1. Koja čast isi amen?

ČAČE tani bari čast te ova deo andi e Jehovasi skupština. Sar e Jehovase sluge, isi amen baro mir hem bahtalipe amare phraljencar hem e phenjencar ki skupština. Kova tano to than ki skupština?

2. Koja ilustracija o Pavle koristindža ko nekobor pe poslanice?

² Amen šaj pobuter te sikljova andi akija tema kotar i ilustracija koja o apostol Pavle koristindža ko nekobor pe poslanice. Ko sa odola poslanice, o Pavle uporedindža i skupština e manušikane teloja. Isto adžahar, ando svako manuš kova tano ki skupština phendža soj tano sar deo ando odova telo (Rimlj. 12:4-8; 1. Kor. 12:12-27; Ef. 4:16).

3. Kola trin buča ka sikljova ko akava članko?

³ Ko akava članko, ka dikha trin važna buča kola šaj te sikljova andi e Pavlesi ilustracija. Sar prvo, ka sikljova so svako amendar isi le po than * ki e Jehovasi skupština. Sar dujto, ka vačera odolestar so šaj te čera ako tano amendže pharo te haljova kova tano amaro than ki skupština. Sar trito, ka dikha sose valjani te da sa amendar te ispunina amari uloga ki e Devlesi skupština.

4. So sikljovaja ando Rimljanima 12:4, 5?

⁴ I prvo buti koja šaj te sikljova kotar e Pavlesi ilustracija tani so svako amendar isi le važno than ki e Jehovasi porodica. O Pavle počmindža pi ilustacija e lafencar: „Sar so o telo isi le but delovija, a nane len sa isto uloga, adžahar hem amen, iako hijam but, hijam jekh telo ko jekhipe e Hristeja, a sar pojedincija hijam delovija ando telo kola zavisinena jekh jekhestar“ (Rimlj. 12:4, 5). O Pavle akaleja manglja te phenel so iako svako amendar isi le različito uloga ki skupština, ipak svako amendar tano važno.

5. Kas o Jehova dindža „sar dar“ e skupštinače?

⁵ Ked razmislineja ando okola kola isi len than ki skupština, verovatno ki godi avena tuče o phralja kola predvodinena (1. Sol. 5:12; Jevr. 13:17). Amen džanaja so prekalo Hrist, o Jehova e skupštinače dindža „e manušen sar dar“ (Ef. 4:8). Odola manuša kola tane dinde „sar dar“ tane o članija ando Vodeće telo, o naimenujime pomoćnikija ando Vodeće telo, o članija ando Odbor andi podružnica, o pokrajinska nadglednikija, o instruktorija ko škole, o skupštinska starešine hem o sluge pomoćnikija. Sa akala phralja tane naimenujime e sveto duhoja te šaj te brininen pe ando e Jehovase bakre hem te zorjačeren e phraljen ki skupština (1. Petr. 5:2, 3).

6. Premali 1. Solunjanima 2:6-8, so o duhovno zrela phralja trudinena pe te čeren?

⁶ Sebepi soj tane naimenujime e sveto duhoja, o phralja šaj te ispuninen razna odgovornostija. O različita delovija ando telo, na primer, o vasta hem o pre, tane čerde te koristinen aso celo telo, isto adžahar hem odova so čerena o naimenujime phralja koristini asi celo skupština. On na čerena odova te bi avera hvalinena len, nego odoleja mangena te zorjačeren pe phraljen hem phenjen. (Čitin 1. Solunjanima 2:6-8.) Amen hijam zahvalna e Jehovase aso akala duhovno zrela phralja kola averenge potrebe čhivena anglo pekle.

7. Kola blagoslovija isi len amare phralja hem phenja kola tane ki punovremeno služba?

⁷ Šaj disave ki skupština tane naimenujime te služinen sar misionarija, sar specijalna ja stalna pionirija. Ko celo sveto, isi amen phralja hem phenja kola odlučindže i služba te čhiven ko prvo than ko po dživdipe. Sebepi odova, on pomožindže bute manušendže te oven e Isusese učenikija. Iako akala punovremena sluge obično nane len but materijalna buča, o Jehova but blagoslovindža len (Mar. 10:29, 30). Amen čače but mangaja akale phraljen hem e phenjen hem zahvalna hijam soj tane deo andi amari skupština!

8. Sose svako objavitelj tano važno e Jehovase?

⁸ Da li jedino o naimenujime phralja hem okola kola tane ki punovremeno služba isi len po than ki skupština? Naravno so na! Svako objavitelj tano važno e Devlese hem e skupštinače (Rimlj. 10:15; 1. Kor. 3:6-9). U stvari, jekh ando najvažno razlog sose postojini i skupština tano te čeren pe o učenikija (Mat. 28:19, 20; 1. Tim. 2:4). Sare kola tane deo andi skupština, o krstime objaviteljija hem o nekrštena objaviteljija, dena sa pestar te ispuninen akava važno zadatko (Mat. 24:14).

