26. ČLANKO PROUČIBASE
„Irinen tumen maje“
Irinen tumen maje hem ma ka irinav man tumendže (MAL. 3:7)
DŽILI 102 Te pomožina okoljendže soj tane slaba
SOSTAR KA VAČERA *
1. Sar o Jehova osetini pe ked jekh ando olese bakre irini pe lese?
SAR so vačerdžam ko okova članko, o Jehova pes uporedindža jekhe šukar pastireja kova but brinini pe ando svako poklo bakro. Ov rodela svakone bakre kova našaldilo. O Jehova phendža e Izraelcendže kola ačhavdže le: „Irinen tumen maje hem ma ka irinav man tumendže.“ Amen džanaja so o Jehova hem avdije mislini adžahar sose ov phendža: „Me na menjinava man“ (Mal. 3:6, 7). O Isus phendža so o Jehova hem o anđelija tane but radosna ked barem jekh kotar Olese sluge kola našaldilje irinena pe Olese (Luka 15:10, 32).
2. So ka osmotrina ko akava članko?
2 Akana ka osmotrina trin e Isusese priče kola ka pomožinen amen te haljova sar šaj te pomožina okolendže kola durilje kotar o Jehova. Ka vačera hem kotar disave osobine kola valjanena amendže te bi pomožina jekhe bakrese kova našaldilo te irini pe lese. Hem ka dikha sose isplatini pe te da sa amendar te pomožina okolendže kola tane neaktivna te irinen pe.
POTRAGA ASO NAŠALDO NOVČIĆ
3-4. Premalo Luka 15:8-10, sose i romni odobor pažljivo rodindža i drahma koja našaldilji?
3 Valjani te da sa amendar te bi arakhaja okolen kola mangena te irinen pe e Jehovase. Ki jekh priča koja tani zapisimi ko Jevanđelje ando Luka, o Isus vačerdža kotar jekh romni koja našaldža jekh vredno novčić, kova vičini pe drahma. Odova soj tano najvažno ki akija priča tano o trud kova akija romni uložindža te bi arakhi le. (Čitin Luka 15:8-10.)
4 O Isus opisujindža sar osetindža pe akija romni ked arakhlja odova vredno novčić kova hine našaldo. Ko e Isuseso vreme, disave Jevrejke hine len običaj te pokloninen deš drahme pe čhajače ko dive ked valjandža te džal ko rom. Možda baš odija drahma so akija romni rodindža hine jekh kotar akala deš drahme. I romni mislindža so odova novčić pelo ko pod. Odolese, oj tharela i svetiljka hem počmini te rodel le ki odija prostorija. Ama, ništa našti te dikhel. Možda odija svetiljka na dela dovoljno svetlo te bi arakhi odova tikno srebrno novčić. Ko krajo, oj lelja i metla hem šulavi celo čher. Ipak, ko krajo maškari čedimi prašina i romni e svetiljkaja ko vas dikhlja sar svetlini olako novčić. Savo olakšanje! Palo odova, oj vičini pe amalen hem pe komšijen te vačeri lendže i šukar vest.
5. Sose šaj te ovel pharo te arakha okolen kola tane neaktivna?
5 Sar so dikhljam ki e Isusesi priča, mora te da sa amendar te bi arakhaja diso so našaldžam. Isto adžahar, valjani te da sa amendar te bi arakhaja okolen kola cidindže pe kotar i skupština. Možda nakhlje but berša sar nane više amencar. On možda selindže pe ko than kuri o phralja na pendžarena len. Ama, šaj te ova uverime so već avdije disave kotar odola neaktivna objaviteljija mangena te irinen pe e Jehovase. On mangena palem te služinen lese pe phraljencar hem pe phenjencar. Ama, on našti kokri te čeren odova. Valjani lendže amari pomoć.
