DA LI nekad hine tut problemi, a na hine ko te pomožini tut? Amen živinaja ko „ko but pharo vreme“, sebepi odova šaj te ova obeshrabrime hem te osetina amen so hijam kokri (2. Tim. 3:1). Ama, na valjani kokri te borina amen amare problemencar. I Biblija phenela so o ćaćutne amala šaj but te pomožinen amen ko „pharo vreme“ (Posl. 17:17).

E Pavlese but pomožinđe olese amala kolencar putujinđa ko misionarska putovanja (Kol. 4:7-11). Ked hine ko phanlipe ko Rim, olese amala ćerđe odova so ov našti hine kokri te ćerel. Na primer, o Epafrodit anđa lese disave buća kola bićhalđe lese o phralja ando Filipi (Fil. 4:18). A o Tihik legarđa e Pavlese lila ko razna skupštine (Kol. 4:7). Odolese so olese amala pomožinđe lese, o Pavle šaj hine te nastavini pi služba iako našti hine te ikljol ando ćher, a kasnije hine ko phanlipe. Sar šaj amen te ova asavke amala?

Avdije o phralja hem o phenja mothovena so jekh ćaćutno amal ćerela. Amari phen i Elizabeta, koja služini sar stalno pioniri ki Španija, mothovi sar jekh phen pomožinđa la ked hine la bare pharipa. Ked o doktorija arakhlje so olaki daj isi la rak, odija phen bićhalđa laće stihija andi Biblija kola but ohrabrinđe la. I Elizabeta phenela: „Ked dikhljum olake poruke, odova dinđa man snaga koja valjanđa maje te istrajinav svako dive, a te na osetinav man so hijum kokri“ (Posl. 18:24).

Amen šaj te ova popaše e phralencar hem e phenjencar ađahar so ka pomožina len te đan ki služba hem ko sastankija. Na primer, šaj te vozina disave phure phrale ja phenja ki služba ja ko sastankija. Tegani, šaj tu te ohrabrine olen, a on tut (Rimlj. 1:12). Ama, disave hrišćanija našti te ikljon ando ćher. Sar šaj olenđe te pomožina?

Disave phralja hem phenja tane naborme ja isi len disave avera pharipa sebepi kola našti te aven uživo ko sastankija. Ki asavki situacija hine hem amaro phral o David kova hine le rak. Šov masek ov morandilo te lel hemoterapija. Ko odova period, pe romnjaja e Lidijaja pratinđe o sastankija ćheral.

Sar pomožinđe len o phralja hem o phenja andi skupština? Palo svako sastanko, disave olendar ki dvorana vaćerđe olencar prekali video-veza. Isto ađahar, ked dinđe komentarija, o phralja palo sastanko bićhalđe lenđe  ohrabrujuća poruke. So hine sebepi odova? O David hem i Lidija osetinđe soj tane paše e phralencar.

Da li šaj te đa ki služba okolencar kola našti te ikljon ando ćher? Amen šaj te ćera disave tikne promene ko amaro raspored hem ađahar te mothova lenđe so na bisterđam len (Posl. 3:27). Na primer, šaj te pisina olencar lila ja te svedočina prekalo telefoni. O starešine šaj te organizujinen o sastankija asi služba te pratinen pe prekalo video-poziv. O David hem i Lidija hine but zahvalna so olengi skupština organizujinđa odova. Ov phenela: „Odova so samo hari šunđam o sastanak hem i molitva but ohrabrinđa amen.“ Podijekh puti, asavke phralen šaj te puća da li šaj koro lende te ovel amen kurs okolencar kasa proučinaja.

Đi sarađujinaja olencar, amen šaj pošukar te penđara len hem te dikha kola šuže osobine isi len. Odova šaj te pomožini amen te ova pana popaše olencar. Na primer, ked šuneja sar on sikavena nekas ando Devleso Lafi hem pomožinena le te ovel popaše e Jehovaja, pana pobuter ka cenine len. Ked đaja olencar ki služba hem legareja len ko sastankija, on šaj te oven te neve amala (2. Kor. 6:13).

Ked o Pavle hine le pharipa alo te dikhel le o Tit, oleso amal, hem odova pomožinđa lese te osetini pe pošukar (2. Kor. 7:5-7). Šukar tano lafencar te ohrabrina amare phralen. Ama, ando Tit sikljovaja so valjani te ohrabrina len hem ađahar so ka provodina vreme olencar hem ka pomožina len ko praktično način (1. Jov. 3:18).

Amare phralja hem phenja ki Rusija tane šukar primer sose pomožinena jekh jekhese. Te dikha o primer ando Sergej hem andi Tatjana. Palo odova so ćerđe pretres ko olengo ćher, i policija legarđa len ki stanica te ispitini len. E Tatjana prvo mukhlje hem oj irinđa pe ćhere. O Sergej phenela: „Palo odova so i Tatjana reslja ćhere jekh hrabro phen alji te dikhel la. Sigate palo odova, but phralja hem phenja alje te pomožinen amen te čistina o ćher hem te irina sa ko po than.“

O Sergej pana phenela: „Uvek sviđinđe pe maje o lafija ando Poslovice 17:17, kuri pisini: ’O šukar amal uvek mothovi mangipe, hem ko phare dive phral ovela‘. Ko odova pharo vreme, but valjanđa maje pomoć ando me amala. Dikhljum sar akava stih ispunini pe. O Jehova dinđa man amalen kola hine hrabra hem pomožinđe maje.“ a

Sar đala o vreme ka oven amen pana pobare pharipa, odolese ka valjani amenđe amala upro kola šaj te oslonina amen. Ama, pana pobuter ka valjani amenđe olengi pomoć ki bari nevolja. Odolese, hajde te da sa amendar te pomožina hem te ohrabrina amare amalen (1. Petr. 4:7, 8).