1-2. So desini pe angleder o Isus te vaćeri pe poslednja lafija?

AKANA tano 14. nisan 33. berš, nevi era. O Isus tano nepravedno optužimo hem osudimo aso zločin kova na ćerđa. O manuša asana lese, okrutno mučinena le hem palo odova kovinena le ko mučeničko stubo. Olese vasta hem pre tane kovime. Svako puti ked lela vazduh ja ked vaćeri diso, ov osetini bari dukh. Ama, ov mora te vaćeri sose isi le diso važno te phenel.

² Akana ka razmotrina e Isusese poslednja lafija kola phenđa đi hine ko mučeničko stubo hem ka dikha so šaj te sikljova olendar. Avere lafencar, hajde te „šuna ole“ (Mat. 17:5).

3. Upro kaste o Isus mislinđa ked phenđa: „Mo Dad, oprostin lenđe“?

³ So o Isus phenđa? Ked hine ko mučeničko stubo, o Isus molinđa pe: „Mo Dad, oprostin lenđe“. Kase te oprostini? Amen šaj te haljova odova ando lafija kola ov phenđa: „On na đanena so ćerena“ (Luka 23:33, 34). O Isus verovatno mislinđa upro rimska vojnikija kola kovinđe le ko stubo. On na đanđe soj tano ov e Devleso Ćhavo. Isto ađahar, ov šaj mislinđa upro manuša kola rodinđe te ovel mudardo, ama kola kasnije mothovđe vera upro leste (Dela 2:36-38). O Isus na dozvolinđa sebepi i patnja koja doživinđa te ovel ogorčeno ja holjamo (1. Petr. 2:23). Umesto odova, ov molinđa e Jehova te oprostini okolenđe kola mudarđe le.

4. So sikljovaja ando odova so o Isus hine spremno te oprostini okolenđe kola protivinđe pe olese?

 ⁴ So šaj te sikljova ando e Isusese lafija? Sar o Isus, hem amen valjani te ova spremna te oprostina averenđe (Kol. 3:13). Disave manuša, a odola šaj te oven hem amare rođakija, šaj te protivinen pe amenđe sebepi so na haljona amare verovanja hem amaro način sar živinaja. On šaj te vaćeren hovajbe amendar averenđe, te ponižinen amen anglo avera, te uništinen amare publikacije ja čak šaj te pretinen so ka maren amen. Ama, umesto te ićera i holi ano amende, amen valjani te molina e Jehova te phravel olenge jaćha te šaj hem on jekh dive te prihvatinen o ćaćipe (Mat. 5:44, 45). Disavo puti šaj te ovel amenđe pharo te oprostina lenđe, posebno ako hine but lošna premalo amende. Ama, ako dozvolinaja i ogorčenost hem i holi te mukhel koreno ano amaro vilo, amen odoleja ka ćera lošno samo kokri amenđe. Jekh phen phenela: „Haljiljum so te oprostinav averenđe na značini so mislinava so odova so ćerđe maje tano ispravno ja so dozvolinava lenđe te ponašinen pe lošno premalo mande, već odova značini so na ićerava više i holi ano mande“ (Ps. 37:8). Ked oprostinaja amen birinaja te na ićera i holi ano amende sebepi o lošno iskustvo kova doživinđam (Ef. 4:31, 32).

5. So o Isus obećinđa e manušese kova hine uzo leste ko stubo hem sose obećinđa lese odova?

⁵ So o Isus phenđa? Uzo Isus hine pana duj zločincija ko mučeničko stubo. Ki početka, solduj marđe lese muj (Mat. 27:44). Ama, hari palo odova jekh olendar menjinđa po stav. Ov haljilo so o Isus na ćerđa „nisavo lošnipe“ (Luka 23:40, 41). Ov čak mothovđa so verujini so o Isus ka uskrsnini hem so jekh dive ka vladini sar Kralj. Ov phenđa e Isusese: „Setin tut koro mande ked ka ave ko to Kraljevstvo“ (Luka 23:42). Akava manuš ćaće mothovđa bari vera! O Isus phenđa lese: „Obećinava tuće avdije, tu ka ove mancar [na ko Kraljevstvo nego] ko raj“ (Luka 23:43). Zapazin so o Isus dinđa jekh obećanje akale manušese kova odnosinđa pe lično upro leste ađahar so koristinđa o lafija „obećinava tuće“ hem „ka ove mancar“. O Isus šajinđa te phenel odola lafija kola dinđe nada akale manušese, sebepi so đanđa so oleso Dad tano milosrdno (Ps. 103:8).

