1. So valjandža neko te čerel ako manglja te vačeri e kraljeja?

ZAMISLIN so živineja angleder 2 500 berš, ki Persija. Mangeja te vačere e kraljeja ando jekh problemi. Te šaj te čere odova valjani te dža ki diz Susan, sose odothe živini o kralj. Ama, angleder te dža te vačere e kraljeja, valjani te ove vičimo koro leste. Ako na hijan vičimo šaj te ove mudardo (Jest. 4:11).

2. Sar o Jehova mangela te osetina amen ked valjani te vačera oleja?

² Amen hijam but bahtale so o Jehova nane sar odova kralj andi Persija. Iako tano pobaro hem pozoralo ando bilo kova vladari, amen ipak šaj te vačera oleja. Ov mangela te ova slobodna te vačera oleja. Na primer, iako o Jehova isi le titule sar soj tane Stvoritelj, Svemoćno hem Svevišnji Gospod, ov mangela dži vačeraja oleja te koristina jekh nežno lafi sar soj tano „Dade“ (Mat. 6:9). Bahtale hijam so o Jehova mangela te ova oleja odobor paše.

3. Sose šaj te vičina e Jehova „Dade“ hem so ka dikha ko akava članko?

³ Amen šaj te vičina e Jehova „Dade“ sose olestar avela o dživdipe (Ps. 36:9). Sebepi soj tano amaro Dad, amen isi amen odgovornost te šuna le. Ako čeraja odova so ov rodela amendar, ka ovel amen bare blagoslovija (Jevr. 12:9). Jekh ando odola blagoslovija tano o večno dživdipe, bilo ki phuv ja ko nebo. Isto adžahar, već akana šaj te uživina ko šukaripa kola ov dela amen. Ko akava članko ka dikha so mothovi so o Jehova tano amaro Dad hem sose šaj te ova sigurna so ov hem ki budućnost, niked na ka mukhel amen. Ama, najangleder ka dikha sose šaj te ova uverime so amaro nebesko Dad but mangela amen hem so brinini pe amendar.

4. Sose tano disavendže pharo te dikhen e Jehova sar pe Dade?

⁴ Da li tano tuče pharo te dikhe e Devle sar te Dade? Disave mislinena soj tane but tikne hem nevažna ked uporedinena pe e Jehovaja. On nane sigurna ko odova da li o Svemoćno Devel brinini pe svakonestar olendar. Ama, amaro manglo Dad na mangela te osetina amen adžahar. Ov dindža amen o dživdipe hem mangela te ova paše oleja. O apostol Pavle akalestar vačerdža e manušendže ki Atina hem palo odova phendža so o Jehova „nane dur nijekhestar amendar“ (Dela 17:24-29). O Devel mangela svako amendar te vačeri oleja sar so jekh čhavo vačeri pe Dadeja kova but mangela le hem brinini pe olestar.

5. So sikljovaja kotar amare phenjako primer?

⁵ Averendže tano pharo te dikhen e Jehova sar pe Dade, odolese so olengo dad na mothovdža lendže dovoljno mangipe hem na hine šukar premalo olende. Jekh amari phen phenela: „Mo dad hine but nasilno. Ked počmindžum te proučinav i Biblija hine maje but pharo te ovav paše mekle nebesko Dadeja. Ama, ked počmindžum te pendžarav e Jehova, sa odova menindža pe.“ Da li hem tu osetineja tut adžahar? Ako ja, tegani ma obeshrabrin tut. Ov sigurno so hari po hari hem tu ka osetine so o Jehova tano najšukar Dad.

6. Premalo Matej 11:27, sar o Jehova pomožini amen te dikha le sar amare Dade?

⁶ Jekh način sar o Jehova pomožini amen te dikha le sar amare Dade tano adžahar so ki Biblija dindža te ovel pisimo odova so o Isus phendža hem čerdža. (Čitinen Matej 11:27.) Sebepi so o Isus savršeno oponašindža pe Dadese osobine ov šaj hine te phenel: „Ko dikhlja man, dikhlja hem me Dade“ (Jov. 14:9). O Isus but putija vačerdža e Jehovastar sar pekle Dadestar. Samo ko štar Jevanđelja, o Isus e Jehovase phendža „Dade“ otprilike 165 putija. Sose o Isus odoborkha vačerdža ando Jehova? Jekh ando razlogija hine sose manglja te uverini e manušen so o Jehova tano Dad kova but mangela len (Jov. 17:25, 26).

7. So sikljovaja ando Jehova kotar odova sar ponašindža pe premalo poklo Čhavo?

⁷ Te dikha sar o Jehova ponašindža pe premalo poklo Čhavo hem so amen sikljovaja olestar. O Jehova uvek šundža e Isusese molitve. Ov na samo so šundža nego hem odgovorindža ko olese molitve (Jov. 11:41, 42). Save god pharipa hine le, ov osetindža so oleso Dad mangela le hem so pomožini lese (Luka 22:42, 43).

