1. Sose valjani te šuna e Isuseso upozorenje?

KED vačerdža kotar poslednja dive, o Isus phendža: „Pazinen tumen tumare vilje te na oven but opteretime [...] e problemencar ando dživdipe“ (Luka 21:34). Valjani te šuna odova upozorenje. Sose? Sar sa avera manuša hem amen avdije mora te borina amen e problemencar.

2. Kolje phare problemencar amare phralja hem phenja borinena pe?

² Disavo puti amen borinaja amen nekobor problemencar ko isto vreme. Te dikha nekobor primerija. Jekh phral kova vičini pe Džon, * isi lje multipla-skleroza. Oljese hine but pharo ked oljesi romni ačhavdža lje palo 19 berš so hine ko brak. Palo odova, oljese duj čhaja čhinavdže te služinen e Jehovase. Jekh bračno par, o Bob hem i Linda hine ljen avera problemija. On ačhilje bizi buti hem palo odova našaldže po čher. Uzo odova, e Lindače o doktor phendža so isi la odobor baro problemi viljeja so šaj te merel, a isto adžahar pana jekh nabormipe počmindža te napadini olako organizam.

3. Premalo Filipljanima 4:6, 7, ko so šaj te ova sigurna?

³ Amen šaj te ova sigurna so amaro Stvoritelj hem manglo Dad, o Jehova, haljola sar o problemija utičinena upro amende. Ov mangela te pomožini amen te ikljova ko krajo amare problemencar. (Čitinen Filipljanima 4:6, 7.) Ko e Devljeso Lafi isi but primerija kola mothovena kola problemija e Devljese sluge hine ljen. Ki Biblija šaj te dikha, sar o  Jehova pomožindža ljen te borinen pe peklje problemencar. Ka dikha nekobor primerija.

4. Kola problemija hine lje o Ilija, hem sar odova utičindža ko oljeso odnos e Jehovaja?

⁴ O Ilija služindža e Jehovase ko but pharo vreme hem hine lje bare problemija. O kralj Ahav, jekh ando neverna kraljija ko Izrael, ženindža pe e Jezaveljaja, koja hine but lošno hem služindža e Valese. On duj čhivdže e manušen te služinen e Valese hem mudardže buten e Jehovase prorokonen. O Ilija uspindža te našel hem preživindža o baro bokhaljipe adžahar so oslonindža pe ko Jehova (1. Kralj. 17:2-4, 14-16). Ked suočindža pe e prorokonencar hem okoljencar so služindže e Valese, o Ilija hem tegani oslonindža pe ko Jehova. Ov podstaknindža e Izraelcen te služinen e Jehovase (1. Kralj. 18:21-24, 36-38). But putija, o Ilija dikhlja sar o Jehova zaštitini lje hem pomožini lje ko pharipa.

5-6. Premalo 1. Kraljevima 19:1-4, sar osetindža pe o Ilija hem sar o Jehova mothovdža so mangela lje?

⁵ Čitinen 1. Kraljevima 19:1-4. O Ilija but darandilo ked i kraljica Jezavelja phendža so ka mudari lje. Odoljese, ov našlja ki Virsaveja. Ulo odobor obeshrabrimo, so manglja te merel. Sose osetindža pe adžahar? O Ilija hine nesavršeno manuš, „obično manuš sar amen“ (Jak. 5:17). Šaj osetindža pe so o problemija tane but bare hem hine but umorno. Šaj mislindža so sa so čerdža te podstaknini e manušen te ačhon uzo Jehova ništa na vredini, so o  buča ko Izrael na džana ko pošukar, hem so jedino ov ačhilo te služini e Jehovase (1. Kralj. 18:3, 4, 13; 19:10, 14). Možda hijam iznenadime so akava verno proroko osetindža pe adžahar. Ama, o Jehova haljilo e Ilijase osećanja.

⁶ O Jehova na holjandilo ked o Ilija phendža sar osetini pe. Ov pomožindža e Ilijase paljem te ovel lje snaga (1. Kralj. 19:5-7). Palo odova, o Jehova doljindža lje šukaripaja hem ispravindža oljeso razmislibe, adžahar so mothovdža ljese poklo baro zoraljipe. Phendža ljese so isi pana 7 000 manuša ko Izrael kola na služinena e Valese (1. Kralj. 19:11-18). Ko akala načinja o Jehova mothovdža e Ilijase so mangela lje.

