1-2. Koja važno odluka valjanđe te anen o Judejcija kola živinđe ko Vavilon? (Jezdra 1:2-4)

 O KRALJ vaćerđa jekh objava. Sa o Judejcija kola hine ko Vavilon oko 70 berš, akana šaj hine te irinen pe ko Izrael. (Čitin Jezdra 1:2-4.) Samo o Jehova šaj hine te ćerel odova. Sose šaj te phena odova? Odolese so o Vaviloncija na hine len običaj te oslobodinen e manušen kolen zarobinđe (Is. 14:4, 17). Ama, o Vavilon hine osvojimo hem o nevo vladari phenđa e Judejcenđe so šaj te irinen pe ki pi phuv. Odolese, svako Judejco, pogotovo o poglavari ki porodica, valjanđa te anel jekh važno odluka, da li ka aćhol ko Vavilon ili ka irini pe ko Jerusalim? Odija na hine lokhi odluka. Sose?

² But olendar hine phure hem hine lenđe pharo te pođinen ko jekh asavko baro drumo. Isto ađahar, but Judejcija bijandilje ko Vavilon hem uduri živinđe. Odolese, on na dikhlje o Izrael sar pi phuv nego sar phuv kuri živinđe olenge phure. Disave olendar verovatno hine barvale ko Vavilon hem na hine lenđe lokho te mukhen po ćher, pi buti hem te đan ko jekh nepoznato than.

3. Kova blagoslov ađićerđa e Judejcen kola irinđe pe ko Izrael?

³ O verna Judejcija đanđe so ako ka irinen pe ko Izrael, o blagoslovija kola ka dobinen ka oven but pobare ando žrtve kola ka ćeren. Jekh ando blagoslovija hine so ko Izrael šaj hine slobodno te služinen e Jehovase. Ko Vavilon hine prekalo 50 hramija kuri o manuša služinđe e hovavne devlenđe. Ama, na hine nijekh kuri šaj hine te služinen e Jehovase. Na hine nijekh oltari kaj šaj hine te den žrtve sar so hine pisimo ko Mojsijeso zakon, niti hine organizujimo o sveštenikija te ćeren odova. Isto ađahar, ko Vavilon hine but pobuter manuša kola služinđe e hovavne  devlenđe nego okola kola poštujinđe e Jehova hem olese merilija. Odolese but Judejcija kola hine verna e Jehovase jedva ađićerđe te irinen pe ko Izrael kaj šaj hine palem te služinen e Jehovase ko ispravno način.

4. So o Jehova obećinđa e Judejcenđe kola ka irinen pe ko Izrael?

⁴ Te putujini pe kotar Vavilon đi o Izrael na hine hić lokho hem odova šaj hine te trajini oko štar masek. Ama, o Jehova obećinđa e Izraelcenđe so ka cidel olendar sa o pharipa đi ka putujinen. O Isaija pisinđa: „Čistinen o drumo e Jehovase! Ćeren amare Devlese ravno drumo prekali pustinja... O bregija nek oven ravna, o drumija kola nane ravna nek oven ravnica!“ (Is. 40:3, 4). Zamislin so valjani te putujine ki pustinja, a anglo tute tano ravno drumo. Tu bi sigurno oveja but bahtalo sebepi odova. But tano polokho te putujine ko ravno drumo hem but posigate ka rese nego te đa upre-tele prekalo planine, bregija ja doline.

5. Kova simbolično anav hine dindo e drumose maškaro Vavilon hem Izrael?

⁵ Avdije, but drumija isi len po anav hem po broj. O simbolično drumo kolestar o Isaija pisinđa isto isi le po anav. Ko Isaija 35:8 pisini: „Uduri ka ovel buvlo drumo kova ka vićini pe Drumo andi svetost. Niko koj tano melalo na ka nakhel odothar.“ So akava obećanje značinđa e Izraelcenđe ko odova vreme hem so amenđe značini?

6. Sose odova drumo vićinđa pe sveto?

⁶ „Drumo andi svetost“ – savo šužo anav aso drumo! Sose akava drumo vićinđa pe sveto? Odolese so niko koj tano melalo, avere lafencar, nijekh Judejco kova ćerđa nemoral, idolopoklonstvo ili disavo aver greh našti hine te irini pe ko Izrael. O Judejcija kola irinđe pe ko Izrael valjanđe te oven e Devleso „sveto narodo“ (Pon. zak. 7:6). Ama, odova na značinđa so okola so ikljilje ando Vavilon na valjanđe te ćeren promene te šaj te oven šukar anglo Jehovase jaćha.

