1-2. (a) Soj tano o jubilej? (Dikh o okvir „ So hine o jubilarno berš?“) (b) Sostar o Isus vačerdža ko Luka 4:16-18?

KO DISAVE phuvja, čerena pe posebna proslave te obeležini pe o 50. berš sar jekh kralj ja kraljica vladini. Odova 50. berš tano pendžardo sar e vladareso jubilarno berš. O manuša akija godišnjica šaj te slavinen jekh dive, jekh kurko ja čak jekh berš, ama odola proslave isi ljen kraj hem o manuša palo odova sigate bistrena ljen.

² Amen akana ka sikljova ando jekh jubilej kova tano pošukar ando jubilej kova o Izraelcija hine ljen svako 50. berš, a kova trajindža berš dive. Odova jubilej e manušendže andža sloboda. Sose amendže valjani odova te ovel važno? Odoljese so o jubilarno berš kova hine ko Izrael setinčeri amen ki jekh priprema koja o Jehova čerdža amendže. Odija priprema šaj već akana te koristini amendže, a ko vreme so avela ka anel amendže večno sloboda. Andi odija sloboda vačerdža o Isus. (Čitinen Luka 4:16-18.)

3. Sar so pisini ki Levitska 25:8-12, kova šukaripe o Izraelcija hine ljen ando jubilarno berš?

³ Ka ovel amendže polokho te haljova ko so o Isus mislindža ked vačerdža andi sloboda, ako najangljeder ka dikha koja svrha hine lje o jubilarno berš, ko purano vreme. O Jehova phendža e Izraelcendže: „O pindato berš tano sveto hem proglasinen ki phuv te ovel sloboda sa e manušendže. Odova nek ovel tumendže oprosno berš, hem nek svako tumendar irini pe ko poklo nasledstvo hem ki piklji porodica.“ (Čitinen Levitska 25:8-12.) Ko okova članko dikhljam sose hine šukar o Izraelcija te ičeren o sabat. Ama, savo šukaripe  hine ljen ando oprosno ja jubilarno berš? Ače te dikha. Zamislin so jekh Izraelco tano ko dugo hem te šaj te platini po dugo morandilo te biknel pi njiva. Ked alo o jubilarno berš, odija njiva šaj hine paljem te ovel oljesi. Adžahar, šajindža svako „te irini pe ko poklo nasledstvo“, a sar džala o vreme o nasledstvo šajindža te ačhol oljese čhavese. Ja šaj o manuš tano ko baro dugo hem sebepi odova valjani kokri pes ja peklje čhave te biknel sar robo te šaj te platini peklje dugija. Ked avela o jubilarno berš, svako robo šajindža te irini pe ki piklji porodica. Odoljese, svako ko ulo robo hine lje razlog te nadini pe so na ka ačhol zauvek robo. Sa akava mothovdža so o Jehova čače brinini pe peklje narodostar.

4-5. Sose tano važno te sikljova ando jubilarno berš kova hine ko Izrael?

⁴ Da li hine pana disavo šukaripe ando jubilarno berš? O Jehova phendža: „Maškaro tumende na valjani niko te ovel čororo, sose o Jehova ka blagoslovini tut ki phuv koja o Jehova, toklo Devel, dela tut te lje la ko nasledstvo“ (Pon. zak. 15:4). Avdije tano but averčhane. But putija dikhaja so o barvalje manuša ovena pana pobarvalje, a o čorore ovena pana počorore.

⁵ Amen hijam hrišćanja hem odoljese na ičeraja amen ko e Mojsijeso zakon. Odova značini so amen na ičeraja odova so phendža o zakon aso jubilarno berš te oslobodina e robonen, te oprostina o dugija hem te irina e manušendže oljengi phuv (Rimlj. 7:4; 10:4; Ef. 2:15). Ama, amendže tano but važno te sikljova ando jubilarno berš. Sose? Odoljese so šaj te uživina ki sloboda koja setinčeri amen ko odova so o Jehova čerdža e Izraelcendže ko purano vreme.

6. Sostar o manuša valjani te oven oslobodime?

⁶ Sare amen valjani te ova oslobodime ando jekh but okrutno ropstvo, a odova tano ropstvo ando greh. Odoljese so hijam grešna amen phurjovaja, ovaja naborme hem meraja. But amendar šaj te dikhen so odova tano čače ked dikhena pe ko ogledalo ja ked džana ko  doktori sose tane naborme. Isto adžahar, amen hijam obeshrabrime ked grešinaja. O apostol Pavle phendža so o „zakon ando greh ičeri lje sar robo“. Palo odova, phendža: „Jadno manuš me hijum! Ko ka spasini man ando telo kova ljegari man ko asavko meribe?“ (Rimlj. 7:23, 24).

