ČLANKO PROUČIBASE 17
O Jehova pomožini amen te borina amen protiv o lošna duhovna sile
Borina amen [...] protiv o lošna duhovna sile ko nebo (EFE. 6:12)
DŽILI 55 Ne plašite se!
SOSTAR KA VAČERA *
1. Premalo o lafija kotar Efeskonendže 6:10-13, kova tano jekh način sar o Jehova mothovi so brinini pe amendar? Objasnin.
O JEHOVA brinini pe amendže ko but načinja. Jekh oljendar tano so pomožini amen te borina amen protiv amare dušmanja. Amare najbare dušmanja tane o Beng hem o demonja. O Jehova upozorini amen hem dela amen sa so valjani te šaj te borina amen protiv oljende. (Čitinen Efeskonendže 6:10-13.) Ako prihvatinaja e Jehovasi pomoć hem oslonina amen potpuno upro ljeste, tegani ka ovel amen snaga te borina amen protiv o Beng. Sar o apostol Pavle hem amen šaj te phena: „Ako tano o Devel amencar, ko ka ovel protiv amende?“ (Rim. 8:31).
2. Sostar ka vačera ko akava članko?
2 Sar hrišćanja, amen na obratinaja but pažnja upro Beng hem upro demonja. Amendže tano ko prvo than te sikljova kotar Jehova hem te služina oljese (Ps. 25:5). Ama, amen mora te džana kola metode o Beng koristini. Sose? I Biblija phenela: „Te na hovavi amen o Beng“ (2. Kor. 2:11). Ko akava članko ka dikha jekh but bari zamka so o Beng hem oljese demonja koristinena te hovaven e manušen. Isto adžahar, ka dikha sar šaj uspešno te borina amen protiv oljende.
SAR O LOŠNA DUHOVNA SILE HOVAVENA E MANUŠEN
3-4. (a) Soj tano o spiritizam? (b) Kobor o manuša verujinena ko spiritizam?
3 Jekh but bari zamka so o Beng hem oljese demonja koristinena te hovaven e manušen tani spiritizam. Okola so čerena spiritizam phenena so on džanena hem kotrolišinena o buča kola avera manuša našti. Na primer, nesave phenena so on šaj prekalji astrologija ja gatanje te dikhen so ka ovel ki budućnost. Avera šaj te čeren te dičhol so on šaj te vačeren e muljencar. A disave čerena madžije. *
4 Kobor o manuša verujinena ko spiritizam? Ko 18 Phuvja ki Latinsko Amerika hem ko Karibi hine čerdi jekh anketa. Oj mothodža so svako trito manuš verujini ki magija hem ko madžije. A skoro isto odobor manuša verujinena so šaj te vačeri pe e duhoncar. Jekh aver anketa čerdža pe ko 18 Phuvja ki Afrika. Odothe svako dujto manuš verujini ko madžije. Naravno, kuri god te živina valjani te arakha amen ando spiritizam, odoljese so o Beng „hovavi celo sveto“ (Puč. 12:9).
5. Sar o Jehova dikhela ko spiritizam?
5 O Jehova tano Devel ando čačipe (Ps. 31:5). Sar o Jehova dikhela ko spiritizam? Ov mrzini o spiritizam! O Jehova phendža e Izraelcendže: „Koro tute ma te ovel nijekh kova pe čhave ja pe čhaja ka tharel ki jag, ni kova gatini, ni kova čerela madžije, ni kova prorokujini premalo znakija, ni kova bahini, ni kova fordela o madžije, ni kova vačeri e duhoncar, ni kova angljeder vačeri so ka ovel, ni kova pučela e muljen, sose ko god čerela diso adžahar ov tano odvratno e Jehovase“ (5. Moj. 18:10-12). Iako o hrišćanja avdije na ičerena pe ko zakon kova o Jehova dindža e Izaelcendže, ama amen džanaja so oljeso mišljenje ando spiritizam na menindža pe (Mal. 3:6).
6. (a) Sar o Beng koristini o spiritizam te čerel lošnipe e manušendže? (b) Premalo o lafija kotar Vačerutno 9:5, so ovela e manušencar ked merena?
6 O Jehova upozorini amen ko akala buča, odoljese so džanela so o Beng koristini o spiritizam te čerel lošnipe e manušendže. Prekalo spiritizam o Beng širini o hovajbe. Jekh kotar odola hovajba tano so o mulje živinena ko aver than. (Čitinen Vačerutno 9:5.) Isto adžahar, prekalo spiritizam o Beng ičeri e manušen ki dar hem cidela ljen ando Jehova. Oljeso cilj tano o manuša te verujinen ko lošna duhovna sile, a na ko Jehova.
SAR ŠAJ TE BORINA AMEN PROTIV O LOŠNA DUHOVNA SILE
7. So o Jehova mothovi amendže?
7 Sar so već phendžam, o Jehova mothovi amendže so valjani te džana te na hovaven amen o Beng hem oljese demonja. Akana ka dikha so šaj te čera te šaj te borina amen protiv o Beng hem o demonja.
8. (a) Kova tano o najvažno način sar šaj te borina amen protiv o lošna duhovna sile? (b) Sar o stih ando Psalam 146:4 mothovi e Bengeso hovajbe ando meribe?
8 Čitin hem hor razmislin ando Devljeso Lafi. Adžahar, šaj jasno te dikha hem te haljova kola tane oljenge hovajba. E Devljeso Lafi tano sar jekh oštro mač koljeja šaj te čhina ja te phena te haljova e Bengese hovajba (Efe. 6:17). Na primer, e Devljeso Lafi mothovi so jekh ando hovajba tano so o mulje šaj te vačeren e dživde manušencar. (Čitinen Psalam 146:4.) Isto adžahar, setinčeri amen so samo o Jehova šaj čače te džanel so ka ovel ki budućnost (Isa. 45:21; 46:10). Ako amen redovno čitinaja e Devljeso Lafi hem hor razmislinaja ando odova, tegani ka mrzina o hovajba ko kola o lošna duhovna sile mangena amen te verujina.
9. Kotar kola spiritistička buča valjani te cida amen?
9 Cide tut kotar sa odova so avela ando spiritizam. Sar hrišćanja amen na magaja te ovel amen ništa odoljeja so avela ando spiritizam. Na primer, amen na džaja ko manuša kola šaj te vačeren e duhoncar, niti mangaja ko bilo kova način te pokušina te vačera e muljencar. Sar so dikhljam ko članko angljeder akaljestar, amen na učestvujinaja ko običaja kola avena ando verovanja so o manuš ked merela nastavini te živini ko aver than. Isto adžahar, amen na mangaja prekalji astrologija te džana savi ka ovel amari budućnost (Isa. 8:19). Amen džanaja so asavke buča tane opasna hem čhivena amen ko direktno kontakt e Bengeja hem e demonencar.
Oponašin e hrišćanen kotar prvo veko adžahar so ka forde sa so avela ando okultizam hem adžahar so ka birine i zabava koja nane la spiritizam (Dikh kotar 10-12. odlomko)
10-11. (a) So nesave manuša ko prvo veko čerdže ked sikljilje o čačipe? (b) Premalo o lafija kotar 1. Korintskonendže 10:21, sose valjani te oponašina o primer ando prva hrišćanja hem sar šaj te čera odova?
10 Forde sa o buča kola avena ando okultizam. Nesave manuša kola živindže ko Efes ko prvo veko, čerdže madžije. Ked sikljilje soj tano o čačipe, on čerdže bare promene. Ki Biblija pisini: „A but okoljendar so čerdže madžije, čedindže peklje knjige hem thardže ljen anglo sarinende“ (Čer. 19:19). On ozbiljno haljilje kobor tano važno te borina amen protiv o lošna duhovna sile. Oljenge knjige kotar i magija hine but skupa. Ama, on na manglje te den ljen sar poklon averendže, niti te biknen ljen, nego thardže ljen. On pobuter razmislindže sar te čeren odova so o Jehova mangela, nego kobor odola knjige tane skupa.
11 Sar šaj amen te oponašina oljengo primer? Šukar tano te forda sa o buča kola avena ando okultizam. Odola buča šaj te oven o amajlije ja buča kola o manuša isi ljen ko po čher ja akharena ljen te šaj te zaštitinen pe ando lošna duhovna sile. (Čitinen 1. Korintskonendže 10:21.)