6. So sikljovaja ando e Isusese lafija kola phenđa e manušese kova hine uzo leste ko stubo?

⁶ So šaj te sikljova ando e Isusese lafija? O Isus savršeno oponašinđa pe Dade (Jevr. 1:3). O Jehova tano spremno te oprostini hem te mothovi amenđe milosrđe, ako ćaće kajinaja amen aso grehija kola ćerđam angleder hem ako verujinaja so ov šaj te oprostini amenđe prekali e Isusesi otkupno žrtva (1. Jov. 1:7). Disavenđe šaj te ovel pharo te verujinen so o Jehova šaj čak te oprostini olenge greške kola ćerđe angleder. Ako disavo puti hem tu ađahar osetineja tut, razmislin akalestar: Hari angleder te merel, o Isus mothovđa milosrđe premalo zločinco kova samo so počminđa te mothovi vera upro leste. Odolese, zamislin samo kobor o Jehova ka mothovi milosrđe pe verno slugenđe kola dena sa pestar te ićeren pe ko olese zapovestija (Ps. 51:1; 1. Jov. 2:1, 2).

7. Premalo Jovan 19:26, 27, so o Isus phenđa e Marijaće hem e Jovanese hem sose phenđa odova?

⁷ So o Isus phenđa? (Čitin Jovan 19:26, 27.) O Isus brininđa pe andi pi daj koja verovatno hine udovica. Olese phralja hem phenja šajinđe te brininen pe ando olake materijalna  potrebe. Ama, ko šajinđa te brinini pe ando olake duhovna potrebe? Ništa na mothovi amenđe so e Isusese phralja tegani hine olese učenikija. Ama, o Jovan hine e Isuseso verno apostol hem jekh ando olese paše amala. O Isus upro okola kola služinđe e Jehovase zajedno oleja dikhlja sar upri pi porodica (Mat. 12:46-50). O Isus manglja e Marija hem odolese phenđa e Jovanese te brinini pe olatar, sose đanđa so ov ka brinini pe ando olake duhovna potrebe. Pe dajaće, phenđa: „Aće to ćhavo“. A e Jovanese, phenđa: „Aće ti daj“. Kotar odova dive, o Jovan ulo e Marijaće sar ćhavo hem brininđa pe olatar sar pe dajatar. Kobor baro mangipe o Isus mothovđa premali akija romni koja  sar bijandilo brininđa pe olestar hem aćhilji uzo leste sa đi na mulo!

8. So šaj te sikljova ando odova so o Isus phenđa e Marijaće hem e Jovanese?

⁸ So šaj te sikljova ando e Isusese lafija? Amen šaj te ova popaše amare phralencar hem phenjencar nego amare porodicaja. Amare rođakija šaj te protivinen pe amenđe ja šaj te vazden pe vasta amendar, ama sar so o Isus obećinđa amenđe, ako aćhovaja paše uzo Jehova hem olesi organizacija, amen ka dobina „100 putija poviše“ ando odova so našalđam. But phralja hem phenja andi amari organizacija ka oven amenđe sar ćhavo, ćhaj, daj ja dad (Mar. 10:29, 30). Sar osetineja tut sebepi odova so isi tut phralja hem phenja kola tane ko jekhipe odolese so isi len vera, mangena e Jehova hem jekh jekhe? (Kol. 3:14; 1. Petr. 2:17).

9. So sikljovaja kotar e Isusese lafija ando Matej 27:46?

⁹ So o Isus phenđa? Hari angleder te merel, o Isus vićinđa ko sa o glaso: „Devla moklo, Devla moklo, sose mukhljan man?“ (Mat. 27:46). Ki Biblija na pisini sose o Isus phenđa akala lafija. Ama, hajde te razmislina hari olendar. Ked phenđa akala lafija, o Isus ispuninđa o proročanstvo ando Psalam 22:1. * Isto ađahar, akala lafija jasno mothovđe so o Jehova ko odova trenutko na štitinđa le (Jov 1:10). O Isus haljilo so oleso Dad mukhlja le ko olese neprijateljenge vasta te bi olesi vera ovela ispitimi đi o meribe. Nijekhe manušesi vera na hine ađahar ispitimi. Uzo odova, akala lafija mothovena amenđe so ov na ćerđa nijekh zločin sebepi kova valjanđa te merel.

