Ko 1920-ta berša, angleder te len pe, me roditeljija upoznajinđe o ćaćipe. Me bijandiljum ko početko ando 1939. berš. Ked hijum le terno ćhavo, amen živinđam ki Engleska. Tegani, đeljum me roditeljencar ko sastankija hem kasnije upisinđum man ki Teokratsko škola propovedanja. Pana setinava man ked hine man mo prvo govor. Morandiljum te terđovav ki kutija te šaj te dikhav e publika. Tegani, hine man šov berš hem đi dikhljum e odraslo manušen ki publika hine man but bari trema.

Mo dad, ki jekh tikni kartica pisinđa maje o uvod asi služba. Hine man ofto berš, ked prvo puti kokri svedočinđum kotar ćher ko ćher. Hijum le but bahtalo ked o stanari čitinđa mi kartica hem odmah lelja i knjiga „Nek o Devel ovela istinito!“ Ikljiljum ki ulica hem prastandoj đeljum te phenav odova me dadese. Uživinđum ki služba hem ko sastankija. Odova podstakninđa man punovremeno te služinav e Jehovase.

But zamangljum o ćaćipe ked mo dad pretplatinđa man ko časopis Stražarska kula. Jedva bi ađićerava te čitinav svako izdanje kova bi resela prekali pošta. Sebepi odova, mo poverenje upro Jehova hine sa pobaro hem ko krajo predajinđum mo đivdipe olese.

Sar porodica hijam le delegatija, ked ko 1950. berš, hine ićerdo o kongres „Rast teokratije“, ko Njujork. Ko četvrtak, 3. avgust, i tema ando odova dive hine „Misionarski dan.“ Odova dive, o phral Keri Barber, kova kasnije služinđa ko Vodeće telo, ićerđa o govor aso krštenje. Ked ko krajo ando po govor o phral postavinđa o duj pućiba okolenđe kola ka krstinen pe, me uštiljum hem phenđum „ja“. Iako  hine man 11 berš, haljiljum so anđum jekh važno odluka. Ama, darandiljum te khuvav ko pani, sose pana na đanđum te plivinav. Mo kako, đelo mancar đi o bazeni hem uverinđa man so sa ka ovel šukar. Hem ćaće odova odobor sigate nakhlja so me pre ni na pipinđe o dno ando bazeni. Jekh phral krstinđa man, a aver pomožinđa man te ikljovav ando bazeni. Kotar odova važno dive, o Jehova hem ponodri ispravinđa me staze.

Ked završinđum i škola, mangljum te ovav pioniri, ama me profesorija podstakninđe man te đav ko fakultet. Olengo pritisak hine ćaće zoralo, hem me popustinđum hem upisinđum o fakultet. Sigate haljiljum so našti te bešav ko duj stolice, te služinav e Jehovase hem te studirinav. Odolese, odlučinđum te mukhav o fakulteti. Molinđum man e Jehovase hem pisinđum jekh lil aso me profesorija, so ko krajo ando prvo berš ka mukhav o fakultet. Hine man potpuno pouzdanje ko Jehova hem odmah uljum pioniri.

I punovremeno služba počminđum ko jul, 1957. berš, ki diz Velingboro. Zamolinđum e phralen ko Betel, ko London, te den man jekhe iskusno phrale kasa šaj te sarađujinav ki služba. O phral Bert Vejsej sikavđa man but buća, ov hine but revno ki služba hem pomožinđa man te ovel man šukar raspored asi služba. Ki skupština hine šov phure phenja, o phral Vejsej hem me. Odova so spreminđum man aso sastankija hem so učestvujinđum, dinđa man but prilike te ovel man pana pobaro pouzdanje ko Jehova hem te mothovav mi vera.

Palo odova so kratko vreme hijum le ko phanlipe, sebepi so odbinđum te đav ki vojska, upoznajinđum e Barbara, jekha phenja koja služinđa sar specijalni pionir. Ko 1959. berš, venčinđam amen hem hijam le spremna te đa kuri god o phralja ka bićhalen amen. Najangleder, hijam le ko Lankašir, ko severozapadno deo andi Engleska. Ko januar, ko 1961. berš, hijum le vićimo te đav jekh masek ko Seminar aso naimenujime phralja, ko Betel, ko London. Hijum le iznenadimo ked ko krajo ando seminar, hijum le zamolimo te služinav sar putujućo nadglednik. I Barbara hem me đeljam ko Birmingem kuri duj kurće dobinđum obuka ando jekh iskusno pokrajinsko nadgledniko. Palo odova, počminđam amari pokrajinsko služba ko grofovije Lankašir hem Češir.

Ko avgust, 1962. berš, đi hijam le ko odmor dobinđam jekh lil andi podružnica. Ko odova lil hine o molbe asi škola Galad! Palo odova so molinđam amen, i Barbara hem me pherđam o molbe hem sigate bićhalđam len ki podružnica. Panđ masek palo odova, hijam le ko drumo aso Bruklin, ko Njujork, kuri hijam le deo ando 38. razred ki škola Galad. Ki odija škola, deš masek hor proučinđam i Biblija.