9. Sose ceninaja amare phenjen?

⁹ O Jehova mothovi poštovanje e phenjendže adžahar so dela len te čeren jekh važno zadatko ki skupština. Ov cenini sa e phenjen kola verno služinena olese, bilo te oven ko brak, daja, udovice ja pana na ljelje pese rome. Ki Biblija, but putija šaj te čitina ando but romnja kola čače vilestar trudindže pe  te služinen e Devlese. On tane pohvalime sebepi so hine mudra, verna, revna, hrabra, velikodušna hem so čerdže šukar delija (Luka 8:2, 3; Dela 16:14, 15; Rimlj. 16:3, 6; Fil. 4:3; Jevr. 11:11, 31, 35). Kobor hijam zahvalna e Jehovase so ko amare skupštine isi amen phenja kola isi len asavke šuže osobine!

10. Sose ceninaja amare phure phraljen hem e phenjen?

¹⁰ Isto adžahar, amen but ceninaja amare phure phraljen hem phenjen ki skupština. Disave olendar celo po dživdipe verno služinena e Jehovase. A disave akana sigende pendžardže o čačipe. Sar god te ovel, but ando amare phure isi len problemija sastipaja sebepi pe berša. Šaj sebepi odola problemija on više našti te čeren odobor kobor bi mangena ki služba ja ki skupština. Ama, amare phure čerena odobor kobor šaj ki služba hem koristinena pi snaga te ohrabrinen hem te sikaven averen. Amen šaj but te sikljova ando olenge iskustvija. On čače but značinena e Jehovase hem amendže (Posl. 16:31).

11-12. Sar ohrabrinena tut o terne ki skupština?

¹¹ Isto adžahar, razmislin hem ando amare terne. On isi len but problemija odolese so barjona ko sveto kova kontrolišini o Beng hem upro kova utičinena olese lošna ideje (1. Jov. 5:19). Ama, amen hijam but ohrabrime ked dikhaja sar dena komentarija ko sastankija, sar džana ki služba hem sar hrabro braninena pe verovanja. Tumen, ternaljen, isi tumen važno than ki e Jehovasi skupština (Ps. 8:2).

¹² Ama, disave amare phraljendže hem e phenjendže tano pharo te verujinen soj tane korisna ki skupština. So šaj te pomožini amen te haljova so svako amendar isi le po than ki skupština? Hajde te dikha.

13-14. Sose disave šaj te mislinen so nane korisna ki skupština?

¹³ Dikh koja tani i dujto buti koja šaj te sikljova andi e Pavlesi ilustracija. Ov vačerdža ando problemi kova but phralja hem phenja isi len avdije. Butendže tano pharo te verujinen  soj tane korisna ki skupština. O Pavle pisindža: „Ako o pro phenela: ’Na hijum vas hem odolese na hijum deo ando telo‘, na značini so sebepi odova nane deo ando telo. Hem ako o kan phenela: ’Na hijum jakh hem odolese na hijum deo ando telo‘, na značini so sebepi odova nane deo ando telo“ (1. Kor. 12:15, 16). So o Pavle manglja akaleja te sikavi amen?

¹⁴ Ked uporedineja tut averencar ki skupština, tegani tu našti te dikhe kobor tu vredineja. Disave ki skupština šaj tane but sposobna te sikaven, džanena šukar te organizujinen o buča ja džanena šukar te tešinen hem te ohrabrinen averen. Šaj mislineja so tu na hijan sposobno sar on. Ako adžahar mislineja, odova mothovi so hijan ponizno hem skromno (Fil. 2:3). Ama, ov oprezno. Ako stalno uporedineja tut okolencar kola tane but sposobna, šaj te obeshrabrine tut. Čak šaj te misline, sar so o Pavle phendža, so nane tut to than ki skupština. So šaj te pomožini tut te borine tut asavke osećanjencar?

15. Premali 1. Korinćanima 12:4-11, so valjani te džana ando amare sposobnostija?

¹⁵ Razmislin akalestar: Ko prvo veko, o Jehova disave hrišćanendže dindža čudesna darija ando sveti duh, ama na dobindže sa o hrišćanija isto dar. (Čitin 1. Korinćanima 12:4-11.) Iako o Jehova dindža len različita darija hem sposobnostija, ipak svako hrišćanin hine lese važno. Avdije, nane amen odola čudesna darija ando sveti duh. Sar tegani hem avdije, iako šaj nane amen ista sposobnostija, sare hijam vredna e Jehovase.

16. Kova e Pavleso savet valjani te primenina?

¹⁶ Umesto te uporedina amen amare phraljencar hem e phenjencar, amen valjani te primenina e Pavleso savet: „Nek svako ispitini pe postupkija, hem tegani ka arakhel ano peste razlog te ovel bahtalo, a na ko odova te uporedini pe averencar“ (Gal. 6:4).

