Da li pažljivo čitinđan akale beršese izdanja andi Stražarsko kula? Ako ja, tegani dikh da li šaj te odgovorine ko akala pućiba:

Sar valjani te ponašina amen premalo pomazanikija?

Amen ceninaja olengi vera, ama na mothovaja lenđe preterano pažnja. Na mangaja te vazda e manušen (Jud. 16, fusn.). Na pućaja len pućiba andi olengi nada (w20.01, str. 29).

So uverini tut so o Jehova obratini pažnja upro tute?

I Biblija mothovi so ov đanđa sa tutar hem angleder so bijandiljan. Ov šunela te molitve. Ov đanela sostar razmislineja hem soj tano ko to vilo, a te postupkija utičinena upro leste (1. Let. 28:9; Posl. 27:11). O Jehova privucinđa tut koro peste (w20.02, str. 12).

Kola primerija isi amen ked valjani te vaćera, a ked na valjani te vaćera?

Amen hijam bahtale ked vaćeraja ando Jehova. Valjani te vaćera hem ked dikhaja so neko tano ko drumo te ćerel diso pogrešno. O starešine dena savetija ked odova valjani. E phralen kola živinena ko phuvja kuri tano amaro delo zabranimo, na ka puća ando odova sar ćerela pe o delo ki odija phuv. Na vaćeraja o poverljiva informacije averenđe (w20.03, str. 20-21).

Ko so o skakavcija ando Joilo 2. poglavlje tane averćhane ando okola kotar Otkrivenje 9. poglavlje?

Ko Joilo 2:20-29 pisini so o Devel ka uspudini e skakavcijen hem so ka nadoknadini i šteta koja o skakavcija ćerđe. Palo odova, ka bićhali po sveti duh. Akava ispuninđa pe ked o Vaviloncija napadinđe o Izrael hem kasnije. Ko Otkrivenje 9:1-11 vaćeri pe ando skakavcija kola tane uporedime e pomazanikonencar kola ko amaro vreme objavinena e Devlese osude protiv akava lošno sveto hem odola osude lošno utičinena upro okola kola tane deo ando akava sveto (w20.04, str. 3-6).

Koj tano avdije o kralj ando sever?

I Rusija hem olake saveznikija. On direktno utičinena upro e Devleso narodo, ađahar so zabraninena o delo ando propovedibe hem mothovena so mrzinena e Svedokonen. O kralj ando sever takmičini pe e kraljeja ando jug (w20.05, str. 13).

Da li o „plod ando duho“ uključini samo o enja osobine kola pominena pe ko Galatima 5:22, 23?

Na. O sveti duh pomožini amen te razvijina hem avera osobine, sar soj tani i pravednost (Ef. 5:8, 9; w20.06, str. 17).

Sose valjani te ova oprezna odoleja so ćhivaja ko društvena mreže?

Odova so ćhivaja ko društvena mreže šaj averenđe te mothovi so hvalinaja amen hem so na hijam ponizna (w20.07, str. 6-7).

So o hrišćanija šaj te sikljon ando iskusna ribarija?

O ribarija astarena maćhen ko pravo vreme hem ko pravo than. Ðanena sar te koristinen i odgovarajućo oprema. Hrabro ćerena pi buti čak ked tano nevreme. Hem amen šaj ađahar te ćera amari služba (w20.09, str. 5).

Sar šaj te pomožina amare studentenđe pana pobuter te zamangen e Jehova?

Šaj te ohrabrina len svako dive te čitinen i Biblija hem hor te razmislinen odolestar so čitinđe. Isto ađahar, šaj te sikava len te molinen pe (w20.11, str. 4).

Upro kaste odnosinena pe o lafija: „Sebepi o Hrist sare ka uskrsninen“? (1. Kor. 15:22)

O apostol Pavle na phenđa so svako manuš ka uskrsnini. Ov vaćerđa ando pomazime hrišćanija kola tane „posvetime ko jekhipe e Hristeja Isuseja“ (1. Kor. 1:2; 15:18; w20.12, str. 5-6).

So ka ćeren ko nebo o pomazanikija kola ka uskrsninen „posigate nego so i jakh treptini“?

On ka sledinen e Isuse hem ka vladinen upro manuša „e palicaja ando sastron“ (Otkr. 2:26, 27; w20.12, str. 12-13).