1-2. (a) So o Jehova dikhela ked milionja manuša čedena pe ko Dive ked setina amen ko Isuseso meribe? (Dikh i slika ko početko ando akava časopis.) (b) Sostar ka vačera ko akava članko?

RAZMISLIN odoljestar so o Jehova dikhela ked milionja manuša ko celo sveto čedena pe jekh puti ko berš te setinen pe ko Isuseso meribe. Ov na dikhela ljen sar but manuša kola tane ko jekh than, ov dikhela svakone manuše so avela. Na primer, ov dikhela okoljen so istrajno avena svako berš. Maškaro oljende šaj isi disave kola avena, iako isi ljen baro progonstvo. Disave na avena ko amare sastankija, ama ko Dive ked setina amen ko Isuseso meribe avena, sebepi so dikhena lje sar diso but važno. Isto adžahar, o Jehova dikhela okoljen kola avena prvo puti sebepi so mangena te džanen so ovela ko odova sastanko.

² O Jehova tano bahtalo ked dikhela so but manuša avena ko odova posebno sastanko (Luka 22:19). Ama, e Jehovase nane najvažno kobor manuša alje. Oljese tano považno sose o manuša alje. Ko akava članko ka vačera kotar jekh važno pučibe: Sose amen džaja hem ko Dive ked setina amen ko Isuseso meribe hem ko amare sastankija kola isi amen svako kurko, kuri o Jehova vičini amen sebepi so mangela amen?

3-4. (a) Sose džaja ko sastankija? (b) So mothovi amendar odova so džaja ko sastankija? (c) Sar so pisini ko 1. Korintskonendže 11:23-26, sose na valjani te muka (te propustina) e Gospodaresi večera?

³ Najbaro razlog sose amen avaja ko sastankija tano sebepi so adžahar služinaja e Devljese. Pana jekh razlog tano sose  o Jehova sikavi amen ko odola sastankija. O manuša kola tane ponosna mislinena so na valjani džiko te sikavi ljen (3. Jov. 9). A ki aver strana, amen jedva adžičeraja te ova sikavde kotar Jehova hem oljesi organizacija (Isa. 30:20; Jov. 6:45).

⁴ Ked džaja ko amare sastankija, tegani mothova so hijam ponizna hem so mangaja te sikljova. Amen na džaja ko Dive ked setina amen ko Isuseso meribe samo sebepi so mislina so valjani te čera odova, nego hem mangaja te ičera amen ko odova so o Isus vačerdža: „Čeren akava te setinen tumen upro mande“ (Čitinen 1. Korintskonendže 11:23-26.) Ko odova sastanko zorjačera amari nada ko vreme so avela hem setina amen ko odova kobor o Jehova mangela amen. Ama, o Jehova džanela so amen našti samo jekh puti ko berš te ova ohrabrime. Odoljese ov dija te ovel amen svako kurko sastankija hem phenela amendže te dža koro oljende. Amen čera odova sebepi so hijam ponizna. Svako kurko šaj odvinaja nekobor sača te šaj te spremina amen hem te dža ko sastankija.

5. Sose o ponizna manuša prihvatinena ked o Jehova vičini ljen?

⁵ Svako berš but ponizna manuša prihvatinena odova so o Jehova vičini ljen te šaj te sikavi ljen (Isa. 50:4). On osetinena pe šukar ked avena ko Dive ked setina amen ko Isuseso meribe hem sebepi odova počminena te aven ko avera sastankija (Zah. 8:20-23). Zajedno oljenca, sare amen hijam bahtalje dži sikljovaja ando Jehova, kova „pomožini [...] hem spasini“ (Ps. 40:17). Čače, so šaj te ovel pošukar hem považno odoljestar te sikaven tut o Jehova hem oljeso manglo Čhavo, o Isus? (Mat. 17:5; 18:20; 28:20).

6. Sar jekh manuš mothodža soj tano ponizno?

⁶ Svako berš, amen daja sa amendar te vičina so pobuter manušen te aven ko Dive ked setina amen ko Isuseso meribe. But ponizna manuša alje ko odova sastanko hem hine oljendže but šukar. Te dikha jekh primer. Angljeder nekobor berš, jekh manuš ljelja i pozivnica te avel ko Dive ked setina amen ko Isuseso meribe, ama vačerdža amare phraljese kova dija lje i pozivnica so našti te avel. Odoljese, amaro phral hine iznenadimo ked dikhlja odolje manuše so alo ko odova posebno sastanko. O manuš ačhilo bizo lafi ked dikhlja sar o phralja viljestar adžičerdže lje odija rat hem odova čhidža lje te počmini te avel hem ko avera sastankija. Čak šta više, samo ko trin sastankija na alo, ko celo odova berš. So pomožija oljese te anel asavki odluka te džal ko sa o sastankija? Hine odobor ponizno so promija poklo mišljenje. O phral kova vičija lje palo disavo vreme vačerdža: „Ov tano but ponizno manuš.“ Čače šaj te phena, so sigurno o Jehova odolje manuše cidija nakro peste, hem akana ov tano amaro krstimo phral (2. Sam. 22:28; Jov. 6:44).