17. Sar ka koristini amendže e Pavleso savet?

¹⁷ Ako primeninaja e Pavleso savet hem razmislinaja ando amare postupkija, ka dikha so isi amen sposobnostija kola avera nane len. Na primer, jekh starešina šaj na ičeri but  šukar govorija, ama tano but šukar ki služba. Ja šaj nane organizujimo sar avera starešine ki skupština, ama tano but brižno pastiri hem o objaviteljija osetinena pe slobodno te aven koro leste te roden savet. Ja šaj tano pendžardo sar but gostoljubivo manuš (Jevr. 13:2, 16). Ked amen džanaja kola tane amare sposobnostija, tegani ka ova zadovoljna odoleja so šaj te čera diso ki skupština. Isto adžahar, tegani verovatno na ka ova zavidna amare phraljendže kola isi len averčhane sposobnostija amendar.

18. Sar šaj te ova pošukar učiteljija?

¹⁸ So god te čera ki skupština, sare amen valjani te ovel amen želja te ova pošukar ki služba hem te razvijina amare sposobnostija. Te šaj te pomožini amen ko odova, o Jehova sikavi amen prekali pi organizacija. Na primer, ko amaro sastanko ko radno dive, amen sikljovaja sar šaj pana pošukar te čera amari služba. Da li primenineja o smernice kola dobineja ko odova sastanko?

19. So šaj te čere te šaj te dža ki Škola e objaviteljendže ando Kraljevstvo?

¹⁹ Pana jekh način sar o Jehova sikavi amen tano prekali Škola e objaviteljendže ando Kraljevstvo. Ki akija škola šaj te džan o phralja hem o phenja kola tane ki punovremeno služba hem kola isi len maškaro 23 hem 65 berš. Šaj mislineja so tu niked našti te dža ki odija škola. Umesto te razmisline sose našti te dža ki odija škola, razmislin odolestar sose mangeja te dža. Čer tuče plan kova ka pomožini tut te ispunine o uslovija asi odija škola. Uzi e Jehovasi pomoć hem toklo trud, tu ka čere odova so mislindžan soj tano nemoguće.

20. So šaj te sikljova ando Rimljanima 12:6-8?

²⁰ I trito buti koja šaj te sikljova andi e Pavlesi ilustracija tani pisimi ko Rimljanima 12:6-8. (Čitin.) Pana jekh puti, o Pavle mothovi so okola kola tane ki skupština isi len averčhane sposobnostija. Ama, akana ov phenela so kola god sposobnostija te ovel amen, valjani te koristina len te zorjačera e phraljen hem e phenjen ki skupština.

21-22. So šaj te sikljova ando Robert hem ando Felis?

²¹ Te dikha o primer ando phral Robert. * Ov služindža ki strano phuv, a palo odova hine vičimo te služini ko Betel, ki pi phuv. Iako o phralja phendže so o razlog sose menjini pe leso zadatko nane sebepi so diso lošno čerdža, ov phendža: „Hine man negativno mišljenje mandar hem odolese masekoncar mislindžum so ništa na vredinava. Nekobor putija mangljum te ikljovav ando Betel.“ So pomožindža lese palem te ovel bahtalo? Jekh aver starešina podsetindža le so o Jehova ko svako zadatko kova čerdžam angleder, sikavdža amen sar šaj pana pošukar te služina lese ko zadatko kova isi amen akana. O Robert haljilo so na valjani više te razmislini ando odova so hine angleder, nego te usredsredini pe ko odova so šaj akana te čerel.

²² O phral Felis Episkopo hine ki slično situacija. Ov hem olesi romni 1956. berš diplomirindže ki škola Galad hem služindže ki pokrajinsko služba ki Bolivija. Ko 1964. berš dobindže e beba. O Felis phenela: „Hine amendže but pharo te mukha o zadatko kova mangljam. Skoro berš dive hijum le but obeshrabrimo. Ama, sebepi so o Jehova pomožindža man, menindžum mo stav hem usredsredindžum man ki mi nevi odgovornost, te ovav dad.“ Da li hem tu osetineja tut sar o Robert hem o Felis? Da li hijan obeshrabrimo sebepi so akana nane tut ista zaduženja kola hine tut angleder? Ako ja, ka ove  pobahtalo ako menjineja to stav hem usredsredineja tut ko odova so šaj akana te čere te šaj te služine e Jehovase hem te phraljendže. Trudin tut hem ponodri te koristine te sposobnostija te šaj te pomožine averendže hem ka ove bahtalo dži zorjačereja e phraljen.

23. Aso so valjani te odvojina vreme hem so ka dikha ko aver članko?

²³ Svako amendar tano važno e Jehovase. Ov mangela te ova deo andi olesi porodica. Ako odvojinaja vreme te razmislina sar šaj te zorjačera amare phraljen hem e phenjen, hem palo odova trudinaja amen te čera odova, tegani verovatno ka osetina so hijam deo andi skupština. Ama, sar dikhaja averen ki skupština? Sar šaj te mothova so ceninaja len? Ko aver članko, ka dobina o odgovorija ko akala pučiba.