8. Kotar kola e Isusese potrebe o Jehova brinindža pe?

⁸ O Isus phendža so ando oleso Dad avela o dživdipe hem so ov brinini pe ando olese potrebe, ked phendža: „Me sebepi o Dad živinava“ (Jov. 6:57). Ov hine le baro poverenje upro poklo Dad, a o Jehova brinindža pe ando olese fizička potrebe. Soj tano najvažno, o Jehova brinindža pe ando e Isusese duhovna potrebe (Mat. 4:4).

9. Sar o Jehova mothovdža soj tano Dad kova mangela e Isuse hem so brinini pe olestar?

⁹ Sebepi so mangela pe čhave, o Jehova manglja o Isus te džanel so ov podržini le (Mat. 26:53; Jov. 8:16). Iako o Jehova na zaštitindža e Isuse kotar sa so šaj te povredini le, ov ipak pomožindža le te istrajini ko pharipa. O Isus džandža so savo god pharipe te ovel le, odova na ka trajini večno (Jevr. 12:2). O Jehova mothovdža so brinini pe ando Isus adžahar so  šundža olese molitve, brinindža pe ando olese fizička potrebe, sikavdža le hem pomožindža lese (Jov. 5:20; 8:28). Akana ka dikha sar amaro nebesko Dad ko slična načinja brinini pe amendar.

10. Premalo Psalam 66:19, 20, sar o Jehova mothovi amendže so mangela amen?

¹⁰ O Jehova šunela amare molitve. (Čitinen Psalam 66:19, 20.) O Jehova na phenela kobor putija valjani te molina amen, sose te molina amen hem kobor bare valjani te oven amare molitve. Ov podstaknini amen: „Uvek molinen tumen“ (1. Sol. 5:17). Amen šaj te molina amen e Jehovase ked god mangaja hem kuri god te ova. Ov uvek isi le vreme te šunel amen. Uvek tano odothe amendže hem pažljivo šunela amare molitve. Ked amen haljovaja so o Jehova šunela amare molitve, amen pobuter mangaja le. Jekh psalmista phendža: „Mangava e Jehova, odolese so ov šunela mo glaso“ (Ps. 116:1).

11. Sar o Jehova odgovorini ko amare molitve?

¹¹ Amaro Dad na samo so šunela nego hem odgovorini ko amare molitve. O apostol Jovan uverini amen ko odova: „So god te molina, a soj tano premali olesi volja, ov šunela amen“ (1. Jov. 5:14, 15). O Jehova šaj na ka odgovorini ko amare molitve ko način ko kova amen očekujinaja. Ov džanela soj tano najšukar amendže hem odolese disavo puti oleso odgovor ki amari molitva šaj te ovel na ja šaj mangela pana te adžičera (2. Kor. 12:7-9).

12-13. Ko kola načinja amaro nebesko Dad brinini pe amendar?

¹² O Jehova brinini pe te ovel amen sa so valjani amendže. Ov čerela odova so rodela ando svako dad (1. Tim. 5:8). Ov brinini pe ando pe čhavenge materijalna potrebe. Ov na mangela te brinina amen odolestar so ka ha, so ka urava, ja kaj ka živina (Mat. 6:32, 33; 7:11). Sar jekh dad kova mangela pe čhave, o Jehova dindža sa pestar te ovel amen sa so valjani amendže ki budućnost.

¹³ Odova soj tano najvažno, o Jehova brinini pe ando amare duhovna potrebe, adžahar so dela amen odova so valjani amendže te šaj te ova paše oleja. Prekalo poklo Lafi, ov mothovdža amendže koj tano ov, so mangela te čerel e manušencar hem e phuvjaja, sose čerdža amen hem so anela amendže i budućnost. Ked počmindžam te proučina, ov mothovdža so brinini pe amendar adžahar so koristindža amare roditeljen ja averen te pomožinen amen te pendžara le. Isto adžahar, prekalo starešine hem prekalo amare zrela phralja hem phenja ov pomožini amen te ačhova paše oleja. Uzo odova, ov sikavi amen prekalo sastankija kuri zajedno sikljovaja amare phraljencar hem phenjencar. Ko asavke hem avera načinja, o Jehova mothovi amendže so brinini pe amendar sar jekh dad (Ps. 32:8).

