1-2. Sose o Isus hine lje baro stres?

KO PALUNO dive ando po dživdipe ki Phuv, o Isus hine lje baro stres. Pana hari o lošna manuša ka mudaren lje adžahar so but ka mučinen lje. O meribe na hine jedino e Isusesi briga. Ov but manglja pe Dade hem manglja te čerel odova so ov mangela. Ako ačhola ljese verno ki akija najphari situacija, o Isus ka opravdini e Devljeso nav. O Isus manglja hem e manušen hem džandža so ka ovel ljen nada ko večno dživdipe samo ako ov ačhola verno dži ko meribe.

² Iako o Isus hine lje baro stres, ov arakhlja po unutrašnjo mir. Ov pe apostolendže phendža: „Moklo mir dava tumendže“ (Jov. 14:27). Ov hine lje „e Devljeso mir“, hem odova mir hine lje odoljese so hine ko šukar odnos e Jehovaja. Odova mir pomožindža e Isuse te na brinini pe (Fil. 4:6, 7).

3. So ka dikha ko akava članko?

³ Niko amendar na ka ovel ki situacija ki koja hine o Isus, ama sar oljese učenikija ka ovel amen razna problemija (Mat. 16:24, 25; Jov. 15:20). Sar ov, hem amen ka ovel amen baro stres. So ka pomožini amen te na sikirina amen but hem te na našala amaro unutrašnjo mir? Akana ka dikha trin buča kola pomožindže e Isusese te čerel piklji služba ki Phuv. Isto adžahar, ka dikha hem sar šaj te oponašina lje ked isi amen pharipa.

4. Premalo 1. Solunskonendže 5:17, kola primerija mothovena so o Isus but putija molindža pe ko poslednjo dive ando poklo dživdipe ki Phuv?

⁴ Čitinen 1. Solunskonendže 5:17. Ko poslednjo dive ando po dživdipe ki Phuv, o Isus molindža pe but putija. Ked pe učenikondže mothodža sar te ičeri pe o Spomen-svečanost, ov molindža pe sebepi o maro hem o vino (1. Kor. 11:23-25). Angljeder so dželo kotar odova than kaj slavindže i Pasha, ov molindža pe peklje učenikoncar (Jov. 17:1-26). Ked pe učenikoncar reslja ki Maslinsko gora, but putija molindža pe (Mat. 26:36-39, 42, 44). Oljese poslednja lafija hine phende ki molitva (Luka 23:46). O Isus molindža pe e Jehovase kotar sa odova so desindža pe ko odova poslednjo dive.

5. Sose o apostolija na hine ljen dovoljno hrabrost?

⁵ O Isus mukhlja pe upro po Dad hem odova mothodža adžahar so molindža pe oljese but putija. Odova dindža lje snaga te istrajini. Ama, o apostolija na istrajindže ki molitva odija rat. Odoljese na hine ljen dovoljno hrabrost ked hine ljen kušnje (Mat. 26:40, 41, 43, 45, 56). Ked isi amen pharipa, ka ačhova verna samo ako oponašinaja e Isuse hem ako molina amen but putija. Sose sa šaj te molina amen?

6. Sar i vera ka pomožini amen te arakha o unutrašnjo mir?

⁶ E Jehovase šaj te molina amen te del amen „pobuter vera“ (Luka 17:5; Jov. 14:1). Amendže valjani vera odoljese so o Beng ka iskušini sa e Isusese učenikon (Luka 22:31). Sar šaj i vera te pomožini  amen te arakha o mir čak ked o problemija avena jekh palo jekh? Ked amen čerdžam sa soj tano dži amende te rešina o problemi, i vera ka podstaknini amen te mukha amare problemija ko e Jehovase vasta. Odoljese so verujinaja so ov ka rešini amare problemija pošukar nego li amen, ki amari godi hem ko vilo amen isi amen mir (1. Petr. 5:6, 7).