6. Sar svako amendar šaj te rodel okolen kola tane neaktivna?
6 Ko sa šaj te rodel okolen kola tane neaktivna? O starešine, o pionirija, o članija andi porodica hem o objaviteljija ki skupština. Avere lafencar, svako amendar šaj te rodel len. Da li isi tut dijekh amal ja nekas kotar ti familija kova tano neaktivno? Ja, da li resljan nekas olendar ki služba kotar čher ko čher ja ki služba ko javna thana? Objasnin e osobače so ako mangela neko te posetini la, amendže ka ovel drago te da olaki adresa ja lako broj kotar telefoni e starešinendže ki amari skupština.
7. So sikljiljan kotar o starešina kova vičini pe Tomas?
7 O starešine tane prvenstveno odgovorna te roden okolen kola mangena te irinen pe e Jehovase. Ama, sar on šaj te čeren odova? Hajde te dikha so jekhe starešinase, kova vičini pe Tomas, * andi Španija, pomožindža te čerel odova. Ov pomožindža pobuter ando 40 objaviteljija te irinen pe ki skupština. O Tomas phenela: „Najangleder, pučava različita objaviteljen ki skupština da li džanena kaj živini odova neaktivno objavitelj ja pučava len da li pendžarena nekas ko više na avela ko sastankija. But objaviteljija tane spremna te pomožinen sose haljona so odija tani hem olengi buti. Palo odova, ked posetinava okolen kola tane neaktivna, me pučava len hem ando olenge čhave hem avera kotar olengi familija. Disave olendar angleder legardže pe čhaven ko sastankija hem možda odola čhave, isto sar olenge roditeljija, jekh vreme hine objaviteljija. Šaj hem olendže valjani pomoć te irinen pe e Jehovase.“
DE SA TUTAR E JEHOVASE ČHAVE HEM ČHAJA TE IRINEN PE KI SKUPŠTINA
8. Ki e Isusesi priča ando našaldo čhavo koja tani zapisimi ko Luka 15:17-24, sar o dad ponašindža pe ked irindža pe leso čhavo?
8 Kola osobine mora te ovel amen te bi pomožinaja okolendže kola mangena te irinen pe e Jehovase? Hajde te dikha so šaj te sikljova kotar e Isusesi priča ando našaldo čhavo. (Čitin Luka 15:17-24.) O Isus objasnindža sar odova čhavo ko krajo haljilo so hine but sebično hem odlučindža te irini pe čhere. O dad prastandilo anglo leste, gušindža le hem odoleja uverindža pe čhave so mangela le. E čhave mučindža i savest hem mislindža so na zaslužini o dad te vičini le mo čhavo. Oleso dad mothovdža saosećanje ked o čhavo phendža lese sar osetini pe. O dad čerdža disave konkretna buča hem adžahar mothovdža soj lese drago so leso čhavo irindža pe čhere. Ama, na sar te irini pe dijekh sluga, nego sar jekh član andi porodica. Te bi mothovi odova, o dad organizujindža i zabava hem dindža o najšuže šeja pe čhavese.
9. Kola osobine mora te ovel amen te šaj te pomožina okolendže kola tane neaktivna te irinen pe e Jehovase? (Dikh o okvir „ Sar te pomožini pe okolendže kola mangena te irinen pe.“)
9 O Jehova tano sar odova dad kotar akija priča. Ov mangela amare phraljen hem e phenjen kola tane neaktivna hem mangela te irinen pe olese. Hem amen šaj te pomožina lendže te irinen pe, ako oponašinaja e Jehova. Te šaj te čera odova, mora te ovel amen strpljenje, saosećanje hem mangipe. Sose tano potrebno te mothova akala posebna osobine hem sar šaj te čera odova?
