Izgleda so na. O Beng na phendža e Evače so ako hala o plod kova o Devel zabranindža, so oj na ka merel ama so jekh nevidljivo deo ando lako telo (koljese disave manuša avdije phenena soj tani besmrtna duša) ka nastavini te živini ko aver than. Ked o Beng prekalo sap vačerdža e Evaja, ov phendža lače so ako hala ando plod, oj na ka merel. Odoljeja manglja te phenel so oj hem ponodri ka živini hem ka uživini ko jekh pošukar dživdipe ki phuv, ama dživdipe bizo Devel (Post. 2:17; 3:3-5).

Ako o hovavno sikljovibe, ando odova so i duša na merela kova tano avdije but pendžardo, na avela ando Eden, tegani kotar avela? Našti te ova sigurna. Džanaja so sa o manuša kola verujindže ko hovavne sikljoviba hine uništime ko Potop. Samo o Noje hem oljesi porodica preživindže o Potop. Odoljese na hine niko ko bi sikavi asavke sikljoviba.

Odoljese, o sikljovibe andi besmrtno duša sigurno počmindža palo Potop. Ked o Devel pomešindža o čhibja ko Vavel, tegani o manuša selisalje prekali celo phuv hem adžahar o sikljovibe so o manuša isi ljen besmrtno duša širindža pe (Post. 11:8, 9). Amen šaj te ova sigurna so kotar god te avel akava sikljovibe, „o dad ando hovajbe“, o Beng hine palo sa akava hem hine ljese drago te dikhel sar akava hovavno sikljovibe širini pe (Jov. 8:44).