1-2. (a) Sose tano logično so o Isus ko jednostavno način mothodža amendže sar valjani te setina amen ko oljeso meribe? (b) Kotar kola e Isusese osobine ka vačera?

ŠAJ LI te vačere so čerela pe ko dive ked setina amen ko Isuseso meribe? But amendar šaj bi odova te vačeren. Sose? Sebepi soj tani odija večera but jednostavno. Ama, šaj džiko te pučel pe sose tani odija večera odobor jednostavno ako tani odija jekh posebno prilika?

² Dži čerdža piklji služba ki Phuv, o Isus hine pendžardo palo odova so o važno čačipe vačerdža e manušendže adžahar so hine jednostavno, jasno hem lokho te haljol pe (Mat. 7:28, 29). Isto adžahar ko jednostavno hem ko logično način mothodža sar valjani te setina amen ko oljeso meribe. Ajde akana te dikha sar dičhilji e Gospodaresi večera hem so tegani vačerdža hem čerdža o Isus. Odova ka pomožini amen pana pošukar te haljova kobor bari poniznost, hrabrost hem mangipe hine lje o Isus hem te dikha sar šaj pana pošukar te čhiva amen upro oljeste.

3. Sar so pisini ko Matej 26:26-28, kobor hine jednostavno i večera koja o Isus čerdža hem soj tane o maro hem o vino?

³ O Isus peklje 11 učenikonca čerdža e Gospodaresi večera. Ov ljelja okova so ačhilo kotar Pasha hem čerdža jednostavno večera. (Čitinen Matej 26:26-28.) Koristija samo o maro bizo kvasco hem o vino kova već hine odothe. Peklje apostolendže vačerdža so odola duj buča tane oljeso savršeno telo hem oljeso rat, kova pana hari ka del sar žrtva oljendže. O apostolija verovatno na hine iznenadime so  odija večera hine odobor jednostavno. Sose šaj te phena odova?

4. Sar o savet kova o Isus dija e Martače pomožini amendže te haljova sose tani e Gospodaresi večera but jednostavno?

⁴ Te dikha so hine nekobor masekija angljeder odova, dži traija e Isuseso trito berš ki služba, ked hine ko čher ko peklje šukar amala, ko Lazar, ki Marta hem ki Marija. Dži bešlje adžahar, o Isus počmija te sikavi ljen. Iako i Marta hine odothe, oj hine astardi odoljeja te spremini o habe e Isusese. Ked dikhlja odova, o Isus vačerdža olače šukaripa so na valjani svako puti te čerel odobor but habe (Luka 10:40-42). Disavo vreme palo odova, hari angljeder so te merel hem ov kokri ičerdža pe ko odova savet kova dija olače. I večera koja tegani hine lje peklje učenikonca hine but jednostavno. So odova vačeri amendže ando Isus?

5. So akija jednostavno večera vačeri ando Isus, hem sar akava složini pe odoljeja so pisini ko Filipskonendže 2:5-8?

⁵ Ko sa so o Isus vačerdža hem čerdža dičhilo kobor tano ponizno. Odoljese na hine čudno so ki paluni rat kotar poklo dživdipe ki Phuv mothodža bari poniznost (Mat. 11:29). Ov džandža so poklo dživdipe ka del sar najbari žrtva ki manušesi istorija hem so o Jehova ka uskrsnini olje hem so ka čhive lje te ovel Kralj ko nebo. Ama ipak ov na manglja te mothovi pe anglo avera adžahar so bi čhivela but buča te čeren pe ki odija večera. Odoljese peklje učenikondže vačerdža jekh puti ko berš te setinen pe ko oljeso meribe adžahar so ka čeren odija jednostavno večera (Jov. 13:15; 1. Kor. 11:23-25). Odova mothovi so o Isus na hine ponosno manuš. Čače amen šaj te ova bahtalje so asavki but šuži osobina sar soj tani i poniznost isi lje amaro nebesko Kralj. (Čitinen Filipskonendže 2:5-8.)

6. Sar šaj sar o Isus te mothova poniznost ked hijam ko kušnje?

⁶ Sar šaj te ova ponizna sar o Isus? Adžahar so averengo šukaripe ka čhiva anglo amaro šukaripe (Fil. 2:3, 4). Te setina amen so hine ki paluni rat ando Isuseso dživdipe ki Phuv. Ov džandža so pana hari ka merel bare dukhenca, ama ov na brinija pese nego peklje verno apostolendže, koljendže ka ovel but pharo sebepi oljeso meribe. Odoljese odova vreme kova ačhilo lje hine oljenca adžahar so sikadža ljen, ohrabrija ljen hem zorjačerdža ljen (Jov. 14:25-31). E Isusesi bari poniznost baš dičhilji ko odova so pobuter brinija pe averendar, nego li pestar. Čače baro primer upro kaste valjani te čhiva amen.

