1. Sose disavendže tano pharo te proučinen?

AVDIJE nane lokho te zaradini pe dživdipase. Amare phralja valjani te čeren but buti te šaj te ovel ljen so te han, so te uraven hem kaj te bešen. A averendže svako dive džala po nekobor satija te džan dži i buti hem te irinen pe. But oljendar čerena phari buti. Ko krajo e diveso, odola bučarne phralja hem phenja tane čače but umorna. Odoljese, nane ljen snaga te proučinen.

2. Ked tu arakheja vreme te proučine?

² Ama, i buti tani so amen mora te arakha vreme te proučina, hem odova šukar te proučina e Devljeso Lafi hem amare publikacije. Amaro amaljipe e Jehovaja hem o večno dživdipe zavisini odoljestar! (1. Tim. 4:15, 16). Disave svako sabaj uštena rano hem proučinena, sose tegani ko čher nane galama hem nane umorna. Avera ko krajo e diveso odvojinena nekobor minutija te šaj te čitinen diso ki mira hem te razmislinen odoljestar.

3-4. Kola promene hine čerde hem sose?

³ Verovatno ka složine tut odoljeja soj tano važno te arakha vreme te proučina. Ama, so valjani te proučina? Šaj pheneja: „Isi but te čitini pe, našti sa te resav.“ Disave čitinena hem dikhena sa so objavini pe, ama isi but kola našti te čeren odova. O Vodeće telo džanela odova. Odoljese, akana sigende odlučindža pe te smanjini pe o broj ando izdanja kola tane štampime ja kola tane ko internet.

⁴ Na primer, o Godišnjako ando e Jehovase svedokija više na ikljola, odoljese so but šuže iskustvija objavinena pe ko amaro veb-sajt ko jw.org^® hem ko masekose emisije ki amari televizija.  O časopisija Stražarsko kula hem Probudite se! kola tane čerde e manušendže ki služba, akana ikljona trin putija ko berš. Akala promene nane čerde te šaj te ovel amen pobuter vreme avere bučendže, nego te šaj te obratina pobuter pažnja okoljese soj tano „najvažno“ (Fil. 1:10). Akana ka dikha sar šaj te odlučina soj tano najvažno hem sar amaro proučavanje šaj te ovel pana pošukar.

5-6. Kola publikacije valjani temeljno te proučina?

⁵ So amen valjani prvo te proučina? Sigurno valjani svako dive te odvojina vreme te proučina e Devljeso Lafi. O poglavlja andi Biblija kola valjani te čitinen pe ko jekh kurko, akana tane smanjime te šaj te ovel amen više vreme te razmislina okoljestar so čitindžam hem odova te istražina ko amare publikacije. Amaro cilj na valjani te ovel samo te nakha disavo materijali, nego hem te mukha odova so čitindžam andi Biblija te resel dži ko amaro vilo hem te čerel te ova paše e Jehovaja (Ps. 19:14).

⁶ So valjani pana temeljno te proučina? Džandžola pe, valjani te pripremina i Stražarsko kula hem e Skupštinako proučibe andi Biblija. Isto adžahar, valjani te pripremina odova so ka ovel ko sastanko ko radno dive. Šukar bi ovela te čitina sa o izdanja kotar Stražarsko kula hem Probudite se!

7. Da li valjani te obeshrabrine tut ako našti te rese te čitine ja te dikhe sa so ikljola ko amaro veb-sajt ja ki amari televizija?

⁷ Šaj pheneja: „Pa šukar, ama sar te resav te čitinav sa o člankija hem te dikhav sa o filmija kola ikljona ko amaro veb-sajt jw.org^® hem ki amari televizija, JW Broadcasting^®? Čače isi but!“ Ajde te dikha jekh primer: Ko restorani kuri isi švedski sto isi but habe. O gostija ko odova restorani niked našti te probinen sa so isi ko odova astalji. On ka ljen samo nekobor kotar odola buča. Isto adžahar, ma obeshrabrin tut ako našti te rese te čitine ja te dikhe sa so ikljola ko amaro veb-sajt ja ki amari televizija. Čitin hem dikh odova so šaj. Akana ka dikha so značini te proučine hem sar šaj odova te čere pana pošukar.

