DA LI isi disavo zaduženje kova bi tu mangeja te čere ki skupština, ama akana našti? Šaj mangeja te čere odova so neko aver čerela. Ja odija odgovornost hine tut angljeder. Ama, sebepi o phuripe, o sastipe, o finansijska problemija ja odoljese so brinineja tut kotar tiklji porodica akana našti te čere odova so čerdžan angljeder. Ja sebepi o promene ki organizacija, šaj morandiljan te mukhe disavo zaduženje kova čerdžan but berš. Kova god te ovel o razlog, šaj osetineja so akana na čereja odova so mangeja ki služba e Jehovase. Ko asavke situacije, haljola pe so disavo puti šaj te ove razočarimo. Ama, so šaj te pomožini tut te na ove razočarimo, obeshrabrimo hem holjamo? Sar šaj te ove bahtalo?

Kotar o Jovan Krstitelj šaj te sikljova sar te ačhova bahtalje. Ov hine lje bare odgovornostija hem verovatno na adžičerdža so sa odova ka ovel ko oljeso dživdipe. Šaj ni ki godi na alo ljese so pobuter vreme ka ovel ko phanljipe nego ki služba. Ama, o Jovan hem ponodri hine bahtalo hem asavko stav hine lje dži o krajo ando poklo dživdipe. So pomožindža ljese te ovel asavko? Sar šaj amen te ačhova bahtalje iako hijam razočarime?

O Jovan počmindža pe službaja ko nilaj, ko 29. berš ki nevi era. O Jehova dindža lje zadatak te pripremini e manušen so ka avel o Mesija. Ov vačerdža: „Pokajinen tumen, sose o nebesko kraljevstvo alo paše“ (Mat. 3:2; Luka 1:12-17). But manuša šukar reagujindže. But oljendar alje but dural te šunen odova so vačeri, kajindže pe hem krstindže pe. Isto adžahar, o Jovan hrabro upozorindža e versko vođen, kola mislindže soj tane pošukar ando avera, so adžičeri ljen i presuda ako na meninena pe (Mat. 3:5-12). O Jovan krstindža e Isuse ko 29. berš ki nevi era. Odova hine najvažno buti koja čerdža ki piklji služba. Kotar tegani, o Jovan vačerdža sarinendže so mora te šunen e Isuse, kova hine o obećimo Mesija (Jov. 1:32-37).

Odoljese so o Jovan hine lje jekh posebno uloga, o Isus šajindža te vačeri: „Maškaro okola  soj tane bijande na uštilo niko koj tano pobaro ando Jovan Krstitelj“ (Mat. 11:11). Amen šaj te ova sigurna so o Jovan but radujindža pe sebepi o blagoslovija kola dobindža. Isto sar ov, but amendar dobindže bare blagoslovija. Jekh primer tano o phral Teri. Ov hem oljesi romni i Sandra, prekalo 50 berš hine ki punovremeno služba. O Teri phenela: „Hine man but šuže odgovornostija. Hijum lje pionir, čerdžum ko Betel, služindžum sar specijalni pionir, sar pokrajinski nadglednik, sar oblasni nadglednik, hem akana paljem hijum specijalni pionir.“ Amen hijam bahtalje ked dobinaja disavo teokratsko zaduženje. Ama, te šaj te ačhova bahtalje ked meninena pe amare okolnostija valjani but te trudina amen, sar so ka sikljova ando e Jovaneso primer.

O Jovan Krstitelj na našaldža poklo bahtaljipe odoljese so hine zahvalno asi služba koja dobindža. Te dikha jekh primer. Palo e Isuseso krštenje, o Jovan hine lje sa pohari učenikija, a o Isus sa pobuter. E Jovanese učenikija sikirindže pe, alje koro ljeste hem phendže: „Ače ov krstini hem sarine džana koro ljeste“ (Jov. 3:26). A o Jovan odgovorindža oljendže: „Ko isi lje nevesta, ov tano mladoženja. A o amal ando mladoženja, ked terdžola hem šunela lje, but radujini pe ked šunela o glaso kotar mladoženja. Adžahar hem me radujinava man hem miklji radost tani potpuno“ (Jov. 3:29). O Jovan na takmičindža pe e Isuseja, niti mislindža so oljesi služba nane odobor vredno sebepi so o Isus isi lje pobari uloga. Ov ačhilo bahtalo sebepi so cenindža piklji uloga sar „amal ando mladoženja“.

O Jovan hine zahvalno hem odova pomožindža lje te ačhol bahtalo, iako oljesi služba na hine lokhi. Na primer, ov sar bijandilo hine Nazirej hem odoljese naštindža te pijel vino (Luka 1:15). Te šaj te mothovi so o Jovan hine skromno, o Isus phendža: „O Jovan [...] ni halja ni pilja“. Ki aver strana, e Isusese hem oljese učenikonendže na hine ništa zabranimo hem živindže sar sa avera manuša (Mat. 11:18, 19). Isto adžahar, o Jovan na čerdža ni jekh čudo, ama džandža so e Isusese učenikija hem disave kola ki početka hine oljese učenikija čerdže čudija (Mat. 10:1; Jov. 10:41). O Jovan na dozvolindža odova te utičini upro ljeste, nego nastavindža te čerel poklo zadatko kova dindža lje o Jehova.