7. So šaj te sikljova ando Robert?

⁷ I molitva ka pomožini amen te arakha o unutrašnjo mir save god pharipa te oven amen. Jekh phral kova vičini pe Robert, a isi lje koro 80 berš hem tano starešina, phenela: „O savet ando Filipskonendže 4:6, 7 pomožindža man te ikljovav ko krajo me problemencar. Hine man problemi e parencar. Jekh vreme na služindžum sar starešina.“ So pomožindža e Robertese te arakhi o unutrašnjo mir? Ov phenela: „Ked god bi počminava te sikirina man, odma bi molinava man. So pobuter molindžum man ando vilo, osetindžum pobaro mir.“

8. Premalo Jovan 8:29, so pomožindža e Isusese te arakhi o unutrašnjo mir?

⁸ Čitinen Jovan 8:29. O Isus hine lje unutrašnjo mir čak ked hine progonimo, sose džandža odoljeja so ka čerel ka radujini pe Dade. Ov ačhilo poslušno hem ked hine ljese pharo odova te čerel. Manglja pe Dade hem celo poklo dživdipe dindža ki služba e Jehovase. Angljeder so alo ki Phuv, ov čerdža e Devljeja sar vešto graditelj (Godž. 8:30). A  dži hine ki Phuv, revno sikadža averen ando po Dad (Mat. 6:9; Jov. 5:17). Odova andža e Isusese baro bahtaljipe (Jov. 4:34-36).

9. Sar i služba šaj te pomožini amen te arakha o unutrašnjo mir?

⁹ Amen šaj te oponašina e Isuse adžahar so hijam poslušna e Jehovase hem so uvek čeraja „buti e Jehovase“ (1. Kor. 15:58). Ked hijam potpuno posvetime e propovedibase, tegani šaj ispravno te dikha amari situacija (Čer. 18:5). Na primer, e manušen koljen arakhaja ki služba but putija isi ljen pobare problemija nego li amen. Ama, ked pendžarena hem mangena e Jehova, hem primeninena oljese savetija, oljengi situacija ovela pošukar hem ovena pobahtalje. Svako puti ked odova dikhaja, pana posigurna hijam so o Devel ka brinini pe amendar. Odova uverenje pomožini amen te arakha o unutrašnjo mir. Ko odova uverindža pe hem jekh amari phen koja celo poklo dživdipe borini pe e depresija hem odoljeja so mislini so nane vredno. Oj phenela: „Ked pobuter džava ki služba, osetinava man posigurno hem pobahtalji. Mislinava so odova tano odoljese so ked hijum ki služba, osetinava man popaše e Jehovaja.“

10. So šaj te sikljova andi Brenda?

¹⁰ Te dikha o primer andi amari phen i Brenda. Oj hem olaki čhaj isi ljen baro nabormipe (multipla-skleroza). I Brenda našti te phirel, hem odoljese valjanena lače invalidska kolica. Propovedini kotar čher ko čher ked god šaj, ama obično svedočini adžahar so bičhalji ljila. Oj vačeri: „Ked prihvatindžum so ko akava sveto niked na ka sačovav, tegani šaj hine te dav sa mandar ki služba. Ked hijum ki služba, na razmislinava ando me brige. Tegani razmislinava ando odova sar šaj te pomožinav e manušendže koljendže propovedinava, a ki godi uvek isi man i nada ki budućnost.“

11-13. (a) Sar o apostolija hem avera mothodže e Isusese soj tane oljese but šukar amala? (b) Sar e Isusese amala utičindže koro ljeste?

¹¹ Dži o Isus propovedindža, oljese verna apostolija mothodže soj tane but šukar amala. On hine amala sar so i Biblija phenela: „Isi hem amala soj tane popaše ando phral“ (Godž. 18:24). O Isus but cenindža asavke amaljen. Dži trajindža oljesi služba, niko ando oljese phralja na mothodže vera koro ljeste (Jov. 7:3-5). Čak hem oljesi familija mislindža so ov diljindilo (Mar. 3:21). Ki aver strana, ki rat angljeder te merel, o Isus pe verno apostolendže šaj hine te phenel: „Tumen ačhiljen mancar ko meklje kušnje“ (Luka 22:28).

¹² Iako o apostolija ko disave situacije razočarindže e Isuse, ov na dikhlja oljenge greške, nego oljengi vera (Mat. 26:40; Mar. 10:13, 14; Jov. 6:66-69). Ki poslednjo rat angljeder te ovel mudardo, o Isus akalje verno manušendže phendža: „Vičinava tumen me amala, odoljese so vačerdžum tumendže sa so šundžum kotar mo Dad“ (Jov. 15:15). E Isusese amala but ohrabrindže lje. Dži pomožindže lje ki služba, e Isuseso vilo pherdilo bahtaljipaja (Luka 10:17, 21).