7. Sar o sastankija hem i Biblija pomožinena amendže te ova ponizna?

⁷ Okova so šuna ko sastankija hem okova so čitina andi Biblija pomožini amendže te ova ponizna. Nekobor kurče angljeder te ovel o Dive ked setina amen ko Isuseso meribe, ko amare sastankija but puča vačeri pe ando Isuseso primer hem andi oljesi poniznost koja mothodža adžahar so dija poklo dživdipe sar žrtva. Nekobor dive angljeder te ovel o Dive ked setina amen ko Isuseso meribe, ovela bi šukar te čitina andi Biblija so ulo angljeder te merel o Isus hem te ovel uskrsnimo. Okova so šuna ko sastankija hem so čitina andi Biblija bajačeri amari zahvalnost premali Isusesi žrtva. Odoljese amen mangaja te ova ponizna sar oljeste hem te čera e Jehovasi volja, čak ked tano odova but pharo (Luka 22:41, 42).

8. Sar o Isus mothodža hrabrost?

⁸ Amen šaj te čhiva amen upro Isus hem adžahar so ka ova hrabra. Razmislin odoljestar kobor ov hine hrabro angljeder te merel. Džandža so o dušmanja pana hari ka ponizinen lje, ka maren lje hem ko kraj ka mudaren lje (Mat. 20:17-19). Ama ov hine spremno te merel. Ked alo odova vreme, peklje apostolendže kola hine oljeja ki Getsimanija vačerdža: „Ušten, te dža. Moklo izdajniko tano paše“ (Mat. 26:36, 46). Ked o manuša kola hine ljen oružije alje te astaren lje, ov ikljilo anglo oljende, vačerdža soj tano ov odova kas rodena hem pheja e vojnikondže te muken oljese apostolen (Jov. 18:3-8). Savo baro primer andi hrabrost! Avdije o pomazime hrišćanja hem o avera bakre dena sa pestar te oven hrabra sar o Isus. Sar čerena odova?

9. (a) Ked valjani amendže hrabrost te bi ova redovna ko sastankija? (b) Sar amaro primer šaj te utičini upro phralja kola tane ko phanljipe sebepi piklji vera?

⁹ Ked hijam ki disavi phari situacija, tegani valjani amendže hrabrost te šaj te ova redovna ko amare sastankija. Disave amare phralja hem phenja avena ko sastankija iako isi ljen dukh ko vilo, obeshrabrime tane hem nane ljen šukar sastipe. A avera mothovena hrabrost adžahar so avena ko sastankija hem uzo odova so isi ljen baro progonstvo andi familija ja ando manuša soj tane ki vlast. Razmislin hari odoljestar sar amaro primer utičini upro phralja kola tane ko phanljipe sebepi piklji vera (Jevr. 13:3). Ked šunena so amen hem ponodri služinaja e Jehovase iako isi amen kušnje, odova pomožini oljendže te ačhon verna, hrabra hem ko sa te šunen e Jehova. O apostol Pavle isto nakhlja kotar odova. Dži hine ko phanljipe ko Rim, hine but bahtalo ked svako puti šuja so oljese phralja verno služinena e Devljese (Fil. 1:3-5, 12-14). Hari angljeder so hine muklo ando phanljipe ja sigate palo odova, o Pavle pisija o ljil e Jevrejendže. Ko odova ljil zorjačerdža e verno hrišćanen te den sa pestar te ovel ljen „mangipe sar phralja hem ponodri“ hem niked te na ačhaven peklje sastankija (Jevr. 10:24, 25; 13:1).

10-11. (a) Kas valjani te vičina ko Dive ked setina amen ko Isuseso meribe? (b) Premalo Efeskonendže 1:7, kova razlog isi amen te čera odova?

¹⁰ Amen mothova hrabrost ked vičina amare familija, e manušen kasa čeraja buti hem e komšijen te aven ko Dive ked setina amen ko Isuseso meribe. Sose čeraja odova? Amen odoborkha hijam zahvalna ko odova so o Jehova hem o Isus čerdže amendže hem odoljese našti a te na vičina averen manušen te aven ko odova sastanko. Amen mangaja te džanen save berečetija šaj te ovel ljen ando Jehovaso šukaripe kova na zaslužina, kova mothodža adžahar so dija pe čhave sar žrtva. (Čitinen Efeskonendže 1:7; Puč. 22:17.)

