O lafija kola tane pisime ko Ponovljeni zakoni 22:25-27, na vačerena ando odova te dokažini pe e manušesi krivica, odoljese so premalo odola lafija ov već hine krivo. O razlog sose hine dindo akava zakon, tano te mothovi pe so i čhaj nane krivo. Akana ka dikha sostar čerdža pe.

Nekobor stihija angljeder vačerena ando manuš kova „ki diz“ suča e čhajaja koja hine verimi. Odoljese so čerdža odova, ov hine krivo asi preljuba, sebepi so upro verimi čhaj dikhlja pe samči tani dindi ko rom. So ulo e čhajaja? „I čhaj na pištindža ki diz“. Ked bi odova čerela, avera bi sigurno šunena la hem bi avena te braninen la. Ama, oj na pištindža. Odoljese, oj hine krivo asi preljuba hem solduj hine osudime soj tane kriva (Pon. zak. 22:23, 24).

Akana ka dikha so o Zakon vačeri andi jekh aver situacija: „Ama, ako o manuš ki njiva resela e čhaja koja tani verimi, pa astari la hem sovela olaja, tegani nek ovel mudardo samo o manuš kova suča olaja, a e čhajače ma čer ništa. Oj na čerdža greh sebepi kova valjani te ovel mudardi, sose odova tano sar ked neko napadini pe pašutne hem mudari lje. Ov e čhaja koja tani verimi arakhlja ki njiva hem oj pištindža, ama na hine niko ko te branini la“ (Pon. zak. 22:25-27).

Ki akija situacija, o sudije pretpostavindže so i čhaj nane krivo. Sose? On pretpostavindže so „oj pištindža, ama na hine niko ko te branini la.“ Odoljese, oj na hine krivo asi preljuba. O manuš hine krivo aso silovanje hem asi preljuba, odoljese so ov astardža la hem suča e čhajaja koja hine verimi.

Iako akava Zakon hine dindo te mothovi so i čhaj nane krivo, ov mothovi so o manuš hine krivo aso silovanje hem asi preljuba. Amen šaj te ova sigurna so o sudije šukar istražujindže hem andže i odluka premalo načelija kola o Devel but putija angljeder phendža (Pon. zak. 13:14; 17:4; Izl. 20:14).