7. Sar o Isus mothodža bari hrabrost sigate palo odova so čerdža e Gospodaresi večera?

⁷ Sigate palji odija večera, o Isus mothodža but bari hrabrost. Sose odova vačera? O Isus čerdža pe Dadesi volja, iako džandža so sebepi odova ka ovel ladžačerdo, adžahar so ka ovel mudardo sar manuš kova vačeri protiv o Devel (Mat. 26:65, 66; Luka 22:41, 42). O Isus dži ko krajo ačhilo verno hem adžahar slavija e Devljeso nav, mothodža so o Devel isi lje pravo te ovel Vrhovno vladari hem phradža o drumo te šaj o manuša te oven ljen večno dživdipe. Ko isto vreme spremija peklje učenikon e bučendže kola pana hari ka ovel ljen.

8. (a) So o Isus vačerdža peklje verno apostolendže? (b) Sar e Isusese učenikija hine hrabra beršenca palo oljeso meribe?

⁸ O Isus mothodža hrabrost hem odoljeja so na mislija ko odova so tegani šaj mučija lje, nego mislija ko odova so valjandža oljese verno apostolendže. I jednostavno večera, koja čerdža o Isus palo odova so muklja te džal pese o Juda, valjandža te setinčeri oljese pomazana učenikon kobor tano vredno oljeso rat kova čhordža hem so značini o savez ko kova učestvujinena (1. Kor. 10:16, 17). Te šaj te pomožini pe apostolendže te dokažinen so zaslužinena te oven vičime ko nebo, o Isus objasnija oljendže so ov hem oljeso Dad adžičerena oljendar (Jov. 15:12-15). Isto adžahar, vačerdža oljendže so ka ovel ljen disave kušnje. A palo odova vačerdža te oven hrabra, sar ov so hine hrabro (Jov. 16:1-4a, 33). Beršenca palo odova, e Isusese učenikija hem ponodri čerdže bare žrtve hem hine hrabra sar oljengo Učitelj. Ko razna kušnje pomožije jekh jekhese, iako sebepi odova čerdže pese pharipa (Jevr. 10:33, 34).

9. Sar šaj sar o Isus te ova hrabra?

 ⁹ Isto adžahar, hem amen avdije hijam hrabra sar o Isus. Na primer, valjani amendže hrabrost te šaj te pomožina e phraljendže kola tane progonime sebepi piklji vera. Podijekh puti amare phralja tane ko phanljipe iako na čerdže ništa protiv o zakoni. Ked diso adžahar ovela, tegani amen valjani te čera sa so šaj oljendže, čak hem te branina ljen amare lafenca (Fil. 1:14; Jevr. 13:19). I hrabrost mothova hem ked uzo odova so daraja, amen nastavina te vačera o šukar haberi (Čer. 14:3). Amen sar o Isus ka nastavina te vačera o šukar haberi, iako o manuša tane protiv amende hem progoninena amen. Ama šaj podijekh puti na hijam odobor hrabra. So tegani šaj te čera?

10. So valjani te čera dži trajinena o kurče angljeder te ovel o Dive ked setina amen ko Isuseso meribe hem sose?

¹⁰ Ked razmislina andi nada koja isi amen sebepi so o Isus dija po dživdipe, tegani amen šaj te ovel amen hrabrost (Jov. 3:16; Efe. 1:7). Nekobor kurče angljeder te ovel o Dive ked setina amen ko Isuseso meribe, isi amen posebno prilika te mothova pana pobari zahvalnost okoljese so dija poklo dživdipe sar žrtva. Ovela bi šukar te čitina i Biblija premalo raspored kova tano dindo ko odova vreme hem hor te razmislina odoljestar so sa hine ko vreme ked o Isus mulo. Adžahar ki Gospodaresi večera amen pana pošukar ka haljova so značinena o simbolija hem i bari žrtva kola on mothovena. Ako haljova so čerdže o Isus hem o Jehova hem kobor baro šukaripe odova anela amendže hem okoljendže kas mangaja, tegani amari nada ka ovel pana pozoralji hem ka čhivel amen te ačhova hrabra dži ko krajo (Jevr. 12:3).

11-12. So sikljiljam dži akana?

¹¹ Dži akana dikhljam, so ked ovela o Dive ked setina amen ko Isuseso meribe na setina amen samo kobor hine bari odija  žrtva, već hem ko odova kobor o Isus hine ponizno hem hrabro. Kobor valjani te ova zahvalna so o Isus pana mothovi asavke osobine. Ov tano akana ko nebo sar Prvosveštenik kova e Jehovase vačeri šukar amendar (Jevr. 7:24, 25). Amen viljestar ka mothova kobor hijam zahvalna ako svako berš ka setina amen ko Isuseso meribe, adžahar so ka čera sar so ov zapovedija (Luka 22:19, 20). Odova čeraja ko dive kova perela ko 14. nisan hem odova tano amendže najvažno dive ko berš.

¹² I jednostavno večera mothovi so pana čhidža e Isuse te del po dživdipe amendže sar žrtva. Dži hine ki Phuv, ov hine šukar pendžardo palo odova. Soj tano odova?

13. So o lafija ando Jovan 15:9 hem 1. Jovaneso 4:8-10 vačerena ando mangipe kova o Isus hem o Jehova mothodže hem ko sa isilje korist kotar oljengo mangipe?

