1. Ko so o Jehova podstaknini pe slugen? (Dikh i slika.)

 KO ŠAJ te del amen šukar savet hem ko šaj te utešini amen? O Jehova. Amen šaj te molina amen olese hem ov podstaknini amen te ćera odova. Ov mangela uvek te molina amen olese (1. Sol. 5:17). Ked god valjani te ana disavi odluka, amen šaj te roda lestar savet (Posl. 3:5, 6). Ov tano velikodušno Devel hem odolese na phenđa kobor putija šaj te molina amen olese, nego odova šaj te ćera ked god mangaja.

2. Sostar ka vaćera ko akava članko?

² I molitva tani jekh šužo poklon ando Jehova hem amen but ceninaja la. Ama podijekh puti, šaj te ovel pharo te arakha vreme te molina amen. Isto ađahar, šaj valjani amare molitve te oven pana pošukar. Ki Biblija isi savetija kola šaj te pomožinen amen te ćera odova. Ko akava članko ka razmotrina e Isuseso primer hem sar šaj sar oleste te arakha vreme te molina amen. Isto ađahar, ka dikha kola panđ buća ka pomožinen amen amare molitve te oven pana pošukar.

3. So o Isus đanđa andi molitva?

³ O Isus đanđa so amare molitve tane but važna e Jehovase. Angleder te avel ki phuv, ov dikhlja sar o Jehova uslišini o molitve ando pe verna sluge. Na primer, o Isus hine e Jehovaja ked uslišinđa e Anaki, e Davidesi hem e Ilijasi molitva (1. Sam. 1:10, 11, 20; 1. Kralj. 19:4-6;  Ps. 32:5). Sebepi odova, o Isus phenđa pe učenikonenđe često te molinen pe sose oleso Dad ka uslišini olenge molitve (Mat. 7:7-11).

4. So sikljovaja ando Isusese molitve?

⁴ O Isus aćhavđa amenđe baro primer ko odova sar valjani te molina amen e Jehovase. Ked hine ki phuv, ov često molinđa pe e Jehovase. O Isus but putija hine le buti hem uzo leste uvek hine manuša. Odolese, valjanđa te odvojini vreme te ovel kokri te šaj te molini pe (Mar. 6:31, 45, 46). Podijekh puti, uštinđa rano sabalje te šaj te ćerel odova (Mar. 1:35). Jekh puti, molinđa pe celo rat angleder te anel jekh važno odluka (Luka 6:12, 13). I rat angleder te merel, nekobor putija molinđa e Jehova te pomožini lese te ćerel o najpharo zadatko kova dobinđa (Mat. 26:39, 42, 44).

5. Sar šaj te oponašina e Isuse?

⁵ Kotar Isuseso primer sikljovaja so, kobor god te ovel amen buti, valjani redovno te molina amen. Sar o Isus, hem amen valjani te odvojina vreme asi molitva. Šaj te molina amen rano sabalje ja kasno raćate. Ađahar šaj te mothova kobor hijam zahvalna e Jehovase aso akava but šužo poklon. Amari phen koja vićini pe Lin, setini pe kobor hine zahvalno ked haljilji so šaj te molini pe e Jehovase. Oj phenela: „Ked haljiljum so šaj te vaćerav e Jehovaja ked god mangava, odova pomožinđa man te ovav pana popaše oleja hem mangljum me molitve te oven pana pošukar.“ Sigurno but amendar osetinena pe ađahar. Odolese, akana ka dikha panđ buća kola šaj te pomina ko amare molitve.

