1. Sose o Jehova stvorindža o životi?

JEKH vreme o Jehova hine kokri. Ama, ov na hine usamljeno sose oleso bahtalipe na zavisini nikastar. Ki aver strana, o Devel manglja hem avera te živinen hem te oven bahtale. O mangipe podstaknindža le te počmini te stvorini (Ps. 36:9; 1. Jov. 4:19).

2. Sar o Isus hem o anđelija osetindže pe ked o Jehova stvorindža avera buča?

² Sar prvo, o Jehova stvorindža pe Čhave, e Isuse. Zajedno pe Čhaveja, o Jehova stvorindža „sa avera buča“, sar soj tane o anđelija (Kol. 1:16). O Isus hine but bahtalo so šajindža te čerel buti pe Dadeja (Posl. 8:30). Hem o anđelija hine len razlog te oven bahtale. On samči „bešlje ko prva redija“ hem dikhlje ked o Jehova hem oleso Vešto Graditelj, o Isus, čerdže o nebo hem i phuv. Sar o anđelija reagujindže? Ked i phuv hine stvorimi, on hvalindže e Devle. Isto adžahar, ked dikhlje sa avera buča kola ov stvorindža, posebno e manušen, on hem ponodri hvalindže le (Jov 38:7; Posl. 8:31, fusn.). Ko sa so o Jehova stvorindža dičhilo oleso mangipe hem olesi mudrost (Ps. 104:24; Rimlj. 1:20).

3. Premali 1. Korinćanima 15:21, 22, savi korist isi amen andi e Isusesi otkupno žrtva?

 ³ O Jehova manglja o manuša te živinen večno ki but šuži planeta koja ov stvorindža. Ama, ked o Adam hem i Eva pobunindže pe protiv olengo manglo Dad, o greh hem o meribe učhardže i phuv (Rimlj. 5:12). So o Jehova čerdža sebepi odova? Ov odmah mothovdža sar ka spasini e manušen (Post. 3:15). O Jehova dindža pe Čhave sar otkupno žrtva te bi e Adamese hem e Evake čhave ovena oslobodime ando greh hem ando meribe. Odoleja dozvolindža svakonese te birini te služini Olese hem sar nagrada te dobini večno životi. (Jov. 3:16; Rimlj. 6:23; čitin 1. Korinćanima 15:21, 22.)

4. Ko kola pučiba ka dobina odgovor ko akava članko?

⁴ Isi but pučiba kola šaj pučaja amen sebepi so o Devel obećindža so ka irini e mulen ko životi. Na primer, sar o uskrsenje šaj ka izgledini? Da li ka uspina te pendžara amare manglen ked ka irinen pe ko životi? Sar o uskrsenje ka anel amendže bahtalipe? So o uskrsenje sikavi amen ando e Jehovaso mangipe, olesi mudrost hem oleso strpljenje? Hajde te dikha o odgovorija ko akala pučiba.

5. Sose tano logično te verujina so o manuša postepeno ka uskrsninen?

⁵ Ked o Jehova prekalo po Čhavo ka uskrsnini bute manušen, logično tano so na ka irini sarinen ko životi ko isto vreme. Sose na? Sose ked bi sarine kotar jekhvar irinena pe ko životi, tegani bi ki phuv ovela haos. A o Jehova tano organizovano Devel hem ov džanela so o buča valjani te oven organizujime te bi o manuša živinena ko mir (1. Kor. 14:33). O Jehova hine mudro hem strpljivo ked ov hem o Isus postepeno pripremindže i phuv  angleder te stvorinen e manušen. Isto adžahar, o Isus ka mothovi odola ista osobine dži ka trajini olesi Hiljadaberšengi vladavina. Ov hem okola kola ka preživinen o Armagedon ka pripreminen o čhera, o habe, o šeja hem avera buča kola ka oven potrebna okolendže kola ka uskrsninen.

