1-2. So podijekh puti šaj te puća amen?

 PUĆLJAN tut li nekad, da li o Jehova odgovorini ko te molitve? Ako ja, tegani na hijan jedino. Disave phralja hem phenja pućlje pe isto odova ked hine len disavo pharipe. Ked isi amen problemija, šaj tano hem amenđe pharo te dikha sar o Jehova odgovorini ko amare molitve.

² Akana ka dikha sose šaj te ova sigurna so o Jehova odgovorini ko amare molitve (1. Jov. 5:15). Isto ađahar, ka dobina odgovor ko duj pućiba: Sose podijekh puti šaj te dićhol pe amenđe so o Jehova na odgovorini ko amare molitve? Sar o Jehova avdije odgovorini ko amare molitve?

3. Sose o Jehova mangela te molina amen olese?

³ Ki Biblija pisini so o Jehova but mangela amen hem so hijam olese but vredna (Ag. 2:7; 1. Jov. 4:10). Sebepi odova, ov phenela amenđe te molina amen olese (1. Petr. 5:6, 7). Ov mangela te pomožini amen te aćhova uzo leste hem te istrajina ked isi amen problemija.

4. Sar đanaja so o Jehova odgovorini ko pe slugenge molitve? (Dikh i slika.)

⁴ But putija, ki Biblija šaj te čitina sar o Jehova odgovorinđa ko pe slugenge molitve. Da li avela tuće disavo primer ki godi? Aće te dikha o primer ando kralj David. Ov hine le bare dušmanija hem but putija molinđa pe e Jehovase te pomožini le. Jekhvar, ov phenđa e Jehovase: „Jehova, šun mi molitva, šun mi usrdno molitva. Šun man sose tu hijan verno hem pravedno“ (Ps. 143:1). O Jehova odgovorinđa ko olese molitve hem spasinđa le  (1. Sam. 19:10, 18-20; 2. Sam. 5:17-25). Odolese, o David šaj hine te phenel: „O Jehova tano paše uzo sa okola so rodena le.“ Hem amen šaj te ova sigurna so o Jehova hem amenđe ka pomožini (Ps. 145:18).

5. Da li o Jehova uvek odgovorinđa ko pe slugenge molitve ađahar sar so on očekujinđe? Vaćer jekh primer. (Dikh i slika.)

⁵ O Jehova šaj na ka odgovorini ko amare molitve ađahar sar so amen očekujinaja. Te dikha o primer ando apostol Pavle. Ov molinđa pe e Jehovase te cidel lestar „o karo ando telo“. O Pavle čak trin putija molinđa pe aso odova. Da li o Jehova odgovorinđa ko olese molitve? Ja, ama na ađahar sar so ov očekujinđa. Umesto te cidel lestar odova problemi, o Jehova dinđa le snaga te izdržini hem te aćhol lese verno (2. Kor. 12:7-10).

6. Sose disavo puti šaj te dićhol so o Jehova na odgovorini ko amare molitve?

⁶ Podijekh puti, hem amenđe šaj te dićhol so o Jehova na odgovorini ko amare molitve. Sose? Odolese so šaj na odgovorini amenđe ađahar sar so očekujinđam. Ama, ov đanela sar najšukar te pomožini amen. Ov šaj čak „te ćerel pobuter kotar sa so molinaja ja zamislinaja“ (Ef. 3:20). Odolese, šaj te ova sigurna so ka odgovorini ko amare molitve ko vreme hem ko način ko kova ni na očekujinaja.

7. Sose šaj ka valjani te menina odova aso so molinaja amen? Vaćer jekh primer.

⁷ Ked hari pošukar haljovaja e Jehovasi volja, šaj ka valjani te menina odova aso so molinaja amen. Te dikha o primer kotar amaro phral o Martin Pecinger. Hari palo odova so ženinđa pe, ov hine phanlo ko koncentraciono logor. Ki početka, ov molinđa pe e Jehovase te oslobodini le ando odova logor te šaj te brinini pe andi pi romni hem palem te propovedini. Ama, palo duj kurće, ov haljilo so o Jehova na ka oslobodini le odothar. Odolese, ov palem molinđa pe e Jehovase: „Jehova, molinava tut mothov maje so valjani te ćerav.“ Palo odova počminđa te razmislini ando avera phralja kola hine ko odova logor. But olendar sikirinđe pe aso pe ćhave hem pe romnja. Amaro phral o Pecinger tegani molinđa pe e Jehovase: „Jehova, hvala so dinđan man nevo zadatko. Pomožin  man te zorjaćerav hem te ohrabrinav e phralen.“ Amaro phral o Pecinger hine enja berš ko koncentraciono logor hem sa odova vreme ohrabrinđa e phralen.

8. Koja važno buti na valjani te bistra ked molinaja amen?

⁸ Amen na valjani te bistra so o Jehova isi le tačno odredimo vreme ked ka ispunini pi namera. Olesi namera tani te cidel sa amare problemija, sar soj tane o prirodna katastrofe, o nabormipa hem o meribe. O Jehova ka ispunini pi namera prekalo po Kraljevstvo (Dan. 2:44; Otkr. 21:3, 4). Ama, đi odova vreme na avela, ov dozvolini e Bengese te vladini (Jov. 12:31; Otkr. 12:9). b Ako bi o Jehova rešini sa e manušenge problemija akana, odova bi značini so o Beng šukar vladini. Ama, đi ađićeraja o Jehova te ispunini pe obećanja, amen na hijam kokri. Akana dikha sar o Jehova pomožini amenđe.