Ki odija škola, na sikljiljam samo ando e Devleso Lafi hem andi e Devlesi organizacija, nego  hem ando phralja hem phenja ko celo sveto. Sebepi so hine amen hari pobuter ando 20 berš, but buća sikljiljam ando avera phralja hem phenja ki škola. Me hem o phral Fred Rask, kova hine jekh ando me instruktorija, svako dive zajedno ćerđam jekh radno zadatko. Hine maje but bari čast te sarađujinav oleja. Jekh andi najvažno buti koja sikavđa man hine so o savet uvek valjani te ovel pravedno, odova značini so valjani te temeljini pe ko e Devleso Lafi. Maškaro okola kola ićerđe amenđe o časija hine o iskusna phralja sar soj tane o Natan Nor, o Frederik Franc hem o Karl Klajn. But sikljiljam andi poniznost kotar o phral Makmilan, kova sikavđa amen sar o Jehova pomožinđa pe narodose ko pharo period ando 1914. berš đi ki početka ando 1919. berš!

Ko krajo andi škola, o phral Nor phenđa e Barbaraće hem maje so ka služina ko Burundi, ki Afrika. Sigate đeljam ki biblioteka te dikha ko Godišnjak kobor objaviteljija služinena ko Burundi ko odova vreme. Hijam le iznenadime so nigde naštinđam te arakha kobor objaviteljija isi ki odija phuv! Amen valjanđam te đa ki phuv kuri pana niko na propovedinđa, ki Afrika, kotar koja hari đanđam. But brininđam amen, ama i molitva pomožinđa amenđe te ovel amen mir.

Ko amaro nevo zadatko, sa hine averćhane ando odova ko so sikljiljam – i klima, i kultura hem i ćhib. Akana morandiljam te sikljova francuski. Isto ađahar, valjanđam te arakha than kaj ka živina. Duj dive palo odova so resljam, o Hari Arnot, amaro amal andi škola, posetinđa amen ked irinđa pe ko po zadatko ki Zambija. Ov pomožinđa amenđe te arakha stan, kova ulo amaro prvo misionarsko dom. Sigate palo odova, počminđam te doživina protivljenje ando vlastija, kola ništa na đanđe ando e Jehovase svedokija. Samo so počminđam te uživina ko amaro zadatko odothe, o vlastija phenđe amenđe so našti te aćhova odothe sose nane amen radno dozvola. Nažalost, morandiljam te preselina amen ki aver phuv, akava puti ki Uganda.

Brininđam amen so đaja ki Uganda bizi viza, ama hine amen pouzdanje upro Jehova. Jekh phral andi Kanada, kova služinđa ki Uganda, objasninđa amari situacija jekhe službenikose,  ki imigraciono služba. Ov phenđa amenđe so šaj te aćhova ki odija phuv đi na dobinaja dozvola aso boravak. Sa odova mothovđa amenđe so o Jehova pomožini amen.

I situacija ki Uganda hine averćhane nego ko Burundi. Ki Uganda već propovedinđa pe, ama ki celo phuv hine samo 28 amare phralja hem phenja. Ko područje arakhljam but manuša kola vaćerena engleski. Sigate haljiljam so valjani te sikljova barem pana jekh ćhib koja vaćeri pe odothe, te bi pomožinaja e manušenđe duhovno te napredujinen. Počminđam te propovedina ki diz Kampala hem ko thana kola hine uzi odija diz kuri vaćerđa pe i ćhib Luganda hem odolese odlučinđam te sikljova odija ćhib. Valjanđa amenđe nekobor berš te šaj šukar te vaćera odija ćhib. Ama, sebepi odova hijam le pouspešna ki služba. Pana pošukar haljiljam kola duhovna potrebe amare studentija isi len. Ked amare studentija dikhlje kobor amen hijam zainteresime olenđe, on hine len poverenje upro amende te phenen amenđe sar odova so sikljona utičini upro lende.

Amen hijam le but radosna đi pomožinđam e manušenđe te sikljon o ćaćipe. Ama, hijam le pana poradosna ked hijam le zamolime te služina ki putujućo služba ki odija phuv. O phralja andi podružnica ki Kenija, zamolinđe amen te pođina ko jekh posebno „safari“, te arakha o thana kuri bi ovela šukar o specijalna pionirija te oven bićhalde te propovedinen. Nekobor putija doživinđam o manuša kola niked angleder na penđarđe e Jehovase svedokonen te oven but gostoljubiva premalo amende. Šukar dočekujinđe amen hem pripreminđe amenđe habe.

