1. Ko kova način o phral Rasel hem olese saradnikija istražindže i Biblija hem sose odova način hine šukar?

POBUTER ando šel berš angleder, o phral Čarls Tejz Rasel hem olese saradnikija odnosno jekh tikni grupa ando manuša kola istražindže i Biblija, počmindže te sastajinen pe. On manglje te dikhen da li šaj te haljon so i Biblija čače sikavi ando Jehova, ando Isus Hrist, ando odova so desini pe e mulencar hem kotar i otkupnina. Olengo način sar proučindže hine jednostavno. Počminena bi adžahar so bi neko postavini o pučibe hem palo odova sare bi istražinena sa o stihija kola tane povezime odole temaja. Ko krajo, bi pisinena odova so haljilje andi odija tema. O Jehova pomožindža odole manušendže te haljon but važna čačipa andi Biblija kola tane važna hem amendže avdije.

2. Sar šaj te ana pogrešno zaključko ked pokušinaja te haljova dijekh e biblijako proročanstvo?

² Ama, akala Istraživačija andi Biblija but sigate haljilje so popharo tano te haljove jekh e biblijako proročanstvo nego li te haljove jekh e biblijako sikljovibe. Sose tano adžahar? Sar prvo, e biblijake proročanstvija najšukar haljona pe dži ispuninena pe ja palo olengo ispunjenje. Ama, isi pana jekh buti. Te bi ispravno haljovaja jekh proročanstvo, neophodno tano te džana oleso kontekst. Ako usredsredinaja amen samo ko jekh deo ando proročanstvo hem na dikhaja aver buča olestar, šaj te ana pogrešno zaključko. But šukar primer sar šaj te desini pe odova tano o proročanstvo kova arakhela pe ki e biblijaki knjiga Joilo. Hajde te vačera kotar odova proročanstvo hem te dikha sose hine potrebno te menjina o način sar haljiljam le.

3-4. Sar dži akana haljiljam o proročanstvo ando Joilo 2:7-9?

³ Čitinen Joilo 2:7-9. O Joilo proreknindža so o skakavcija ka opustošinen i izraelsko phuv. Odola pohlepna  insektija kola isi len e lavese danda hem e lavesi vilica ka han sa anglo peste (Joilo 1:4, 6). But berša verujindžam so akava proročanstvo odnosini pe ko e Jehovaso narodo kova neprestano propovedini sar o skakavcija kola niko naštindža te zaustavini. Sar so o skakavcija opustošinena i phuv, isto adžahar, amen haljiljam so amaro propovedibe razorno utičini upro manuša kolen kontrolišinena o religiozna vođe. *

⁴ Odova objašnjenje bi ovela logično ako bi osmotrinaja samo o stihovija kotar Joilo 2:7-9. Ama, ako osmotrinaja celo proročanstvo haljovaja so nane le odova značenje. Mangaja te dikha štar razlogija kola ka mothoven sose adžahar mislinaja.

5-6. Kotar kola pučiba šaj razmislinaja ked čitinaja o izveštaj ando (a) Joilo 2:20? (b) Joilo 2:25?

⁵ Sar prvo, hajde te dikha so o Jehova phendža kotar akala skakavcija: „Okole kova avela ando sever [o skakavcija] ka uspudinav dur tumendar“ (Joilo 2:20). Ako o skakavcija predstavinena e Jehovase svedokon kola šunena e Isusesi zapovest adžahar so propovedinena hem čerena učenikonen, sose tegani o Jehova phenela so ka uspudini len? (Jezek. 33:7-9; Mat. 28:19, 20). Jasno tano, so o Jehova na ka uspudini pe verna slugen. Umesto odova, ov ka uspudini diso ja okolen kola protivinena pe lese narodose.