Hem amen ka ačhova bahtalje ako ceninaja amaro zadatko kova isi amen ki e Jehovasi služba. Amaro phral o Teri phenela: „Svako zadatko kova hine man čerdžum lje najšukar so šaj.“ Ked razmislini kotar piklji punovremeno služba, ov phenela: „Nane man sose te žalina man, sose sa šukar hine maje.“

Amen ka ova pana pobahtalje, ako razmislinaja odoljestar sose tani disavi odgovornost ki e Jehovasi služba odobor posebno. Bari tani čast te ova „e Devljese saradnikija“ (1. Kor. 3:9). Ako svako dive kosaja jekh predmet kova tano amendže but važno, ov ka sjajini pana pobuter. Isto adžahar, ako hor razmislinaja kobor tani bari čast te služina e Devljese, ka ačhova bahtalje. Amen na ka uporedina amen averencar. Na ka mislina so o zadatak kova o Jehova dindža amendže nane odobor vredno, sar o zadatak kova dindža averendže (Gal. 6:4).

O Jovan šaj džandža so oljesi služba na ka trajini but, ama šaj na džandža so odobor sigate ka završini pe (Jov. 3:30). Ko 30. berš ki nevi era, samo šov masek palo e Isuseso krštenje, o kralj Irod phanlja e Jovane. Ama, o Jovan nastavindža te vačeri soj tano ispravno (Mar. 6:17-20). So pomožindža ljese te ačhol bahtalo iako hine ko asavke okolnostija? O duhovna buča hine ljese najvažna.

Dži hine ko phanljipe, o Jovan šundža so o Isus proširindža pi služba (Mat. 11:2; Luka 7:18). O Jovan hine sigurno so o Isus tano Mesija, ama šaj pučlja pe sar o Isus ka ispunini sa okova so o proročanstvija vačerena oljestar. Sebepi so o Jovan džandža so o Mesija valjani te ovel kralj, šaj pučlja pe da li o Isus pana hari ka počmini te  vladini. Da li ka ikalji lje ando phanljipe? Odoljese so manglja te džanel pobuter ando odova so o Isus ka čerel, o Jovan bičhaldža duje peklje učenikonen te pučen e Isuse: „Da li tu hijan okova so valjani te avel ja te adžičera avere?“ (Luka 7:19). Ked irindže pe o Jovan sigurno pažljivo šundža ljen sar vačerena so o Isus prekalo čudija sačari e nabormen hem so palo odova bičhaldža ljen te phenen oljese: „O kore dikhena, o sakatija phirena, o gubava čistinena pe, o kašuke šunena, o mulje uštena, e čoroljendže vačeri pe o šukar haberi“ (Luka 7:20-22).

Oljenge lafija but ohrabrindže lje. Odoljeja potvrdindža pe so o Isus ispunindža o proročanstvija ando Mesija. O Isus na ikaldža e Jovane ando phanljipe, ama o Jovan džandža so oljesi služba hine vredno. Iako hine ko asavke okolnostija, ov hine lje razlog te ovel bahtalo.

Hem amen sar o Jovan šaj bahtaljipaja hem strpljivo te istrajina ako o duhovna buča tane amendže najvažna (Kol. 1:9-11). Amen šaj te istrajina ako čitinaja i Biblija hem ako hor razmislinaja odoljestar so čitindžam, sose odova ka setinčeri amen so amari služba e Jehovase tani but vredno (1. Kor. 15:58). Amari phen i Sandra phenela: „Svako dive čitinava po jekh poglavlje andi Biblija hem odova čerela man te ovav popaše e Jehovaja. Odova pomožini man o Jehova te ovel maje najvažno, a na me.“ Ked razmislinaja ando odova so čerena amare phralja hem phenja e Jehovase, odova šaj te pomožini amen te na razmislina samo amendar. „E masekosi emisija ki amari televizija JW Broadcasting^® pomožini amen te osetina so hijam deo andi amari organizacija hem te ačhova bahtalje dži čeraja amaro zadatko“, phenela i Sandra.

Isto sar o prorok Ilija, hem o Jovan revno čerdža poklo zadatak. Sar ov, hem o Jovan „hine obično manuš sar amen“ (Luka 1:17; Jak. 5:17). Ako amen oponašinaja oljeso primer, adžahar so hijam zahvalna hem so o duhovna buča tane amendže najvažna, tegani hem amen save god okolnostija te ovel amen, ka ova bahtalje ki amari služba.