10. So sikljovaja ando odova so o Isus phenđa pe Dadese?

¹⁰ So šaj te sikljova ando e Isusese lafija? Jekh buti koja šaj te sikljova tani te na očekujina so o Jehova ka zaštitini amen ando izazovija kola ispitinena amari vera. Sar so o Isus hine iskušimo đi o meribe, hem amen valjani te ova spremna te mothova so hijam verna đi o meribe (Mat. 16:24, 25). Ama, amen šaj te ova sigurna so o Devel na ka mukhel te ova iskušime pobuter odolestar so šaj te izdržina (1. Kor. 10:13). Isto ađahar, sikljovaja so hem amen sar o Isus šaj te doživina bari nepravda (1. Petr. 2:19, 20). Okola kola protivinena pe amenđe na ćerena odova sose ćerđam diso lošno, već odolese so na hijam deo ando akava sveto hem so propovedinaja i šukar vest (Jov. 17:14; 1. Petr. 4:15, 16). O Isus haljilo sose o Jehova mukhlja le te patini. Ama, disave e Jehovase verna sluge podijekh puti pućena pe sose o Jehova dozvolini te desinen pe lenđe lošna buća (Avak. 1:3). Amaro milosrdno hem strpljivo Dad haljola so odova na značini so olengi vera tani slabo, već so valjani lenđe uteha koja samo ov šaj te del len (2. Kor. 1:3, 4).

11. Sose o Isus phenđa o lafija ando Jovan 19:28?

¹¹ So o Isus phenđa? (Čitin Jovan 19:28.) Sose o Isus phenđa: „Trošalo hijum“? Ov phenđa odova te bi ispunini pe o proročanstvo ando Psalam 22:15, kova phenela: „Nane man više snaga, uljum sar phago phuvjako ćaro, mi ćhib lepini pe ko mo muj.“ Isto ađahar, palo sa odova so o Isus doživinđa hem i dukh koja osetinđa đi hine ko mučeničko stubo, ov sigurno hine but trošalo. Valjanđa lese diso te pijel.

12. So šaj te sikljova ando odova ked o Isus phenđa: „Trošalo hijum“?

 ¹² So šaj te sikljova ando e Isusese lafija? O Isus na mislinđa soj tano slabo ako mothovi averenđe sar osetini pe, ni amen na valjani te osetina amen ađahar. But putija ko amaro životi, amen mislinaja so na valjani te roda pomoć averendar. Ama, ako valjani amenđe pomoć, amen na valjani te lađa te roda la. Na primer, ako hijam phure ja naborme, amen šaj te puća disave phrale ja phenja te vozinen amen đi o doktori ja đi i prodavnica. Isto ađahar, ako hijam obeshrabrime, šaj te puća jekhe starešina ja jekhe zrelo phrale ja phenja te odvojinen vreme te šunen amen ja te phenen amenđe disavo „šužo lafi“ kova ka ohrabrini amen (Posl. 12:25). Ma bistri so amare phralja hem phenja mangena te pomožinen amen ked avena o „phare dive“ (Posl. 17:17). Ama, on našti te đanen soj tano amenđe ki godi. On našti te đanen so valjani amenđe sa đi amen na phenaja lenđe odova.

13. So ćerđa o Isus odoleja so aćhilo verno đi o meribe?

¹³ So o Isus phenđa? Ko 14. nisan ko trin sati palo pladne, o Isus glasno phenđa: „Ćerđum sa so rodinđan mandar“ (Jov. 19:30). E Isusese lafija kola phenđa, hari angleder te merel, mothovena so ov ćerđa sa so o Jehova rodinđa olestar. Odoleja so aćhilo verno sa đi o meribe, o Isus ćerđa nekobor buća. Sar prvo, ov mothovđa so o Beng hovavi. Mothovđa so jekh savršeno manuš šaj te aćhol verno ko sa, bizo obzir so o Beng šaj te ćerel lese. Sar dujto, o Isus dinđa po životi sar otkupnina. Sebepi so o Isus mulo, amen sar nesavršena manuša šaj te ova amala e Devleja hem šaj te ovel amen nada ko večno životi. Sar trito, o Isus mothovđa soj tano o Jehova pravedno vladari hem cidinđa i lađ ando pe Dadeso anav.