7. So o Isaija proreknindža andi sloboda?

⁷ O Jehova arakhlja rešenje sar te oslobodini amen ando greh. Sebepi o Isus, amen šaj te ova oslobodime. Pobuter ando 700 berš angljeder te avel o Isus ki phuv, o Isaija proreknindža so ki budućnost ka ovel pobaro oslobođenje. Odija sloboda ka ovel pobari nego okija koja dobindže o Izraelcija ko jubilarno berš. O prorok Isaija pisindža: „O duh ando Suvereno Gospod Jehova tano upro mande, sose o Jehova pomazindža man te vačerav o šukar haberi e krotkonendže. Bičhaldža man te pačarav o rane okoljendže koljengo vilo tano phago, te objavinav i sloboda e zarobime manušendže hem te phravav o jačha e zarobime manušendže“ (Is. 61:1). Upro kaste odnosini pe akava proročanstvo?

8. Upro kaste ispunindža pe e Isaijaso proročanstvo andi sloboda?

⁸ Akava važno proročanstvo kotar oslobođenje ando ropstvo, počmindža te ispunini pe palo odova so o Isus počmindža pe službaja. Ked hine ki sinagoga, ko than kuri barilo, ko Nazaret, o Isus čitindža e Isaijase lafija e Judejcendže kola čedindže pe odothe. O Isus upro peste primenindža akala lafija: „E Jehovaso duho tano upro mande, odoljese so o Devel pomazindža man te vačerav o šukar haberi e čororendže, bičhaldža man te objavinav i sloboda e zarobime manušendže, te phravav o jačha e kororendže, te oslobodinav e manušen kola patinena, te propovedinav e Jehovaso berš andi milost“ (Luka 4:16-19). Sar o Isus ispunindža akava proročanstvo?

9. So o Izraelcija mislindže, sostar o Isus ka oslobodini ljen?

⁹ Ko e Isuseso vreme, o manuša počmindže te dobinen i sloboda kolatar o Isaija vačerdža. O Isus odova potvrdindža ked phendža: „Avdije ispunindže pe akala lafija ando Ljil kola akana šundžen“ (Luka 4:21). But manuša kola šundže odova so o Isus čitindža nadisalje so ov ka oslobodini ljen andi rimsko vlast. On šaj mislindže isto sar o duj manuša kola phendže: „Amen nadisaljam soj tano ov okova kova  ka oslobodini o Izrael“ (Luka 24:13, 21). Ama, amen džanaja so o Isus na sikavdža peklje učenikonen te buninen pe protiv i rimsko vlast, iako hine okrutno. Ov savetujindža ljen te den „e carese e careso“ (Mat. 22:21). Tegani, sar o Isus oslobodindža e manušen ko odova vreme?

10. Sostar o Isus oslobodindža e manušen?

¹⁰ E Devljeso Čhavo pomožindža e manušendže te oven oslobodime ando duj buča. Sar prvo, o Isus pomožindža e manušendže te oven oslobodime ando hovavne sikljoviba, kola sikavdže o verska vođe. Ko odova vreme, but Jevreja hine zorjea čhivde te poštujinen i tradicija hem te verujinen ko hovavne sikljoviba (Mat. 5:31-37; 15:1-11). Okola kola valjandže te sikaven e manušen ando Devel hine samči korore sose ni on na hine ljen šukar odnos e Devljeja. Odoljese so odbacindže e Mesija hem na manglje te šunen odova so ov sikavdža, on ačhilje korore hem oljenge grehija na hine oprostime (Jov. 9:1, 14-16, 35-41). O Isus sikavdža o čačipe hem dindža šukar primer, hem adžahar mothovdža e ponizno manušendže sar šaj te oven oslobodime ando hovavne sikljoviba (Mar. 1:22; 2:23-3:5).

11. So o Isus pana čerdža te šaj o manuša te oven oslobodime?

¹¹ Sar dujto, sebepi o Isus e manušenge grehija šaj te oven oprostime. Ov dindža po dživdipe sar žrtva, hem odoljese o Devel oprostini o grehija okoljenge kola isi ljen vera hem odija vera mothovena odoljeja so čerena (Jevr. 10:12-18). O Isus phendža: „Ako o Čhavo oslobodini tumen, čače ka oven slobodna“ (Jov. 8:36). Odija sloboda hine pošukar andi sloboda koja o Izraelcija dobindže ked hine o berš ando oprostibe. Na primer, o manuš kova hine oslobodimo ko berš ando oprostibe, šaj hine palo odova paljem te ovel robo hem ko krajo te merel. Ama, i sloboda koja o Isus dela amen ka trajini večno.

