1-2. Kola buča tane but važna aso sa e Jehovase svedokija?

DUJ važna buča utičinena upro amende avdije – e Devleso pravo te vladini hem te opravdini pe oleso anav. Sar e Jehovase svedokija, amen mangaja te vačera kotar akala teme. Ama, da li e Devleso pravo te vladini hem te opravdini po anav tane duj različita buča? Na.

² Sare amen hijam svesna so e Devleso anav mora te ovel posvetimo. Isto adžahar, sikljiljam so mora te dokažini pe so e Devleso pravo te vladini, ja o način sar vladini, tano najšukar. Odolese, solduj buča tane važna.

3. So sa uključini o anav Jehova?

³ U stvari, o anav Jehova, uključini sa ando amaro Devel. Odova uključini oleso način sar vladini. Tegani, ako phenaja so i najvažno buti tani te cidel pe i ladž kotar e Devleso anav, logično tano te phena so e Jehovaso način sar vladini mora te ovel dokažimo sar najšukar način. E Jehovaso anav tano but povezimo odoleja sar ov vladini sar Vrhovno vladari. (Dikh o okvir „ Soj tano sa uključimo ko odova te posvetini pe e Jehovaso anav?“)

4. So o Psalam 135:13 vačeri ando e Devleso anav hem kola pučiba ka razmotrina ko akava članko?

⁴ O anav Jehova tano but posebno. (Čitin Psalam 135:13.) Sose tano e Devleso anav odobor važno? Sar prvo puti hine ladžačerdo? Sar o Devel opravdini po anav? Hem sar amen šaj te pomožina te opravdini pe oleso anav? Ko akava članko, ka dobina odgovorija ko akala pučiba.

5. So disave manuša šaj te pučen pe ked šunena so e Devleso anav valjani te svetini pe?

⁵ „Nek svetini pe to anav“ (Mat. 6:9). O Isus phendža so jekh andi najvažno buti, sose molinaja amen, tani te svetini pe e Devleso anav. Ama, so značinena akala e Isusese lafija? Te posvetine diso značini te čere le te ovel sveto hem čisto. Ipak, disave manuša šaj pučena pe: „Zar e Jehovaso anav nane već sveto hem čisto?“ Te bi dobina odgovor ko odova pučibe, valjani te razmislina ando odova so o anav vačeri nekastar.

6. Sose o anav tano odobor vredno?

⁶ O anav tano diso pobuter nego li samo o slovija kola tane pisime ko jekh papiri ja kola izgovorinena pe. I Biblija odova potvrdini ked phenela: „Pošukar tano te birini pe šukar anav, nego baro barvalipe“ (Posl. 22:1; Prop. 7:1). Ama, sose o anav tano odobor vredno? Sose ov uključini nekasi reputacija, odnosno so avera mislinena okolestar kova akhari odova anav. Premalo odova, o način sar o anav bešela ko papiri ja sar izgovorini pe nane odobor važno. Najvažno tano so e manušendže avela ki godi ja so osetinena ko vilo ked šunena odova anav.

7. Sar o manuša napadindže e Devleso anav?

⁷ Ked o manuša phenena hovajba kotar o Jehova, on napadinena olesi reputacija. Odoleja so napadinena olesi reputacija, on pokušinena te ladžačeren oleso anav. E Devleso anav hem olesi reputacija prvo puti hine napadime ko edensko vrt. Hajde te dikha so sikljovaja kotar akava napad.

8. So o Adam hem i Eva džandže hem kola pučiba šaj te puča amen?

⁸ O Adam hem i Eva džandže so e Devleso anav hine o Jehova hem džandže but važna buča olestar. On džandže e Jehova sar e Stvoritelje, Okole kova dindža lendže dživdipe, but šužo than kaj te živinen hem savršeno bračno partnere (Post. 1:26-28; 2:18). Ama, da li on ka nastavinen te koristinen pi savršeno godi te bi hor razmislinena ando sa o buča kola o Jehova dindža olendže? Da li on hem ponodri ka barjačeren po mangipe hem cenjenje aso Jehova? O odgovorija ko akala pučiba hine jasna ked e Devleso neprijatelj iskušindža len.

9. (a) Premalo Postanak 2:16, 17 hem 3:1-5, so o Jehova phendža e Adamese hem Evače? (b) Sar o Satana podstaknindža len te mislinen so o Jehova uskratini diso olendar?