6. Premalo Otkrivenje 4:10, 11, soj tano o Jehova dostojno te primini?

⁶ Hvalin e Jehova. Ki jekh vizija, o apostol Jovan dikhlja sar 24 starešine služinena e Jehovase ko nebo. On hvalinena e Devle hem phenena soj tano dostojno te primini „i slava, i čast hem i moć.“ (Čitin Otkrivenje 4:10, 11.) Isto ađahar, hem o verna anđelija isi len but razlogija te hvalinen e Jehova. On tane oleja ko nebo hem but šukar đanena  savo tano. Dikhena sar mothovi pe osobine ko odova so ćerela. Ked dikhena sar postupini averencar, odova podstaknini len te hvalinen le (Jov 38:4-7).

7. Aso so šaj te hvalina e Jehova?

⁷ Isto ađahar, hem amen valjani te hvalina e Jehova ko amare molitve ađahar so ka phena lese so posebno sviđini pe amenđe koro leste hem sose poštujinaja le. Ked čitineja hem proučineja e Devleso Lafi, trudin tut te dikhe kola e Jehovase osobine posebno sviđinena pe tuće (Jov 37:23; Rimlj. 11:33). Tegani, vaćer lese odova ki molitva. Amen šaj te hvalina e Jehova hem odolese so pomožini amenđe hem sa amare phralenđe. Ov uvek brinini pe amendar hem štitini amen (1. Sam. 1:27; 2:1, 2).

8. Aso kola buća šaj te zahvalina amen e Jehovase? (1. Solunjanima 5:18)

⁸ Zahvalin tut e Jehovase. Ki molitva, amen šaj aso but buća te zahvalina amen e Jehovase. (Čitin 1. Solunjanima 5:18.) Odolese so svako šukar poklon avela olestar, amen šaj te zahvalina amen olese asi svako šukar buti koja isi amen (Jak. 1:17). Na primer, šaj te zahvalina amen asi šuži phuv hem aso šukar buća kola ćerđa amenđe. Isto ađahar, šaj te zahvalina amen lese so dinđa amen životi, porodica, amalen hem nada asi budućnost. Uzo odova, but hijam lese zahvalna so šaj te ova olese amala.

9. Sose valjani te trudina amen hem ponodri te ova zahvalna e Jehovase?

⁹ Sare amen valjani te trudina amen te razmislina aso so šaj te zahvalina amen e Jehovase. Živinaja ko sveto kuri o manuša nane zahvalna. But putija, o manuša samo razmislinena odolestar sar šaj te dobinen odova so valjani lenđe, a na ando odova sar šaj te mothoven soj tane zahvalna aso buća kola isi len. Ako počminaja te razmislina sar olende, tegani amare molitve ka oven sar jekh spisko kuri pisini samo odova so valjani amenđe. Odolese, te na avel đi odova, valjani hem ponodri te mothova kobor hijam zahvalna e Jehovase aso sa o buća kola ćerela amenđe (Luka 6:45).

10. Sar jekha phenjaće i zahvalnost pomožinđa te istrajini? (Dikh i slika.)

¹⁰ Ked isi amen pharipa, i zahvalnost šaj but te pomožini amen. Ki Stražarsko kula kotar 15. januar 2015. berš, tano mothovdo o iskustvo kotar amari phen Kjongsuk. O doktorija phenđe laće so isi la rak ko pluća. Oj phenela: „Hine maje but pharo ked phenđe maje odova. Hine man osećaj so sa našalđum hem but darandiljum.“ Ama, so pomožinđa laće te istrajini? Oj phenela so svako rat angleder te đal ko sojbe đelji ko krov ando po ćher hem ko glaso molinđa pe e Jehovase hem zahvalinđa pe lese aso panđ  šuže buća kola hine la odova dive. Odova pomožinđa laće te na brinini pe but hem podstakninđa la te phenel e Jehovase kobor mangela le. Oj haljilji kobor o Jehova pomožini pe slugenđe ked isi len bare pharipa hem odova pomožinđa laće te haljol so isi la pobuter blagoslovija nego pharipa. Sar i Kjongsuk, hem amen šaj te oven amen but razlogija te ova zahvalna e Jehovase, čak ked isi amen bare pharipa. Ked ki molitva phenaja e Jehovase kobor hijam lese zahvalna, odova pomožini amen te ovel amen mir hem te ova bahtale.

