„Me hijum but ladžutni,“ phenela i Sara, * „hem nane man baro samopouzdanje. Odolese, maje tano but neprijatno ked hijum e manušencar kola tane sigurna ano peste hem kola isi len zoralo karakter. Ama, osetinava man opušteno ked hijum nekasa koj tano blago hem ponizno. Asavke manušendže šaj te phravav mo vilo, te phenav lendže sar osetinava man hem te vačerav olencar kotar me problemija. Me najšukar amala tane asavke.“

E Sarake lafija mothovena so ked hijam blaga, o manuša mangena te oven amare amala. O Jehova but mangela okole kova tano blago. Oleso Lafi podstaknini amen: „Uraven tumen... ki blagost“ (Kol. 3:12). Soj tani i blagost? Sar o Isus mothovdža akija osobina? Hem sar amaro dživdipe šaj te ovel pošukar sebepi so hijam blaga?

I blagost podrazumini mirno narav. O blago manuš premalo avera ponašini pe ko jekh nežno hem ljubazno način hem ked tano ko problemija na našali po mir hem pi samokontrola.

Iako disave manuša mislinena so o blaga manuša tane slaba, u stvari on isi len bari unutrašnjo snaga. O grčko lafi asi „blagost“ koristindža pe te opisujini jekhe divljo graste kova hine ukrotimo. O gras na našaldža pi snaga, ama sebepi o trening ov šaj te kontrolišini pi snaga. Isto adžahar, i blagost pomožini amendže te kontrolišina amari nesavršenost hem te ova ko mir averencar.

Šaj mislinaja: „Me na hijum blago manuš.“ Sebepi so živinaja ko sveto kuri but manuša tane nasilna hem nestrpljiva, šaj te ovel amendže pharo te ova blaga (Rimlj. 7:19). Iako valjani but te trudina amen te šaj te barjačera i blagost, o sveti duh ka pomožini amendže te ova odlučna te barjačera akija osobina (Gal. 5:22, 23). Sose valjani te trudina amen te barjačera i blagost?

I blagost tani osobina koja privucini e manušen. Sar so ko početko i Sara phendža, svako mangela te ovel ko društvo e manušencar kola tane blaga. O Isus ko najšukar način mothovdža so značini te ove blago hem šukar manuš (2. Kor. 10:1). Čak hem o čhave, kola obično darana te oven e manušencar kolen na pendžarena, but manglje te oven oleja (Mar. 10:13-16).

I blagost zaštitini hem amen hem averen. Ako hijam blaga, na ka nervirina amen sigate, niti ka  holjana sigate (Posl. 16:32). Ked hijam blaga, na ka ovel amen osećaj krivice kova pojavini pe ked nekas povredinaja, posebno okolen kas but mangaja. I blagost zaštitini averen, sose ako kontrolišinaja amare osećanja hem amaro ponašanje na ka povredina len.

Iako hine le bare odgovornostija hem hine but zauzeto, o Isus hine blago premalo sarinende. Tegani, but manuša hine umorna hem opteretime hem valjandža lendže ohrabrenje. Sigurno hine but utešime ked o Isus phendža lendže: „Aven koro mande... sose me hijum blago hem ponizno ko vilo“ (Mat. 11:28, 29).

Sar šaj te sikljova te ova blaga sar o Isus? Ked proučinaja e Devleso Lafi, amen sikljovaja sar o Isus ponašindža pe premalo manuša hem sar postupindža ko disave phare situacije. Palo odova, ked ka doživina o situacije kola ka ispitinen da li hijam blaga ja na, amen ka da sa amendar te ova sar o Isus (1. Petr. 2:21). Akana ka dikha trin buča kola pomožindže e Isusese te ovel blago.

O Isus hine ponizno ko vilo. O Isus phendža so ov tano „blago hem ponizno ko vilo“ (Mat. 11:29). I Biblija spomini akala duj osobine zajedno, sose i blagost hem i poniznost tane but povezime (Ef. 4:1-3). Sose šaj te phena odova?

I poniznost pomožini amendže te na mislina so hijam but važna hem te na ova but osetljiva. Sar o Isus reagujindža ked disave manuša nepravedno phendže lese soj tano halano hem pijanica? Odoleja sar živindža, ov mothovdža lendže so odova nane adžahar. Odolese so hine ponizno, ov phendža: „I mudrost opravdinena olake delija“ (Mat. 11:19).

Ked neko nepromišljeno vačeri diso kotar ti nacija, pol ja ando odova kotar aveja, tegani trudin tut te vačere blago. Amaro phral o Petar, kova služini sar starešina ki južno Afrika, phenela: „Ked neko nervirini man pe lafijencar, pučava man: ’Sar bi o Isus reagujini akana?‘ Sikljiljum te na mislinav so hijum but važno.“

O Isus haljilo e manušenge slabostija. E Isusese učenikija hine len šukar namera, ama podijekh puti olengi nesavršenost sprečindža len te čeren odova so manglje. Na primer, i rat angleder o Isus te merel, o Petar, o Jakov hem o Jovan na dindže e Isusese i emotivno podrška koja valjandža lese. Ked phendža: „O duho, tano čače spremno, ama o telo tano slabo“, o Isus mothovdža so haljilo sose on zasuče (Mat. 26:40, 41). Odolese so haljilo so on tane nesavršena, o Isus na holjandža upro pe apostolija.