 ⁹ Čitin Postanak 2:16, 17 hem 3:1-5. Ked o Beng vačerdža prekalo sap, ov pučlja e Eva: „Da li o Devel čače phendža so na isminena te han kotar svako kaš ko vrt?“ Ko odova pučibe hine uključimo o podmuklo hovajba kova hine sar garavdo otrov. Sose phenaja odova? Odolese so o Devel phendža olendže so šaj te han kotar sa o kašta ko odova vrt, osim kotar jekh. Odova značindža so on šajindže te han but različita plodija ando kašta (Post. 2:9). Sa odova mothovi so o Jehova tano čače velikodušno Devel. Ipak, o Devel zabranindža e Adamese hem e Evače te han o plod kotar jekh kaš kova ov birindža. O pučibe kova o Satana koristindža podstaknindža len te razmislinen so o Jehova ipak nane velikodušno. Šaj i Eva zabrinuto pučlja pe: „Da li o Devel uskratini amendže diso šukar?“

10. Sar o Satana direktno oklevetindža e Devleso anav hem so ulo palo odova?

¹⁰ Dži tegani i Eva pana dikhlja e Jehova sar pe Vladare. Oj odgovorindža e Satanase adžahar so mothovdža lese o jasno uputstvo kova o Devel dindža lendže. Oj phendža so on ne bi valjani ni te pipinen odova kaš, sose haljilji ked o Devel upozorindža len so i neposlušnost ka ljegari len dži meribe. Ama, o Satana phendža: „Na, sigurno na ka meren“ (Post. 3:2-4). O Satana više na okolišindža, već direktno ladžačerdža e Devleso anav ked phendža e Evače so o Jehova tano hovavno. Ked čerdža odova, o Satana ulo klevetnik. Ko odova trenutko, i Eva hine potpuno zavedimi. Oj poverujindža e Bengese (1. Tim. 2:14). I Eva pobuter verujindža e Bengese nego e Jehovase. Sebepi odova, na hine lače pharo te anel i najgoro mogućo odluka. Oj odlučindža te na šunel e Jehova. Odova potvrdindža ked lelja hem halja o plod so o Jehova zabranindža lendže. Kasnije, oj dindža hem e Adamese te hal ando plod (Post. 3:6).

11. Savi prilika o Adam hem i Eva propustindže?

¹¹ Zamislin akana so i Eva šajindža te phenel e Bengese. Zamislin so phendža: „Me tut na pendžarava, ama pendžarava me Dade, e Jehova, hem me mangava le hem verujinava lese. Ov dindža e Adamese hem maje sa so isi amen. Kotar tuče pravo te phene bilo so lošno olestar? Naš!“ Kobor bi o Jehova ovela radosno ked bi dikhela sar olesi mangli čhaj lafencar mothovi soj tani verno olese (Posl. 27:11). Nažalost, ni Eva, a ni o Adam na hine len verno mangipe premalo Jehova. Sebepi so na hine len asavko mangipe, o Adam hem i Eva propustindže i prilika te odbraninen e Devleso anav ando odova klevetnik.

12. Sar o Beng sejindža o sumnje ki e Adamesi hem e Evaki godi hem so on propustindže te čeren?

¹² Sar so dikhljam, o Satana napadindža e Jehovasi reputacija adžahar so pokušindža te čhivel e Evače sumnja ki godi so o Jehova  nane šukar Dad. O Adam hem i Eva propustindže i prilika te odbraninen e Jehovaso anav. On dozvolindže e Bengese te utičini upro lende hem sebepi odova pobunindže pe protiv po Dad. O Satana hem avdije koristini slična metode. Ov napadini e Jehovaso anav adžahar so oklevetini le. O manuša kola verujinena ko e Bengese hovajba but sigate odbacinena e Jehova sar pe Vladare.

13. Sar o Jezekilj 36:23, mothovi koja tani i glavno poruka andi Biblija?

¹³ Da li o Jehova čerela diso te odbranini kokri pes ando odola klevete? Naravno so ja! Celo Biblija usredsredini pe ko odova so o Jehova čerdža te bi cidela i ladž koja hine čhivdi ko oleso anav ko Eden (Post. 3:15). U stvari, i glavno poruka andi celo Biblija tani: O Jehova opravdini po anav prekalo Kraljevstvo ko kova vladini oleso Čhavo hem palem anela i pravda hem o mir ki phuv. Ki Biblija tane korisna informacije kola pomožinena amen te haljova sar o Jehova ka opravdini po anav. (Čitin Jezekilj 36:23.)

14. Sar o Jehova opravdindža po anav ked ko Eden hine pobuna?

¹⁴ O Satana čerdža sa so šaj te bi sprečini e Jehova te ispunini pi namera. Ama, kobor god putija manglja te čerel odova, na dželo lese talo vas. I Biblija mothovi so o Jehova čerdža, hem dokažini so o Jehova tano čače brižno Dad hem najšukar Vladari. Ama, o Beng kova pobunindža pe hem sa okola kola dželje ki olesi strana, but povredindže e Jehova (Ps. 78:40). Ov rešindža odova problemi odoleja so postupindža mudro, strpljivo hem pravedno. Isto adžahar, ov mothovdža so isi le neograničeno moć ko but načinija. Soj tano najvažno, oleso mangipe dičhola ko sa so čerela (1. Jov. 4:8). O Jehova uvek čerela ko odova te opravdini po anav.