¹³ E Isusese amala na hine samo o apostolija, već hem avera, murša hem džuvlja kola pomožindže lje ki služba hem ko avera načinja. Disave phravdže ljese pe udara hem odoljese hine lje kuri te hal  maro (Luka 10:38-42; Jov. 12:1, 2). Avera putujindže oljeja hem sa so hine ljen ulavdže oljeja (Luka 8:3). O Isus hine lje šukar amala odoljese so ov hine šukar amal. Čerdža šukar buča oljendže hem na očekujindža oljendar te čeren diso pobuter nego li so šaj. Iako hine savršeno, ov cenindža so oljese nesavršena amala pomožindže lje. Šaj te ova sigurna so on pomožindže lje te arakhi po unutrašnjo mir.

14-15. Sar šaj te ovel amen šukar amala hem sar šaj on te pomožinen amen?

¹⁴ O šukar amala ka pomožinen amen te ačhova verna e Jehovase. Najšukar način sar te ovel amen šukar amala tano amen te ova šukar amala (Mat. 7:12). Na primer, i Biblija podstaknini amen amaro vreme hem i snaga te trošina te pomožina averendže, posebno okoljendže kola nane ljen (Efe. 4:28). Da li ki skupština nekase valjani pomoć? Šaj li te dža te čine diso okoljendže kola našti te ikljon ando čher sebepi soj tane naborme ja phure? Šaj li te spremine habe e porodicače koja jedva ikljola ko krajo? Ako džaneja sar koristini pe o veb-sajt jw.org^® hem i aplikacija JW Library^®, šaj li te pomožine averendže ki skupština te sikljon sar te koristinen ljen? Ked daja sa amendar te pomožina averen, ka ova pobahtalje (Čer. 20:35).

¹⁵ Amare amala ka oven amencar ked isi amen problemija hem ka pomožinen amen te arakha amaro unutrašnjo mir. Sar so o Elijuj šundža e Jove dži vačerdža ando peklje problemija, isto adžahar hem amare amala ka oven spremna  strpljivo te šunen amen dži vačeraja oljendže amare problemija (Jov 32:4). Na valjani te očekujina so on ka anen odluke ko amaro than, ama mudro ka postupina ako šunaja oljenge savetija kola avena andi Biblija (Godž. 15:22). Baš sar so o kralj David ponizno prihvatindža i pomoć ando pe amala, amen o ponos na valjani te sprečini te prihvatina i pomoć kotar amare amala (2. Sam. 17:27-29). O šukar amala tane poklon kotar Jehova (Jak. 1:17).

16. Premalo Filipskonendže 4:6, 7, prekalo kaste jedino šaj te dobina o mir? Objasnin.

¹⁶ Čitinen Filipskonendže 4:6, 7. Sose o Jehova phenela so oljeso mir šaj te dobina „prekalo o Isus Hrist“? O unutrašnjo mir šaj te dobina hem te arakha samo ako haljovaja koja tani e Isusesi uloga ki Jehovasi namera hem ako mothovaja vera koro ljeste. Na primer, prekalji e Isusesi otkupno žrtva, sa amare grehija ka oven oprostime (1. Jov. 2:12). Ked razmislinaja odoljestar, amen isi amen bari uteha! Sar Kralj ando e Devljeso Kraljevstvo, o Isus ka cidel sa o pharipa kola čerdže o Beng hem oljeso sveto (Isa. 65:17; 1. Jov. 3:8; Puč. 21:3, 4). Odova dela amen but šuži nada! Iako o Isus ačhadža amendže odgovorno zadatko, ov tano amencar hem pomožini amen dži trajinena akala poslednja dive (Mat. 28:19, 20). Odova but ohrabrini amen! Uteha, nada hem hrabrost –  tane but važna buča kola valjanena amendže te šaj te arakha o unutrašnjo mir.

17. (a) Sar o hrišćanja šaj te arakhen o unutrašnjo mir? (b) Premalo Jovan 16:33, so ka šaj te čera?

¹⁷ Tegani, sar šaj te arakha o unutrašnjo mir ked isi amen bare problemija? Adžahar so ka oponašina e Isuse. Sar prvo, te molina amen hem te istrajina ki molitva. Sar dujto, te šuna e Jehova hem revno te propovedina, čak ked odova nane lokho. Hem sar trito, oslonin tut upro teklje amaljengi pomoć ked isi tut problemija. Tegani, e Devljeso mir ka arakhi amari godi hem amaro vilo. Sar so o Isus izdržindža sa o kušnje, adžahar hem amen ka uspina te ikljova ko krajo sa e problemencar. (Čitinen Jovan 16:33.)