⁶ Sar dujto, hajde te razmislina ando odova so pisini ko Joilo 2:25. Odothe o Jehova phenela: „Me ka irinav tumendže sa o buča kola našaldžen beršencar, kola halje tumendar o skakavcija, o skakavcija bizo phakha, o skakavcija kola našti te čaljon hem o pohlepna skakavcija, mi bari vojska koja bičhaldžum protiv tumende“ (Joilo 2:25). Zapazin so o Jehova phendža so ka „irini“ ja so ka nadoknadini sa i šteta koja čerdže o skakavcija. Ako bi o skakavcija predstavinena e Jehovase narodo kova propovedini, tegani da li bi odova značini so i poruka koja propovedinaja čerela i šteta? Baš suprotno, amari poruka spasini averengo životi hem šaj te podstaknini okolen kola čerena lošna buča te pokajinen pe (Jezek. 33:8, 19). Odova tano baro blagoslov olendže!

7. Premalo Joilo 2:28, 29, so o lafija „palo odova“ pomožinena amen te haljova?

⁷ Čitinen Joilo 2:28, 29. Sar trito, hajde te dikha kole redoja desinena pe o događaja ko akava proročanstvo. Da li zapazindžan so o Jehova phenela: „Palo odova ka bičhalav mo sveti duh“? Ked ka ovel odova? Odova ka ovel palo odova so o skakavcija ka završinen pi buti. Ako o skakavcija tane o objaviteljija ando e Devleso Kraljevstvo, tegani sose bi o Jehova bičhali lendže po duh palo odova so završinena o propovedibe? Jekh tano sigurno: Bizo e Devleso moćno sveto duho, on niked na bi uspinena te istrajinen ko propovedibe ko sa odola berša dži doživindže o protivljenje hem zabrane.

8. Kas predstavinena o skakavcija ando Otkrivenje 9:1-11? (Dikh i slika ko početko ando akava časopis.)

⁸ Čitinen Otkrivenje 9:1-11. Hem ko krajo, hajde te dikha o štarto razlog. Angleder mislindžam so o skakavcija kolendar o Joilo pisindža tane povezime amare službaja sebepi jekh slično proročanstvo kotar i knjiga Otkrivenje. O proročanstvo ando Otkrivenje vačeri kotar o skakavcija  kola isi len manušikane muja, a upro šere „diso sar zlatna krune“ (Otkr. 9:7). On mučinena „e manušen [e Devlese neprijateljen] kola nane len e Devleso pečati ko čekati“ (Otkr. 9:4, 5). Odova period trajini 5 masek, otprilike odobor kobor hem živini jekh skakavco. Akate verovatno vačeri pe ando e Devlese pomazana sluge. On hrabro objavinena e Devlese osude protiv akava lošno sveto hem odola osude lošno utičinena upro okola kola tane deo ando odova sveto.

9. Kola bare razlike isi maškaro skakavcija kotar i knjiga Joilo hem andi knjiga Otkrivenje?

⁹ Ama, iako isi disave sličnostija maškaro akala duj proročanstvija kotar o Otkrivenje hem ando Joilo, isi hem nekobor bare razlike. Na primer, ko e Joileso proročanstvo o skakavcija uništinena o biljke (Joilo 1:4, 6, 7). Ki e Jovanesi vizija, e skakavcendže hine „zapovedimo te na čeren i šteta e čarjače ki phuv“ (Otkr. 9:4). O skakavcija kola o Joilo dikhlja avena kotar sever (Joilo 2:20). A o skakavcija kola o Jovan dikhlja avena kotar bezdan (Otkr. 9:2, 3). O Joilo phenela so o skakavcija tane uspudime, a ko Otkrivenje phenela pe so o skakavcija nane uspudime, već soj tano dozvolimo lendže te završinen pi buti. Premalo odova, našti te arakha nijekh dokaz ki Biblija so o Jehova nane zadovoljno olencar.  (Dikh o okvir „ O proročanstvija kotar o skakavcija – slična ama različita.“)

