1. So disave mislinena ando večno životi?

 BUT manuša pazinena so hana hem redovno vežbinena te šaj te arakhen po sastipe. Ipak na očekujinena te živinen večno sose verovatno mislinena so odova nane moguće. Ama, o Isus phenđa so o manuša šaj te živinen večno sar so pisini ko Jovan 3:16 hem 5:24.

2. So ando večno životi pisini ko Jovan 6. poglavlje? (Jovan 6:39, 40)

² Jekh dive o Isus prekalo jekh čudo parvarđa nekobor hiljade manušen. a Odova ćaće hine neverovatno, ama odova so o Isus phenđa tajsato dive hine diso pana pošukar. O narodo đelo palo leste ko Kapernaum, ki galilejsko strana ando more. Uduri phenđa lenđe so o manuša kola mulje šaj te ušten hem te živinen večno. (Čitin Jovan 6:39, 40.) Zamislin so odova tuće značini. Razmislin ando te amala ja te mangle kola mulje. E Isusese lafija uverinena amen so but okolendar kola mulje ka ušten hem šaj zajedno te uživina ko raj. Ama, odova so o Isus pana phenđa ko Jovan 6. poglavlje hine butenđe pharo te haljon. So ov phenđa?

3. Premalo Jovan 6:51, so o Isus phenđa pestar?

³ Palo odova so prekalo jekh čudo dinđa len maro, o  manuša razmislinđe andi mana koja o Jehova dinđa e Izraelcenđe ked hine ki pustinja. Ki Biblija phenela pe soj tani i mana „maro kotar nebo“ (Ps. 105:40; Jov. 6:31). O Isus akana pomini disave buća andi mana te šaj te sikavi len jekh but važno buti. Iako i mana hine dindi prekalo čudo, okola kola halje la ko krajo ipak mulje (Jov. 6:49). Ama, o Isus akana pese phenela soj tano „o pravo maro kotar nebo“, „e Devleso maro“ hem „o maro ando životi“ (Jov. 6:32, 33, 35). Ov vaćerđa so isi bari razlika maškar oleste hem i mana. Ov phenđa: „Me hijum o đivdo maro, kova huljilo kotar nebo. Ako neko hala ando odova maro, ka živini večno.“ (Čitin Jovan 6:51.) Odola lafija buninđe e Jevrejen. On naštine te haljon sar šaj o Isus te phenel soj tano ov o „maro“ kova alo kotar nebo hem so odova maro tano pošukar andi mana koja o Devel dinđa olenge phurenđe. Palo odova, phenđa lenđe: „Odova maro tano mo telo.“ Ko so mislinđa? Amen bi valjani te haljova odova sose o odgovor mothovi so amen hem amare mangle šaj te živina večno. Hajde te dikha ko so o Isus mislinđa.

O ĐIVDO MARO HEM OLESO TELO

4. Sose disave hine šokirime ked šunđe so o Isus phenđa?

⁴ Disave hine šokirime ked šunđe so o Isus phenela so valjani te han oleso telo kova ka del te šaj o sveto te živini. Da li mislinđe so o Isus ka del len po doslovno telo te han? (Jov. 6:52). Ama, palo odova o Isus phenđa diso so pana pobuter šokirinđa len. Ov phenđa lenđe: „Ako na hana o telo ando manušikano Ćhavo hem na pijena oleso rat, nane tumen životi ano tumende“ (Jov. 6:53).

5. Sose šaj te ova sigurna so o Isus na mislinđa so o manuša ćaće valjani te pijen oleso doslovno rat?

⁵ Ked o Noje živinđa, o Devel zabraninđa e manušenđe te han rat (Post. 9:3, 4). Kasnije, odova dinđa te ovel pisimo ko Mojsijeso zakon. Svako ko halja rat valjanđa „te ovel mudardo“ (Lev. 7:27). O Isus sikavđa e Jevrejen te poštujinen sa o zakonija kola o Devel dinđa len (Mat. 5:17-19). Odolese, ov niked na bi phenela e Jevrejenđe te han oleso doslovno telo hem te pijen oleso doslovno rat. Ked vaćerđa akala lafija o Isus manglja te sikavi e narodo sar te dobini o „večno životi“ (Jov. 6:54).

