1-2. So o Jehova čerdža te šaj te ova deo andi olesi porodica hem sose?

O JEHOVA birindža amen te ova deo andi olesi porodica kuri sare služinena olese. Odova tano diso posebno. Sare kola tane deo andi amari porodica predajindže po dživdipe e Devlese hem mothovena vera ki otkupno žrtva koja dindža oleso Čhavo. Amen hijam jekh bahtali porodica. Već akana isi amen bahtalo dživdipe hem jedva adžičeraja o vreme ked zauvek ka živina, bilo ko nebo ja ko raj ki phuv.

² Odolese so but mangela amen, o Jehova arakhlja način te šaj te ova deo andi olesi porodica. Ama te bi čerela odova, ov morandilo te čerel jekh bari žrtva (Jov. 3:16). Ki Biblija pisini: „But skupo hijen platime“ (1. Kor. 6:20). Sebepi i otkupno žrtva, amen šaj te ova paše oleja. Amendže tani bari čast so šaj e najbare osoba ko svemir te vičina, amaro Dad. Sar so dikhljam ko okova članko, o Jehova tano najšukar Dad.

3. So šaj te puča amen? (Dikh o okviri „ Da li o Jehova obratini pažnja upro mande?“)

³ Sar jekh e biblijako pisco, hem amen šaj pučaja amen: „Sar šaj te irinav e Jehovase sa o šukaripe kova čerdža maje?“ (Ps. 116:12). Nisar našti te irina lese sa o šukaripe kova čerdža amendže. Ama, sebepi so ov but mangela amen hem amen hijam podstaknime te manga le. O apostol Jovan pisindža: „Amen mangaja, sose ov prvo manglja amen“ (1. Jov. 4:19). Ko kola načinja amen šaj te mothova amare Dadese so mangaja le?

4. Premali Jakovljeva 4:8, sose valjani te trudina amen te šaj te ova paše e Jehovaja?

⁴ O Jehova mangela te ova oleja paše hem te vačera oleja. (Čitinen Jakovljeva 4:8.) Ov uvek šunela amen hem prekalo poklo Lafi ov podstaknini amen: „Istrajinen ki molitva“ (Rimlj. 12:12). Ov niked na umorini pe hem nane previše zauzeto te bi šunela amare molitve. Ki aver strana, amen šunaja ole ked čitinaja i Biblija hem o publikacije kola pomožinena amen te haljova la. Isto adžahar, amen šunaja e Jehova ked pažljivo šunaja ko amare sastankija. Sar so o čhave šaj te ačhon paše pekle roditeljencar ako redovno hem phravdo vačerena olencar, adžahar hem amen ka ačhova paše e Jehovaja ako redovno hem phravdo vačeraja oleja.

5. Sar šaj amare molitve te oven pana pošukar?

⁵ Razmislin save tane te molitve. Ked molinaja amen, o Jehova mangela te phrava lese amaro vilo (Ps. 62:8). Odolese, valjani te puča amen: „Da li tane me molitve površna sar disavi poruka koja kopirindžum hem bičhaldžum? Da li tane me molitve ando vilo sar jekh lil kova lično me pisindžum?“ Tu sigurno but mangeja e Jehova hem mangeja to amalipe oleja te ačhol zoralo. Odolese, valjani redovno te vačere oleja. Vačer lese so bešela tuče ko vilo, sose hijan bahtalo hem so dukhala tut. Ov sigurno so uvek šaj te rode lestar te pomožini tut.

6. So valjani te čera te šaj te ačhova paše amare Dadeja?

⁶ Te šaj te ačhova paše amare Dadeja, valjani uvek te ova zahvalna olese. Amen slažinaja amen e psalmistaja kova pisindža: „Jehova, Devla moklo, but čudesna buča tu čerdžan hem but buča amendže mangeja te čere. Nijekh nane sar tute. Ked bi mangava te vačerav kotar sa odola buča, ne bi šaj, sose on tane pobuter nego so šaj te brojinav len“ (Ps. 40:5). Amen na samo so osetinaja i zahvalnost, već amare lafencar hem delijencar mothovaja so hijam zahvalna e Jehovase. Sebepi odova, amen hijam averčhane averendar. Avdije, o manuša na mothovena soj tane zahvalna aso sa so o Devel čerdža olendže. Odova mothovi so živinaja „ko poslednja dive“ (2. Tim. 3:1, 2). Niked ma dozvolin te ovel tut asavko stav.

7. So o Jehova mangela te čera hem sose?

⁷ Nijekh roditelj na mangela olese čhave te svađinen pe nego te oven amala. Isto adžahar, hem o Jehova mangela sa olese sluge te oven amala, sose o čačutne hrišćanja pendžarena pe palo mangipe (Jov. 13:35). Amen šaj te phena ista lafija kola hem jekh psalmista phendža: „Kobor tano šukar hem prijatno ked o phralja živinena ko jekhipe!“ (Ps. 133:1). Ked mangaja amare phraljen hem e phenjen, amen mothovaja so mangaja e Jehova (1. Jov. 4:20). Kobor tano šukar te ove deo andi porodica ki koja te phralja hem te phenja tane „šukar jekh premalo avereste [hem] samilosna“ (Ef. 4:32).

8. Premali 1. Jovanova 5:3, kova tano najvažno razlog sose šunaja e Jehova?

⁸ Sar so o Jehova očekujini ando čhave te šunen pe roditeljen, ov očekujini hem amen te šuna ole (Ef. 6:1). O Jehova tano amaro Stvoritelj, dela amen sa so valjani te živina hem ov tano pomudro ando amare roditeljija. Odolese, ov zaslužini te ova poslušna olese.  Ama, najvažno razlog sose amen šunaja e Jehova tano sebepi so mangaja le. (Čitinen 1. Jovanova 5:3.) Iako isi but razlogija sose valjani te šuna e Jehova, ov niked na čhivela amen silaja te šuna le. Ov dindža amen i slobodno volja hem bahtalo tano ked šunaja le sebepi so mangaja le.