11. Sose e Isusese učenikonenđe valjanđa hrabrost palo odova so ov irinđa pe ko nebo?

¹¹ Rode e Jehovastar te pomožini tut te ove hrabro ki služba. Hari angleder te irini pe ko nebo, o Isus setinćerđa pe učenikonen so ka valjani te propovedinen „ko Jerusalim, ki celo Judeja hem Samarija, hem sa đi o najdur thana ki phuv“ (Dela 1:8; Luka 24:46-48). Hari palo odova, o jevrejska religiozna vođe ćhivđe ko phanlipe e Petare hem e Jovane hem legarđe len anglo Sinedrion. On zabraninđe lenđe te propovedinen hem čak pretinđe lenđe (Dela 4:18, 21). Sar reagujinđe o Petar hem o Jovan?

12. Premalo Dela apostolska 4:29, 31, so ćerđe o učenikija?

¹² Ked o jevrejska religiozna vođe zabraninđe lenđe te propovedinen, o Petar hem o Jovan phenđe: „Kokri dikhen da li tano ispravno anglo Devel te šuna tumen, a na e Devle. Amen našti, a te na vaćera ando odova so dikhljam hem so šunđam“ (Dela 4:19, 20). Ked o Petar hem o Jovan hine oslobodime ando phanlipe, o učenikija molinđe pe e Jehovase te del len snaga hem ponodri te ćeren olesi volja. On phenđe: „Pomožin te slugenđe hem ponodri hrabro te objavinen to lafi.“ O Jehova uslišinđa odija iskreno molitva. (Čitin Dela apostolska 4:29, 31.)

13. So šaj te sikljova ando amaro phral o Džinhjuk?

¹³ Amen šaj te oponašina e učenikonen ando prvo veko ađahar so ka propovedina, čak ako o vlastija zabraninena amenđe odova. Te dikha o primer ando Džinhjuk, amaro phral kova hine ko phanlipe sebepi i neutralnost. Đi hine ko phanlipe, oleso zadatko hine te brinini pe ando manuša kola hine ki samica. Ama, olese hine dozvolimo te vaćeri olencar samo ando buća kola olenđe valjani. Na hine lese dozvolimo te vaćeri olencar andi Biblija. Ov molinđa pe e Jehovase asi hrabrost hem mudrost te šaj te koristini svako prilika te vaćeri lenđe i šukar vest (Dela 5:29). Ov phenela: „O Jehova uslišinđa me molitve ađahar so dinđa man hrabrost hem mudrost. Odolese, šaj hine anglo udara kotar odola samice te počminav but kursija kola trajinđe samo panđ minutija. Đi hijum le ko phanlipe, raćate bi pisinava lila kola tajsato dive dinđum odole manušenđe.“ Hem amen šaj te ova uverime so o Jehova ka pomožini amen te ćera amaro zadatko. Sar o Džinhjuk, šaj te molina amen e Jehovase te del amen hrabrost hem mudrost.

14. So šaj te pomožini amenđe ked isi amen problemija? (Psalam 37:3, 5)

¹⁴ Molin tut e Jehovase te pomožini tut te istrajine ked isi tut pharipa. But amendar tane naborme ja isi len emocionalna  problemija. Disave našalđe nekas kas manglje, isi len disavi phari situacija ko ćher, doživinđe progonstvo ja disave avera problemija. I pandemija hem o maribe ćerđe akala problemija te oven pana pobare. Odolese, so šaj te ćere? Ćućar to vilo e Jehovase. Vaćer lese ti situacija ađahar sar so bi vaćereja te šukar amalese hem ov uverimo so o Jehova „ka pomožini tut.“ (Čitin Psalam 37:3, 5.)

