela disavo problemi, o phralja kola hine ko vorda valjanđe te mukhen o svetlija anglal te korjaćeren okolen kola napadinena amen hem te trubinen ki sirena. Avera phralja bi avena te pomožinen. Ano mande mislinđum: „E Jehovaso narodo ćaće tano spremno aso sa!“ Ništa lošno na ulo. Odolese so osetinđum man sigurno šaj hine te sovav.

Beršencar palo odova, ked setinava man hine ko akava kongres, haljiljum so mi daj niked na brininđa pe niti darandilji. Oj hine la poverenje ko Jehova hem ki olesi organizacija. Niked na ka bistrav olako šukar primer.

Hari angleder odova kongres, mi daj ulji stalno pioniri. Odolese, pažljivo šunđa o govorija kola vaćerđe andi pionirsko služba. Ked irinđam amen ćhere, oj phenđa: „Mangava hem ponodri te služinav sar pioniri, ama valjani maje tumari pomoć ko ćher.“ Amen mangljam te pomožina laće. Odolese svako amendar morandilo angleder o doručak te čistini jekh ja duj sobe. Ked bi đaja ki škola, mi daj bi najangleder avela te dikhel sar sredinđam hem palo odova bi đala ki služba. Hine la but buti, ama uvek brininđa pe amendar. Ked avaja hine ćhere te ha maro ja ked bi avaja andi škola, uvek hine othe amenđe. Disavo puti pali škola, amen đeljam olaja ki služba. Odova pomožinđa man te haljovav so značini te ove pioniri.

Ked hine man 16 berš, uljum pioniri. Iako mo dad tegani pana na krstinđa pe, ov manglja te đanel sar đala maje. Jekh rat, phenđum lese so iako but trudinava man, pana na arakhljum nekas ko mangela te  proučini. Hari terdiljum hem pućljum le: „Da li bi mangeja te proučine mancar?“ Ov hari razmislinđa hem phenđa maje: „Sose na.“ Ađahar mo dad ulo mo prvo kurs. Hine maje bari čast te proučinav oleja.

Proučinđam i knjiga „Istina će vas osloboditi“. Ama, palo disavo vreme haljiljum so mo dad pomožini man pošukar te haljovav e Devleso Lafi hem pošukar te sikavav averen. Na primer, jekh rat palo odova so čitinđam o odlomko, ov phenđa: „Dikhava so pisini ki knjiga. Ama, sar đaneja so odova so pisini akate tano tačno?“ Na hijum le pripremimo aso odova hem odolese phenđum lese so aver puti ka vaćera odolestar. Arakhljum nekobor stihija kola podupirinena odova sostar vaćerđam. Palo odova, sikljiljum sar te istražinav te šaj pošukar te pripreminav man aso kurs. Odova pomožinđa maje pana pošukar te haljovav e Devleso Lafi, ama hem te pomožinav me dadese. Ov ićerđa pe ko odova so sikljilo hem krstinđa pe ko 1952. berš.

Ked hine man 17. berš selinđum man. Tegani i Džeta ulji misionarka, a a o Don đelo ko Betel. Dikhljum so solduj mangena pe zadatkija hem odova but ohrabrinđa man. Odolese, predajinđum i molba aso Betel hem asi škola Galad hem sa odova mukhljum ko Jehovase vasta. Palo odova, ko 1946. berš hijum le vićimo te đav ko Betel.

Sar đelje o berša, hine man razna zadatkija ko Betel hem odolese šaj hine te sikljovav but buća. Ko Betel služinđum 75 berš hem othe sikljiljum sar te pomožinav ko odova te štampinen pe o knjige hem sikljiljum te ćerav buti sar računovođa. Sikljiljum hem sar te ćinav o buća kola valjanđe aso Betel hem sar te bićhalav disave važna buća ko avera thana. Ama, najvažna buća sikljiljum ko jutarnjo program hem ko biblijake predavanja.

