6. ČLANKO PROUČIBASE
ĐILI 18 Zahvalna asi otkupnina
Sose hijam zahvalna so o Jehova oprostini amenđe?
O Devel odobor manglja o sveto so dinđa pe jedinobijande Ćhave (JOV. 3:16)
SO KA SIKLJOVA?
Ka dikha so o Jehova ćerđa te šaj te oprostini amare grehija. Palo odova sigurno ka ova pozahvalna so o Jehova oprostini amenđe.
1-2. Sar amari situacija tani slično sar e ćhavesi kole pominaja ko prvo odlomko?
ZAMISLIN jekhe terne ćhave kova barilo ki jekh barvali porodica. Jekh dive olese roditeljija mulje. Odova šokirinđa le. Ama, isi diso so pobuter ka šokirini le. Ov saznajini so olese roditeljija trošinđe sa o pare hem aćhavđe lese bare dugija. Akana, umesto te nasledini olengo barvalipe, ov nasledinđa olenge dugija hem o manuša mangena odmah te irini lenđe. Ama, o dugija tane odobor bare so ov niked na ka šaj te irini len.
2 Ko disavo način, amari situacija tani slično sar akale ćhavesi. Amare roditeljija, o Adam hem i Eva, hine savršena hem živinđe ko but šužo raj (Post. 1:27; 2:7-9). On šaj hine te ovel len but šužo životi hem večno te živinen. Ama, sa odova pelo ko pani ked grešinđe. O Jehova cidinđa len ando edensko vrt hem našalđe i prilika večno te živinen. A so olenge ćhave nasledinđe olendar? Ki Biblija pisini: „Prekalo jekh manuš [o Adam] ko sveto khuvđa o greh hem prekalo greh o meribe, ađahar o meribe alo ko sa o manuša sose sare ulje grešna“ (Rimlj. 5:12). Ando Adam nasledinđam o greh, a odova greh legari amen đi o meribe. Ov tano sar jekh but baro dugo kova niko amendar našti te platini (Ps. 49:8).
3. Sose šaj te phena so amare grehija tane sar „dugija“?
3 O Isus phenđa so amare grehija tane sar „dugija“ (Mat. 6:12; Luka 11:4). Ked grešinaja, odova tano ka phene ćhivaja amen dugo ko Jehova. Ov bi šaj te rodel amendar te platina odova dugo. Ako na bi uspinaja te irina odova dugo, ov bi ovela platimo tek ked ka mera (Rimlj. 6:7, 23).
4. (a) So bi ovela amencar ked na bi ovela amen nikasi pomoć? (Psalam 49:7-9) (b) Ko so odnosini pe o lafi „greh“ kova pomini pe ki Biblija? (Dikh o okvir „ Greh“.)
4 Nane moguće amen te irina odova so o Adam hem i Eva našalđe. (Čitin Psalam 49:7-9.) Bizi pomoć, amen na bi ovela amen nada ki budućnost hem ko uskrsenje. U stvari, amaro meribe bi ovela sar o meribe ando životinje, amen bi meraja hem niked na bi uštaja (Prop. 3:19; 2. Petr. 2:12).
5. Sar amaro manglo Dad pomožinđa amen te platina o dugo kova nasledinđam? (Dikh i slika.)
5 Razmislin ando terno ćhavo kole pominđam ki početka. Sar bi osetini pe ked bi neko nudini lese te platini o dugo kova nasledinđa ando pe roditeljija? Sigurno bi ovela zahvalno hem bi prihvatini odova velikodušno poklon. Ko slično način, o Jehova dinđa amen jekh poklon sebepi kova tano platimo o greh kova nasledinđam ando Adam. O Isus objasninđa odova ađahar: „O Devel odobor manglja o sveto so dinđa pe jedinobijande Ćhave, te na ovel uništimo nijekh kova mothovi vera ano leste, nego te ovel le večno životi“ (Jov. 3:16). Isto ađahar, odova poklon omogućini amenđe te ova e Jehovase amala.
O Isus sikavđa e manušen so o Jehova oprostini prekali otkupnina (Jov. 3:16). Palo odova, ov spremno dinđa po životi te šaj te platini odija otkupnina. (Dikh o 5. odlomko.)
6. Sostar ka vaćera ko akava članko hem sose?
6 Sar pomožini amen odova velikodušno poklon sebepi kova amare grehija šaj te oven oprostime? Te šaj te dobina odgovor ko odova pućibe akana ka razmotrina disave izrazija andi Biblija sar soj tane pomirenje, očišćenje, otkupnina hem proglasime sar pravedna. Ko akava članko ka vaćera so svako izraz značini. Ked pošukar ka haljova olengo značenje, pana pobuter ka cenina sa so o Jehova ćerđa te šaj te oprostini amare grehija.