Akana đeljam ko aver „safari“. Putujinđum duj dive vozeja andi Kampala đi i luka Mombasa, ki Kenija. A palo odova đeljum brodoja ko Sejšelska ostrvija, ko Indijsko okeani. Kasnije, kotar 1965. đi o 1972. berš, redovno đeljum ko Sejšelska ostrvija zajedno e Barbaraja. Ko početko hine samo duj objaviteljija odothe, a kasnije ulji jekh grupa hem skupština. Avera „safarija“ legarđe man đi odova te posetinav e phralen ki Eritreja, ki Etiopija hem ko Sudan.

Palo odova so jekh vojničko grupa preuzminđa i vlast ki Uganda, i političko situacija menjinđa pe. Beršencar hine but pharo hem tegani haljiljum kobor tano važno te šuna i zapovest: „Den e carese e careso“ (Mar. 12:17). Ko jekh trenutko, sa o strancija kola živinđe ki Uganda morandilje te prijavinen pe ki policijsko stanica paše uzo olengo ćher. Amen odmah ćerđam odova. Nekobor dive palo odova đi vozinđam ki Kampala, i tajno policija zaustavinđa man hem jekhe avere misionare. Bur darandiljam! On optužinđe amen so hijam špijunija hem legarđe amen ki glavno policijsko stanica, kuri objasninđam so amen hijam misionarija hem so isi amen šukar namera. Objasninđam lenđe so već prijavinđam amen ki policija, ama on na manglje te šunen amen. On astarđe amen hem legarđe amen ki policijsko stanica koja hine uzo misionarsko dom. Kobor hijam le bahtale ked jekh policajco, kova već đanđa so prijavinđam amen, penđarđa amen hem phenđa e stražarese te oslobodini amen!

Ko odola dive hine amenđe but pharo sose i vojska but putija blokirinđa o drumija. Posebno  hine amenđe pharo ked bi zaustavinena amen o vojnikija kola hine mate. Svako puti amen molinđam amen hem osetinđam unutrašnjo mir đi nakhljam bezbedno odova drumo. Nažalost, ko 1973. berš sa o misionarija morandilje te đan andi Uganda.

Palem hijam le bićhalde te služina ki aver država, akava puti ki Obala Slonovače, ki zapadno Afrika. So akija promena značinđa amenđe: palem nevi kultura hem valjanđam palem te vaćera francuski celo vreme hem te prilagodina amen te živina e misionarencar kola hine ando ando avera phuvja. Pana jekh puti dikhljam sar o Jehova vodini amen đi o ponizna hem o iskrena manuša kola sigate prihvatinđe i šukar vest. Dikhljam sar o Jehova ispravini amare staze sebepi so hine amen pouzdanje upro leste.

Nažalost, saznajinđam so i Barbara isi la rak. Iako but putija đeljam ki Evropa sebepi olako lečenje, ipak ko 1983. berš, haljiljam so više našti te služina ki Afrika. Hine amenđe but pharo sebepi odova.

Ði služinđam ko Betel ko London, i Barbara hine sa pološno hem ko krajo mulji. I betelsko porodica but pomožinđa maje. Posebno jekh bračno par pomožinđa man te prilagodinav man hem ponodri te ovel man pouzdanje ko Jehova. Kasnije, upoznajinđum e phenja En, koja hine saradniko ko Betel hem koja služinđa sar specijalno pionir. Ćaće dićhilo soj tani duhovno osoba koja mangela e Jehova. Ko 1989. berš, venčinđam amen hem kotar tegani služinaja ko Betel.

Kotar 1995. đi o 2018. berš, služinđum sar predstavnik ando glavno sedište, (kova angleder vićinđa pe zonski nadglednik) hem posetinđum skoro 60 phuvja. Ki svako poseta, dikhljum sar o Jehova brinini pe ando po narodo, bizo obzir ko kola okolnostija tane.

Ki jekh poseta, ko 2017. berš, palem irinđum man ki Afrika. Hine but šukar so i En šajinđa te dikhel o Burundi hem so solduj šajinđam te dikha sar amaro delo napredujinđa. Ki isto ulica kuri propovedinđum kotar ćher ko ćher pana ko 1964. berš, tano akana šužo Betel kova brinini pe aso pobuter ando 15 500 objaviteljija.

But hijum le bahtalo ked dikhljum kola phuvja ka posetinav ko 2018. berš. Jekh olendar hine i Obala Slonovače. Ked resljam ko Abidžan, i glavno diz, osetinđam amen samći ćhere hijam. Ked dikhljum o telefonsko imenik ko Betel, dikhljum so ki soba uzo amende živini o phral Sosu. Setinđum man so ov služinđa sar nadglednik andi diz ked služinđum ko Abidžan. Ama, pogrešinđum. Odova hine aver Sosu – oleso ćhavo.

O Jehova ispuninđa po obećanje. Ando sa odola pharipa kola doživinđum, sikljiljum so ako uzdajinaja amen upro Jehova, ov ćaće ka ispravini amare staze. Akana hijam bahtale so šaj hem ponodri te aćhova ko akava drumo hem te služina e Jehovase sa đi na khuvaja ko nevo sveto (Posl. 4:18).