7. Ko so uverini amen o način ko kova o Jehova pomožindža e Ilijase?

⁷ Da li isi ko toklo dživdipe situacije kola čerena tuče stres? Tegani, kobor utešini amen ked džanaja so o Jehova haljilo sar o Ilija osetindža pe! Oljeso primer uverini amen so o Jehova haljola sova borinaja amen hor ko vilo. Ov džanela so amen šaj, a so našti te čera hem džanela sostar razmislinaja hem sar osetinaja amen (Ps. 103:14; 139:3, 4). Ako hem amen, sar o Ilija osloninaja amen ko Jehova, ov ka pomožini amen te ikljova ko krajo e problemencar kola čerena amendže stres (Ps. 55:22).

8. Sar o Jehova ka pomožini tut te ikljove ko krajo te problemencar?

⁸ O stres šaj te čhivel amen te mislina so i situacija niked na ka menini pe, hem odoljese šaj te ova but obeshrabrime. Ked odova desini pe, ma bistre so o Jehova ka pomožini tut te ikljove ko krajo te problemencar. Sar ka pomožini tut? Ov vičini tut te phene oljese teklje problemija hem sar osetineja tut. Ov ka šunel teklje molitve hem ka pomožini tut (Ps. 5:3; 1. Petr. 5:7). Odoljese, često vačer teklje problemija ki molitva e Jehovase. Ov na ka vačeri tuva sar so vačerdža e Ilija, ama ov ka vačeri tuva prekalo poklo Lafi, i Biblija, hem prekali piklji organizacija. O primerija kola isi ki Biblija šaj te den tut uteha hem nada. Isto adžahar, teklje phralja hem phenja šaj te zorjačeren tut (Rimlj. 15:4; Jevr. 10:24, 25).

9. Sar šaj jekh poverljivo amal te pomožini amen?

⁹ O Jehova phendža e Ilijase te del jekh deo kotar piklji odgovornost e Jelisejese. Ko asavko način, o Jehova dindža e Ilijase jekhe šukar amalje kova pomožindža lje ked hine lje pharipa. Isto adžahar, ked amen poverina amen jekhe amaljese, ov šaj te pomožini amen te borina amen amare pharipencar (2. Kralj. 2:2; Posl. 17:17). Ako mislineja so nane tut nikas kase šaj te phene teklje problemija hem sar osetineja tut, molin tut e Jehovase te pomožini tut te arakhe nekas koj tano zrelo hem ko šaj te ohrabrini tut.

10. Sar e Ilijaso primer dela amen nada hem sar o obećanje kova tano ko Isaija 40:28, 29 pomožini amen?

¹⁰ O Jehova pomožindža e Ilijase te borini pe peklje pharipencar hem te služini oljese but berša. E Ilijaso primer dela amen nada. Nesavo puti sebepi o stres hijam fizički hem emocionalno but umorna. Ama, ako osloninaja amen upro Jehova ov ka del amen snaga koja valjani amendže te šaj te služina oljese. (Čitinen Isaija 40:28, 29.)

11-13. Sar o problemija utičindže ko e Devljese trin sluge ko purano vreme?

¹¹ Hem avera manuša ki Biblija borindže pe bare problemencar. I Ana akhardža bari ladž odoljese so na hine la čhave. Uzo odova,  olako rom hine lje pana jekh romni koja hine but lošno premali late hem mardža lače muj so nane la čhave (1. Sam. 1:2, 6). Odoljese i Ana hine but tužno hem ništa na halja (1. Sam. 1:7, 10).

¹² Disavo puti ko poklo dživdipe, o kralj David hine lje bare problemija. Razmislin so sa ov doživindža. I krivica halja lje sebepi o greške kola čerdža (Ps. 40:12). Oljeso čhavo, o Avesalom, kas ov but manglja, uštilo protiv oljeste hem ko krajo hine mudardo (2. Sam. 15:13, 14; 18:33). Jekh ando oljese najpaše amala izdajindža lje (2. Sam. 16:23–17:2; Ps. 55:12-14). But psalmija kola o David pisindža mothovena amendže so hine but obeshrabrimo, ama hem so potpuno uzdajindža pe ko Jehova (Ps. 38:5-10; 94:17-19).