15. Sar o Beng klevetini e Devleso anav avdije hem so ovela palo odova?

¹⁵ O Beng hem avdije klevetini e Devleso anav. Na primer, ov sejini sumnje e manušendže ko vilo so o Devel tano moćno, pravedno, mudro hem soj tano mangipe. Isto adžahar, ov trudini pe te uverini e manušen so o Jehova nane Stvoritelj. Čak, iako o manuša  verujinena so o Devel postojini, o Beng pokušini te ubedini e manušen so o Devel hem olese zakonija tane gruba hem nepravedna. O Beng sikavi e manušen so o Jehova tano okrutno Devel kova tharela e manušen ko pakao. Ked on počminena te verujinen ko odola grozna hovajba, olengo vilo tano spremno te odbacini e Jehova sar okole kova isi le pravo te vladini. Sa dži o Beng na doživini potpuno poraz, ov ka nastavini te klevetini e Jehova, hem te irini tut protiv oleste. Da li ka dozvoline lese odova?

16. So šaj te čere, a so o Adam hem i Eva propustindže te čeren?

¹⁶ O Jehova dozvolindža e nesavršeno manušendže te učestvujinen ko odova te opravdini pe e Devleso anav. U stvari, tu šaj te čere odova so Adam hem i Eva propustindže te čeren. Iako but manuša ko sveto ladžačerena hem klevetinena e Jehovaso anav, tu isi tut prilika te odbranine oleso anav hem te phene odole manušendže so o Jehova tano sveto, pravedno, šukar hem mangipe (Is. 29:23). Tu šaj te mothove so mangeja ov te ovel to Vladari. Isto adžahar, šaj te pomožine e manušendže te haljon so jedino e Jehovaso način sar vladini tano potpuno pravedno hem so ka anel mir hem sreća ki celo phuv (Ps. 37:9, 37; 146:5, 6, 10).

17. Sar o Isus čerdža pe Dadeso anav te ovel pendžardo?

¹⁷ Ked braninaja e Jehovaso anav, amen oponašinaja o primer ando Isus Hrist (Jov. 17:26). O Isus čerdža pe Dadeso anav te ovel pendžardo, na samo adžahar so koristindža odova anav, nego hem adžahar so sikavdža e manušen savo tano čače o Jehova. Na primer, odova so ov sikavdža e manušen hine averčhane ando odova so o fariseja sikavdže. On sikavdže so o Jehova tano grubo, zahtevno, dur amendar hem okrutno Devel. Ki aver strana, o Isus pomožindža e manušendže te dikhen olese Dade sar okole kova tano razumno, strpljivo, kova mangela hem oprostini. Isto adžahar, pomožindža e manušendže te pendžaren e Jehova, adžahar so savršeno oponašindža pe Dadese osobine ko po životi (Jov. 14:9).

18. Sar šaj te mothova so o hovajba hem o klevete ando Jehova nane čače?

¹⁸ Sar o Isus, hem amen šaj te phena e manušendže odova so džanaja ando Jehova, so ov tano brižno hem ljubazno Devel. Ked čeraja odova, mothovaja so o hovajba hem o  klevete olestar nane čače. Amen opravdinaja e Jehovaso anav, ked pomožinaja e manušendže te haljon so oleso anav tano sveto. Hem amen šaj te oponašina e Jehova. Odova tano moguće, iako hijam nesavršena (Ef. 5:1, 2). Ked amare lafija hem delija mothovena e manušendže savo tano o Jehova čače, odoleja pomožinaja te opravdini pe oleso anav. Amen braninaja oleso anav, adžahar so pomožinaja e manušendže te džanen o čačipe ando Devel. * Isto adžahar, dokažinaja so o nesavršena manuša šaj te oven verna e Devlese (Jov 27:5).

19. Sar o Isaija 63:7, pomožini amendže te dikha kova glavno cilj valjani te ovel amen ked sikavaja averen?

¹⁹ Isi pana diso so šaj te čera te bi posvetinaja e Jehovaso anav. Ked sikavaja averen ando e biblijake čačipa, često vačeraja ando odova so o Devel isi le pravo te vladini ko celo svemir. Sa odova tano čače adžahar. Ama, iako tano važno te sikava len ando Devlese zakonija, amaro glavno cilj tano te pomožina olendže te razvijinen mangipe premalo Jehova, amaro Dad, hem te oven verna olese. Amen valjani te vačera ando e Jehovase šukar osobine kola mothovena savi tani i Osoba koja akhari odova anav. (Čitin Isaija 63:7.) Ked sikavaja len ko asavko način, amen pomožinaja averendže te mangen e Jehova hem te oven poslušna lese sebepi so mangena te oven verna olese.

20. So ka dikha ko aver članko?

²⁰ Ama, sar šaj te ova sigurna so amare delija hem o način sar sikavaja ka pomožinen averendže, ked šunena o anav Jehova, te razmislinen ando šukar buča olestar hem te oven privucime olese? Ko aver članko ka dobina odgovor ko akava pučibe.