6. Premalo Dela apostolska 24:15, kas o Jehova ka uskrsnini?

⁶ Najvažno ando sa, okola kola ka preživinen o Armagedon ka sikaven okolen kola ka uskrsninen ando e Devleso Kraljevstvo hem ando odova so o Jehova rodela olendar. Sose? Sose but ando okola kola ka uskrsninen ka oven maškaro okola „soj tane nepravedna.“ (Čitin Dela apostolska 24:15.) Te šaj te dobinen o blagoslovija andi e Isusesi otkupno žrtva, ka ovel potrebno te čeren bare promene ano po životi. Zamislin samo kobor bari buti ka ovel te sikave okolen kola ništa na džanena ando Devel. Da li svako manuš ka ovel le pe učitelje sar avdije? Da li ka oven dodelime ko skupštine kuri ka oven sikavde sar te sikaven okolen kola ka uskrsninen palo lende? Mora te adžičera te bi džanaja sar ka ovel sa odova. Ama, amen džanaja so dži o krajo andi e Hristesi hiljadaberšengi vladavina „i phuv ka ovel pherdi džandipaja ando Jehova“ (Is. 11:9). Odola hiljada berša amen ka ovel amen but buti te čera, ama hem ka uživina!

7. Sose e Devleso narodo ka ovel saosećajno ked ka sikavi okolen kola ka uskrsninen?

⁷ Dži trajini e Hristesi hiljadaberšengi vladavina, sare ando e Jehovaso narodo ka valjani te menjinen pe te bi ugodinena lese. Odolese, svako olendar ka ovel saosećajno dži pomožini okolendže kola uskrsnindže te borinen pe protiv pe pogrešna želje hem mislija hem te bi živinena premalo e Jehovase merilija (1. Petr. 3:8). Okola kola ka uskrsninen ka dikhen so e Jehovaso narodo tano ponizno hem so pana mangena te menjinen pe te bi ugodinena e Jehovase. Sebepi odova, on ka mangen te obožavinen e Jehova olencar (Fil. 2:12).

8. Sose tano logično te verujina so okola kola ka adžičeren okolen kola ka uskrsninen ka pendžaren pe manglen?

⁸ Isi but razlogija sose šaj te ova sigurna so okola kola ka adžičeren okolen kola ka uskrsninen ka uspinen te pendžaren len. Na primer, sebepi o način sar o Jehova angleder uskrsnindža e manušen, šaj te očekujina so o Jehova palem ka stvorini e manušen te izgledinen, te vačeren hem te razmislinen ko isto način sar angleder so mulje. Setin tut so o Isus uporedindža o meribe e sojbaja, hem o uskrsenje odoleja ked nekas vazdeja ando sojbe (Mat. 9:18, 24; Jov. 11:11-13). Ked o manuša uštena ando sojbe, on izgledinena hem vačerena ko isto način sar angleder so dželje te soven hem olengo pamćenje na našaldžola. Hajde te dikha e Lazareso primer. Ov hine mulo štar dive hem oleso telo počmindža te raspadini pe. Ama, ked o Isus uskrsnindža le, olese phenja odmah pendžardže le, a upro Lazar dičhilo so na bisterdža len (Jov. 11:38-44; 12:1, 2).

9. Sose okola kola ka uskrsninen na ka ovel len odmah savršeno godi hem telo?

⁹ O Jehova obećindža so ko raj niko na ka phenel: „Nabormo hijum“ (Is. 33:24; Rimlj. 6:7). Okola kola ka uskrsninen ka oven palem stvorime hem ka oven saste manuša. Ama, on na ka oven odmah savršena. Ked bi ovena savršena, olengi porodica hem olenge amala na bi šaj te pendžaren len. Izgleda so sa o manuša postepeno ka aven dži o savršenstvo dži trajini e Hristesi hiljadaberšengi vladavina. Ked ka završinen pe odola hiljada berša, o  Isus ka irini o Kraljevstvo pe Dadese. Tegani, o Kraljevstvo potpuno ka ispunini sa pe zadatkija hem ka anel e manušen dži o savršenstvo (1. Kor. 15:24-28; Otkr. 20:1-3).

10. Sar o uskrsenje ka utičini upro tute?

¹⁰ Zamislin sar ka osetine tut ked palem ka dikhe te manglen kola mulje. Da li ka asa andi radost ja ka rove? Da li ka ove odobor bahtalo so ka džilabe e Jehovase? Jekh tano sigurno, tu ka osetine baro mangipe premalo to brižno Dad hem oleso nesebično Čhavo, sebepi o uskrsenje.