12. So valjani te puča amen ked birinaja amari zabava?
12 Birin savi zabava ka ovel tut. Puč kokri tut: „Da li čitinava knjige, časopisija ja člankija ko internet kola vačerena ando okultizam? Savi muzika šunava, kola filmija ja serije dikhava ja kola igrice čhelava? Da li ki mi zabava isi spiritizam? Da li odothe vačeri pe ando vampirija, zombija ja ando buča kola tane natprirodna? Da li o armanja ja o madžije mothovena pe sar zabava? Naravno, nane svako zabava ki koja isi bajke ja izmislime buča obavezno povezimi okoljeja soj tano spiritističko. Ama, ked birineja ti zabava ov odlučno te ove so podur ando sa so o Jehova mrzini. Amen mangaja te da sa amendar te ovel amen „čisto savest“ anglo amaro Devel (Čer. 24:16). *
13. So na mangaja te čera?
13 Ma vačer priče ando odova so čerena o demonja. Amen mangaja te ova sar o Isus (1. Petr. 2:21). Angljeder so alo ki Phuv, o Isus hine ko nebo hem ov džandža but buča ando Beng hem ando demonja. Ama, ov na vačerdža odoljestar so on čerdže. O Isus manglja te svedočini ando Jehova, a na ando Beng. Amen šaj te ova sar o Isus ako na vačeraja priče ando demonja. Amen mangaja amare lafija te mothoven so kotar amaro vilo „avela šukar lafi“, znači o čačipe (Ps. 45:1).
Nane amen razlog te dara ando lošna duhovna sile. O Jehova, o Isus hem o anđelija tane but pozoralje ( Dikh o 14. hem 15. odlomko) *
14-15. (a) Sose na valjani te dara ando lošna duhovna sile? (b) Kola dokazija isi amen so o Jehova arakhi po narodo avdije?
14 Ma te ovel tut dar ando lošna duhovna sile. Ko avdisutno sveto šaj te desinen pe amendže lošna buča. O nesrećna slučaja, o nabormipa ja o meriba šaj iznenada te oven. Ama, na valjani te mislina so o lošna duhovna sile tane odgovorna odoljese so ulo. I Biblija phenela so „o vakti hem o buča kola na adžičerdže arakhena sarinen“ (Vač. 9:11). O Jehova mothodža soj tano pozoralo ando demonja. Na primer, o Devel na mukhlja e Bengese te mudari e Jove (Jov 2:6). Ko Mojsijeso vreme, o Jehova mothodža so tano pozoralo ando sveštenikija ko Egipat kola čerdže madžije (2. Moj. 8:18; 9:11). Ko nebo, o Isus mothodža kobor bari moć dobija ando Jehova ked e Benge hem e demonen fordindža kotar nebo ki Phuv. Pana hari, on ka oven fordime ko bezdan kuri nikase na ka čeren lošnipe (Puč. 12:9; 20:2, 3).
15 Avdije dikhaja but dokazija so o Jehova arakhi poklo narodo. Razmislin akaljestar: Amen propovedinaja hem sikavaja o čačipe ki celo Phuv (Mat. 28:19, 20). Adžahar mothovaja e Bengese lošna buča. Te šaj, o Beng bi čhinavi amen, ama našti te čerel odova. Odoljese, na valjani te dara ando lošna duhovna sile. Amen džanaja so „o Jehova pe jačhencar rodela ki celo Phuv te šaj te mothovi po zoraljipe te arakhi okoljen so celone viljeja služinena oljese“ (2. Let. 16:9). Ako amen hijam verna e Jehovase, tegani o demonja našti trajno te čeren amendže lošnipe.
BLAGOSLOVIJA OKOLJENDŽE KOLA PRIHVATINENA E JEHOVASI POMOĆ
16-17. Vačer jekh primer kova mothovi so valjani amendže hrabrost te šaj te borina amen protiv o lošna duhovna sile.
