O Isus ulo Prvosveštenik ked krstindža pe ko 29. berš ki nevi era. Sar džanaja odova? Ked krstindža pe, o Isus mothovdža soj tano spremno te žrtvujini po životi ko simbolično oltar kova predstavini e Devlesi volja (Gal. 1:4; Jevr. 10:5-10). Sebepi so akava simbolično oltar postojini kotar o dive ked o Isus krstindža pe hem o duhovno hram isto postojini ando odova dive. E Jehovaso baro duhovno hram predstavini sa so prekali e Isusesi žrtva omogućini amendže te služina e Jehovase ko ispravno način (Mat. 3:16, 17; Jevr. 5:4-6).

Hine potrebno jekh Prvosveštenik kova ka služini ko odova baro duhovno hram. Odolese o Jehova pomazindža „e sveto duhoja“ e Isuse te ovel Prvosveštenik hem „dindža lese i moć“ (Dela 10:37, 38; Mar. 1:9-11). Ama, sar šaj te ova sigurna so o Isus hine pomazimo sar Prvosveštenik angleder te merel hem te uskrsnini? O primer ando Aron hem ando prvosveštenikija kola alje palo leste ka pomožini amendže te dobina odgovor ko akava pučibe.

Premalo e Mojsijeso zakon, samo o prvosveštenik šajindža te khuvel ki Svetinja upro svetinje koja hine ko sveto šatori hem kasnije ko hram. Jekh zavesa delindža akala duj prostorije, i Svetinja upro svetinje hem i Svetinja. O prvosveštenik khuvdža ki odija prostorija pali zavesa samo ko Dive ando pomirenje (Jevr. 9:1-3, 6, 7). Sar so o Aron hem okola kola alje palo leste hine pomazime sar prvosveštenikija hine pomazime angleder te khuven ki Svetinja upro svetinje pali zavesa, isto adžahar hem o Isus morandilo te ovel pomazimo sar Prvosveštenik ando e Jehovaso baro duhovno hram angleder te merel hem tek tegani nakhlja „prekali zavesa, odnosno prekalo poklo telo“ ko dživdipe ko nebo (Jevr. 10:20). Sebepi odova, o apostol Pavle phendža so o Isus alo „sar prvosveštenik“ hem so palo odova nakhlja ko „pobaro hem pošukar šatori kova na čerdže e manušikane vasta“, avere lafencar „ko nebo“ (Jevr. 9:11, 24).

Ked o nevo savez počmindža te važini? Ked o Isus irindža pe ko nebo hem ponudindža po savršeno manušikano životi sebepi amaro, ov čerdža duj ando trin buča kola hine potrebna te čeren pe te bi o nevo savez počmini te važini. Kola hine odola trin buča?

Sar prvo, o Isus pojavindža pe anglo Jehova. Sar dujto, o Isus ponudindža i vrednost andi pi žrtva e Jehovase, hem sar trito o Jehova prihvatindža i vrednost andi e Isusesi žrtva. Dži akala trin buča na čerdže pe, o nevo savez na počmindža te važini.

I Biblija na phenela ked tačno o Jehova prihvatindža i vrednost andi e Isusesi žrtva. Odolese, ni amen našti te phena ko kova trenutko o nevo savez počmindža te važini. Ama, džanaja so o Isus dželo ko nebo deš dive angleder i Pedesetnica (Dela 1:3). Ko disavo trenutko ko odola deš dive, o Isus ponudindža i vrednost andi pi žrtva e Jehovase hem ov prihvatindža la (Jevr. 9:12). Odova so ulo ki Pedesetnica 33. berš ki nevi era hine jasno dokaz so odova savez već počminđa te važini (Dela 2:1-4, 32, 33). Hine jasno so o nevo savez tegani već hine ki snaga.

Te ponovina. O nevo savez počmindža te važini ked o Jehova prihvatindža i vrednost andi e Isusesi žrtva hem uključinđa e pomazanikonen ko odova savez. O Posrednik tano o Isus kova služini sar Prvosveštenik (Jevr. 7:25; 8:1-3, 6; 9:13-15).