¹¹ Ked hijam hrabra hem džaja ko sastankija, amen mothova pana jekh but šuži osobina,  koja o Devel hem oljeso Čhavo but mothovena la.

12. (a) Sar amare sastankija bajačerena amaro mangipe premalo Jehova hem o Isus? (b) Ko so podstakninena amen o lafija ando 2. Korintskonendže 5:14, 15?

¹² Amaro mangipe premalo Jehova hem o Isus čhivela amen te dža ko sastankija. Odoljese, okova so sikljovaja ko sastankija bajačeri amaro mangipe premalo Jehova hem premalo oljeso Čhavo. Amen ko sastankija redovno setina amen ko sa so čerdže on amendže (Rim. 5:8). O Dive ked setina amen ko Isuseso meribe posebno setinčeri amen ko odova kobor tano baro oljengo mangipe, čak hem premalo okoljende kola pana na haljovena kobor tani vredno odija žrtva. Amen hijam but zahvalna hem odoljese daja sa amendar svako dive te čera sar so čerdža o Isus. (Čitinen 2. Korintskonendže 5:14, 15.) Uzo odova, amen viljestar mangaja te hvalina e Jehova sebepi so dija pe čhave amendže sar žrtva. Jekh buti sar šaj te hvalina lje tani so ko amare sastankija šaj te da komentarija amare lafenca.

13. Vačer pobuter odoljestar sar šaj te mothova amaro mangipe premalo Jehova hem oljeso Čhavo.

¹³ Amaro mangipe premalo Jehova hem premalo oljeso Čhavo šaj te mothova adžahar so hijam spremna te čera disave žrtve. Te šaj te ava ko sastankija, but puča valjani diso te žrtvujina. Ko but skupštine o sastankija ko radno dive ičerena pe ko akšami, ked šaj hijam but čhinde. Aver sastanko ičeri pe ko savato ja kurko, ked avera manuša odmorinena. Da li o Jehova dikhela so amen džaja ko sastanko iako hijam čhinde? Po! Odoljese, so pobuter daja sa amendar, ov pana pobuter cenini o mangipe kova mothova premalo oljeste (Mar. 12:41-44).

14. Ko so o Isus ačhadža šukar primer amendže?

¹⁴ O Isus ačhadža amendže primer te mothova mangipe, adžahar so ka žrtvujina kokri amen sebepi averengo. Ov hine spremno na samo te merel peklje učenikondže, nego hem svako dive te čhivel oljengo šukaripe anglo poklo. Na primer, ov hine peklje učenikonca čak ked hine fizički hem emocionalno čhindo (Luka 22:39-46). Ov  dikhlja ko odova so šaj ov te del averendže, a na ko odova so šaj te ljel oljendar (Mat. 20:28). Ked tano amaro mangipe premalo Jehova hem premalo amare phralja but zoralo, tegani ka da sa amendar te dža ko Dive ked setina amen ko Isuseso meribe hem ko sa avera amare sastankija.

15. Kase posebno mangaja te pomožina?

¹⁵ Amen hijam ki jekh čačutni hrišćansko organizacija hem mangaja te da so pobuter amaro vreme te vičina averen te oven amenca. Ama, posebno mangaja te da amaro vreme „amare phraljendže ki vera“ kola tane neaktivna (Gal. 6:10). Amaro mangipe premalo oljende ka mothova adžahar so ka ohrabrina ljen te aven ko sastankija, a posebno te aven ko Dive ked setina amen ko Isuseso meribe. Amen sar o Jehova hem o Isus hijam but bahtalje, ked o phralja hem o phenja kola tane neaktivna irinena pe e Jehovase, kova tano amaro manglo Dad hem Pastiri (Mat. 18:14).

16. (a) Sar šaj te ohrabrina jekh jekhe hem ko so ka pomožinen amen o sastankija? (b) Sose tano šukar baš ko akava vreme te setina amen ko Isusese lafija kotar Jovan 3:16?

¹⁶ Ko kurče so avena, ka da sa amendar te vičina so pobuter manušen te aven ko Dive ked setina amen ko Isuseso meribe ko akšami, ko petak, 19. april ko 2019. berš. (Dikh o okvir „ Da li ka vičine oljen?“) Prekalo celo berš, valjani hem ponodri te ohrabrina jekh jekhe adžahar so ka ova redovna ko amare sastankija kola o Jehova dija amen. Dži avela sa popaše o krajo kotar akava sveto, o sastankija valjanena amendže te šaj te bajačera amari poniznost, hrabrost hem o mangipe (1. Sol. 5:8-11). Celone viljeja mothov toklo mangipe premalo Jehova hem oljeso Čhavo kola but mangena amen! (Čitinen Jovan 3:16.)