16 Valjani amendže hrabrost te šaj te borina amen protiv o lošna duhovna sile, posebno ked o amala ja i porodica protivinena pe amendže. On mislinena so diso lošno ka ovel ako na čeraja odova so on čerena. Ama, o Jehova blagoslovini sa okoljen soj tane hrabra. Te dikha o primer andi amari phen i Erika koja živini ki Gana. I Erika hine la 21 berš ked počmindža te proučini i Biblija. Olako dad hine svešteniko kova bavindža pe magija. Ov manglja i Erika te učestvujini ko jekh običaj kuri valjandža te hal o mas so dela pe sar žrtva olake dadese devljendže. I Erika na manglja te čerel odova hem olaki porodica mislindža so oj marela muj oljenge devljendže. On mislindže so oljenge devela ka kazninen ljen adžahar so ka oven naborme.
17 I Erikaki porodica pokušindža te čhivel la te učestvujini ko odova običaj, ama oj na manglja, iako sebepi odova morandilji te ikljol ando čher. Nesave phralja ljelje la koro peste. O Jehova but blagoslovindža e Erika – odoljese so odola phralja hem phenja ulje sar olaki porodica (Mar. 10:29, 30). Iako olaki porodica odreknindža pe olatar hem thardže olake šeja, i Erika ačhilji verno e Jehovase, krstindža pe hem akana tani opšti pionir. Oj na darala ando demonja. Kotar pi porodica i Erika phenela: „Svako dive molinava man jekh dive mi porodica te dikhel kobor tano šukar te pendžara e Jehova hem te ovel amen sloboda koja avela ando Devel.“
18. Kola blagoslovija ka oven amen ako isi amen poverenje ko Jehova?
18 Na ka ovel amen sare odobor bare kušnje. Ama, sare valjani te borina amen protiv o lošna duhovna sile hem te ovel amen poverenje ko Jehova. Odoljese ka ovel amen but blagoslovija hem o Beng na ka hovavi amen. Isto adžahar, na ka mukha i dar ando demonja te čhinavi amen te služina e Jehovase. Uzo odova, ka zorjačera amaro amaljipe e Jehovaja. O apostol Jakov pisindža: „Oven podložna e Devljese, a protivinen tumen e Bengese, hem ov ka našel tumendar. Oven paše e Devljeja, hem ov ka ovel paše tumencar“ (Jak. 4:7, 8).
DŽILI 150 Bog je naš izbavitelj
^ odl. 5 Odoljese so but mangela amen, o Jehova upozorini amen so o lošna duhovna sile šaj te čeren amendže lošnipe. Sar o lošna duhovna sile hovavena e manušen? So šaj te čera te šaj te borina amen protiv oljende? Ko akava članko ka dikha sar o Jehova pomožini amen te na hovavena amen o lošna duhovna sile.
^ odl. 3 OBJASNIME LAFIJA: O spiritizam odnosini pe ko verovanja hem ko buča so čerena pe, a povezime tane e demonencar. Odova uključini o verovanje so o duh ando manuš živini palo meribe hem so šaj odova duh te vačeri e dživde manušencar, posebno prekalo manuša kola vačerena e duhoncar. O spiritizam šaj te ovel hem ked neko čerela madžije ja gatini. Ko akava članko i magija odnosini pe ko okultizam. A i magija šaj te ovel hem ked neko dela armanja, bahini hem cidela o madžije. Odova nane isto sar ked o madžioničar čerela trikija te asačeri e manušen.
^ odl. 12 O starešine nane ljen pravo te čeren pravilija ked vačeri pe andi zabava. Svako hrišćanin isi lje piklji savest koja tani oblikujimi premalji Biblija hem svako valjani kokri te odlučini so ka čitini, so ka dikhel ja so ka čheljel. O mudra poglavarija brininena odoljestar i zabava ki porodica te ovel premalo biblijake načelija. (Dikh ki srpsko čhib o članko „Da li su kod Jehovinih svedoka zabranjeni određeni filmovi, knjige i muzika?“ ko sajt jw.org®. Dža ko O NAMA > UOBIČAJENA PITANJA.)
^ odl. 54 SO DIKHAJA KO SLIKE: O Isus tano mothovdo sar zoralo Kralj kova vladini ando nebo hem predvodini i nebesko vojska. Upro oljende tano e Jehovaso presto.
