O apostol Pavle pisinđa e Timotejese, kova služinđa sar starešina: „Zapovedinava tuće anglo Devel, anglo Hrist Isus hem anglo birime anđelija te ićere tut ko odova bizo disave predrasude ili pristrasnost“ (1. Tim. 5:21).

Najangleder te dikha ko nane o „birime anđelija“. Jasno tano so odola anđelija nane deo ando 144 000 pomazanikija. Ked o Pavle pisinđa e Timotejese, o uskrsenje ando pomazanikija pana na počminđa ko nebo. O apostolija hem avera pomazanikija pana na ulje duhovna stvorenja. Odolese, on našti te oven o „birime anđelija“ (1. Kor. 15:50-54; 1. Sol. 4:13-17; 1. Jov. 3:2).

Isto ađahar, o „birime anđelija“ našti te oven ni o anđelija kola hine buntovna ko vreme ando Potop. On đelje ki Bengesi strana hem ulje demonija, e Isusese dušmanija (Post. 6:2; Luka 8:30, 31; 2. Petr. 2:4). Ki budućnost, on ka oven fordime ko bezdan kuri ka oven phanle 1 000 berš hem palo odova ka oven uništime zajedno e Bengeja (Jud. 6; Otkr. 20:1-3, 10).

Odolese, o „birime anđelija“ kolendar o Pavle vaćeri tane sigurno o anđelija ko nebo kola tane verna e Devlese hem e Isusese.

Ko nebo isi nekobor hiljada verna anđelija (Jevr. 12:22, 23). Izgleda so o Jehova na dinđa sarinenđe te ćeren isto zadatko (Otkr. 14:17, 18). Na primer, ov bićhalđa samo jekhe anđele te mudari 185 000 asirsko vojnikonen (2. Kralj. 19:35). But anđelija šaj isi len zadatko te „ćeden ando [Isuseso] Kraljevstvo sa okolen kola averen ćhivena te ćeren greh hem okolen kola ćerena bezakonje“ (Mat. 13:39-41). Disave anđelija šaj dobinđe zadatko te ćeden e pomazanikonen ko nebo (Mat. 24:31). A avera anđelija dobinđe zapovest ando Devel te „[arakhen] amen ko sa [amare] drumija“ (Ps. 91:11; Mat. 18:10; uporedinen e stihonencar ando Matej 4:11 hem Luka 22:43).

O „birime anđelija“ kola pominena pe ki 1. Timoteju 5:21 tane najverovatno o anđelija kolenđe tane dinde posebna odgovornostija povezime e Devlese narodoja. Ko kontekst ando akava stih, o Pavle vaćeri ando odova sar o starešine valjani te ćeren pi služba hem so avera ki skupština valjani te poštujinen len. O starešine valjani te ispuninen pe odgovornostija bizo „predrasude hem pristrasnost“ hem na valjani te anen o odluke ki sig. Sose hine važno te ićeren pe ko akava savet? O Pavle phenđa so on ćerena pi služba „anglo Devel hem anglo Hrist Isus hem anglo birime anđelija“. Odolese, jasno tano so disave anđelenđe tani dindi odgovornost te pomožinen ki skupština. Isto ađahar, on hem štitinena e Devlese slugen, pomožinena len ki služba hem phenena e Jehovase so primetinđe (Mat. 18:10; Otkr. 14:6).