Isto ađahar, but buća sikljiljum ando mo tikneder phral o Karl, kova alo ko Betel ko 1947. berš. Ov đanđa but šukar te istražini hem hine šukar učitelj. Jekh puti pućljum le te pomožini man, sose valjanđum te ićerav jekh govor. Phenđum lese so arakhljum but materijali aso mo govor, ama na đanava sar te koristinav le. Ov samo pućlja man: „Andi koja tema valjani te vaćere?“ Odmah haljiljum so manglja te phenel maje. Valjanđum te koristinav samo o materijali kova ka pomožini man te objasninav i tema ando mo govor hem te na ćhivav pana buća. Niked na ka bistrav odova so sikavđa man.

 Te šaj neko te ovel bahtalo ko Betel, valjani te đal redovno ki služba, sose tegani šaj te oven le šukar iskustvija. Niked na ka bistrav so ulo ked jekh rat propovedinđam ko Bronks, ko Njujork. Jekh phral hem me khuvđam ko jekha romnjake udara koja angleder već lelja o časopisija Stražarsko kula hem Probudite se! Palo odova so phenđam amare anava, phenđam laće: „Avdije mangaja te mothova e manušenđe disave šuže buća andi Biblija.“ Oj phenđa: „Ako vaćerena andi Biblija, šaj te khuven.“ Čitinđam laće nekobor stihija kola vaćera ando Devleso Kraljevstvo hem ando nevo sveto. Odova but sviđinđa pe laće. Ked aver puti aljam koro late, oj vićinđa hem pe familija te šunen amen. Oj hem olake ćherutne kasnije verno služinđe e Jehovase.

Odlučinđum te ženinav man. Oko 10 berš palo odova arakhljum jekha phenja savi rodinđum. So pomožinđa maje te arakhav maje šukar romnja? Molinđum man e Jehovase hem razmislinđum ando odova so mangava te ćerav zajedno olaja palo venčanje.

Ko kongres, ko 1953. berš kova hine ićerdo ko Jenki stadion, upoznajinđum e phenja Meri Anjol. Oj hem i Džeta hine ko dujto razred ki škola Galad hem zajedno služinđe ko isto than sar misionarija. I Meri hine but oduševimi đi vaćerđa maje andi služba ko Karibi hem ando kursija kola hine la sa akala berša. Sar pošukar penđarđam amen, haljiljam so isi amen ista ciljija. Zamangljam jekh jekhe hem venčinđam amen ko april ko 1955. berš. But putija dikhljum so i Meri hine maje poklon ando Jehova hem primer kova šaj te oponašinav. Hine bahtali savo god zadatko te dobini. But hine bućarni, kotar vilo brininđa pe ando avera hem uvek hine laće o Kraljevstvo ko prvo than (Mat. 6:33). Trin berš služinđam ki pokrajinsko služba. Ko 1958. berš hijam le vićime te služina ko Betel.

Andi Meri sikljiljum but buća. Na primer, ked leljam amen, odlučinđam zajedno te čitina i Biblija hem odova svako puti po 15 stihija. Palo odova so čitinđam jekh deo, vaćerđam ando odova hem razmislinđam sar te primenina len. I Meri but putija vaćerđa maje ando odova so sikljilji ko Galad ja ki misionarsko služba. Odova so sikljiljum olatar pomožinđa maje te ovav pošukar govorniko hem te đanav sar te ohrabrinav e phenjen (Posl. 25:11).

Ko 2013. berš mi mangli Meri muli. Jedva ađićerava te dikhav la ko nevo sveto! Ama, đi na avela odova vreme, odlučno hijum hem ponodri te mukhav e Jehova te sikavi man hem celone vileja te ovel man poverenje upro leste (Posl. 3:5, 6). Ked razmislinava ando odova so e Jehovaso narodo ka ćerel ko raj, odova utešini man hem ćerela man te ovav bahtalo. Tegani ka sikljova neve buća ando amaro Veličanstveno Učitelj! Nane man lafija kolencar šaj te zahvalinav man lese aso sa odova so đi akana sikavđa man hem aso oleso bizaslužimo šukaripe kova mothovđa maje.