7. Kola promene valjanđe te ćeren disave Judejcija? Vaćer jekh primer.

⁷ Sar so dikhljam angleder, but Judejcija bijandilje ko Vavilon hem izgleda so but olendar počminđe te razmislinen sar o Vaviloncija. Beršencar palo odova so o Judejcija irinđe pe ko Izrael, o Jezdra šunđa so lelje pese romnjen ando avera narodija (Izl. 34:15, 16; Jezd. 9:1, 2). Kasnije, o namesnik, o Nemija hine but razočarimo ked haljilo so o ćhave kola bijandilje ko Izrael čak ni na sikljilje i hebrejsko ćhib (Pon. zak. 6:6, 7; Nem. 13:23, 24). Sar šaj hine akala ćhave te mangen e Jehova hem te služinen lese ako na haljona i hebrejsko ćhib ki koja uglavnom hine pisimo e Devleso Lafi? (Jezd. 10:3, 44). Akala Judejcija valjanđe te ćeren bare promene, ama but polokho bi ovela lenđe te ćeren odova ko Izrael kuri o narodo počminđa te služini e Jehovase ko ispravno način (Nem. 8:8, 9).

8. Sose valjani te zaniminen amen o događaja kola desinđe pe angleder but berša? (Dikh i slika ki naslovno strana.)

⁸ Neko šaj te phenel: „Akava tano zanimljivo. Ama, da li odova so desinđa pe e Judejcenđe isi le disavo značenje amenđe?“ Ja, sebepi so hem amen đaja ko „Drumo andi svetost“. Bilo te ova  pomazanikija ja „avera bakre“, amen valjani te aćhova ko „Drumo andi svetost“. Odova ka pomožini amenđe te služina e Jehovase ko ispravno način akana hem ki budućnost, ked e Devleso Kraljevstvo ka anel amenđe bare blagoslovija (Jov. 10:16). b Kotar 1919. berš, milionija manuša ikljilje ando Baro Vavilon, kova tano o svetsko carstvo andi hovavni religija, hem počminđe te đan ko odova simbolično drumo. Verovatno hem tu hijan jekh olendar. Iako o manuša počminđe te đan ko odova drumo oko 100 berš angleder, avera but vreme angleder olende počminđe te pripreminen le.

9. Premalo Isaija 57:14, sar pripreminđa pe o „Drumo andi svetost“?

⁹ Aso Judejcija kola ikljilje ando Vavilon, o Jehova phenđa so ka cidel sa odova so šaj te ćhinavi len te đan ko „Drumo andi svetost“. (Čitin Isaija 57:14.) Ama, so šaj te phena aso amaro vreme? Beršencar angleder o 1919. berš, o Jehova koristinđa disave manušen, kola but poštujinđe le, te pomožinen avere manušenđe te ikljon ando Baro Vavilon. (Uporedin e stihoja ando Isaija 40:3.) Odova so on kasnije ćerđe, avere lafencar, čistinđe o drumo, pomožinđa e iskreno manušenđe te ikljon andi hovavni religija hem te služinen e Jehovase olese narodoja. Sar on čistinđe o drumo? Akana ka vaćera odolestar.

10-11. Sar o štampanje hem o prevod andi Biblija pomožinđe te širini pe o ćaćipe? (Dikh i slika.)

¹⁰ Štampanje. Đi ko 1450. berš, i Biblija hine pisimi vasteja. Aso odova valjanđa but vreme. Isto ađahar, na hine but Biblije hem hine but skupa. Ama, ked počminđa te koristini pe i mašina aso štampanje, hine but polokho te proizvodini pe i Biblija hem but manuša šaj hine te ovel len po primerak.

¹¹ Prevod. Beršencar, i Biblija hine uglavnom samo ki latinsko ćhib. Odija ćhib šaj hine te haljon samo o manuša kola hine but školujime. Ama, ked počminđe te štampinen pe o knjige, disave manuša kola hor poštujinđe e Devle, dinđe sa pestar te prevodinen i Biblija ko ćhibja kola vaćerđe hem o obična manuša. Ađahar o manuša kola čitinđe i Biblija šaj hine te uporedinen odova so sikljilje ki crkva odoleja so i Biblija ćaće sikavi.

12-13. Vaćer jekh primer sar disave istraživačija andi Biblija ko 19. veko počminđe te otkrijinen o hovavne sikljoviba andi crkva.

¹² Publikacije. O manuša kola hor proučinđe i Biblija haljilje but buća. Ama, o sveštenikija hine but holjame ked akala manuša počminđe averenđe te vaćeren ando odova so sikljilje. Na primer, ko 19. veko nekobor iskrena manuša počminđe te objavinen disave traktatija ko kola hine mothovde disave hovavne sikljoviba andi crkva.