8. So valjani te čera ked pripreminaja i Stražarsko kula hem sose tano odova šukar?

⁸ Te proučini pe značini so dži čitineja ti godi valjani te ovel samo odothe te šaj te sikljove diso važno ando odova. Odova na značini so valjani samo sigate te čitina diso hem te podvucina o odgovorija. Na primer, ked pripremineja i Stražarsko kula, najangljeder dikh ko početko e člankoso sostar ka vačera. Palo odova, dikh o naslov ando članko, o podnaslovija hem o pučiba ponovibase. Tegani, hari pohari čitin celo članko. Obratin pažnja ki prvo rečenica ko odlomko, sose oj tani najvažno. Odija rečenica phenela sostar ka vačeri pe ko odlomko. Dži čitineja o članko, razmislin odoljestar sar tano svako odlomko povezimo e podnasloveja hem e glavno temaja. Podvucin o lafija kola nane tuče pendžarde hem beležin i misao koja mangeja te istražine.

9. (a) Sose hem sar valjani posebno te obratina pažnja ko stihija ked proučinaja i Stražarsko kula? (b) Premalo o lafija kotar Ješua 1:8, so valjani te čera ked čitinaja disavo biblijako stih?

⁹ Ked amen proučinaja i Stražarsko kula ko skupštinako sastanko, odova pomožini amen te haljova i Biblija. Odoljese, razmislin kotar stihija, naročito okoljendar kola ka čitinen pe ko sastanak. Posebno obratin pažnja ko ključna lafija ja izrazija ando stihija kola mothovena i glavno misao ko odlomko. Uzo odova, odvojin hari vreme te razmisline ando stihija kola čitindžan hem te dikhe sar  šaj te primenine ljen ko toklo dživdipe. (Čitinen Ješua 1:8.)

10. Premalo o lafija kotar Jevrejendže 5:14, sose o roditeljija valjani ko porodično proučibe te sikaven pe čhaven sar te proučinen hem sar te istražinen avera buča?

¹⁰ Džandžola pe, o roditeljija mangena oljenge čhave te uživinen ked isi ljen porodično proučibe. Iako o roditeljija uvek valjani te ovel ljen plan so ka čeren ko porodično proučibe, nane potrebno svako kurko te organizujinen disave posebna projektija. Dijekhvar ko porodično proučibe šaj te dikhen amari masekosi emisija ki amari televizija ja šaj te čeren ko dijekh posebno projekat, sar na primer te čeren e Nojesi arka. Ama, but tano važno te sikaven pe čhaven sar te proučinen. O čhave valjani te sikljon sar te pripreminen pe e sastankondže ja sar te istražinen dijekh problemi ja disavo pučibe kova pojavindža pe ki škola. (Čitinen Jevrejendže 5:14.) Ako čhere ka ovel ljen odija navika te proučinen i Biblija, tegani ka ovel ljendže polokho te pratinen odova so vačeri pe ko sastankija ja ko kongresija, kuri na ka oven uvek disave filmija. Naravno, kobor vreme ka proučinen peklje čhavencar ka zavisini odoljestar save tane o čhave hem kobor berš isi ljen.

11. Sose tano važno te sikava e osoba kasa proučinaja sar kokri te proučini?

¹¹ O manuša kasa proučinaja i Biblija isto valjani te sikljon sar kokri te proučinen. Ked počminena te proučinen, amen hijam bahtalje so ked pripreminena pe e sastankose ja peklje kursese podvucinena o odgovorija. Ama, valjani te sikava ljen hem sar kokri te istražinen hem temeljno te proučinen. Odova ka pomožini ljen ked ka ikljol dijekh problemi, te džanen sar hem kuri te arakhen o savetija, a na odma te pučen averen.

12. Kola ciljija šaj te oven amen dži proučinaja?

¹² Ako na hijan manuš kova mangela te proučini, tegani šaj mislineja so niked na ka uživine ko odova. Ama, šaj te uživine. Ki početka na valjani but te proučine, ama hari pohari produžin o vreme ked proučineja. Nek ovel tut disavo cilj. Džandžola pe, o najvažno cilj tano pobuter te ove paše e Jehovaja. Disave tikne ciljija kola šaj te oven tane, te arakha o odgovor ko pučibe kova pučlja amen neko ja te istražina so amare publikacije phenena kotar o problemi kova isi amen.