14. Sose o Jehova sikavi amen hem sar čerela odova?

¹⁴ O Jehova sikavi amen. O Isus hine savršeno, a amen na hijam. Odolese, dži sikavi amen, amaro Dad hem ispravini amen ked valjani. Oleso Lafi setinčeri amen: „Kas o Jehova mangela, ole hem ukorini“ (Jevr. 12:6, 7). Ko nekobor načinja šaj te dobina i disciplina kotar o Jehova. Na primer, odova so čitinaja ki Biblija ja šunaja ko sastankija šaj te pomožini amen te haljova so valjani te menjina amaro način sar razmislinaja ja odova so čeraja. Isto adžahar, šaj hem prekalo starešine te dobina pomoć.  Ko kova god način te dobina i disciplina ando Jehova, ov uvek čerela odova odolese so mangela amen (Jer. 30:11).

15. Sar o Jehova arakhi amen?

¹⁵ O Jehova pomožini amen te istrajina ko pharipa. Sar so jekh dad pomožini pe čhavendže ked isi len pharipa hem amaro nebesko Dad dela amen snaga te izdržina ko pharipa. Ov dela amen poklo sveti duh, a odova duh arakhi amen ando sa so šaj te rumini amaro amalipe oleja (Luka 11:13). Isto adžahar, o Jehova arakhi amen ked hijam obeshrabrime adžahar so dela amen i nada. Odija nada pomožini amen te istrajina ko pharipa. Ama, niked ma te bistre: Save god lošna buča te desinen pe amendže, amaro Dad ka sačari sa amare rane. Kola god pharipa isi amen akana, na ka trajinen zauvek, ama o blagoslovija kola o Jehova dela amen ka oven večna (2. Kor. 4:16-18).

16. So ulo ked o Adam na šundža pe Dade?

¹⁶ Odova so o Jehova čerdža ked o Adam grešindža mothovi amendže kobor mangela amen. Sebepi so o Adam na šundža pe nebesko Dade, ni ov, a ni oleso potomstvo na hine više deo andi e Jehovasi porodica (Rimlj. 5:12; 7:14). Ama, o Jehova čerdža diso te šaj te pomožini e Adamese čhavendže.

17. So o Jehova odmah čerdža ked o Adam grešindža?

¹⁷ O Jehova kaznindža e Adame, ama na mukhlja oleso potomstvo bizi nada. Ov odmah dindža po lafi so o manuša kola ka šunen le palem ka oven deo andi olesi porodica (Post. 3:15; Rimlj. 8:20, 21). Te šaj odova te čerel, o Jehova dindža pe Čhave, e Isuse, sar i otkupno žrtva amendže. Ko asavko način, o Jehova mothovdža so but mangela amen (Jov. 3:16).

18. Sose šaj te ova sigurna so o Jehova mangela amen, čak iako cidisaljam olestar?

 ¹⁸ Iako hijam nesavršena, o Jehova mangela te ova deo andi olesi porodica hem niked nane lese pharo te pomožini amendže. Amen šaj te razočarina le ja te cida amen olestar, ama o Jehova niked na našali pi nada so palem ka irina amen koro leste. O Isus mothovdža kobor o Jehova mangela pe čhaven ked vačerdža jekh priča ando našaldo čhavo (Luka 15:11-32). O dad ki odija priča niked na našaldža pi nada so oleso čhavo ka irini pe čhere. Ked oleso čhavo irindža pe, ov vilestar prihvatindža le. Ako cidisaljam ando Jehova, a kajinaja amen, tegani šaj te ova sigurna so amaro Dad, o Jehova, tano spremno te pomožini amendže te irina amen koro leste.

19. Sar o Jehova ka popravini i šteta koja čerdža o Adam?

¹⁹ Amaro Dad ka popravini sa i šteta koja čerdža o Adam. Palo odova so o Adam bunisalo protiv o Devel, o Jehova odlučindža te birini 144 000 manušen kotar i phuv, kola ka služinen sar kraljija hem sveštenikija olese Čhaveja, e Isuseja, ko nebo. Ko nevo sveto, o Isus hem okola so ka vladinen oleja ka pomožinen e poslušno manušendže te oven savršena. Okolendže kola ka nakhen i završno kušnja, o Devel ka del večno dživdipe. Tegani, amaro Dad ka ovel but bahtalo ked ka dikhel so i phuv tani pherdi savršeno manušencar. Kobor šukar ka ovel odova vreme!

20. Ko kola načinja o Jehova mothovi so mangela amen hem so ka dikha ko aver članko?

²⁰ O Jehova mothovdža amendže so čače but mangela amen. Ov tano najšukar Dad. Ov šunela amare molitve, brinini pe ando amare materijalna hem duhovna potrebe. Ov sikavi amen hem pomožini amendže. Isto adžahar, ki budućnost adžičerena amen but blagoslovija. Odova so o Jehova mangela amen hem brinini pe amendar, čerela amen te ova but bahtale. Ko aver članko ka dikha ko kola načinja amen, sar olese čhave, šaj te mothova so hijam zahvalna aso oleso mangipe.