10. Vačer jekh e biblijako primer kova mothovi sar jekh lafi šaj te predstavini duj različita buča.

¹⁰ Sa akala razlike pomožinena amendže te haljova so akala duj proročanstvija nane povezime. Da li odova značini so o skakavcija andi knjiga Joilo na predstavinena isto odova so predstavinena o skakavcija andi knjiga Otkrivenje? Ja. Ki Biblija, jekh isto lafi šaj te predstavini duj različita buča. Na primer, ko Otkrivenje 5:5, e Isusese phenela pe soj tano „Lav ando e Judaso pleme“, a isto odova lafi lav, koristini pe hem ko stih kotar 1. Petrova 5:8 kuri e Bengese phenela pe soj tano „ričućo lav.“ O štar razlogija kola dikhljam dži akana pomožindže amendže te haljova so o proročanstvo kotar Joilo na haljiljam ko ispravno način. Tegani, so akava proročanstvo čače značini?

11. Sar o Joilo 1:6 hem 2:1, 8, 11 pomožinena amendže te haljova kas predstavinena o skakavcija?

¹¹ Ked hari popaše osmotrinaja o kontekst kotar e Joileso proročanstvo haljovaja so ov vačeri kotar o vojno napad (Joilo 1:6; 2:1, 8, 11). O Jehova phendža so ka upotrebini pi „bari vojska“ (e vavilonsko vojnikonen) te kaznini e neposlušno Izraelcen (Joilo 2:25). Odolese tano normalno so asi akija vojska phenela pe so avela „ando sever“, sose o Vaviloncija napadindže o Izrael kotar sever (Joilo 2:20). Akija vojska tani organizujimi sar o skakavcija. O Joilo olendar pisindža: „Svako [vojniko] džala pravo anglal... khuvena ki diz, ripinena ko zidija. Ukljona ko čhera, khuvena ando prozorija sar o lopovi“ (Joilo 2:8, 9). Da li šaj te zamisline odija scena? Kuri god te pođine othe tane o vojnikija. Niko našti te garavi pe, ni te našel andi akija vavilonsko vojska.

12. Sar ispunindža pe o proročanstvo ando skakavcija kotar i knjiga Joilo?

¹² Sar skakavcija, o Vaviloncija (o Haldejcija) napadindže o Jerusalim ko 607. berš, angleder amari era. I Biblija phenela: „O haldejsko kraljo... e mačeja mudardža olenge terne čhaven. Na mothovdža samilost ni premalo čhave, ni premalo čhaja, ni premalo phure, ni premalo slaba. O Devel dindža lese sa ko vasta. Thardža o čher kotar čačutno Devel, peravdža o jerusalimska zidija, thardža sa o tvrđave hem uništindža sa soj tano vredno“ (2. Let. 36:17, 19). Ked o Vaviloncija napadindže hem uništindže i phuv, o manuša šajindže samo te phenen: „Akija tani phuv bizo pani ki koja na bešena ni o manuša a ni o životinje. Dindi tani e Haldejcendže ko vasta“ (Jer. 32:43).

13. Objasnin so značinena o stihovija ando Jeremija 16:16, 18?

¹³ Oko 200 berš palo e Joileso proročanstvo, o Jehova prekalo Jeremija proreknindža pana diso kotar akava napad. Ov phendža so o vojnikija pažljivo ka roden te bi phanden e Izraelcen kola čerdže lošna buča. „’Ka bičhalav buten ribaren‘, phenela o Jehova, ’kola ka astaren len. Palo odova ka bičhalav buten lovcen hem on ka astaren len ko sa o gore, ko sa o bregija hem ka ikalen len kotar o pukotine ko stene. Najangleder ka kazninav len potpuno aso olengo prestup hem olengo greh.‘“ E Izraelcendže kola na kajinena pe aso lošna buča kola čerdže, na ka pomožinen ni o okeanija ni o šume te garaven pe kotar i vavilonsko vojska ja kotar e Jehovasi kazna (Jer. 16:16, 18).