11. Premalo e Isusese lafija kola tane pisime ko Jovan 5:28, 29, so ka dobinen okola kola živinena premalo e Devlese pravedna merilija?

¹¹ Zamislin kobor ka oven radosna okola kola ka uskrsninen ked ka menjinen pe te bi živinena premalo e Jehovase merilija. Okolendže kola ka menjinen pe ka ovel dozvolimo te živinen ki phuv zauvek. Ki aver strana, okolendže kola ka odbacinen e Devle na ka ovel dozvolimo te ruminen o mir ko raj. (Is. 65:20; čitin Jovan 5:28, 29.)

12. Ko kova način sare kola ka živinen ki phuv ka oven blagoslovime ando Jehova?

¹² Dži o Kraljevstvo ka vladini, e Devleso narodo ka dikhel so o lafija ando Poslovice 10:22 tane tačna. Odothe pisini: „O blagoslov ando Jehova čerela te ove barvalo hem na pratini le nisavi dukh.“ Uzi pomoć ando e Jehovaso sveti duh, e Devleso narodo ka ovel duhovno barvalo, odnosno sa poviše ka ličinen upro Hrist hem ka aven dži o savršenstvo (Jov. 13:15-17; Ef. 4:23, 24). Svako dive on ka oven sa pozorale, pošukar manuša. Zamislin kobor bahtale ka ova (Jov 33:25). Ama, sar odova so razmislinaja ando uskrsenje šaj te pomožini amendže već avdije?

13. Premalo Psalam 139:1-4, sar o uskrsenje mothovi amendže kobor šukar o Jehova pendžari amen?

¹³ Sar so vačerdžam angleder, ked o Jehova ka uskrsnini e manušen, ov ka irini lendže olengo pamćenje hem olengo karakter kova hine len angleder so mulje. Razmislin samo so značini odova. O Jehova mangela tut odobor so pamtini sar tu razmislineja, sar osetineja tut, sar vačereja hem so čereja. Ako ka ovel potrebno tut te uskrsnini, olese ka ovel lokho te irini to pamćenje, te stavija hem to karakter. O kralj David džandža so o Jehova džanela svakone amendar but šukar. (Čitin Psalam 139:1-4.) Sar upro amende utičini ked haljovaja kobor šukar o Jehova pendžari amen?

14. Sar valjani te osetina amen ked razmislinaja ando odova kobor šukar o Jehova pendžari amen?

¹⁴ Ked hor razmislinaja ando odova kobor šukar o Jehova pendžari amen, na valjani te brinina amen. Sose? Na valjani te bistra so o Jehova but brinini pe amendar. Svako amendar tano olese posebno. Ov na bistrela sa so doživindžam ko amaro životi, a so utičindža upro amende. Kobor tano odova utešno! Niked na valjani te mislina so hijam kokri. Svako dive hem svako trenutko, o Jehova tano uzo amende hem rodela prilike te pomožini amen (2. Let. 16:9).

15. Sar o uskrsenje dokažini so o Jehova tano mudro?

¹⁵ I dar ando meribe tano moćno oružje. O manuša kolen o Beng kontrolišini koristinena odova oružje te bi čhivena e manušen te izdajinen pe amalen hem te odrekninen pe ando odova ko so verujinena. Ama, odova oružje nane uspešno protiv amende, sose amen džanaja so ako amaro  neprijatelji mudari amen, o Jehova ka irini amen ko životi (Otkr. 2:10). Amen hijam uverime so ništa so on šaj te čeren amendže, našti te odvojini amen ando Jehova (Rimlj. 8:35-39). Kobor o Jehova hine mudro ked dindža amen i nada ando uskrsenje! Odoleja, o Jehova samči ljelja e Bengestar oleso najmoćno oružje, a ki aver strana amendže dindža hrabrost sar oružje.

