1. Sose o Jehova pes uporedini e dajaja koja dojini?

„ŠAJ li i daj te bistrel pe čhavore kole dojini?“ Akava pučibe o Jehova pučlja ko vreme ked o proroko Isaija služindža. O Devel phendža pe narodose: „Čak hem ked bi oj bistrela le, me tut niked na ka bistrav“ (Is. 49:15). Ov na uporedindža pes but putija jekha romnjaja, ama ki akija situacija ov čerdža odova. O Jehova uporedindža pekle osećanja kola isi le premalo pekle sluge e mangipaja kova i daj isi la premalo lako čhavo. Ov manglja olese sluge te džanen so ov but mangela len. But daja šaj osetinena pe slično sar i phen koja vičini pe Jasmin, koja phenela: „Ked tu dojineja te čhave, tu oleja čereja jekh posebno veza koja trajini celo dživdipe.“

2. Sar o Jehova osetini pe ked jekh ando olese čhave cidela pe olestar?

² O Jehova zapazini čak hem ked jekh ando olese čhave na džala više ki služba ja ko sastankija. Odolese, šaj samo te zamislina kobor bari dukh ov osetini ked dikhela so svako berš hiljade olese sluge ovena neaktivna. *

3. So o Jehova mangela?

³ But ando amare phralja hem phenja kola hine neaktivna, irindže pe ki skupština hem but hijam bahtale sebepi odova. O Jehova mangela on te irinen pe, a hem amen mangaja (1. Petr. 2:25). Sar šaj amen te pomožina lendže? Angleder te odgovorina ko akava pučibe, šukar bi ovela te džana sose neko više na džala ki služba hem na avela ko sastankija.

4. So ulo disavendže sebepi olengi buti?

⁴ Disave dozvolindže olengi buti te ovel ko prvo than ko olengo dživdipe. „Trošindžum but vreme hem snaga ki buti,“ phenela o Hung *, jekh phral kova živini ki Azija. „Na hijum le mudro. Mislindžum so ako isi man pobuter pare, pošukar ka služinav e Jehovase. Odolese čerdžum pobuter buti. Na hijum le redovno ko sastankija hem palo disavo vreme više ni na dželjum. O sveto tano čerdo adžahar hari pohari te cidel e manušen kotar o Devel.“

5. Sar o problemija utičindže upri jekh phen?

⁵ Disave phralja hem phenja isi len but problemija kola obeshrabrinena len. I Ana kotar i Britanija, koja isi la pandž čhave, phenela: „Mo dujto čhavo bijandilo nabormo. Sar dželo o vreme, jekh kotar me čhaja hine isključimi, a mo aver čhavo psihički naborsalo. Odobor peljum ki depresija so više na dželjum ni ko sastankija ni ki služba. Ko krajo, uljum neaktivno.“ Amendže tano but žao so i Ana, olaki porodica hem avera isi len asavke problemija.

6. So šaj te ovel ako neko na šunela o savet ando Kološanima 3:13?

⁶ Čitin Kološanima 3:13. Disave e Jehovase sluge doživindže ki skupština neko te povredini len. O apostol Pavle phendža so disavo puti amare phralja ja phenja šaj te uvredinen amen. A šaj čak premalo amende neko te postupini nepravedno. Ako na pazinaja, šaj te ova ogorčena. I ogorčenost šaj te cidel e manuše kotar o Jehova. Te dikha o primer ando phral o Pablo, andi Južno Amerika. Neko nepravedno optužindža e Pablo so čerdža diso pogrešno. O Pablo na hine krivo. Ama, o starešine verujindže soj tano ov krivo hem sebepi odova našaldža po zaduženje ki skupština. Sar ov reagujindža? „But holjandžum“, phenela o Pablo „hem hari pohari duriljum andi skupština.“

7. Sar šaj o osećaj krivice te utičini upro jekh manuš?

⁷ Ako neko angleder čerdža ozbiljno greh, ov šaj te ovel le osećaj krivice hem but vreme palo odova. Šaj te mislini so o Jehova više na mangela le. Čak, iako pokajindža pe hem mothovdža pe lese milosrđe, ov šaj te mislini so nane dovoljno šukar manuš te šaj te ovel deo ando e Devleso narodo. Jekh phral, kova vičini pe Francisko, osetindža pe baš adžahar. Ov phendža: „Sebepi so čerdžum nemoral, hijum le ukorimo. Iako ki početka dželjum ko sastankija, peljum ki depresija hem osetindžum so na hijum dostojno te ovav deo ando e Jehovaso narodo. Mučindža man mi savest hem hijum le uverimo so o Jehova na oprostindža maje. Sar dželo o vreme, više na dželjum ni ko sastankija, a ni ki služba.“ Sar osetinaja amen sebepi so o phralja hem o phenja nalazinena pe ko asavke situacije, sar soj tane akala kolendar dži akana vačerdžam? Da li šaj te čhive tut ko olengo than? Soj tano pana považno, so o Jehova osetini premalo olende?