CILJ: POMIRENJE
7. (a) So pana našalđe o Adam hem i Eva? (b) So valjani amenđe odolese so hijam e Adamese hem e Evake potomkija? (Rimljanima 5:10, 11)
7 Ked o Adam hem i Eva grešinđe, on na samo so više našti hine te živinen večno nego hem ulje e Devlese dušmanija. Angleder so grešinđe, on hine deo andi Devlesi porodica, ama sebepi pi neposlušnost više našti hine te oven ki odija porodica (Luka 3:38). Odova hine angleder so hine len ćhave (Post. 3:23, 24; 4:1). Odolese so hijam olenge potomkija, valjani te pomirina amen e Jehovaja. (Čitin Rimljanima 5:10, 11.) Avere lafencar, amen valjani diso te ćera te šaj te ova olese amala. Premalo jekh biblijako rečniko, o grčko lafi kova akate tano koristimo aso „pomirenje“ šaj te prevodini pe hem sar „te ćere amal ando dušmani“. Šukar tano te đana so o Jehova prvo ćerđa diso te šaj te ova olese amala. Akana ka dikha so ćerđa.
REŠENJE: OČIŠĆENJE
8. So ki Biblija značini o lafi „očišćenje“?
8 O Jehova arakhlja način o nesavršena manuša te oven olese amala. Sar? Prekalo očišćenje. Ki Biblija akava lafi značini „te ućhari pe“ ili „te zamenini pe“ jekh buti averaja koja isi la isto vrednost. Ađahar okova so hine našaldo ja uništimo šaj te nadoknadini pe. Te bi nadoknadini pe odova so o Adam našalđa, o Devel obezbedinđa jekh žrtva koja isi la isto vrednost sar o životi ando savršeno manuš. Isto ađahar, prekalo očišćenje ov omogućinđa e manušenđe te oven ko mir oleja (Rimlj. 3:25).
9. So ćerđa o Jehova te šaj e Izraelcenge grehija te oven oprostime?
9 Ko purano vreme te šaj hine o Izraelcija te oven paše e Jehovaja, ov arakhlja način sar te oven oprostime olenge grehija. On valjanđe jekh puti ko berš te slavinen jekh prazniko kova vićinđa pe: Dive ando očišćenje. Ko odova dive, o prvosvešteniko dinđa životinjska žrtve sebepi e manušenge grehija. Naravno, odola žrtve našti hine potpuno te ućharen olenge grehija sose o životinje nane odobor vredna sar o manuša. Ama, sa đi o Izraelcija kajinđe pe hem dinđe e Jehovase o životinjska žrtve kola rodinđa, ov spremno oprostinđa lenđe (Jevr. 10:1-4). Odola žrtve kola dinđe pe odova dive hem ko avera prilike, setinćerđe e Izraelcen soj tane grešna hem so valjanđa lenđe diso pobuter te šaj potpuno te oven ućharde olenge grehija.
10. Savo trajno rešenje hine le o Jehova te šaj amare grehija te oven oprostime?
10 O Jehova celo vreme hine li ki godi trajno rešenje sar amare grehija te oven oprostime. Ov bićhalđa pe mangle Ćhave te ovel „jekhvar zauvek dindo te šaj te akhari o grehija ando but manuša“ (Jevr. 9:28). O Isus dinđa „po đivdipe sar otkupnina butenđe“ (Mat. 20:28). Soj tani i otkupnina?
CENA: I OTKUPNINA
11. (a) Premali Biblija, sose valjanđa te del pe i otkupnina? (b) Ko bi jedino šaj hine te platini i otkupnina?
11 Ki Biblija pisini so o Jehova odlučinđa so valjani te ovel platimi i otkupnina te šaj amare grehija te oven oprostime hem te šaj te ova olese amala. a So hine i otkupnina koja valjanđa te platini pe te šaj o manuša te ovel len odova so o Adam našalđa? Pa, o Adam hem i Eva našalđe po savršeno životi hem i prilika te živinen večno. Odolese, valjanđa te platini pe baš odova so on našalđe (1. Tim. 2:6). I otkupnina šaj hine te platini jedino jekh manuš kova (1) hine savršeno, (2) hine le mogućnost te živini večno ki phuv hem (3) hine spremno te del po životi amenđe. Jedino oleso životi šaj hine te ovel odgovarajućo otkupnina te šaj te irini pe odova so hine našaldo.
12. Sose o Isus šaj hine te platini i otkupnina?
12 Ka razmotrina trin razlogija sose o Isus šaj hine te platini i otkupnina. (1) Ov hine savršeno hem „na ćerđa nijekh greh“ (1. Petr. 2:22). (2) Sebepi odova šaj hine te živini večno ki phuv. (3) Ov hine spremno te merel hem te del po životi amenđe (Jevr. 10:9, 10). O Isus hine savršeno sar o prvo manuš o Adam angleder so grešinđa (1. Kor. 15:45). Odolese, pe meribaja šaj hine te platini i otkupnina hem te irini odova so o Adam našalđa (Rimlj. 5:19). Ađahar o Isus ulo „o poslednjo Adam“. Nane potreba aver savršeno manuš te avel hem te platini odova so o Adam našalđa. O Isus mulo „jekh puti hem zauvek“ (Jevr. 7:27; 10:12).
