SARE amen hijam sigurna so o Jehova usmerini pekle narodo hem dela le odova so valjani lese te šaj te ovel paše oleja ko akala „poslednja dive“ (2. Tim. 3:1). Ama, amendar zavisini da li ka šuna e Jehova. Amari situacija tani slično sar i situacija ki koja hine o Izraelcija ki pustinja. On valjandže spremno te šunen o zvuk andi truba.

O Jehova phendža e Mojsijese: „Čer duj trube ando kovano srebro. Koristin len te vičine e narodo te čedel pe hem te objavine o znak aso pođiba“ (Br. 10:2). O sveštenikija trubindže ko trube ko različita načinija te šaj te mothoven e manušendže so valjani te čeren (Br. 10:3-8). Avdije, e Devleso narodo dobini o smernice ko nekobor načinija. Ko akava članko ka razmotrina trin načinija kola setinčerena amen ko zvukija ando trube ko purano vreme. Odola trin načinija tane: ked hijam vičime ko bare događaja; ked o starešine dobinena obuka hem ked o smernice aso sa o skupštine menjinena pe.

Ked o Jehova manglja „celo narodo“ te čedel pe ko ulaz andi istočno strana kotar sveti šator, o sveštenikija trubindže ko solduj trube (Br. 10:3). Sa o plemenija, kola hine ulogorime okolo o sveti šator ko štar grupe, šundže odova jasno zvuk. Okola kola hine ulogorime uzo odova ulaz, verovatno šajindže te aven aso nekobor minutija. Averendže kola hine hari podur valjandža pobuter vreme hem pobaro trud te šaj te aven. Bizo obzir da li hine paše ja dur, o Jehova manglja sare te aven hem te šunen olese smernice.

Avdije, amen na čedaja amen ko sveti šator, ama hijam vičime te ava ko bare događaja, sar soj tane o regionalna kongresija hem o posebna događaja ko kola dobinaja važna pouke hem smernice. Ko celo sveto, e Jehovaso narodo šunela isto program. Odolese, okola kola prihvatinena odova poziv te aven ko asavke događaja tane deo ando jekh bahtalo hem baro narodo. Disave valjani te putujinen pobuter ando avera. Ama, sare kola prihvatinena odova poziv džanena so o trud kova uložindže te šaj te aven, ka isplatini pe.

Da li okola kola živinena but dur ando than kuri ičeri pe jekh asavko baro događaj šaj te ovel len korist? Naravno. Odolese so i tehnologija napredujindža, but phralja hem phenja šaj te pratinen isto program, čak šaj te osetinen pe soj tane deo ando odova baro događaj. Na primer, dži trajindža i poseta ando predstavniko kotar glavno sedište, i podružnica ko Benin, prenosindža o program ko Niger, ki Arlit, jekh rudarsko diz ki pustinja Sahara. Čedindže pe 5 objaviteljija  hem 16 zainteresovana manuša. Iako hine but dur, on osetindže pe soj tane deo ando 44 131 manuša kola hine ko odova baro događaj. Jekh phral pisindža: „Vilestar phenaja tumendže oven saste so prenosindžen amendže odova program. Odova palem mothovdža amendže kobor mangena amen.“

Ked o sveštenikija trubindže ki samo jekh truba, „samo o knezija, ando kola tane svako poglavari upro hiljada Izraelcija“, valjandže te aven anglo sveti šator (Br. 10:4). Odothe šajindže te dobinen smernice hem obuka ando Mojsije. Odova šajindža te pomožini lendže te ispuninen pe odgovornostija ko poklo pleme. Ako bi tu oveja jekh ando odola knezija, da li bi deja sa tutar te ave hem te šune i pouka koja ka koristini tuče?

Avdije, o starešine nane „knezija“, niti gospodarinena upro e Devleso stado kova tano olendže dindo (1. Petr. 5:1-3). Ama, sigurno dena sa pestar te brininen pe ando stado. Ked tane vičime, on spremno džana ko Seminar aso naimenovana phralja. Ko odova seminar, o starešine sikljona sar šaj pana pošukar te čeren pekle skupštinska zaduženja. Sebepi odija pouka koja dobinena ko seminar, o starešine hem okola kolendar on brininena pe ko skupštine, šaj te oven popaše e Jehovaja. Iako šaj na dobindžan jekh asavki obuka, tu šaj te sikljove okolendar kola dobindže odija obuka.

Disavo puti, o starešine trubindže adžahar so i truba oglasindža averčhane zvuk. Akava hine znak so o Jehova manglja celo narodo te selini pe (Br. 10:5, 6). Ked o narodo selindža pe, odova čerdže ko jekh but organizovano način. Ama, odija hine but phari buti. Podijekh puti, disave Izraelcendže na dželo pe ko aver than. Sose?

Šaj disave mislindže so odova so valjani te selinen pe hine but često hem iznenada. „Disavo puti bi o oblako terdžola ando račate dži sabalje.“ A disavo puti bi nakhena „duj dive, masek dive ja pobuter“ (Br. 9:21, 22). Kobor putija selindže pe? Ko Brojevi 33. poglavlje spomini pe oko 40 thana ko kola o Izraelcija hine ulogorime.

Dži selindže pe, disave šaj arakhlje than kuri hine lado. Odova sigurno hine but prijatno ki „bari hem zastrašujućo pustinja“ (Pon. zak. 1:19). Odolese, šajindže te mislinen so odova so valjani te selinen pe tani promena koja džala ko pološno.

Ked o plemija valjandže te pođinen, disavendže hine pharo te adžičeren po redo. Sare šundže o zvuk andi truba kova hine averčhane, ama naštindže sarine te pođinen ko isto trenutko. Odova zvuko andi truba kova hine averčhane, hine znak so o plemija kola hine ulogorime ki istočno strana valjanena te pođinen, a odola tane e Judaso, e Isahareso hem e Zavuloneso pleme (Br. 2:3-7; 10:5, 6). Palo odova so bi on pođinena ko drumo, o sveštenikija dujto puti trubindže averčhane zvuk andi truba, te den znak so avera trin plemija kola tane ulogorime ki južno strana ando logor, valjani te pođinen. O sveštenikija bi čerena akava sa dži sare ando logor na bi pođinena.

Šaj hine tuče pharo te prihvatine disave promene ki organizacija. Sose? Šaj razmislindžan odolestar so već hine but promene. Ja šaj sviđindža pe tuče sar o buča čerdže pe angleder hem na mangeja te menjini pe diso. Savo god te ovel o razlog, šaj hine tuče pharo te ove strpljivo dži sikljiljan neve buča hem valjandža tuče vreme te prihvatine len. Ama, sar god te ovel, amen sigurno ka dikha so o promene tane šukar amendže hem so o Jehova tano zadovoljno amencar.

Ko e Mojsijeso vreme, o Jehova ki pustinja vodindža milionija muršen, džuvljen hem čhaven. Bizi olesi briga hem olese uputstvija, on na bi ačhona dživde. Avdije, o Jehova vodini amen ko akala phare poslednja dive. Ov pomožini amendže te ova paše oleja hem amari vera hem ponodri te ovel zorali. Odolese, amen mangaja te da sa amendar te šuna e Jehova sar so o verna Izraelcija šundže o jasno zvuk ando trube.