15. Sar šaj i molitva te pomožini amen te istrajina ked isi amen problemija? Vaćer jekh primer.

¹⁵ Ako redovno molinaja amen, odova ka pomožini amenđe te istrajina ked isi amen problemija (Rimlj. 12:12). O Jehova đanela save problemija isi len olese sluge hem „šunela olengi vika hem izbavini len“ (Ps. 145:18, 19). Amari phen i Kristi isi la 29 berš hem služini sar pioniri. Oj kotar jekhvar but naborsalji hem sebepi odova pelji ki bari depresija. Hari palo odova, o doktorija phenđe laće so hem olaki daj tani but nabormi. I Kristi phenela: „Ando vilo molinđum man e Jehovase te del man snaga te šaj svako dive te istrajinav. Dinđum sa mandar te đav ko sastankija hem redovno te ovel man mo lično proučibe. I molitva pomožinđa man tegani ked hine maje but pharo. Đanđum so o Jehova tano uvek odothe hem so uvek ka utešini man. Iako o problemija me sastipaja pana na rešinđe pe, o Jehova uslišinđa me molitve hem dinđa man mir.“ Odolese, niked na valjani te bistra so o Jehova đanela „sar te ikali e manušen kola tane verna olese andi kušnja“ (2. Petr. 2:9).

16. Sose valjani amenđe e Jehovasi pomoć ked isi amen kušnje?

¹⁶ Molin tut e Jehovase te pomožini tut ked isi tut kušnje. Sar nesavršena manuša, amen svako dive borinaja amen odoleja te na ćera diso soj tano pogrešno.  Ama, o Satana dela sa pestar te ovel amenđe sa popharo. Jekh način sar ćerela odova tano ađahar so mangela te meljaćeri amari godi prekali nemoralno zabava. Sebepi odova šaj te ova melale anglo Jehova hem šaj lokho te ćera disavo ozbiljno greh (Mar. 7:21-23; Jak. 1:14, 15).

17. So valjani te ćera palo odova so molinđam amen e Jehovase asi pomoć? (Dikh i slika.)

¹⁷ Amenđe valjani e Jehovasi pomoć te borina amen te na ćera odova soj tano pogrešno. Ked o Isus sikavđa pe učenikonen sar te molinen pe, ov phenđa: „Ma mukh te pera ko iskušenje, nego cide amen ando Beng“ (Mat. 6:13). O Jehova mangela te pomožini amenđe. Ama, amen valjani te molina le aso odova. Palo odova, valjani te cida amen ando buća kola šaj te ćhiven amen te grešina. Uzo odova, valjani te trudina amen te na čitina ja te na šuna disave pogrešna razmišljanja kola tane popularna ko Bengeso sveto (Ps. 97:10). Amen šaj te phera amari godi šukar bućencar ađahar so ka čitina hem ka proučina e Devleso Lafi. Isto ađahar, redovno ka đa ko sastankija hem ki služba. Odola buća šaj te zaštitinen amari godi. O Jehova dela amen po lafi so na ka mukhel te ova iskušime pobuter odolestar so šaj te izdržina (1. Kor. 10:12, 13).

18. Ked vaćeri pe andi molitva, so valjani sare te ćera?

¹⁸ Sar niked angleder, svako amendar valjani te molini pe te aćhol verno e Jehovase ko akala poslednja dive. Odolese, odvojin vreme svako dive te moline tut e Jehovase. Ov mangela te „phrava lese amaro vilo“ (Ps. 62:8). Hvalin e Jehova hem zahvalin tut lese aso sa o buća kola dela tut. Molin tut olese te pomožini tuće te ove hrabro ki služba. Molin e Jehova te pomožini tut te istrajine ked isi tut problemija hem te ove odlučno te na grešine. Ma mukh nikase hem nisose te ćhinavi tut redovno te moline tut. Ama, sar o Jehova odgovorini ko amare molitve? Odolestar ka vaćera ko aver članko.