¹³ O Isus sa so čerdža hine savršeno hem adžahar mothodža kobor o Jehova mangela amen. (Čitinen Jovan 15:9 hem 1. Jovaneso 4:8-10.) Kotar sa odova, najvažno tano so o Isus celone viljeja manglja te del po dživdipe amendže. Da li hijam pomazanikija ja „avera bakre“, sare amen isi amen berečetija sebepi o mangipe kova o Jehova hem oljeso Čhavo mothodže premalo amende prekali žrtva koja dije (Jov. 10:16; 1. Jov. 2:2). Ako razmislina odoljestar sar dičhilji e Gospodaresi večera, tegani ka džana pana diso ando Isuseso mangipe hem ando odova kobor hine razumno. Sose šaj te phena odova?

14. Sar o Isus mothodža mangipe premalo peklje učenikija?

¹⁴ E Isuseso mangipe premalo oljese pomazime učenikija dičhilo ko odova so na vačerdža oljendže te čeren but buča ki odija večera, nego odija hine jekh but jednostavno večera. Sar nakhlja o vreme, o pomazime učenikija valjandže hem ponodri svako berš te setinen pe ko Isuseso meribe. Sare on hine ko razna okolnostija, a disave oljendar hine hem ko phanljipe (Puč. 2:10). Da li uspije te čeren odova so o Isus zapovedija? Po, uspije.

15-16. Sar disave slavije e Gospodaresi večera čak ked hine ko phare situacije?

¹⁵ Kotar prvo veko pa sa dži avdije, o čačutne hrišćanja dena sa pestar svako berš te setinen pe ko Isuseso meribe. On ičerena e Gospodaresi večera najšukar so šaj, sar so čerdža o Isus, čak podijekh puti hem ko phare situacije. Te dikha nekobor primerija. Ked o phral o Harold King hine kokri ko phanljipe (ki samica) ki Kina, ov valjandža te razmislini odoljestar sar ka ičeri e Gospodaresi večera. Ov garavde spremija o simbolija kola valjandže te oven ki Gospodaresi večera, adžahar so koristija odova so hine lje. Džendža o dive ked valjani te ovel e Gospodaresi večera hem dikhlja te ovel so potačno. Ked alo o vreme, iako hine kokri ko phanljipe (ki samica) ov džilabdža, molija pe hem ičerdža e biblijako vačeribe.

¹⁶ Te dikha pana jekh primer. Nekobor phenja kola ko Dujto svetsko maribe hine phanlje ko koncentraciono logor ičerdže e Gospodaresi večera, iako džandže so adžahar šaj te našaljen po dživdipe. On čerdže odova garavde, baš odoljese so e Gospodaresi večera na hine but phari te ičeri pe. On objasnije sar hine odova: „Čedijam amen ko krugo, a ko maškar hine jekh tikni stolica koja hine učhardi parne čaršafeja kuri hine o maro hem o vino. Na mangljam te thara i sijalica sose bi adžahar dikhena so čeraja, odoljese thardžam i momolji [...] Viljestar molijam amen hem dijam lafi amare Dadese so sa amari snaga  ka da te opravdini pe oljeso sveto nav.“ Savi bari vera mothodže! Hem kobor baro mangipe mothodža o Isus ked čerdža e Gospodaresi večera adžahar jednostavno te šaj te slavina la, čak ked hijam ko phare situacije.

17. Save pučiba šaj te puča amen?

¹⁷ Dži avela o Dive ked setina amen ko Isuseso meribe, ovela bi šukar te puča amen: „Sar šaj pana pobuter te ovav sar o Isus ko odova te mothovav mangipe? Da li pobuter mislinava upro me phralja hem phenja, nego li upro mande? Da li kotar meklje phralja hem phenja adžičerava pobuter, nego li so šaj te čeren ja džanava so svako isi lje peklje granice?“ Valjani uvek te da sa amendar te ova sar o Isus ko odova te haljova sar tano averendže (1. Petr. 3:8).

18-19. (a) Ko so šaj te ova sigurna? (b) So celone viljeja mangeja te čere?

¹⁸ O Dive ked setina amen ko Isuseso meribe na ka trajini pana but. Ked o Isus ka avel dži trajini i bari nevolja, ka čedel okoljen so ačhilje kotar „oljese birime“ ko nebo hem više na ka ovel potrebno te slavini pe o Dive ked setina amen ko Isuseso meribe (1. Kor. 11:16; Mat. 24:31).

¹⁹ Ama čak hem ked više na ka slavina e Gospodaresi večera, šaj te ova sigurna so e Jehovaso narodo viljestar ka setini pe ki akija jednostavno proslava koja mothovi i najbari poniznost, hrabrost hem o mangipe kova o manuš šaj hine te mothovi. Tegani okola so hine ki akija posebno večera ka vačeren okoljendže kola tegani ka živinen, sar dičhilo odova. Ama, te šaj akana te oven amen berečetija kotar akija večera, valjani celone viljeja te ova sar o Isus hem te mothova ko amaro dživdipe poniznost, hrabrost hem mangipe. Ako ka čera odova, amen šaj te verujina so o Jehova but ka blagosovini amen (2. Petr. 1:10, 11).