6. Sar valjani te haljova e Isusese lafija ando Jovan 6:53?

⁶ So o Isus manglja odoleja te phenel? Jasno tano so o Isus vaćerđa ko simbolično smisao, isto sar ked vaćerđa e romnjaja andi Samarija. Ov phenđa laće: „Ko ka pijel o pani kova me ka dav le, niked na ka trošaljol, nego ov koro leste ka ovel izvor ando pani kova anela o večno životi“ (Jov. 4:7, 14). b O Isus na manglja te phenel laće so oj ka ovel la večno životi ako pijela odova doslovno pani. Isto ađahar, ov na manglja te phenel so o manuša kolenđe vaćerđa ko Kapernaum ka živinen večno ako hana oleso doslovno telo hem pijena oleso doslovno rat.

 DA LI TANE AKALA E ISUSESE LAFIJA POVEZIME E GOSPODESE VEČERAJA?

7. So disave phenena ando odova so o Isus vaćerđa ko Jovan 6:53?

⁷ Disave phenena so ko Jovan 6:53 o Isus u stvari objasninđa so o manuša valjani te ćeren ki Gospodesi večera, sose tegani koristinđa slična lafija (Mat. 26:26-28). On phenena so svako ko avela ki Gospodesi večera valjani te lel o maro hem o vino kola đana kotar vas ko vas. Da li tano odova tačno? But tano važno te haljova odova, sose svako berš ko celo sveto milionija manuša avena ko odova događaj. Akana ka dikha nekobor buća kola tane averćhane maškaro odova so pisini ko Jovan 6:53 hem maškaro odova so o Isus phenđa ki Gospodesi večera.

8. Soj tano averćhane maškar akala duj događaja? (Dikh i slika.)

⁸ Akana ka dikha duj buća kola tane averćhane. Prvo, ked hem kaj o Isus vaćerđa o lafija kola tane ko Jovan 6:53-56? Odola lafija phenđa e Jevrejenđe ki Galileja ko 32. berš ki nevi era. Odova hine jekh berš angleder te uspostavini e Gospodesi večera ko Jerusalim. Dujto, kase vaćerđa akala lafija? E manušenđe kolen pobuter zaniminđa sar te dobinen hrana ando Isus nego te sikljon ando Jehova hem oleso Kraljevstvo  (Jov. 6:26). U stvari, ked o Isus phenđa diso so hine lenđe pharo te haljon, on sigate našalđe pi vera koro leste. Čak hem disave ando olese učenikija ćhinavđe te sledinen le (Jov. 6:14, 36, 42, 60, 64, 66). Odola manuša hine but averćhane ando Isusese 11 apostolija kola berš dive palo odova hine oleja ki Gospodesi večera. Tegani, olese 11 verna apostolija hine oleja, iako na haljilje sa odova so o Isus sikavđa. Ama, on na hine sar okola manuša andi Galileja. On hine sigurna so o Isus hine e Devleso Ćhavo kova alo kotar nebo (Mat. 16:16). Odolese, ov pohvalinđa len: „Tumen aćhiljen mancar ko me kušnje“ (Luka 22:28). Akala duj buća kola razmotrinđam već mothovena so ko Jovan 6:53 o Isus na manglja te phenel so ka ovel ki Gospodesi večera. Ama, isi pana razlike.

SO E ISUSESE LAFIJA ZNAČINENA TUĆE?

9. Upro kaste odnosinena pe e Isusese lafija kola phenđa ki Gospodesi večera?

⁹ Ki Gospodesi večera o Isus dinđa pe apostolenđe o maro bizo kvasco hem phenđa lenđe so odova predstavini oleso telo. Palo odova dinđa len o vino hem phenđa so odova predstavini o „rat ando savez“ (Mar. 14:22-25; Luka 22:20; 1. Kor. 11:24). Odova so phenđa ando savez hine but važno. Ov vićinđa le „nevo savez“ hem samo okola kola ka vladinen oleja ko Kraljevstvo tane deo ando odova savez, a na sa o manuša (Jevr. 8:6, 10; 9:15). Tegani, o apostolija na haljilje odova. Ama pana hari, on valjanđe oven pomazime sveto duhoja hem te oven deo ando nevo savez sebepi kova šaj te oven e Isuseja ko nebo (Jov. 14:2, 3).

10. Koja tani pana jekh razlika maškar odova so o Isus phenđa ki Gospodesi večera hem odova so phenđa ki Galileja? (Dikh i slika.)