9-10. Sose tano važno te džane e Devlese zakonja hem načelija hem te ičere len?

⁹ Sa o roditeljija mangena olenge čhave te oven zaštitime. Odolese on čhivena disave pravilija pe čhavendže. Ked o čhave poštujinena odola pravilija, on mothovena so isi len poverenje upro pe roditeljija hem so poštujinena len. Ama, pana považno tano te džana hem te ičera amare Dadese zakonja hem načelija. Adžahar mothovaja so mangaja hem so poštujinaja e Jehova hem odova tano uvek amare šukaripase (Is. 48:17, 18). Ama, okola so odbacinena e Jehova hem olese zakonja hem načelija povredinena kokri pes (Gal. 6:7, 8).

¹⁰ Ked šunaja e Jehova, tegani hijam zaštitime kotar sa o buča kola šaj fizički hem emotivno te povredinen amen ja kola šaj lošno te utičinen ko amaro amalipe oleja. O Jehova džanela soj tano najšukar amendže. Amari phen, i Aurora, koja tani andi Amerika, phenela: „Sigurno hijum so ked šunaja e Jehova ka ovel amen najšukar dživdipe.“ Sare amen šaj te phena odova. Da li šaj te setine tut  kola šukar buča tu doživindžan odolese so hijan le poslušno e Jehovase?

11. Sar i molitva pomožini amen?

¹¹ I molitva pomožini amen te ova poslušna čak hem ked odova tano pharo. Sebepi so hijam nesavršena disavo puti nane lokho te šuna e Jehova, ama uvek valjani te borina amen te na grešina. Jekh psalmista celone vileja molindža e Jehova: „Čhiv ano mande i želja te šunav tut“ (Ps. 51:12). Amari phen, i Denisa koja služini sar stalno pioniri, phenela: „Ked tano maje pharo te šunav e Jehovase zapovestija, me molinava le te del man snaga te čerav odova soj tano ispravno.“ O Jehova sigurno ka odgovorini ko asavke molitve (Luka 11:9-13).

12. Premalo Efešanima 5:1, so valjani te čera?

¹² Čitinen Efešanima 5:1. Sar e Jehovase „mangle čhave“, amen daja sa amendar te oponašina le. Ked hijam šukar premalo avera, ked mangaja len hem ked oprostinaja lendže, amen oponašinaja e Devlese osobine. Amaro šukar ponašanje šaj te čhivel averen te mangen te pendžaren e Jehova (1. Petr. 2:12). Posebno o roditeljija valjani te ponašinen pe premalo pe čhave adžahar sar so o Jehova ponašini pe premalo amende. Ked o roditeljija oponašinena e Jehova, olenge čhave verovatno ka mangen te oven oleja paše.

13. So valjani te čera te šaj te ova hrabra?

 ¹³ Jekh tikno čhavo tano ponosno upro po dad. Ov uživini te vačeri olestar. Isto adžahar, amen hijam ponosna upro amaro Dad, o Jehova, hem mangaja avera te pendžaren le. Osetinaja amen isto sar o kralj David, kova pisindža: „Me ka hvalinav man e Jehovaja“ (Ps. 34:2). Ama, so te čera ako hijam but ladžutne? Sar šaj te ova hrabra? I hrabrost šaj te dobina ako razmislinaja kobor o Jehova ka ovel bahtalo ako vačeraja olestar hem kobor averendže ka ovel korisno te sikljon olestar. O Jehova ka del amen hrabrost. Sar so pomožindža amare phraljendže ko prvo veko te oven hrabra, isto adžahar, ov ka pomožini hem amendže (1. Sol. 2:2).

14. Sose tano važno te propovedina?

¹⁴ O Jehova nane pristrasno (na čerela razlika maškaro manuša). Ov tano bahtalo ked dikhela so amen mangaja averen bizo obzir kotar avena (Dela 10:34, 35). Najšukar način te mothova so mangaja averen tano te propovedina lendže (Mat. 28:19, 20). Sar šaj odova te pomožini e manušendže? Okola so šunena amen već akana šaj te ovel len pošukar dživdipe, a ki budućnost šaj te dobinen o večno dživdipe (1. Tim. 4:16).

15-16. Kola razlogija isi amen te ova bahtale?

¹⁵ O Jehova tano Dad kova but mangela amen hem ov mangela te ova bahtale (Is. 65:14). Isi but razlogija sose već akana šaj te ova bahtale, iako isi amen problemija. Na primer, uverime hijam so amaro Dad but mangela amen. Džanaja o čačipe kova tano ko oleso Lafi, i Biblija (Jer. 15:16). Amen hijam deo andi jekh porodica ki koja sare mangena e Jehova, olese zakonja hem načelija hem kuri sare mangena jekh jekhe (Ps. 106:4, 5).

¹⁶ Amen šaj te ova bahtale sose džanaja so ki budućnost amaro dživdipe ka ovel pana pošukar. Džanaja so pana hari o Devel ka cidel sa e lošno manušen hem so prekalo poklo Kraljevstvo ka čerel raj ki celo phuv. Isto adžahar, isi amen nada so amare mangle kola mulje ka oven uskrsnime hem so palem ka oven amencar (Jov. 5:28, 29). Tegani čače ka ova but bahtale! Pana hari sa soj tano ko nebo hem ki phuv ka hvalini amare Dade hem ka služinen samo olese.