1-2. Premalo Psalam 34:8, sar šaj te dikha kobor tano o Jehova šukar?

ZAMISLIN so neko dinđa tut te has disavo habe kova niked angleder na haljan. Mangeja te đane savo tano odova habe hem odolese dikheja le, mirišineja le, pućeja sar ćerela pe ja pućeja averen savo tano. Ama, jedino način te đane da li tuće sviđini pe odova habe tano te probine le.

² Kobor tano o Jehova šukar amen dikhaja ked čitinaja i Biblija, amare publikacije ja ked šunaja kola šukar buća ov ćerđa averenđe. Ama, te šaj ćaće te haljova kobor tano o Jehova šukar, amen kokri valjani te osetina odova. (Čitin Psalam 34:8.) Sar šaj te ćera odova? Zamislin so mangeja te služine ki punovremeno služba. Te šaj te ispunine odova cilj, šaj ka valjani te ćere disave promene ko to životi. Šaj but putija šunđan so ako ćhivaja e Devleso Kraljevstvo ko prvo than, o Jehova ka del amen odova so ćaće valjani amenđe. Ama, šaj niked na osetinđan sar o Jehova ćerela odova lično tuće (Mat. 6:33). Amen isi amen vera ko e Isuseso obećanje. Odolese, pazinaja sar trošinaja o pare, na ćeraja odobor buti sar angleder hem daja sa amendar pobuter te đa ki služba. Ked ćeraja akala buća, kokri dikhaja sar o Jehova ćaće brinini pe amendar. Ađahar, „probinaja“ kobor tano o Jehova šukar.

3. Premalo Psalam 16:1, 2, kase o Jehova mothovi po šukaripe?

³ O Jehova tano „šukar premalo sare“, čak hem premalo okola kola na penđarena le (Ps. 145:9; Mat. 5:45). Ama, posebno tano šukar premalo okola kola mangena le hem služinena lese celone vileja. (Čitin Psalam 16:1, 2.) Akana ka dikha kola šukar buća o Jehova ćerela amenđe.

4. Sar o Jehova mothovi soj tano šukar premalo okola kola mangena te penđaren le?

 ⁴ Svako puti ked ićeraja amen ko odova so sikljiljam ando Jehova, amaro životi ovela pana pošukar. Na primer, ked počminđam te proučina, dikhljam sar o Jehova pomožini amenđe te menjina amaro način sar razmislinaja hem te ćhinava te ćera o buća kola na sviđinena pe olese (Kol. 1:21). Ked krstinđam amen, pana pobuter dikhljam kobor tano šukar sose akana šaj te ovel amen čisto savest hem te ova olese amala (1. Petr. 3:21).

5. Sar ki služba osetinđan kobor tano o Jehova šukar?

⁵ Ked hijam ki služba, amen šaj te osetina kobor tano o Jehova šukar. Da li hijan lađutno? But phralja hem phenja tane lađutne. Angleder so uljan e Jehovaso svedoko, šaj mislinđan so niked na ka uspine te đa kotar ćher ko ćher te vaćere e manušencar andi Biblija. Ama, uzi e Jehovasi pomoć, avdije redovno đaja ki služba hem uživineja te vaćere e manušencar. Isto ađahar, but putija dikhljan sar o Jehova pomožini tut. Na primer, pomožinđa tut te aćhove smireno ked neko ki služba hine grubo premalo tute. Ked arakhljan nekas ko mangela te šunel, ov pomožinđa tuće te setine tut kova stih valjani te čitine. Uzo odova, ov hem ponodri dinđa tut snaga te propovedine, iako o manuša šaj na manglje te šunen (Jer. 20:7-9).

6. Sar o Jehova mothovi amenđe po šukaripe?

⁶ O Jehova mothovi amenđe kobor tano šukar ađahar so sikavi amen sar te ćera amari služba (Jov. 6:45). Ko sastanko ko radno dive, šaj te šuna šukar pripremime prezentacije kola šaj te koristina ki služba. Ki početka, šaj daraja te koristina odola neve predlogija. Ama, ked koristinaja len, šaj te dikha kobor tane šukar. Ko kongresija hem ko sastankija šunaja govorija kola podstakninena amen te služina e Jehovase ko disavo aver način. Ako daja sa amendar te ćera odova, iako šaj daraja, palo odova ka dikha sar o Jehova ka blagoslovini amen. Akana ka dikha kola šukar buća o Jehova ka del amen ako isi amen poverenje upro leste hem ako trudinaja amen pana pobuter te služina lese, bizo obzir ko kola okolnostija hijam. Palo odova, ka dikha sar šaj te ispunina amare ciljija.

