O proročanstvija kola pominena pe ko akava okvir opisujinena o događaja kola desindže pe ko isto vreme. Sa akala događaja dokazinena so živinaja ko „poslednja dive“ (Dan. 12:4).

• Stihija: Otkr. 11:7; 12:13, 17; 13:1-8, 12

  Proročanstvo: Prekalo 3 000 berš, „i divljo zver“ vladindža upro manuša. Ko vreme ando krajo, olako eftato šero tano ranimo. Kasnije, odija rana sačilji hem „celo phuv“ džala pali odija zver. O Beng koristini odija zver te „borini pe okolencar so ačhile.“

  Ispunjenje: Palo Potop, pojavindže pe o vladavine kola protivindže pe e Jehovase. Vekonencar palo odova, dži trajindža o Prvo svetsko rat, o Britansko carstvo našaldža pi moć. Ked ov hem i Amerika ulje saveznikija, ov oporavindža pe. Posebno ko vreme ando krajo, o Beng koristini sa o vlastija ki phuv te progonini e Devlese narodo.

• Stihija: Dan. 11:25-45

  Proročanstvo: Ko vreme ando krajo, o kralj ando sever hem o kralj ando jug borinena pe ko ka ovel le pobari vlast.

  Ispunjenje: I Nemačka hem i angloameričko svetsko sila borindže pe ko ka ovel la pobari vlast. Ko 1945. berš, o Sovjetsko savez hem olese saveznikija ulje o kralj ando sever. Ko 1991. berš, o Sovjetsko savez raspadindža pe, hem sar dželo o vreme, i Rusija hem olake saveznikija ulje o kralj ando sever.

• Stihija: Is. 61:1, Mal. 3:1; Luka 4:18

  Proročanstvo: Angleder o Mesijansko Kraljevstvo te ovel uspostavimo, o Jehova bičhaldža pe „glasniko“ te „pripremini o drumo.“ Akija grupa počmindža te vačeri „o šukar haberi e krotkonendže.“

  Ispunjenje: Kotar 1870. berš, o phral, o Rasel hem olese saradnikija počmindže hor te proučinen i Biblija te šaj te haljon so oj čače sikavi. Ko 1881. berš, e Devlese sluge haljilje soj tano but važno te propovedinen i šukar vest. Ko odova vreme ikljilje o člankija sar soj tane „Rodena pe 1 000 propovednikija“ hem „Pomazime te propovedina.“

• Stihija: Mat. 13:24-30, 36-43

  Proročanstvo: Jekh manuš sejindža o dživ. Palo odova, o neprijatelj alo hem sejindža o korov maškaro dživ. O kukolj barilo hem učhardža o dživ. Ked alo o vreme asi žetva, o korov hine odvojimo kotar o dživ.

  Ispunjenje: Kotar 1870. berš, dikhlja pe sa pobuter hem pobuter i razlika maškaro prava hrišćanja hem o hovavne hrišćanja. Ko poslednja dive, o prava hrišćanja tane čedime hem odvojime ando hovavne hrišćanja.

• Stihija: Dan. 2:31-33, 41-43

  Proročanstvo: O stopala ando sastron hem andi glina tane deo ando kip kova tano čerdo ando razna metalija.

  Ispunjenje: I glina predstavini e manušen kola odoleja so buninena pe, oslabinena o uticaj andi angloameričko svetsko sila. Sebepi odova, akija svetsko sila našti te ovel zorali sar o sastron.

• Stihija: Mat. 13:30; 24:14, 45; 28:19, 20

  Proročanstvo: „O dživ“ tano čhivdo ko „ambarija“ hem „o verno hem o razborito robo“ tano čhivdo upro „sluge.“ I „šukar vest ando Kraljevstvo“ počmindža te vačeri pe ki celo phuv.