12. Ko prvo dobindža i sloboda koja o Isus objavindža?

¹² Ki Pedesetnica 33. berš n. e. o Jehova pe sveto duhoja pomazindža e apostolen hem averen verna muršen hem džuvljen. Ov usvojindža ljen te oven oljese čhave, te šaj ked ka avel o vreme te uskrsninen ko nebo te vladinen e Isuseja (Rimlj. 8:2, 15-17). On hine prva kola dobindže o blagoslovija kola andža i sloboda kolatar o Isus vačerdža ki sinagoga. On hine osobodime ando hovavne sikljoviba hem adetija kola na hine ando e Devljeso Lafi, a ando  kola o verska vođe sikavdže e manušen. Isto adžahar, anglo e Devljese jačha on hine oslobodime ando greh kova ljegari ko meribe. O simbolično berš ando oprostibe ja o jubilarno berš kova počmindža ked e Isusese učenikija hine pomazime ko 33. berš n. e, ka završini pe ko krajo ando e Isusesi hiljadaberšengi vladavina. So sa ka ovel čerdo kotar akana, pa dži o krajo ando e Hristesi vladavina?

13-14. Ko pana šaj te dobini i sloboda kolatar o Isus vačerdža?

¹³ Ko amaro vreme, but manuša ando sa o nacije tane deo kotar „avera bakre“ (Jov. 10:16). O Devel na birindža ljen te vladinen e Isuseja ko nebo. Ama, ki Biblija pisini so on ka živinen večno ki phuv. Da li hem tu hijan jekh oljendar?

¹⁴ Disave šukar buča kola o pomazanikija dobindže, dobindžan hem tu. Odoljese so mothoveja vera ki e Isusesi žrtva šaj te moline tut e Jehovase te oprostini teklje grehija. Šaj te ovel tut šukar odnos e Devljeja hem čisto savest (Ef. 1:7; Otkr. 7:14, 15). Isto adžahar, razmislin ando blagoslovija kola isi tut sebepi so hijan oslobodimo ando hovavne sikljoviba. O Isus phendža: „Ka pendžaren o čačipe hem o čačipe ka oslobodini tumen“ (Jov. 8:32). Amen hijam but bahtalje so hijam oslobodime!

15. Koja sloboda hem blagoslovija ka ovel amen ki budućnost?

 ¹⁵ Ko vreme so avela, šaj te ovel amen pana pobari sloboda. Pana hari, o Isus ka uništini i hovavni religija hem sa o manušikane vladavine. O Devel ka arakhi okoljen so služinena oljese hem ka del ljen bare blagoslovija ko raj, ki phuv (Otkr. 7:9, 14). But manuša ka oven uskrsnime hem sa o lošna buča kola hine sebepi e Adameso greh više na ka oven (Dela 24:15).

16. Savi sloboda adžičeri e manušen ki phuv?

¹⁶ Dži trajini i Hiljadaberšengi vladavina, o Isus hem okola so ka vladinen oljeja ka pomožinen e manušendže te ovel ljen savršeno sastipe hem šukar odnos e Devljeja. Odova vreme ked ka ova oslobodime ando ropstvo e grehose, ka ovel sar o jubilarno berš ko Izrael. Odova ka značini so sa o manuša kola verno služinena e Jehovase ka oven savršena hem ka oven oslobodime ando greho.

17. Premalo Isaija 65:21-23, so ka ovel e Devljese slugencar? (Dikh i slika ko početko ando akava časopis.)

¹⁷ O proročanstvo kova vačeri savo dživdipe adžičeri amen ki budućnost arakhi pe ko Isaija 65:21-23. (Čitinen). Tegani amen na ka ova bizi buti. Ki Biblija pisini so e Devljese sluge tegani ka čeren i buti koja ka čerel ljen te oven bahtalje. Ko krajo ando e Hristesi vladavina, amen šaj te ova sigurna „so sa soj stvorimo ka ovel oslobodimo ando robovanje ko telo kova raspadini pe hem ka dobinen i slavno sloboda e Devljese čhavengi“ (Rimlj. 8:21).

18. Sose šaj te verujina so ki budućnost ka ova bahtalje?

¹⁸ Sar so o Jehova manglja o Izraelcija te ovel ljen vreme ked ka čeren buti hem ked ka odmorinen pe, ov isto mangela oljese sluge te ovel ljen odova ki e Hristesi vladavina. Sigurno ka ovel amen vreme te šaj te zorjačera amaro amaljipe e Jehovaja. Te šaj te ova bahtalje amen akana valjani te služina e Jehovase, a ko nevo sveto ka ovel amen pana pobuter vreme odoljese. Sa o verna manuša ka oven bahtalje dži trajini e Hristesi vladavina, odoljese so sare ka ovel amen buti koja mangaja hem sare ka služina e Devljese.