¹³ Jekh manuš kova hor proučinđa i Biblija hine o Henri Gru. Ko 1835. berš, ov objavinđa jekh traktati ko kova hine mothovdo so ovela e manušencar ked merena. Ko odova traktati, ov andi Biblija mothovđa so i besmrtnost tani poklon ando Devel, a na diso sova hijam bijande, sar so o crkve sikavđe. Ko 1837. berš jekh svešteniko kova vićinđa pe Džordž Stors, arakhlja odova traktati đi hine ko voz. Palo odova so čitinđa le, ov uverinđa  pe so arakhlja o ćaćipe. Odolese, odlučinđa averenđe te vaćeri ando odova so sikljilo. Ko 1842. berš, ićerđa nekobor govorija ki tema „Jekh istraživanje – da li tane o lošna besmrtna?“ Odova sostar o Džordž Stors pisinđa, but šukar utičinđa upro jekh terno ćhavo kova vićinđa pe Čarls Tejz Rasel.

14. Sar e Raselese hem olese saradnikonenđe pomožinđa odova so disave manuša angleder olende istražinđe? (Dikh i slika.)

¹⁴ E Raselese hem olese saradnikonenđe but pomožinđa odova so disave manuša angleder olende istražinđe. Sar? Đi proučinđe i Biblija, šaj hine te koristinen o leksikonija, o konkordance (spisko ando biblijake stihija premalo važna lafija) hem avera prevodija andi Biblija kola hine len angleder so počminđe te istražinen. Isto ađahar, but pomožinđa lenđe odova so istražinđe o manuša sar soj tane o Henri Gru, o Džordž Stors hem avera. O phral o Rasel hem olese saradnikija, but pomožinđe ko odova te čistini pe o „Drumo andi svetost“, ađahar so objavinđe but knjige hem traktatija kola vaćerđe ando odova so sikavi i Biblija.

15. Kola važna događaja ulje ko 1919. berš?

¹⁵ Ko 1919. berš o Baro Vavilon više na hine le moć upro Devleso narodo. Ko odova berš, o Isus ćhivđa e „verno hem razborito robe“ kova pomožinđa e iskreno manušenđe te đan ko „Drumo andi svetost“ (Mat. 24:45-47). Sebepi i buti koja ćerđe disave verna manuša angleder, okola so počminđe te đan ko odova drumo šaj hine te sikljon pobuter ando Jehova hem andi olesi namera (Posl. 4:18). Isto ađahar, šaj hine te ćeren disave promene ko po životi te šaj te ćeren odova so o Jehova rodela olendar. Ama, o Jehova na očekujinđa ando po narodo kotar jekh puti te ćeren sa odola promene, već hari pohari. (Dikh o okvir „ O Jehova hari pohari čistini pe narodo“.) Kobor samo bahtale ka ova ked sare ka ćera o  buća kola hvalinena amare Devle! (Kol. 1:10).

16. Sar održini pe o „Drumo andi svetost“ kotar 1919. berš? (Isaija 48:17; 60:17)

¹⁶ Svako drumo valjani redovno te održini pe. Kotar 1919. berš ko „Drumo andi svetost“ pana ćerela pe buti hem odolese šaj but manuša te ikljon ando Baro Vavilon. O verno hem o razborito robo ko 1921. berš objavinđa jekh knjiga koja pomožinđa bute manušenđe te sikljon o ćaćipe andi Biblija. Odija knjiga vićinđa pe E Devlesi harfa hem hine objavimi ko šov milionija primerkija ko 36 ćhibja. But manuša upoznajinđe o ćaćipe prekali odija knjiga. Akana sigende ikljilji nevi publikacija, kolaja šaj te proučina i Biblija e manušencar hem oj vićini pe Ov bahtalo zauvek! Ko poslednja dive, e Jehovasi organizacija dela amen duhovno hrana koja pomožini amenđe te aćhova ko „Drumo andi svetost“. (Čitin Isaija 48:17; 60:17.)

17-18. Kaj legari o „Drumo andi svetost“?

¹⁷ Šaj te phena so svako ko počmini te proučini i Biblija isi le prilika te đal ko „Drumo andi svetost“. Disave manuša kratko đana ko odova drumo hem palo odova mukhena le. A disave tane odlučna te đan ko odova drumo sa đi na resena ko po cilj. Ama, kova tano olengo cilj?

¹⁸ Okolen so isi len nebesko nada, o „Drumo andi svetost“ legari ko „Devleso raj“ kova tano ko nebo (Otkr. 2:7). A okolen so isi len nada so ka živinen ki phuv, odova drumo legari đi i savršenost koja ka dobinen ko krajo andi Hiljadaberšengi vladavina. Ako tu avdije đaja ko odova drumo, ma irin tut palal, ma mukh odova drumo sa đi na reseja ko nevo sveto! Odolese, mangaja tuće phravdo drumo!