14. Ked ispunindža pe o proročanstvo kotar o Joilo 2:28, 29?

¹⁴ Ko e Joileso proročanstvo garavi pe jekh pozitivno buti, sose vačeri kotar i obnova. I phuv palem ka ovel plodno (Joilo 2:23-26). Tegani, sa o manuša ka džanen o čačipe. O Jehova phenela: „Palo odova ka bičhalav mo sveti duh upro sa o vrste ando manuša, hem tegani tumare čhave hem tumare čhaja ka prorokujinen... Čak hem ko me robovija hem ko robinje ka bičhalav mo sveti duh ko odola dive“ (Joilo 2:28, 29). Akava proročanstvo na ispunindža pe odmah palo odova so o Izaraelcija irindže pe ando Vavilon čhere, već nekobor vekovija palo odova, ki Pedesetnica 33. berš, amari era. Sar džanaja odova?

15. Savi razlika isi maškaro e Petarese lafija ko Dela apostolska 2:16, 17 hem maškaro odova so pisini ko Joilo 2:28 hem so mothovi odova?

¹⁵ E Devleso duh podstaknindža e Petare te primenini o lafija ando Joilo 2:28, 29 ko događaj kova desindža pe ki Pedesetnica. Odova sabalje, oko 9 o sati o Devel bičhaldža po sveti duh kova podstaknindža okolen kola dobindže le te počminen te vačeren „kotar e Devlese moćna delija“ (Dela 2:11). Isto adžahar, e Devleso duho podstaknindža e Petare te koristini hari averčhane lafija dži citirindža e Joileso proročanstvo. Ama, da li haljoveja kaj tani i razlika? (Čitinen Dela apostolska 2:16, 17.) Umesto te počmini e lafencar „palo odova“, o Petar phendža: „Ko poslednja dive.“ Odola lafija odnosindže pe ko period angleder o Jerusalim te ovel uništimo ko 70. berš, amari era. O Devel ka bičhali po „duh upro sa o vrste ando manuša.“ Premalo odova haljovaja so nakhlja disavo vreme kotar o period  ked hine pisimo o proročanstvo ando Joilo dži na ispunindža pe.

16. Sar e Devleso duho utičindža ko propovedibe ko prvo veko hem sar avdije utičini?

¹⁶ Palo odova so o Devel bičhaldža po sveti duh upro hrišćanja ko prvo veko, on počmindže te propovedinen šukar vest ko celo sveto. Ked o apostol Pavle pisindža akija poslanica e Koloskonendže oko 61. berš, amari era, ov phendža so i šukar vest propovedindža pe „sa e manušendže talo nebo“ (Kol. 1:23). Ko odova vreme, ked o Pavle živindža, o izraz „sa e manušendže“ odnosindža pe ko sveto kova tegani hine pendžarutno. Sebepi e Devleso moćno sveto duho, ko amaro vreme propovedini pe pobuter nego li angleder – ko celo sveto. (Dela 13:47; dikh o okvir „ Ka bičhalav mo sveto duho.“)

17. Sar akana haljovaja e Joileso proročanstvo ando skakavcija?

¹⁷ So menindža pe? Akana pošukar haljovaja o proročanstvo ando Joilo 2:7-9. Sar so dikhljam, akala stihovija na odnosinena pe upro amaro revno propovedibe, već ki vavilonsko vojska koja napadindža o Jerusalim ko 607. berš, angleder amari era.

18. So na menindža pe ando e Jehovaso narodo?

¹⁸ So na menindža pe? E Jehovaso narodo hem ponodri propovedini i šukar vest ko sa o thana ki phuv hem ko sa o načinja (Mat. 24:14). Nijekh vlast našti te sprečini amen te čera amaro zadatko, te propovedina. Sebepi e Jehovaso blagoslov, hrabro propovedinaja i šukar vest ando Kraljevstvo sar niked dži akana! Amen ponizno prihvatinaja e Jehovasi pomoć te bi šaj te haljova e biblijake proročanstvija, hem uverime hijam so ked ka avel o pravo vreme o Jehova ka vodini amen adžahar so ka pomožini amendže potpuno te haljova o čačipe (Jov. 16:13).