13. Koja tani i razlika maškaro očišćenje ando greh hem i otkupnina?
13 Koja tani i razlika maškaro očišćenje ando greh hem i otkupnina? O očišćenje ando greh tano korak kova o Devel ćerđa te šaj amen o nesavršena manuša te ova olese amala. I otkupnina tani cena koja tani platimi te šaj o očišćenje ando greh te ovel moguće. Odija cena o Isus platinđa ked ćhorđa po rat amenđe (Ef. 1:7; Jevr. 9:14).
REZULTATIJA: OSLOBODIME ANDO GREH, ANDO MERIBE HEM PROGLASIME SAR PRAVEDNA
14. So akana ka razmotrina hem sose?
14 Sar pomožini amen odova so o Jehova ćerđa amenđe? Te šaj te dobina odgovor ko akava pućibe, ka razmotrina so značinena duj izrazija andi Biblija kola objasninena odova.
15-16. (a) Sostar hijam oslobodime sebepi i otkupnina? (b) Sar odova utičini upro amende?
15 I Biblija phenela so hijam oslobodime sebepi odova soj tani i otkupnina platimi. O apostol Petar phenđa e hrišćanenđe: „Đanena so ando tumaro isprazno način ando životi kova nasledinđen ando tumare paradada na hijen oslobodime [doslovno: „otkupime“] disovaja so raspadini pe – srebroja ili zlatoja – nego e Hristese dragoceno rateja, kova tano sar o rat ando bakro kova tano čisto hem bizi mana“ (1. Petr. 1:18, 19; fusn.).
16 Sebepi i otkupnina amen šaj te ova oslobodime ando greh hem ando meribe kola anena amenđe bare dukha (Rimlj. 5:21). Amen hijam but zahvalna e Jehovase hem e Isusese so hijam oslobodime sebepi e Isuseso dragoceno rat (1. Kor. 15:22).
17-18. (a) So značini te ova proglasime sar pravedna? (b) Kola blagoslovija isi amen sebepi odova?
17 Ki Biblija pisini so e Jehovase sluge tane proglasime sar pravedna. Odova značini so ov na očekujini te platina aso greške kola ćerđam. Ama, akava na značini so o Jehova na ićeri pe ko pe merilija asi pravda. Ov na proglasinđa amen sar pravedna odolese so zaslužinaja odova niti phanela pe jaćha anglo grehija kola ćeraja. Ama, spremno oprostini amenđe odolese so mothovaja vera ko odova so ov hem o Isus ćerđe te šaj te omogućinen i otkupnina (Rimlj. 3:24; Gal. 2:16).
18 So amenđe značini odova so hijam proglasime sar pravedna? Okola soj tane birime te vladinen e Isuseja ko nebo već tane proglasime sar pravedna hem ulje e Devlese ćhave (Titu 3:7; 1. Jov. 3:1). Ov oprostinđa olenge grehija. Odova tano sar ka phene on niked na ćerđe odola grehija hem odolese šaj te oven ko Devleso Kraljevstvo (Rimlj. 8:1, 2, 30). Isto ađahar, okola so ka živinen ki phuv tane proglasime sar pravedna. O Jehova oprostinđa olenge grehija hem on ulje olese amala (Jak. 2:21-23). O baro mnoštvo ando manuša kola ka preživinen o Armagedon isi len mogućnost niked te na meren (Jov. 11:26). „O pravednikija“ hem „o nepravednikija“ kola mulje ka uskrsninen (Dela 24:15; Jov. 5:28, 29). Ko krajo, sa e Jehovase poslušna sluge ki phuv „ka dobinen i slavno sloboda e Devlese ćhavengi“ (Rimlj. 8:21). Jedva ađićeraja o vreme ked palem ka ova e Jehovase savršena ćhave.
19. Sar amari situacija meninđa pe sebepi odova so ćerđe o Jehova hem o Isus? (Dikh o okvir „ So odova značini amenđe?“)
19 Amari situacija hine bizi nada, sar i situacija ando terno ćhavo kole pominđam ki početka. Ov sa našalđa hem nasledinđa jekh baro dugo kova niked na bi uspini te irini. Ama, amenđe o Jehova pomožinđa ađahar so arakhlja način amare grehija te oven oprostime. Ov bićhalđa pe Ćhave te del po životi sar otkupnina. Ako verujinaja so e Isusesi otkupno žrtva oslobodini amen ando greh hem meribe, amare grehija ka oven kosle ka phene niked ni na hine. A soj tano najvažno, akana šaj te ova paše amala amare nebesko Dadeja, e Jehovaja.
20. Sostar ka vaćera ko aver članko?
20 Ked razmislinaja so o Jehova hem o Isus ćerđe amenđe, osetinaja but bari zahvalnost (2. Kor. 5:15). Bizi olengi pomoć, na bi ovela amen nada! Ama, kobor lično amenđe značini odova so o Jehova oprostini? Odolestar ka vaćera ko aver članko.
ĐILI 10 Hvalin e Jehova, amare Devle
a Ko disave ćhibja o lafi „otkupnina“ tano prevodimo e lafencar kola doslovno značinena „cena aso životi“ ili „pare kolencar diso otkupini pe“.
