I Meri hem olako rom o Džon, a bešena ko than kuri but manuša ando Filipini alje te ćeren buti. On tane bahtale so šaj te propovedinen lenđe. Đi trajinđa i pandemija kotar koronavirus, i Meri na samo so počminđa but kursija ki phuv kaj živini, već hem ko avera phuvja. Sar ćerđa odova?

I Meri bi pućela e romnjen kolencar proučini: „Da li đanena pana nekas ko bi mangela te proučini i Biblija?“ Ako bi on phenena ja, tegani bi pućela len da li šaj te upoznajinen la olencar. Asavko jednostavno pućibe but putija anđa šukar rezultatija. Sose? Odolese so o manuša kola ceninena odova so sikljona ando Devleso Lafi obično mangena odova te phenen pe porodicaće ja pe amalenđe. So hine sebepi odova so i Meri pućlja odova jednostavno pućibe?

I Džasmin, i romni kolaja i Meri proučini, upoznajinđa la pana štarencar kola manglje te proučinen i Biblija. Jekh olendar hine i Kristin. Olaće odobor sviđinđa pe odova so proučinđa so manglja duj putija ko kurko te ovel la kurs. Ked i Meri pućlja la da li hem oj penđari pana nekas ko mangela te proučini i Biblija, oj phenđa: „Ja, đanava. Ka upoznajinav tut me amalinjencar.“ Aso nekobor kurće, i Kristin upoznajinđa la pe štare amalinjencar kola manglje te proučinen. Kasnije, pana disave amalinjencar, a disave olendar upoznajinđa la pe amalinjencar.

I Kristin manglja hem olaki porodica ko Filipini te sikljol andi Biblija. Odolese vaćerđa pe ćhajaja, e Andreaja. Ki početka, i Andrea mislinđa: „O Svedokija tane sekta, on na verujinena ko Isus hem koristinena samo o purano zavet.“ Ama, palo odova so samo jekh puti proučinđa, oj meninđa po mišljenje. Kasnije, svako puti ked sikljilji diso nevo andi Biblija, oj phenđa: „Ako odova pisini ko Devleso Lafi, mora te ovel tačno.“

Palo disavo vreme, i Meri prekali Andrea upoznajinđa pana duje olake amalinjen hem jekha koleginica. On isto počminđe te proučinen. Isto ađahar, i Andrea isi la jekh tetka koja vićini pe Andžela. Iako hine korori, oj ipak svako puti hine othe ked i Andrea hine la kurs. I Meri na đanđa odova. Ama, jekh dive, i Andžela pućlja e Andrea, da li šaj i Meri te proučini olaja. E Andželaće but sviđinđa pe odova so sikljilji. Aso samo jekh masek, oj pamtinđa but stihija kotar Biblija hem manglja štar putija ko kurko te proučini. Uzi Andreaki pomoć, oj počminđa  redovno te ovel ko sastankija prekali video-veza.

Ked i Meri haljilji so e Kristinako rom, o Džošua, tano othe đi i Kristin proučini, oj pućlja le da li bi mangela hem ov te proučini. O Džošua phenđa: „Me samo ka šunav, ma puć man ništa. Ako ka puće man, me odmah ka ikljovav.“ Ama, palo panđ minutija, ov hine le pobuter pućiba nego i Kristin hem manglja te proučini i Biblija.

Sebepi jekh jednostavno pućibe, i Meri počminđa but kursija. Nekobor kursija valjanđa te del avere phralenđe hem phenjenđe. Ukupno i Meri počminđa 28 kursija ko štar phuvja.

I Džasmin, i prvo osoba kolaja i Meri proučinđa, krstinđa pe ko april, ko 2021. berš. I Kristin krstinđa pe ko maj, ko 2022. berš hem irinđa pe ko Filipini ki pi porodica. E Kristinake duj amalinja isto krstinđe pe. Olaki tetka i Anđela krstinđa pe nekobor masek palo odova hem akana služini sar stalno pioniri. E Kristinako rom, o Džošua, olaki ćhaj i Andrea hem avera nekobor kursija šukar napredujinena.

Ko prvo veko, but manuša odmah vaćerđe pe porodicaće hem pe amalenđe odova so sikljilje ando Isus (Jov. 1:41, 42a; Dela 10:24, 27, 48; 16:25-33). Sose na bi pućeja okolen kasa proučineja hem averen kola tane zainteresovana, da li đanena nekas ko bi mangela te proučini i Biblija? Ako pućeja akava jednostavno pućibe, šaj hem tu ka arakhe pobuter manušen kola mangena te proučinen i Biblija.