14. So valjani te ova odlučna te ćera svako dive? Objasnin.

¹⁴ So šaj te sikljova ando e Isusese lafija? Amen valjani te ova odlučna te aćhova verna svako dive ko amaro životi. Razmislin ando lafija kola phenđa o phral Maksvel Frend kova hine instruktor ki škola Galad. Ko jekh međunarodno kongres, o phral Frend ko po govor andi vernost phenđa: „Ma aćhav tajsase odova so šaj te phene ja te ćere avdije. Da li hijan sigurno so hem tajsa ka ove đivdo? Živin svako dive samći odija tani ti poslednjo šansa te mothove so hijan dostojno te živine večno.“ Hajde hem amen svako dive te živina samći odija tani amari poslednjo šansa te mothova so hijam verna! Odolese, čak ako valjani te mera, amen šaj te phena: „Jehova me dinđum sa mandar te aćhovav tuće verno, te mothovav so o Beng tano hovavno, te posvetinav to anav hem te opravdinav to pravo te vladine!“

15. Premalo Luka 23:46, ko so o Isus hine sigurno?

¹⁵ So o Isus phenđa? (Čitin Luka 23:46.) O Isus hine le poverenje upro Jehova hem odolese phenđa: „Mo Dad, ko te vasta dava mo duh.“ Ov đanđa so oleso životi zavisini ando Jehova hem hine sigurno so oleso Dad na ka bistrel le.

16. So sikljovaja ando odova so ulo jekhe phralese kova hine le 15 berš?

¹⁶ So šaj te sikljova ando e Isusese lafija? Ov spremno te mukhe to životi ko e Jehovase vasta. Te šaj te ćere odova valjani te „uzdajine tut upro Jehova celone vileja“ (Posl. 3:5). Te dikha o primer ando Džošua kova ked hine le 15 berš hine but nabormo. Ov odbinđa te prihvatini disavo medicinsko lečenje  sebepi so bi odoleja mothovi so na šunela e Devleso zakon. Hari angleder te merel, ov phenđa pe dajaće: „Mi daj, me hijum ano e Jehovase vasta [...] Šaj te phenav tuće, mi daj, sose hijum potpuno sigurno: đanava so o Jehova ka uskrsnini man. Ov đanela soj tano maje ko vilo hem me but mangava le.“ * Bi ovela šukar svako amendar te pućel pe: „Ako tani mi vera ispitimi, odolese so hijum ki disavi situacija ki koja šaj te našalav mo životi, da li tegani ka mukhav mo životi ko e Jehovase vasta hem da li ka verujinav lese so ov ka setini pe upro mande“?

17-18. Kola važna buća sikljiljam? (Dikh o okvir „ So sikljovaja ando e Isusese poslednja lafija“?)

¹⁷ Kobor važna buća sikljiljam ando e Isusese poslednja lafija! Odola lafija podsetinđe amen so valjani te oprostina averenđe hem te verujina so o Jehova ka oprostini amenđe. Amen hijam bahtale so hijam deo andi duhovno porodica ki koja tane amare phralja hem phenja kola tane spremna te pomožinen amen. Ama, ako valjani amenđe pomoć, valjani te roda la. Ðanaja so o Jehova ka pomožini amen te istrajina ko bilo kova problemi kova šaj te ovel amen. Isto ađahar, dikhljam kobor tano važno svako dive te živina, ka phene odova tano zadnjo dive te mothova so hijam verna, uverime so amaro životi ko e Jehovase vasta tano ko sigurno.

¹⁸ Ćaće, ando e Isusese lafija kola phenđa đi hine ko mučeničko stubo sikljiljam but buća. Ked primeninaja odova so sikljiljam, amen ka šuna odova so o Jehova phenđa amenđe ando po Ćhavo: „Šunen ole“ (Mat. 17:5).