7. Kola blagoslovija ka doživina ako daja sa amendar te ćera diso pobuter ki služba?

⁷ Ka ova pana popaše e Jehovaja. Te dikha o primer ando jekh starešina kova vićini pe Samuel * hem kova služini pe romnjaja ki Kolumbija. On uživinđe te služinen sar pionirija ki pi skupština, ama manglje te đan uduri kuri tani pobari potreba. Te šaj te ćeren odova, on morandilje te odrekninen pe ando disave buća. O Samuel phenela: „Amen ićerđam amen ko savet kova tano pisimo ko Matej 6:33 hem pazinđam te na ćina o buća kola na valjani amenđe. Najpharo hine te mukha amaro ćher, sose samo so sredinđam amen hem irinđam amare dugija.“ Ked reslje ki nevi skupština, on na hine len odobor pare kobor hine len angleder. Odolese, morandilje te sikljon sar te ikljon ko krajo odoleja so isi len. O Samuel pana phenela: „Dikhljam sar o Jehova brinini pe amendar hem sar odgovorini ko amare molitve. Tegani, haljiljam so o Jehova tano zadovoljno so anđam asavki odluka hem osetinđam kobor tano baro oleso mangipe.“ Da li hem tu šaj te ćere diso pobuter ki služba?  Ako po, tegani ov sigurno so ka ove pana popaše e Jehovaja hem so ov ka brinini pe tutar (Ps. 18:25).

8. So sikljovaja ando odova so phenđe o Ivan hem i Viktorija?

⁸ Ka ova bahtale. O Ivan hem i Viktorija služinena sar pionirija ko Kirgistan. Sebepi so živinđe skromno, on šaj hine te prihvatinen bilo kova zadatko, sar soj tano te ćeren buti ki gradnja ando amare objektija. O Ivan phenela: „Dinđam sa amendar te ćera amare zadatkija najšukar so šaj. Iako ko krajo ando dive hijam le but umorna, hine amen mir hem hijam le zadovoljna sose đanđam so amari snaga trošinaja e Jehovase. Isto ađahar, arakhljam neve amalen hem hine amen but šuže iskustvija“ (Mar. 10:29, 30).

9. So ćerela i Mera te šaj pana pobuter te služini e Jehovase?

⁹ Amen šaj te ova bahtale đi služinaja e Jehovase, čak iako isi amen pharipa. Na primer, amari phen i Mera, koja živini ki Zapadno Afrika, aćhilji bizo rom. Angleder, oj ćerđa buti sar doktorka, ama akana tani ki penzija hem služini sar stalno pioniri. Sebepi so isi la artritis, oj šaj samo jekh sati te đal kotar ćher ko ćher. Ama, šaj te đal ki služba e kolicaja. Isto ađahar, isi la but posete hem kursija. Disave ando odola kursija šaj te ićeri prekalo telefoni. Sose i Mera mangela te ćerel pobuter e Jehovase? Oj phenela: „But mangava e Jehova hem e Isuse. But putija molinava e Jehova te del man snaga te ćerav odobor kobor šaj“ (Mat. 22:36, 37).

10. Premali 1. Petrova 5:10, so ka dobina ako mukhaja o Jehova te koristini amen?

¹⁰ O Jehova ka sikavi amen sar te ćera amare zadatkija. Amaro phral o Ken, kova služini sar pionir ko Mauricijus, doživinđa odova. Ked upoznajinđa o ćaćipe, ov aćhavđa o fakultet, krstinđa pe hem počminđa te služini e Jehovase ki punovremeno služba. Ov phenela: „Mangljum te ovav sar o prorok Isaija, kova phenđa: ’Aće man, man bićhal‘“ (Is. 6:8). O Ken učestvujinđa ko nekobor projektija ki gradnja hem pomožinđa ko prevodilačko odeljenje te prevodinen pe o publikacije ki olesi ćhib. Ov phenela: „I obuka koja dobinđum sikavđa man sar te ćerav pana pošukar me zadatkija.“ Ama, na sikljilo samo odova. Ov pana phenela: „I obuka pomožinđa maje te haljovav so disave buća našti te ćerav hem so valjani te ćerav ko me osobine te šaj pana pošukar te služinav e Jehovase.“ (Čitin 1. Petrova 5:10.) Sose na bi razmislineja ando odova da li šaj te ćere disave promene ko to životi te šaj o Jehova te sikavi tut aso disavo zadatko kova šaj te ćere ki olesi organizacija?