8. Da li o Jehova bistrela okolen kola angleder služindže lese? Objasnin.

⁸ O Jehova na bistrela okolen kola služindže olese, ama kola privremeno čhinavdže te oven olese narodoja. Ov na bistrela sa odova so čerdže olese (Jevr. 6:10). O prorok Isaija pisindža jekh but šuži ilustracija, te šaj te mothovi sar o Jehova brinini pe ando poklo narodo. Ov pisindža: „Sar o pastiri ov ka brinini pe ando po stado. Pe vasteja ka čedel e tikne bakren, ki angalja ka akhari olen“  (Is. 40:11). Sar o Jehova, o baro Pastiri, osetini pe ked jekh ando olese bakre mukhela o stado? O Isus mothovdža sar o Jehova osetini pe ked pučlja pe učenikonen: „So mislinena? Ako jekh pastiri isi le 100 bakre hem jekh olendar našaldžola, zar na ka mukhel odole 99 bakre ki gora hem ka džal te rodel okole kova našaldilo? Hem ako arakhi le, čače phenava tumendže, pobuter ka radujini pe sebepi odova bakro nego sebepi okola 99 bakre kola na našaldilje“ (Mat. 18:12, 13).

9. Sar ko purano vreme jekh šukar pastiri postupindža pe bakrencar? (Dikh i slika ko početak ando akava časopis.)

⁹ Sose šaj e Jehova te uporedina jekhe pastireja? Odolese so ko purano vreme jekh šukar pastiri but brinindža pe ando pe bakre. Na primer, o David borindža pe e medvedeja hem e laveja te šaj te zaštitini pe bakren (1. Sam. 17:34, 35). O šukar pastiri ka primetini čak hem ako samo jekh bakro nedostajini (Jov. 10:3, 14). Asavko pastiri ka mukhel pekle 99 bakren ko jekh tor ja ka pučel avere pastiren te arakhi len, te šaj ov te džal te rodel odole bakre kova nedostajini. O Isus koristindža odija ilustracija te šaj te sikavi amen jekh but važno buti: „Adžahar, ni mo Dad kova tano ko nebo na mangela nijekh kotar akala tikne te našaldžol“ (Mat. 18:14).

10. Premalo Jezekilj 34:11-16, so o Jehova obećindža, so ka čerel aso pe bakre kola našaldilje?

¹⁰ O Jehova mangela svakone amendar, čak hem „e tiknen“ kola durilje kotar oleso stado. Prekalo prorok Jezekilj, o Devel obećindža so ka rodel pe bakren kola našaldilje hem ka pomožini lendže palem te oven ko šukar odnos oleja. Isto adžahar, ov phendža so sa ka čerel te šaj te spasini len. Ov ka čerel isto odova so čerdža jekh izraelsko pastiri ked bi nedostajini lese jekh bakro. (Čitin Jezekilj 34:11-16.) Najangleder, o pastiri bi rodela e bakren, a te šaj te čerel odova, valjandža lese but vreme hem trud. Palo odova, ked arakhi odole bakre kova našaldilo, o pastiri bi anela le palem ko stado. Ko krajo, ako o bakro povredindža pe ja tano bokhalo, o pastiri bi pomožini odole bakrese adžahar  so bi pačari olese rane, bi ljela le ki angalja hem bi parvari le. O starešine, o pastirija ando e „Devleso stado“, valjani te čeren ista buča te šaj te pomožinen okolendže kola durilje kotar i skupština (1. Petr. 5:2, 3). O starešine rodena len, pomožinena lendže te irinen pe ki skupština hem mothovena lendže mangipe adžahar so pomožinena lendže palem te oven e Jehovase amala. *

11. So jekh šukar pastiri haljola?

¹¹ Jekh šukar pastiri haljola so o bakro šaj te našaldžol. Hem ako avela dži odova, o pastiri na ka postupini oleja grubo. Te dikha kova primer ačhavdža amendže o Devel dži pomožindža disave pekle slugendže, kola jekh kratko vreme, durilje olestar.