13. (a) Objasnin so šaj jekh terno te čerel te šaj ki škola te vačeri odova ko so verujini. (b) Sar šaj te primenine o savet kotar Koloskonendže 4:6?

 ¹³ Na primer, ako hijan terno hem pana džaja ki škola, šaj te amala kotar toklo razred verujinena ki evolucija. Šaj bi mangeja te vačere ljendže odova so sikavi i Biblija odoljestar, ama mislineja so na hijan sposobno ja na džaneja. Ače, i tema kotar koja šaj te proučine! Šaj te ovel tut duj ciljija: (1) te zorjačere ti vera ko odova so o Devel sa stvorindža hem (2) te sikljove sar šaj pošukar te objasnine odova ko so verujineja (Rim. 1:20; 1. Petr. 3:15). Najangljeder puč kokri tut: „Sose me amala verujinena ki evolucija“? Palo odova, ko amare publikacije istražin odija tema. Šaj ka ovel polokho te objasnine odova ko so verujineja, nego li so tu mislindžan. But manuša verujinena ki evolucija, samo sebepi odoljese so neko phendža ljendže soj tano odova čače. Ako arakheja samo jekh ja duj buča koljendar šaj te vačere, šaj ka pomožine nekase kova iskreno rodela o odgovorija. (Čitinen Koloskonendže 4:6.)

14-16. (a) Sar šaj pošukar te pendžare disave biblijake knjige? (b) Premalo o stihija kola tane dinde, objasnin sar šaj te džane pobuter kotar knjiga koja pisindža o Amos. (Dikh o okvir „ O manuša andi Biblija nek oven tuče dživde ki godi“.)

¹⁴ Zamislin so ko aver sastanko valjani te vačera kotar knjiga koja pisindža jekh kotar tikne prorokija, a koljestar na džanaja odobor but. O prvo korako šaj te ovel te barjačere i želja te sikljove pobuter ando manuš kova pisindža odija knjiga. Sar šaj te čere odova?

¹⁵ Sar prvo, puč kokri tut: „So džanava okoljestar kova pisindža i knjiga? Ko hine ov, kaj živindža hem savi buti čerdža?“ Ked ka džane odova, tegani šaj te haljove sose koristindža disave lafija ja disave poređenja. Dži čitineja oljesi knjiga ki Biblija, razmislin odoljestar kola lafija mothovena amendže savo manuš hine ov.

¹⁶ Sar dujto, šukar bi ovela te džane ked tani odija knjiga pisimi. Odova šaj lokho te proverine ki „Tabela knjiga Svetog pisma“ koja tani ko krajo ando prevod Novi svet. Uzo odova, šaj te dikhe i tabela ando prorokija hem kraljija ki brošurica „Istražujmo Božju Reč“. Ako vačeri pe kotar proročansko knjiga, ovela bi zanimljivo te džane save uslovija hine ko odova vreme. Ko kola lošna stavija ja adetija (običaja) upozorindža odova prorok? Ko živindža ko isto vreme ked živindža odova prorok? Te šaj te haljove i situacija pošukar, šaj te dikhe hem avera biblijake knjige. Na primer, te šaj te haljove so sa ulo ko vreme ked živindža o prorok Amos, šukar bi ovela te čitine disave stihija kotar 2. Kraljija hem kotar 2. Letopisa, ko kola ljegarena amen o unakrsna reference kotar Amos 1:1. Uzo odova, šaj te čitine i knjiga koja pisindža o Osija, kova šaj živindža ko isto vreme ked hem o Amos. Sa akala buča ka pomožinen te haljove savo hine o dživdipe ked živindža o Amos (2. Kralj. 14:25-28; 2. Let. 26:1-15; Os. 1:1-11; Am. 1:1).