11. So ćerđe disave phenja andi Južno Koreja hem so ulo sebepi odova? (Dikh i slika ki naslovno strana.)

¹¹ Čak hem o iskusna phralja hem phenja ked mangena te propovedinen ko nevo način, valjani te sikljon sar te ćeren odova. Ko period andi pandemija kotar koronavirus, jekh starešina andi Južno Koreja pisinđa: „Disave kola angleder naštinđe but te đan ki služba, sebepi soj tane naborme, akana ćerena odova prekalo video-poziv. Trin phenja kola isi len pobuter ando 80 berš sikljilje te koristinen o elektronska uređaja hem akana skoro svako dive đana ki služba“ (Ps. 92:14, 15). Da li hem tu mangeja te ćere diso pobuter ki služba hem ađahar te dikhe kobor tano o Jehova šukar? Te dikha nekobor buća kola šaj te ćere te šaj te ispunine odova cilj.

12. So o Jehova obećini okolenđe kola osloninena pe upro leste?

¹² Sikljov te oslonine tut upro Jehova. Ov obećini so ka del amen bare blagoslovija ako osloninaja amen upro leste hem ako daja lese amaro najšukar (Mal. 3:10). Amari phen i Fabiola, koja živini ki Kolumbija, doživinđa odova. Sigate palo odova so krstinđa pe, oj manglja te služini sar stalno pioniri. Ama, olako rom hem olake trin ćhave zavisinđe andi olaki plata. Odolese, ked valjanđa te đal ki penzija, oj but molinđa pe e Jehovase. Oj phenela: „Ked o manuša predajinena o lila asi penzija, valjani but te ađićeren. Ama, me dobinđum mi penzija aso masek dive. Odova hine čudo.“ Duj masek palo odova, oj počminđa te služini sar stalno pioniri. Akana, isi la pobuter ando 70 berš hem prekalo 20 berš služini sar pioniri. Đi akana, pomožinđa ofto manušenđe te aven đi o krštenje. Oj phenela: „Iako disavo puti nane man snaga, o Jehova svako dive pomožini man te aćhovav ki pionirsko služba.“

13-14. Kola primerija šaj te pomožinen amen te oslonina amen upro Jehova hem te služina lese pana pobuter?

¹³ Sikljov ando okola kola osloninđe pe upro Jehova. Ki Biblija isi but primerija ando manuša kola trudinđe pe te služinen e Jehovase. Ando odola primerija sikljovaja so o Jehova blagoslovinđa e manušen tek palo odova so ćerđe diso sova mothovđe so  osloninena pe upro leste. Na primer, o Jehova blagoslovinđa e Avrahame, tek palo odova so ov mukhlja po ćher, iako na đanđa kaj valjani te đal (Jevr. 11:8). Isto ađahar, o Jakov dobinđa jekh posebno blagoslov ando Jehova, tek palo odova so borinđa pe e anđeleja (Post. 32:24-30). Ked valjanđe te khuven ki Obećimi phuv, o Izraelcija šaj hine te nakhen i reka, tek palo odova so o sveštenikija khuvđe ko pani (Is. Nav. 3:14-16).

¹⁴ Isto ađahar, hem avdije šaj but te sikljova ando amare phralja hem phenja kola osloninđe pe upro Jehova hem ispuninđe pe ciljija. Na primer, amaro phral o Pejton hem olesi romni i Diana, uživinđe te čitinen o iskustvija ando amare phralja hem phenja kola đelje te služinen uduri kuri tani pobari potreba. Disave ando odola iskustvija tane ki serija ando člankija „Oni spremno služe.“ * O Pejton phenela: „Đi čitinđam olenge iskustvija osetinđam ka phene dikhaja sar neko hala disavo šužo habe. So pobuter čitinđam, pana pobuter mangljam te ’probina hem te dikha kobor tano o Jehova šukar.‘“ Ko krajo, o Pejton hem i Diana đelje te služinen uduri kuri tani pobari potreba. Da li hem tu čitinđan akala iskustvija? Isto ađahar, da li ko amaro sajt dikhljan o video-materijalija Propovedanje na udaljenom području – Australija hem Propovedanje na udaljenom području – Irska? Akala iskustvija ka pomožinen tut te haljove so šaj te ćere te služine e Jehovase pana pobuter.