16. Kola pučiba valjani te puče tut hem sar o odgovorija ka pomožinen tuče te dikhe da li verujineja upro Jehova?

¹⁶ Ako okola kola mrzinena e Jehova phenena so ka mudaren tut, da li ka verujine so o Jehova ka uskrsnini tut? Sar šaj te ove sigurno ko odova? Jekh način tano te puče kokri tut: „Da li o tikne odluke kola anava svako dive mothovena so verujinava upro Jehova?“ (Luka 16:10). Ili šaj te puče tut: „Da li o način sar koristinava mo vreme hem me pare mothovi so verujinava ko e Jehovaso obećanje so ka brinini pe aso me materijalna potrebe ako čhivava oleso Kraljevstvo ko prvo than?“ (Mat. 6:31-33). Ako to odgovor ko akala pučiba tano ja, odoleja mothoveja so verujineja upro Jehova hem so hijan spremno asi svako kušnja koja ka avel ki budućnost (Posl. 3:5, 6).

17. (a) Sar o uskrsenje mothovi so o Jehova tano strpljivo? (b) Sar šaj te mothova amaro cenjenje aso e Jehovaso strpljenje?

¹⁷ O Jehova već odredindža o dive ked ka uništini akava lošno sveto (Mat. 24:36). Ov na ka našalji po strpljenje hem na ka čerel odova angleder odova dive. Ov jedva adžičeri te uskrsnini okolen kola mulje, ama strpljivo tano (Jov 14:14, 15). Ov adžičeri pravo vreme te uskrsnini len (Jov. 5:28). Amen isi amen šukar razlogija te ova zahvalna aso e Jehovaso strpljenje. Razmislin samo: Sebepi so o Jehova tano strpljivo, sa o manuša isi len vreme te „pokajinen pe“ (2. Petr. 3:9). O Jehova mangela so poviše manuša te dobinen večno životi. Odolese, sar šaj te mothova so hijam zahvalna aso oleso strpljenje? Valjani te da sa amendar te roda okolen kola ispravno dikhena ko večno životi hem te pomožina lendže te mangen e Jehova hem te služinen lese (Dela 13:48). Tegani on ka ovel len korist ando e Jehovaso strpljenje sar so amen isi amen.

18. Sose valjani te ova strpljiva averencar?

¹⁸ O Jehova tano strpljivo hem na adžičeri amendar te ova savršena angleder te završinen  pe hiljada berša. Dži tegani, o Jehova tano spremno te oprostini amare grehija. Odolese, amen isi amen razlog te roda šukar buča ko avera hem te ova strpljiva olencar. Hajde te dikha jekhe phenjako primer kaso rom isi le ozbiljna napadija andi panika hem sebepi odova više na avela ko sastankija. Oj phenela: „But hine maje pharo sebepi odova. Sa so planirindžam sar porodica asi budućnost, rumindža pe.“ Ama, akija brižno romni ipak ačhilji strpljivo pe romeja. Oj oslonindža pe upro Jehova, hem niked na odustajindža. Sar o Jehova, oj ačhavdža o problemi palo peste hem usredsredindža pe ko šukar osobine ando po rom. Oj phenela: „Mo rom isi le but šukar osobine hem dela sa pestar te izborini pe pekle nabormipaja.“ Kobor tano važno te ova strpljiva okolencar kola borinena pe pekle problemencar sar soj tane okola ki amari porodica ja amare phralja ki skupština.

19. So valjani te ova odlučna te čera?

¹⁹ O Isus hem o anđelija hine bahtale ked i phuv hine stvorimi. Ama, zamislin kobor ka oven bahtale ked ka dikhen so i phuv tani pherdi savršeno manušencar kola mangena e Jehova hem služinena olese. Zamislin kobor ka oven bahtale e Isusese suvladarija ked ka dikhen kobor e manušendže značini odova so on čerena (Otkr. 4:4, 9-11; 5:9, 10). Hem zamislin o vreme ked amare jačha ka pherdžon asvencar sebepi i radost, a na sebepi i dukh, hem ked o nabormipe, i tuga hem o meribe zauvek ka našaldžon (Otkr. 21:4). Dži tegani, ov odlučno te oponašine amare Dade kova mangela amen, kova tano mudro hem strpljivo. Ako čereja adžahar, tu ka ačhove bahtalo, bizo obzir koja kušnja isi tut (Jak. 1:2-4). Kobor hijam bahtale so o Jehova dindža amen i nada ando uskrsenje (Dela 24:15).