10. Sose valjani te ova strpljiva dži pomožinaja nekase palem te ovel paše e Jehovaja?
10 Mora te ova strpljiva sose tano potrebno vreme te bi jekh osoba irini pe e Jehovase. But olendar kola angleder hine neaktivna phendže so irindže pe e Jehovase tek palo odova so nekobor putija o starešine hem avera ki skupština posetindže len. Amari phen i Nensi, kotar i Azija, phenela: „Jekh mi šukar amalin ki skupština but pomožindža maje. Ponašindža pe premalo mande sar phureder phen. Oj podsetindža man ko sa o šukar buča kola angleder čerdžam zajedno. Dži vačerdžum lače sar osetinava man, oj strpljivo šundža man hem na bezdindža pe te del maje savet. Čače hine maje pravo amal kova hine spremno te pomožini maje ked god hine potrebno.“
11. Sose valjani te ova saosećajna te bi pomožinaja nekase kova tano obeshrabrimo?
11 O saosećanje tano sar o melem kova čhivela pe ki rana hem kova pomožini te sačaren pe o povređena osećanja. Disave neaktivna objaviteljija beršencar hine ogorčena sebepi so neko kotar i skupština povredindža len. Odola osećanja ugušindže i želja te irinen pe e Jehovase. Disave šaj mislinena so doživindže nepravda. Odolese, valjani lendže neko ko ka šunel len hem ka haljol sar osetinena pe (Jak. 1:19). Amari phen i Marija, koja jekh vreme hine neaktivno, phenela: „Valjandža maje neko ko ka šunel man, ko ka utešini man, ko ka del maje savet hem neko ko ka pomožini man.“
12. Sar tano e Jehovaso mangipe sar šelo?
12 Ki Biblija koristini pe o šelo te bi opisujini pe e Jehovaso mangipe premalo oleso narodo. Sar tano e Devleso mangipe sar šelo? Hajde te dikha jekh primer. Zamislin so tasljoveja ko nemirno more hem neko fordela tuče o pojas aso spasavanje. Sigurno hijan zahvalno asi odija pomoć, sose odova pojas pomožini tuče te ačhove ki površina. Ama, odova pojas nane dovoljno te bi ačhoveja dživdo, sose o pani tano šudro hem jedino šaj te preživine ako aveja dži disavo čamco. Valjani neko te fordel tuče o šelo hem te privucini tut dži o čamco. O Jehova phendža e Izraelcendže kola ačhavdže le: „O mangipe koristindžum sar šelo te privucinav len maje“ (Os. 11:4). Hem avdije, o Devel adžahar postupini okolencar kola „tasljona“ ko pe problemija hem brige. O Jehova mangela odola manuša te džanen so ov mangela len hem so mangela te pomožini lendže te irinen pe olese. O Devel šaj te koristini tut te bi mothovi lendže mangipe.
13. Sar e Pabloso iskustvo mothovi so amaro mangipe premalo avera šaj te pomožini averendže te irinen pe e Jehovase?
13 But tano važno te uverina okolen kola tane neaktivna so o Jehova hem amen mangaja len. Amaro phral o Pablo, kastar vačerdžam ko okova članko, hine neaktivno pobuter ando 30 berš. Ov phendža: „Jekh dive, ked ikljiljum ando čher, resljum jekha ljubazno phure phenja koja vačerdža mancar ko jekh ljubazno način. Počmindžum te rovav sar jekh tikno čhavo. Phendžum lače so samči o Jehova bičhaldža la te vačeri mancar. Ko odova trenutko, odlučindžum te irinav man e Jehovase.“
MOTHOV MANGIPE DŽI POMOŽINEJA OKOLENDŽE KOLA TANE SLABA
14. Premali priča ando Luka 15:4, 5, so čerdža o pastiri ked arakhlja e bakre kova našaldilo?
14 Ked arakhaja okolen kola tane neaktivna, valjani te nastavina te pomožina lendže. Sar o našaldo čhavo kotar e Isusesi priča, on osetinena bari dukh andral hem valjani lendže but vreme te šaj te nakhel odija dukh. Verovatno tane duhovno slaba sebepi sa so doživindže ko e Bengeso sveto. Amen valjani te pomožina olendže te zorjačeren pi vera ko Jehova. Ki priča ando bakro kova našaldilo, o Isus opisujini sar o pastiri lela e bakre ki pi angalja hem irini le ko stado. Odova pastiri već odvojindža vreme hem snaga te bi arakhi odole bakre. Ama, svesno tano so mora te akhari le ki angalja, sose odova bakro nane le snaga kokri te irini pe ko stado. (Čitin Luka 15:4, 5.)