15. Sar šaj o šukar amala te pomožinen amenđe?

¹⁵ Birin šukar amalen. Amenđe tano polokho te probina o habe kova niked na haljam ako tano amencar neko ko uživini ko odova habe. Isto ađahar, ako družinaja amen okolencar kase tano o Jehova ko prvo than, verovatno hem amen ka manga te ćera diso pobuter e Jehovase. Jekh bračno par doživinđa odova. O Kent phenela: „Amari porodica hem amare amala ohrabrinđe amen te služina e Jehovase ko različita načinija. Sebepi so družinđam amen okolencar kase tano o Jehova ko prvo than, amen dobinđam snaga te ćera diso pobuter e Jehovase.“ O Kent hem i Veronika akana služinena sar specijalna pionirija ki Srbija.

16. Premalo Luka 12:16-21, sose valjani te ova samopožrtvovana?

¹⁶ Ov samopožrtvovano. Na valjani te odreknina amen ando sa o buća te šaj te služina e Jehovase (Prop. 5:19, 20). Ama, ako na ćeraja pobuter ki služba e Jehovase sose na hijam spremna te odreknina amen ando disave buća, tegani šaj te ćera isto greška koja ćerđa o manuš ando e Isuseso poređenje. Ov ćedinđa baro barvalipe, ama anglo Devel na hine barvalo. (Čitin Luka 12:16-21.) Amaro phral, o Kristijan, kova živini ki Francuska, phenela: „Na dinđum mo najšukar ni e Jehovase ni me porodicaće.“ Odolese, ov hem olesi romni odlučinđe te oven pionirija. Ama, te šaj te ćeren odova, morandilje te aćhaven pi buti. Počminđe te čistinen ćhera hem kancelarije hem sikljilje te oven zadovoljna odoleja so isi len. Da li pokajinđe pe sose anđe asavki odluka? O Kristijan phenela: „Akana pana pobuter uživinaja ki služba. But hijam bahtale te dikha sar o manuša kasa proučinaja hem okola kas posetinaja sikljona ando Jehova.“

17. Sose šaj te ovel amenđe pharo te propovedina ko aver način?

¹⁷ Ov spremno te propovedine ko aver način (Dela 17:16, 17; 20:20, 21). Amari phen  i Širli živini ki Amerika hem služini sar pioniri. Ko period kotar koronavirus, oj našti hine te propovedini ađahar sar so angleder ćerđa. Ki početka, darandilji te svedočini prekalo telefoni. Ama, ked alo o pokrajinsko nadgledniko, ko sastankija asi služba, sikljilji sar te ćerel odova. Akana redovno svedočini prekalo telefoni. Oj phenela: „Ki početka, darandiljum, ama akana ćaće uživinava te ćerav odova. Akana šaj te arakhav pobuter manušen nego ked đeljam kotar ćher ko ćher.“

18. So šaj te ćhinavi amen te ćera diso pobuter ki služba?

¹⁸ Ćhiv tuće cilj hem de sa tutar te ispunine le. Ked isi amen problemija, molinaja amen e Jehovase te pomožini amen hem pažljivo razmislinaja so te ćera (Posl. 3:21). I Sonja, koja služini ki jekh romani grupa ki Evropa, phenela: „Pisinava me ciljija ko jekh lil hem ćhivava le ko than kuri šaj te dikhav len. Isto ađahar, crtinđum maje duj drumija kola legarena ko različita pravcija. Ked valjani te anav disavi odluka, razmislinava da li odija odluka ka pomožini man te ispuninav me ciljija ja na.“ I Sonja na dozvolini te peraven la o problemija. Oj phenela: „O problemija šaj te oven sar zido kova ćhinavi amen te ispunina amare ciljija ja sar most kova pomožini amen te ispunina len. Mandar zavisini sar ka dikhav ko problemija.“

19. Sar šaj te mothova so hijam zahvalna e Jehovase aso šukar buća kola dela amen?

¹⁹ O Jehova blagoslovini amen ko but načinija. Amen ka mothova so hijam zahvalna aso buća kola ov dela amen ađahar so ka da sa amendar te hvalina le (Jevr. 13:15). Ako ćeraja diso pobuter ki amari služba e Jehovase, ov ka blagoslovini amen pana pobuter. Svako dive, sarine valjani te „probinen hem te dikhen kobor tano o Jehova šukar.“ Tegani, ka ova sar o Isus kova phenđa: „Mo habe tano te ćerav okova soj tano pali volja okolesi kova bićhalđa man hem te završinav i buti koja dinđa man“ (Jov. 4:34).