  Ispunjenje: Ko 1919. berš, o verno hem o razborito robo tano čhivdo upro e Devleso narodo. Avdije, e Jehovase svedokija propovedinena ko prekalo 200 phuvja hem štampinena i literatura koja temeljini pe ki Biblija ko prekalo 1 000 čhibja.

• Stihija: Dan. 12:11; Otkr. 13:11, 14, 15

  Proročanstvo: I zver koja hine la duj šinga phenela e manušendže ki phuv te čeren „o lik andi divljo zver“ hem „dela dživdipe e likose andi zver.“

  Ispunjenje: I angloameričko svetsko sila osnujindža i organizacija koja vičindža pe Društvo naroda. Akija organizacija hine la podrška kotar avera narodija. Kotar 1926-1933. berš, o kralj ando sever isto adžahar hine član ando Društvo naroda. O manuša verujindže so o Društvo naroda šaj te anel mir, a odova tano diso so samo e Devleso Kraljevstvo šaj te čerel. Isto adžahar, o manuša verujinena so o Ujedinjena nacije ka anen mir.

• Stihija: Dan. 8:23, 24

  Proročanstvo: O kralj kova okrutno izgledini „ka uništini odobor but buča so o manuša ka čudinen pe.“

  Ispunjenje: I angloameričko svetsko sila mudardža buten manušen hem but buča uništindža. Na primer, ko Dujto svetsko rat, i Amerika fordindža duj atomska bombe upri phuv koja hine olako hem e Britanijako neprijatelj. Akava oružje čerdža pobari šteta nego li bilo kova aver angleder oleste.

• Stihija: Dan. 11:31; Otkr. 17:3, 7-11

  Proročanstvo: I „skerletno zver“ koja isi la deš šinga ikljola ando bezdan hem oj tani o oftoto kraljo. I knjiga ando Danilo phenela so akava kralj tano „i gadost koja pustošini.“

  Ispunjenje: O Društvo naroda prestajindža te postojini dži trajindža o Dujto svetsko rat. Palo maribe, o Ujedinjena nacije hine osnujime. O Ujedinjena nacije, sar hem o Društvo naroda angleder olende, phenena so šaj te anen mir, a u stvari odova šaj te čerel samo e Devleso Kraljevstvo. O Ujedinjena nacije ka napadinen i religija.

• Stihija: 1. Sol. 5:3; Otkr. 17:16

  Proročanstvo: O vladarija objavinena o „mir hem sigurnost“, hem o „deš šinga“ hem i „divljo zver“ napadinena e „bludnica“ hem uništinena la. Palo odova, o narodija ovena uništime.

  Ispunjenje: O vladarija šaj ka phenen so on andže o mir hem i sigurnost. Tegani, o narodija kola tane deo ando Ujedinjena nacije ka uništinen o hovavne religiozna organizacije. Akava ka ovel početak andi bari nevolja. Odija nevolja ka završini pe ked o Isus ko Armagedon ka uništini odova so ačhilo ando e Bengeso sveto.

• Stihija: Jezek. 38:11, 14-17; Mat. 24:31

  Proročanstvo: O Gog napadini i phuv ando e Devleso narodo. Palo odova, o anđelija čedena „olese birime.“

  Ispunjenje: O kralj ando sever hem avera vladavine napadinena e Devlese narodo. Disavo vreme palo akava napad, o pomazanikija kola tane ki phuv ka oven čedime ko nebo.

• Stihija: Jezek. 38:18-23; Dan. 2:34, 35, 44, 45; Otkr. 6:2; 16:14, 16; 17:14; 19:20

  Proročanstvo: Okova kova bešela upro parno gras pobedini adžahar so uništini e Goge hem olese vojska. „I zver“ tani fordimi „ko jezero andi jag“ hem o bar uništini o baro kip.

  Ispunjenje: O Isus, sar kralj ando e Devleso Kraljevstvo, ka spasini e Devlese narodo. O Isus, o 144 000 hem o anđelija uništinena i koalicija naroda, odnosno celo e Bengeso političko sistemi.