15. Sar šaj te pomožina okolendže kola tane slaba, a mangena te irinen pe e Jehovase? (Dikh o okvir „ Dragoceno pomoć.“)
15 Amen valjani te odvojina vreme hem snaga te pomožina okolendže kola tane neaktivna, te pobedinen o slabostija kola sprečinena len palem te služinen e Jehovase. Ama, e Jehovaso duho, oleso Lafi hem o publikacije kola dobinaja prekali skupština šaj te koristina te bi pomožina lendže palem te zorjačeren pi duhovnost (Rimlj. 15:1). Sar šaj te čere odova? Jekh iskusno starešina phenela: „Ked o neaktivna objaviteljija odlučinena te irinen pe e Jehovase, butendže valjani neko ko ka proučini olencar.“ * Odolese, ako hijan zamolimo te proučine i Biblija olencar, ov spremno te prihvatine odova zadatko. Odova isto starešina phenela: „O objavitelji kova tano zamolimo te proučini odole osobaja valjani te ovel šukar amal, upro kaste o neaktivno objavitelj šaj te ovel le poverenje.“
I RADOST KO NEBO HEM KI PHUV
16. Sar šaj te džana, so šaj te oslonina amen ki podrška ando anđelija?
16 But iskustvija mothovena so o anđelija pomožinena amen te arakha e neaktivno objaviteljen kola mangena te irinen pe e Jehovase (Otkr. 14:6). Na primer, amaro phral o Silvio, ando Ekvador, iskreno molindža pe te pomožini le neko te irini pe ki skupština. Dži pana molindža pe, duj starešine zvonindže ko lese udara. Dži trajindža olengi poseta on hine bahtale so šaj te pomožinen lese.
17. Sar ka utičini upro amende ked ka pomožina okolendže kola tane neaktivna?
17 Ka ovel amen but bari radost dži ka pomožina okolendže kola tane duhovno slaba te irinen pe e Jehovase. Zapazin so phenela o Salvador, o pioniri kova dela sa pestar te brinini pe ando neaktivna objaviteljija. Ov phenela: „Ked razmislinava ando neaktivna objaviteljija kola irindže pe, disavo puti me jačha pherdžona asva sose hijum but bahtalo. But hijum bahtalo so o Jehova spasindža jekh ando pe bakre kotar e Bengeso sveto hem so me šajindžum te sarađujinav oleja ki odija buti“ (Dela 20:35).
18. Ko so šaj te ove uverimo ako hijan neaktivno objavitelj?
18 Ako hijan neaktivno objavitelj, ov uverimo so o Jehova mangela tut. Ov mangela te irine tut lese. Te šaj te čere odova, valjani tuče baro trud. Ama, sar o dad kotar e Isusesi priča, o Jehova adžičeri tut te irine tut hem but ka ovel bahtalo ked ka irine tut čhere.
DŽILI 103 Pastiri su dar od Boga
^ odl. 5 O Jehova mangela te irinen pe lese sare kola neko vreme na propovedindže hem na dželje ko sastankija. Amen šaj te ohrabrina len te prihvatinen e Jehovaso poziv: „Irinen tumen maje.“ Ko akava članko, ka vačera sar šaj te pomožina lendže te irinen pe e Jehovase.
^ odl. 7 Disave anava tane menjime.
^ odl. 15 Disave neaktivno objaviteljendže šaj te pomožini pe adžahar so ka proučini pe olencar disave delovija kotar i knjiga Održite se u Božjoj ljubavi. A averencar šaj te proučini pe disave poglavlja kotar i knjiga Približi se Jehovi. O Službeni odbor andi skupština ka odlučini ko ka proučini odole osobaja.
^ odl. 68 SO DIKHAJA KO SLIKE: Trin phralja pomožinena jekhe neaktivno objaviteljese te irini pe ki skupština. Odova čerena adžahar soj tane ko kontakt oleja, mothovena lese so mangena le hem adžahar so mothovena saosećanje dži šunena le.