Amari phen i Mendi, angleder but kritikujindža averen. Akana, oj trudini pe te ovel blago sar o Isus. Oj phenela: „Trudinava man te na bistrav so sa o manuša tane nesavršena. Dava sa mandar te ovav sar o Jehova hem te dikhav olenge šukar osobine.“ So mislineja, da li o saosećajno stav kova o Isus hine le premalo e manušenge mane, šaj te pomožini hem tuče te ove blago premalo avera?

O Isus mukhlja sa o buča ko e Devlese vasta. Ked o Isus hine ki phuv, o manuša nepravedno ponašindže pe premalo oleste. But putija pogrešno haljilje le, mrzindže le hem mučindže le. Iako nakhlja sa odova, ov ačhilo blago sose „uzdajindža pe upro Okova kova pravedno sudini“ (1. Petr. 2:23). O Isus džandža so oleso nebesko Dad ka pomožini lese te izdržini sa hem so ov ko po vreme ka kaznini okolen so lošno ponašindže pe premalo leste.

Ako holjanaja hem pokušinaja te ispravina i nepravda koja doživindžam, šaj lokho te preterina hem te čera pana pobaro problemi. Odolese, e Devleso Lafi podsetini amen: „E manušesi holi na ljegari dži e Devlesi pravednost“ (Jak. 1:20). Čak, iako isi amen opravdano razlog te holjana, sebepi amari nesavršenost šaj te reagujina ko pogrešno način.

I phen Keti koja živini ki Nemačka, angleder mislindža: „Ako tu na borineja tut kokri tuče, niko aver na ka čerel odova.“ Ama, ked sikljilji te uzdajini pe upro Jehova, oj menindža po stav. Oj phenela: „Akana ne mora uvek te ovav spremno te braninav kokri man. Šaj te reagujinav blago, odolese so džanava so o Jehova ka popravini sa soj tano lošno ko akava sveto.“ Ako hem tu doživindžan i nepravda ki ti koža, oponašin e Isuse hem uzdajin tut upro Devel hem odova ka pomožini tuče te ačhove blago.

O Isus phendža so ako mangaja te ova bahtale, mora te ova blaga. Ov phendža: „Bahtale tane okola soj tane blaga“ (Mat. 5:5). Akana ka dikha sar i blagost ka pomožini amendže ko disave situacije.

I blagost smanjini napetost ko brako. „Phendžum but buča kola na mislindžum hem adžahar but povredindžum me romnja“, priznajini amaro phral o Robert kotar i Australija. „Ama, o gruba lafija kola vačerdžum ki holi, našti te kosav. Maje tano but pharo ked dikhava kobor povredindžum me romnja.“

„Sare često grešinaja“ ked vačeraja. O nepromišljena lafija šaj te čeren but problemija ko brako (Jak. 3:2). Ko asavke situacije, i blagost pomožini amendže te ačhova smirime hem te kontrolišina amari čhib (Posl. 17:27).

Amaro phral o Robert, but trudindža pe te razvijini o osobine sar soj tane o mir hem i samokontrola. Sar odova uticindža ko olengo brako? Ov phenela: „Akana, ked mi romni hem me našti te složina amen, trudinava man te šunav pažljivo, blago te vačerav hem te na holjanav sigate. Akana, amaro odnos tano but pošukar nego li angleder.“

I blagost pomožini amendže te ova amala averencar. Okola kola sigate uvredinena pe, nane len but amala. Ama, i blagost pomožini amendže te arakha o mir kova povezini amen (Ef. 4:2, 3). I Keti, kolatar vačerdžam angleder, phenela: „Ked hijum blago, šaj te uživinav dži družinava man averencar, čak iako disave manušencar nane lokho te ove amal.“

I blagost anela unutrašnjo mir. I Biblija povezini „i mudrost so avela odupral“ odoleja te ova blaga hem miroljubiva manuša (Jak. 3:13, 17). Jekh blago manuš isi le „mirno vilo“ (Posl. 14:30). Amaro phral, o Martin, but trudindža pe te ovel blago. Ov phenela: „Akana na insistirinava o buča te čeren pe sar so me mangava. Odolese isi man pana pobaro unutrašnjo mir hem hijum pobahtalo.“

Čače tano so sare amen valjani but te trudina amen te šaj te ova blaga. Jekh phral phenela: „Te ovav iskreno, čak hem avdije, podijekh puti osetinava so hijum but holjamo.“ Ama, o Jehova kova podstaknini amen te razvijina i blagost, ka pomožini amendže te uspina (Is. 41:10; 1. Tim. 6:11). Ov šaj te završini amari „obuka dži o krajo“ hem te „zorjačeri amen“ (1. Petr. 5:10). Dži tegani, sar o apostol Pavle hem amen šaj te „oponašina e Hriste kova tano blago hem šukar“ (2. Kor. 10:1).