¹⁰ Odova so o Isus phenđa ki Gospodesi večera odnosini pe upro jekh tikni grupa, o „tikno stado“. Olese verna apostolija hine prva kola hine deo andi odija grupa (Luka 12:32). Odija rat o Isus phenđa lenđe te han o maro hem te pijen o vino. Avera kola kasnije ka oven deo andi odija grupa isto ka valjani te han o maro hem te pijen o vino ki Gospodesi večera. On ka vladinen oleja ko nebo. Akija tani pana jekh razlika maškar i Gospodesi večera hem odova so phenđa ki Galileja. Odova so phenđa ki Gospodesi večera odnosini pe samo upro odija tikni grupa. A odova so phenđa ki Galileja odnosini pe upro but pobaro broj ando manuša.

11. Sar đanaja so o Isus ki Galileja na obratinđa pe jekha tiknja grupaće ando manuša?

¹¹ But manuša kolenđe o Isus vaćerđa ki Galileja samo manglje lestar maro. Ama, o Isus manglja te pomožini lenđe te haljon so isi diso but považno ando maro. Odova tano diso so šaj te del len večno životi. Ov phenđa lenđe so čak hem okola kola mulje šaj palem te ušten hem te živinen večno. Ko Jovan 6. poglavlje na vaćerđa ando blagoslovija kola ka dobini samo jekh tikni grupa ando manuša, sar so kasnije phenđa ki Gospodesi večera. Umesto odova, ki Galileja vaćerđa ando blagoslovija kola šaj te dobinen sa o manuša. U stvari, ov phenđa: „Ako neko hala ando odova maro, ka  živini večno. Odova maro tano mo telo, kova ka dav te šaj o sveto te živini“ (Jov. 6:51).

12. So valjani neko te ćerel te šaj te dobini o večno životi?

¹² Da li o Isus e Jevrejenđe ki Galileja phenđa so odola blagoslovija ka dobinen sa o manuša? Na, nego samo okola kola mothovena vera koro leste. Avdije, but manuša verujinena ko Isus hem phenena soj tano olengo spasitelj (Jov. 6:29). Ama, odova nane dovoljno. Ki Galileja hine but manuša kola ki početka mothovđe vera ko Isus, ama palo odova ćhinavđe te sledinen le. Sose ćerđe odova?

13. So značini neko te ovel e Isuseso učeniko?

¹³ But manuša ki Galileja đelje palo leste sa đi dinđa len odova so valjanđa lenđe. On manglje o Isus te saćari len, te del len maro hem te vaćeri lenđe ando buća kola mangena te šunen. Ama, jasno mothovđa lenđe so ov na alo ki phuv te del len odova so on mangena. Ov alo te sikavi len ando odova so valjani te ćeren te šaj te oven olese sledbenikija. On valjanđe te „aven koro leste“, avere lafencar te šunen le hem te ićeren pe ko odova so sikavđa len (Jov. 5:40; 6:44).

14. So valjani te ćera te šaj te ovel amen korist ando Isuseso telo hem rat?

¹⁴ O Isus sikavđa len so odova so dinđa po telo hem po rat sar žrtva ka omogućini lenđe te živinen večno. On valjanđe te mothoven vera ko odova.  Asavki vera hine but važno aso Jevreja, ama hem avdije (Jov. 6:40). Odolese, odova so o Isus phenđa ko Jovan 6:53 značini so valjani te ovel amen vera ki otkupno žrtva te šaj te dobina o večno životi. Akava blagoslov šaj te dobinen but manuša (Ef. 1:7).

15-16. Kola važna buća sikljovaja ando Jovan 6. poglavlje?

¹⁵ Ko Jovan 6. poglavlje sikljiljam but važna hem ohrabrujuća buća. Dikhljam so o Isus but brinini pe amendar. Đi hine ki Galileja, ov saćarđa e manušen, vaćerđa lenđe ando Devleso Kraljevstvo hem dinđa len maro ked na hine len (Luka 9:11; Jov. 6:2, 11, 12). Soj tano najvažno, sikavđa len soj tano ov o „maro ando životi“ (Jov. 6:35, 48).

¹⁶ Okola soj tane deo ando „avera bakre“ na lena hem na valjani te len o maro hem o vino ki Gospodesi večera (Jov. 10:16). Ama, ko jekh simbolično način, on ipak hana „o maro ando životi“. Odova ćerena ađahar so mothovena vera ki Isusesi otkupno žrtva (Jov. 6:53). Okola kola lena o maro hem o vino mothovena soj tane deo ando nevo savez hem so isi len nada so ka vladinen ko nebesko Kraljevstvo. Ama, bilo te ovel amen nada te živina ko nebo ja ki phuv, o izveštaj ando Jovan 6. poglavlje tano but važno amenđe. Ov sikavi amen kobor tano važno te mothova vera ki otkupno žrtva te šaj te dobina o večno životi.