12. Sar o Jehova postupindža premalo Jona?

¹² O prorok Jona našlja ando poklo zadatko. Ama, o Jehova na vazdindža pe vasta olestar. Sar jekh šukar pastiri, o Jehova spasindža le hem pomožindža lese adžahar so dindža lese snaga koja valjandža lese te šaj te čerel poklo zadatko (Jona 2:7; 3:1, 2). Palo odova, o Devel koristindža jekh dudum te šaj te pomožini e Jonase te haljol kobor tano vredno svakone manušeso dživdipe (Jona 4:10, 11). So sikljovaja? O starešine na valjani sigate te vazden pe vasta ando neaktivna objaviteljija. Umesto odova, valjani te den sa pestar te haljon sose jekh bakro cidindža pe ando stado. Isto adžahar, ked odova bakro irini pe e Jehovase, o starešine hem ponodri mothovena lese mangipe hem brininena pe olestar.

13. So šaj te sikljova andi e Jehovasi reakcija ko odova so vačerdža o pisco ando 73. psalam?

¹³ O pisco ando 73. psalam, obeshrabrindža pe ked dikhlja so o lošna uvek izgledinena soj tane uspešna. Ov pučlja pe da li isi le disavi korist odolestar te čerel e Devlesi volja (Ps. 73:12, 13, 16). Sar o Jehova reagujindža? Ov na osudindža odole manuše. U stvari, o Devel dindža ki Biblija te oven pisime olese lafija. Ko krajo, o psalmista haljilo so nane ništa pošukar ko dživdipe nego te ove  e Jehovaso amal (Ps. 73:23, 24, 26, 28). So sikljovaja? O starešine na valjani sigate te osudinen okolen kola pučena pe koja tani korist ando odova te služini pe e Jehovase. Umesto te osudinen len, on ka den sa pestar te haljon sose adžahar vačerena ja čerena. Samo tegani o starešine šaj te koristinen i Biblija te šaj te ohrabrinen len.

14. Sose e Ilijase valjandža pomoć hem sar o Jehova pomožindža lese?

¹⁴ O prorok Ilija našlja kotar i kraljica Jezavelja (1. Kralj. 19:1-3). Ov mislindža so niko više na služini sar e Jehovaso proroko hem mislindža so odova so ov čerela nane više vredno. O Ilija hine odobor depresivno so manglja te merel (1. Kralj. 19:4, 10). Ama, o Jehova na osudindža e Ilija. Ov uverindža le ko odova so nane kokri, so šaj te oslonini pe ki e Devlesi moć hem so isi pana buti koja ov valjani te čerel. O Jehova pažljivo šundža sa so mučini e Ilija hem dindža le neve zadatkija (1. Kralj. 19:11-16, 18). So sikljovaja? Sare amen, a posebno o starešine, valjani premalo e Jehovase sluge te postupina ljubazno. Bilo o manuš te mothovi soj tano ogorčeno ja te mislini so na zaslužini e Jehovaso milosrđe, o starešine ka šunen le dži phravela lendže po vilo. Palo odova, on ka den sa pestar te uverinen le so o Jehova mangela le.

15. Premalo Jovan 6:39, sar o Isus dikhlja ko pe Dadese bakre?

¹⁵ Sar o Jehova mangela amen te dikha upro olese bakre kola našaldilje? Amen šaj  but te sikljova ando e Isuseso primer. Ov džandža so sa e Jehovase bakre tane vredna anglo e Devlese jačha. Odolese, o Isus čerdža sa so šaj te pomožini „e našalde bakrendže ando izraelsko narodo“ te irinen pe e Jehovase (Mat. 15:24; Luka 19:9, 10). Sar jekh šukar pastiri, o Isus dindža sa pestar te na našali nijekhe e Jehovase bakre. (Čitin Jovan 6:39.)

16-17. Sar o starešine valjani te dikhen upro okola kolendže pomožinena te irinen pe? (Dikh o okvir „ Sar šaj te osetini pe o bakro kova našaldilo?”)

¹⁶ O apostol Pavle podstaknindža e starešinen ki skupština Efes te oponašinen e Isuseso primer. Ov phendža: „Mora te pomožinen okolendže kola tane slaba. Hem tumen mora te ovel tumen ki godi so o Gospod Isus, phendža: ’Pobuter isi bahtalipe ked dela pe nego ked ljela pe‘“ (Dela 20:17, 35). Odova stih mothovi so o starešine isi len jekh važno odgovornost, a odija tani te brininen pe ando e Jehovaso narodo. Jekh starešina andi Španija, kova vičini pe Salvador, phenela: „Ked razmislinava odolestar kobor o Jehova brinini pe ando pe bakre kola našaldilje, odova podstaknini man te dav sa mandar te pomožinav len. Uverimo hijum so o Jehova mangela te brininav man olendar.“

¹⁷ Sarinendže kola pominena pe ko akava članko, neko pomožindža te irinen pe e Jehovase. Avdije, isi pana objaviteljija kola durilje kotar o Jehova, ama mangena te irinen pe olese. Aver članko ka vačeri pobuter odolestar so šaj amen te čera te šaj te pomožina lendže te irinen pe e Jehovase.