DA LI primetinđan so but manuša ko sveto mislinena so avera valjani olencar te ponašinen pe ko disavo posebno način hem so zaslužinena te dobinen disavo posebno položaj? Bizo obzir kobor dobinena, on mislinena so zaslužinena poviše. Asavke manuša tane sebična hem nane zahvalna aso odova so isi len. I Biblija prorekninđa so baš asavke ka oven o manuša ko poslednja dive (2. Tim. 3:2).

Naravno uvek postojinđe sebična manuša. Na primer, o Adam hem i Eva manglje kokri te odlučinen soj tano šukar, a soj lošno hem sebepi olengo amen avdije sare patinaja. Aver primer tano o Ozija, o kralj andi Juda. Ov mislinđa so šaj te del o kad ko hram, ama na hine le pravo te ćerel odova (2. Let. 26:18, 19). Isto ađahar, o fariseja hem o sadukeja mislinđe so zaslužinena o Devel olencar te ponašini pe pošukar nego averencar samo sose hine e Avrahamese potomkija (Mat. 3:9).

Okružime hijam sebična manušencar hem on šaj te utičinen upro amende (Gal. 5:26). Šaj te počmina te mislina so zaslužinaja disavo posebno položaj ili so avera valjani te ponašinen pe amencar ko disavo posebno način. So šaj te pomožini amen te na desini pe odova? Valjani te dikha so o Jehova mislini ando odova. Šaj but te pomožinen amen duj načelija andi Biblija.

 O Jehova odlučini so zaslužinaja te dobina. Aće disave primerija.

• Ki porodica, o Jehova mangela o rom te mangel pe romnja, a i romni te poštujini pe rome (Ef. 5:33). O bračna parija valjani te mothoven romantična osećanja samo jekhe jekhese (1. Kor. 7:3). Isto ađahar, o roditeljija isi len pravo te očekujinen olenge ćhave te oven lenđe poslušna. A o ćhave isi len pravo te očekujinen ando pe roditeljija te brininen pe olendar hem te mothoven lenđe mangipe (2. Kor. 12:14; Ef. 6:2).

• Ki skupština, o starešine zaslužinena te poštujina len sose but trudinena pe (1. Sol. 5:12). Naravno, o starešine nane len pravo te kontrolišinen e phralengo životi (1. Petr. 5:2, 3).

• O Devel phenđa so o vlastija isi len pravo te roden e manušendar te platinen o porezija hem te oven lenđe podložna (Rimlj. 13:1, 6, 7).

O Jehova odolese so mangela amen dela amen pobuter buća nego so zaslužinaja. Amen hijam nesavršena hem odolese zaslužinaja te mera (Rimlj. 6:23). Ama, o Jehova dela amen but blagoslovija sose mangela amen (Ps. 103:10, 11). Svako blagoslov ja zadatko kova isi amen tano sebepi oleso bizaslužimo šukaripe (Rimlj. 12:6-8; Ef. 2:8).

Pazin te na počmine te razmisline sar o manuša ko sveto. Bizo te ova svesna, šaj te počmina te mislina so zaslužinaja diso pobuter ando avera. Jekh puti, o Isus vaćerđa jekh priča koja mothovi so odova šaj lokho te desini pe. Ov vaćerđa ando radnikija kola hine pogodime te ćeren buti celo dive aso jekh denari. Kasnije, hine pogodime pana radnikija. Ko krajo, sare dobinđe isto plata. Ama, okola so ćerđe buti ando sabalje mislinđe so zaslužinena te dobinen više sose celo dive o kham mudarđa len (Mat. 20:1-16). O Isus andi akija priča istakninđa so olese sledbenikija valjani te oven zadovoljna odoleja so o Devel dela len.

Ov zahvalno hem ma očekujin te dobine diso averendar (1. Sol. 5:18). Oponašin e Pavle kova na rodinđa e phralendar kotar Korint materijalno te pomožinen le, iako  hine le pravo ko odova (1. Kor. 9:11-14). Valjani te cenina sa so dobinaja averendar hem na valjani te mislina so avera tane dužna te den amen diso.

Ov ponizno. Ked neko isi le baro mišljenje pestar, ov obično počmini te mislini so zaslužini te dobini pobuter ando odova so isi le. I poniznost ka pomožini amen te na razmislina ađahar.

O prorok Danilo tano but šukar primer andi poniznost. Ov alo andi jekh važno familija, hine šužo, pametno hem hine le but sposobnostija. Odolese, lokho šaj hine te desini pe te mislini so zaslužini i pažnja hem o odgovornostija kola dobinđa (Dan. 1:3, 4, 19, 20). Ama, ov aćhilo ponizno hem odolese hine dragoceno anglo Jehovase jaćha (Dan. 2:30; 10:11, 12).

Sare valjani te da sa amendar te cida amen ando stavija kola isi ko akava sebično sveto. Mangaja hem ponodri te ova radosna sose isi amen o buća kola o Jehova dela amen sebepi po bizaslužimo šukaripe.