17-18. Vačer jekh primer, kotar akala odlomkija ja kova tu birindžan, te mothove sar i informacija koja na dičhola odobor važno šaj te pomožini tut pobuter te uživine dži proučineja i Biblija.

¹⁷ Ked čitinaja i Biblija, šukar tano te ovel amen želja te sikljova diso nevo. Na primer, zamislin so čitineja o 12. šero ando Zaharijaso proročanstvo, kova vačeri ando e Mesijaso meribe (Zah. 12:10). Ko 12. stiho ka čitine so e „Nataneso čher“ ka žalini sebepi e Mesijaso meribe. Ma nakh sigate prekalo  odova detalji, nego ačhov odothe hem puč kokri tut: „Savi veza isi maškaro e Nataneso čher hem o Mesija? Šaj li te džanav pobuter odoljestar?“ A palo odova, počmin te istražine. O unakrsna reference ljegarena amen dži ko 2. Samueleso 5:14, kuri dikhaja so o Natan hine jekh kotar e Davideso čhavo. I dujto referenca ljegari amen dži o Luka 3:31, kuri dikhaja so o Isus prekalji Marija hine direktno e Nataneso potomak. (Dikh ki Stražarsko kula kotar avgust 2017, 32. str. Akava broj nane ki romani čhib.) Kotar jekhvar sa ovela but zanimljivo! Džaneja so e Isusese hine phendo so ka ovel e Davideso potomak (Mat. 22:42). Ama, o David hine lje više ando 20 čhave. Čače tano neverovatno so o Zaharija mothovdža so posebno e Nataneso čher ka ovel lje razlog te žalini sebepi e Isuseso meribe.

¹⁸ Te dikha pana jekh primer. Ko prvo šero ando Lukaso jevanđelje čitinaja so o anđeo Gavrilo alo ki Marija hem vačerdža olače so ka bijani murše. Ov phendža: „Ov ka ovel baro hem ka vičini pe o Čhavo ando Najbaro. O Jehova o Devel ka del lje presto e Davideso, oljese dadeso, hem ov zauvek ka vladini sar kralj upro e Jakoveso čher“ (Luka 1:32, 33). Obično bi usredsredinaja amen ko odova so o Gavrilo prvo phendža, a odova tano so o Isus ka vičini pe Čhavo ando Najbaro. Ama, o Gavrilo isto adžahar phendža so o Isus ka vladini sar kralj. Odoljese šaj pučaja amen so i Marija mislindža kotar odola lafija. Da li šaj alo lače ki godi so o Isus ka ovel kralj ko Izrael ko than e Irodeso, ja ko than oljese čhavengo? Ako bi o Isus ovela kralj, tegani bi i Marija ovela kraljica-daj hem olaki porodica bi živini ki kraljevsko  palata. Ama, ki Biblija na pisini so i Marija razmislindža odoljestar, niti pisini so i Marija bilo ked rodindža dijekh baro položaj ko Kraljevstvo, sar so čerdže e Isusese duj učenikija (Mat. 20:20-23). Akava detalji pana pobuter uverini amen ko odova so i Marija hine jekh but ponizno romni.

19-20. Premalo o lafija kotar Jakoveso 1:22-25 hem 4:8, kola ciljija isi amen dži proučinaja?

¹⁹ Ma bistri so o glavno cilj dži proučinaja e Devljeso Lafi hem amare publikacije tano so pobuter te ova paše e Jehovaja. Isto adžahar, mangaja so pojasno te dikha save hijam andral ko vilo hem so valjani te menina koro amende te šaj te šuna e Devlje. (Čitinen Jakoveso 1:22-25; 4:8.) Odoljese svako puti angljeder so ka počmina te proučina valjani te molina amen e Jehovase te del amen poklo duh. Valjani te molina amen te pomožini amen so pošukar te haljova odova so proučinaja hem te pomožini amen jasno te dikha kola promene valjani te čera.

²⁰ Mangaja sare amen te da sa amendar te ova sar e Devljeso verno sluga koljestar o psalmista vačerdža: „[Ov] uživini ko Jehovaso zakon, hem dive rat pažljivo čitini oljeso zakon [...] hem sa so čerela ka ovel uspešno“ (Ps. 1:2, 3).