¹³ Palo odova, jekh psalmista počmindža te mangel te živini sar o lošna manuša. Ov šaj hine andi porodica kotar o Levit Asaf kova služindža ko „veličanstveno svetilište e Devljeso“. Oljese negativna osećanja andže lje dži odova te na ovel bahtalo hem zadovoljno. Čak počmindža te mislini so i nagrada koja dela amen o Devel nane dovoljno (Ps. 73:2-5, 7, 12-14, 16, 17, 21).

14-15. So sikljiljam kotar akala primerija ando odova sar te oslonina amen ki Jehovasi pomoć?

¹⁴ Akala trin e Devljese sluge oslonindže pe upro e Jehovasi pomoć. Ki molitva vačerdže e Jehovase peklje problemija. Phravdže ljese po vilo hem vačerdže sose adžahar osetinena pe. Ama, on nastavindže te džan ko than kuri služindža pe e Jehovase (1. Sam. 1:9, 10; Ps. 55:22; 73:17; 122:1).

¹⁵ O Jehova saosećajno odgovorindža svakonese oljendar. I Ana dobindža unutrašnjo mir (1. Sam. 1:18). O David  pisindža: „But bare pharipa isi lje o pravedno manuš, ama ando sa o Jehova ikalji lje“ (Ps. 34:19). A o psalmista palo odova phendža so o Jehova ičerdža lje „kotar desno vas“ hem dindža lje vođstvo prekalo savet. Ov pisindža: „A maje tano šukar te ovav paše uzo Devel. O Suvereno Gospod, o Jehova tano than kuri garavava man“ (Ps. 73:23, 24, 28). So amen sikljovaja kotar akala primerija? Disavo puti hem amen ka ovel amen bare problemija kola ka čeren amendže stres. Ama, amen šaj te borina amen ako hor razmislinaja sar o Jehova pomožindža averendže, ako oslonina amen upro oljeste ki molitva hem ako šunaja lje ko sa so rodela amendar (Ps. 143:1, 4-8).

16-17. (a) Sose na valjani te cida amen averendar? (b) Sar šaj paljem te ovel amen snaga?

¹⁶ Akala trin primerija sikavena amen pana jekh važno buti. Na valjani te cida amen ando Jehova hem ando oljeso narodo (Posl. 18:1). Amari phen i Nensi, koja doživindža bare problemija ked olako rom ačhavdža la, phenela: „Hine but dive ked na mangljum te dikhav nikas, niti te vačerav nekasa. Ama, so pobuter cidindžum  man averendar, sa pophare hine maje.“ O buča promenindže pe ked i Nensi dikhlja sar šaj oj te pomožini averendže kola tane ko pharipa. Oj phenela: „Šundžum averen dži vačerdže ando peklje problemija. Ked avera hem oljenge problemija hine maje ko prvo than, tegani na mislindžum odobor but mandar hem ando meklje problemija.“

¹⁷ O sastankija šaj te čeren paljem te ovel amen snaga. Ked hijam ko sastankija, amen mukhaja e Jehova te utešini amen hem te pomožini amen (Ps. 86:17). Odothe ov zorjačeri amen prekalo poklo sveti duh, prekalo poklo Lafi hem prekalo poklo narodo. O sastankija dena amen prilika „zajedno te ohrabrina amen“ (Rimlj. 1:11, 12). Jekh phen koja vičini pe Sofija phenela: „O Jehova hem amare phralja hem phenja, pomožinena man te istrajinav. O sastankija hine maje najvažna. Haljiljum so ked pobuter džava ki služba hem ked više čerava ki skupština, tegani pošukar šaj te borinav man meklje problemencar.“

18. So ka del amen o Jehova ked hijam obeshrabrime?

¹⁸ Ked hijam obeshrabrime, ma te bistra so o Jehova dela amen po lafi so ka cidel amare brige zauvek. Ama, dži na avela odova dive ov akana pomožini amen te ikljova ko krajo amare problemencar. Ov dela amen želja hem zoraljipe uspešno te borina amen e osećanjencar kola čerena amen te ova obeshrabrime hem bizi nada (Fil. 2:13).

19. Ko so uverinena amen o lafija ando Rimljanima 8:37-39?

¹⁹ Čitinen Rimljanima 8:37-39. O apostol Pavle uverini amen so ništa našti te ulavi amen ando e Devljeso mangipe. Sar šaj te pomožina e phraljendže hem e phenjendže kola borinena pe e problemencar? Ko aver članko ka dikha sar šaj te mothova saosećanje sar o Jehova hem adžahar te pomožina amare phraljen hem phenjen ko pharipa.