9. Sar šaj o Jehova te pomožini amenđe ked valjani te ana disavi odluka? Vaćer jekh primer.

⁹ Dela amen mudrost. O Jehova obećini amenđe so ka del amen mudrost ked valjani te ana disave odluke. Amenđe posebno valjani olesi mudrost ked valjani te ana odluke kola ka utičinen ko celo amaro životi, sar soj tane da li ka khuva ko brako ili na (Jak. 1:5). Te dikha o primer andi jekh phen koja vićini pe Marija. c Oj hine bahtali hem služinđa e Jehovase sar stalno pionir ked upoznajinđa jekhe phrale. Oj phenela: „So pobuter hijam le paše jekh jekheja, pana pobuter sviđinđam amen jekh jekhese. Đanđum so valjani te anav odluka. But molinđum man e Jehovase sebepi odova. Valjanđa maje e Jehovaso vođstvo, ama đanđum so o Jehova našti te anel odluka ko mo than.“ Oj haljilji so o Jehova odgovorinđa ko olake molitve hem dinđa la mudrost. Sar? Đi istražinđa ko amare publikacije, arakhlja nekobor člankija kola pomožinđe laće te arakhi odgovorija ko pe pućiba. Isto ađahar, but pomožinđa laće o savet kova dinđa la olaki daj te haljol so tačno osetini. Ko krajo, oj šaj hine te anel šukar odluka.

10. Premalo Filipljanima 4:13, sar o Jehova pomožini pe slugenđe? Vaćer jekh primer. (Dikh i slika)

¹⁰ Dela amen snaga te istrajina. Sar so pomožinđa e Pavlese, o Jehova hem amenđe šaj te del snaga te istrajina ko amare pharipa. (Čitin Filipljanima 4:13.) Te dikha sar o Jehova pomožinđa amare phralese e Bendžaminese, kova hine le bare pharipa. Jekh pobaro deo  ando po ternipe, ov hem olesi porodica živinđe ki Afrika sar izbeglice ko jekh kamp. O Bendžamin phenela: „Uvek molinđum man e Jehovase te del man snaga te ćerav odova soj tano šukar anglo olese jaćha. O Jehova odgovorinđa ko me molitve ađahar so dinđa man mir, hrabrost te propovedinav hem publikacije kola pomožinđe man te aćhovav duhovno zoralo.“ O Bendžamin pana phenela: „Ked čitinđum o iskustvija ando amare phralja hem phenja hem ked haljiljum sar o Jehova pomožinđa lenđe te istrajinen, odova podstakninđa man hem me ponodri te aćhovav lese verno.“

11-12. Sar o Jehova prekalo amare phralja hem phenja odgovorini ko amare molitve? (Dikh i slika.)

¹¹ Pomožini amen prekalo phralja hem phenja. Ki rat angleder te merel, o Isus usrdno molinđa pe e Jehovase. Ov molinđa e Jehova te na dozvolini te ovel osudimo sar neko ko na mothovi poštovanje premalo Devleso anav. Ama, o Jehova na ćerđa odova. Umesto odova, ov pomožinđa le ađahar so bićhalđa jekhe anđele te ohrabrini le (Luka 22:42, 43). O Jehova hem amen šaj te pomožini ađahar so ka podstaknini disave phrale ja phenja te vićini amen ili te avel koro amende. Svako amendar šaj te phenel dijekh „šužo lafi“ averenđe (Posl. 12:25).

¹² Hajde te dikha o primer andi amari phen i Mirijam. Nekobor kurće palo olake romeso meribe, oj hine kokri ćhere hem hine but tužno hem depresivno. But runđa hem hine la potreba te vaćeri nekasa. Oj phenela: „Na hine man snaga nikas te vićinav hem odolese molinđum man e Jehovase. Đi runđum hem molinđum man, mo telefoni zvoninđa. Tegani vićinđa man jekh starešina, amaro but šukar amal.“ Odova starešina hem olesi romni but ohrabrinđe la. Oj tani uverimi so o Jehova podstakninđa odole phrale te vićini la.

13. Vaćer jekh primer kova mothovi so o Jehova šaj te uslišini amare molitve prekalo manuša kola na služinena lese.

¹³ Pomožini amen prekalo manuša kola na služinena lese (Posl. 21:1). Podijekh  puti, o Jehova odgovorini ko amare molitve ađahar so podstaknini disave manušen kola na služinena lese te pomožinen amen. Na primer, ov podstakninđa e kralje kova vićinđa pe Artakserks te mukhel e Nemija te đal ko Jerusalim te pomožini te obnovini pe i diz (Nem. 2:3-6). Isto ađahar, hem avdije o Jehova šaj te podstaknini disave manušen kola na služinena lese te pomožinen amen.

14. Sar ohrabrini tut o iskustvo andi amari phen i Su Hing? (Dikh i slika.)

¹⁴ Amari phen koja vićini pe Su Hing, osetinđa sar o Jehova pomožinđa la prekalo jekh doktori. Olako ćhavo isi le nekobor mentalna poremećaja. Jekh puti, ov pelo hem ozbiljno povredinđa pe. Oj hem olako rom morandilje te aćhaven pi buti te šaj te brininen pe olestar. