DA LI tu kokri tuče bi pheneja so hijan manuš kova tano zahvalno? Sare amen valjani te razmislina ando akava pučibe. Ki Biblija pisini so ko amaro vreme o manuša ka oven „nezahvalna“ (2. Tim. 3:2). Sigurno hem tu pendžareja disave manušen kola adžičerena avera te čeren ljendže diso ja te den ljen diso. On mislinena so na valjani te oven zahvalna sebepi odova so dobinena. Sigurno na ka osetine tut šukar te ove maškaro asavke manuša.

E Jehovase sluge tane podstaknime te „oven zahvalna“. Ki Biblija pisini: „Oven zahvalna aso sa“ (Kol. 3:15; 1. Sol. 5:18). Isto adžahar, sebepi amaro tano šukar te ova zahvalna. Akana ka dikha nekobor razlogija sose tano šukar te ova zahvalna.

Jekh razlog sose valjani te ova zahvalna tano sose odova pomožini amen te osetina amen šukar. Ked zahvalineja tut nekase, tegani hem tu osetineja tut šukar, ama hem o manuš kase zahvalindžan tut. Sose? Odoljese so ked hijam zahvalna hem amen hem avera hijam bahtalje. Na primer, ako neko odvojini vreme te čerel tuče diso šukar, ov čerela odova sebepi so mislini so tu zaslužineja odova. Ov brinini pe tutar. Ked tu dikheja so neko brinini pe tutar, tegani hem tu osetineja tut šukar. Šaj i Ruta baš adžahar osetindža pe. O Voz but pomožindža e Rutače. Sebepi, odova i Ruta sigurno hine but bahtalji ked dikhlja so neko brinini pe olatar (Ruta 2:10-13).

Amen valjani posebno te ova zahvalna e Devljese. Sigurno dijekh puti razmislineja ando but buča kola o Devel čerdža tuče hem kola pana čerela (Pon. zak. 8:17, 18; Dela 14:17). Ama, na valjani te čere odova samo dijekhvar, nego često. Odoljese odvojin vreme hor te razmisline ando blagoslovija kola o Jehova dindža hem tuče hem averendže. Ako hor razmislineja ando odova kobor tano o Devel phravde vasteso, odova ka čhivel tut te ove ljese pana pozahvalno. Isto adžahar, ka haljove kobor mangela tut hem kobor cenini tut (1. Jov. 4:9).

Ama, amen na valjani te razmislina samo ando odova so o Jehova tano phravde vasteso hem ando blagoslovija kola dela amen, nego hem valjani te ova zahvalna aso oljeso šukaripe (Ps. 100:4, 5). Phenela pe so „ked zahvalina amen e manušendže odova čerela ljen bahtalje“.

Pana jekh razlog sose valjani te ove zahvalno tano sose adžahar zorjačereja toklo amaljipe averencar. Sare amen mangaja avera te ceninen amen. Ked tu zahvalineja tut nekase sebepi so čerdža tuče diso šukar, tumaro amaljipe ovela pozoralo (Rimlj. 16:3, 4). O manuša kola tane zahvalna, verovatno ka oven spremna te pomožinen averendže. On dikhena ked tano neko ljubazno premalo ljende hem odova podstaknini ljen hem on te oven ljubazna. Ked pomožinaja averendže, amen šaj te ova bahtalje. Odova hem o Isus phendža: „Pobuter isi bahtaljipe ked dela pe nego ked ljela pe“ (Dela 20:35).

O Robert Emens, jekh ando direktorija ko fakulteti ki Kalifornija, istražujindža so valjani te šaj te ova zahvalna. Ov phendža: „Te šaj te ova zahvalna, amen valjani te haljova so zavisinaja jekh jekhestar. Disavo puti amen daja, a disavo puti amen dobinaja.“ Te šaj te ačhova  dživde hem te ova bahtalje, amen zavisinaja averendar. Na primer, šaj avera dena amen habe ja ljegarena amen ko doktori ked nane amendže šukar (1. Kor. 12:21). O manuš kova tano zahvalno jasno mothovi so cenini odova so avera čerena oljese. Da li hem tu isi tut navika te zahvaline tut aso odova so avera čerena tuče?

Ked hijam zahvalna, tegani šaj ko avera te dikha odova soj tano šukar. Amari godi tani sar jekh filter. Oj odvojini o štetna buča ando buča kola tane šukar hem mukhela o šukar buča te ačhon othe. Odoljese so hijam adžahar čerde, amen pobuter usredsredinaja amen ko pozitivna buča, a na ko problemija. So pobuter hijam zahvalna, pobuter ka dikha o šukar buča hem odova ka čhivel amen te ova pana pobuter zahvalna. Ako daja sa amendar te dikha sose sa šaj te ova zahvalna, odova ka pomožini amen te šuna e Pavleso savet: „Uvek oven bahtalje ko Gospod“ (Fil. 4:4).

Ked hijam zahvalna odova pomožini amen te na razmislina negativno. But tano pharo te ova zahvalna hem ko isto vreme te ova tužna, ljubomorna ja holjame. E manušendže kola tane zahvalna nane odobor važna o materijalna buča. On tane zadovoljna odoljeja so isi ljen hem na trudinena pe te ovel ljen pobuter (Fil. 4:12).

Sar e Jehovaso svedoko, tu haljoveja so ked isi tut pharipa, o Beng mangela te obeshrabrini tut hem te ove tužno. Ov bi mangela tu te ove negativno hem uvek te žaline tut. Ako hijan asavko, tuče ka ovel but pharo te vačere o šukar haberi adžahar te šaj e manušendže te pašljol ko vilo. I zahvalnost hem o plodija ando e Devljeso sveti duh tane but povezime. Na primer, amen hijam bahtalje odoljese so dikhaja o šukar buča kola dela amen o Devel hem isi amen vera so ka čerel odova so phendža (Gal. 5:22, 23).

Sebepi so hijan e Jehovaso svedoko, verovatno složineja tut odoljeja so pisini ko akava članko andi andi zahvalnost. Ama, ipak haljoveja so nane lokho te mothove zahvalnost hem te ove pozitivno. Ama, ma mukh odova te obeshrabrini tut. Tu šaj te sikljove te ove zahvalno hem te mothove i zahvalnost. Sar? Svako dive odvojin vreme te razmisline odoljestar sose sa šaj te ove zahvalno. So pobuter ka čere odova, ka ovel tuče polokho te mothove i zahvalnost. Ka ove pobahtalo ando manuša kola dikhena samo pes hem peklje pharipa. Razmislin ando šukar buča kola o Devel hem o manuša čerena tuče te ohrabrinen tut hem te pomožinen tut te ove bahtalo. Šaj ki jekh sveska ja negde averthe te pisine sa odova. Odothe šaj te pisine duj ja trin buča aso kola hijan zahvalno odova dive.

O istraživačija phenena so „ked svako dive mothovaja zahvalnost odova šaj te menjini o način sar amari godi čerela buti hem tegani tano polokho te ova pozitivna“. O zahvalna manuša tane bahtalje manuša. Odoljese, razmislin ando blagoslovija kola isi tut, ma bistri o šukar buča kola ulje tuče hem uvek ov zahvalno. Ceninen o šukar buča kola ovena ko tumaro dživdipe hem „zahvalinen e Jehovase sose tano šukar.“ Isto adžahar, „oven zahvalna aso sa“ (1. Let. 16:34; 1. Sol. 5:18).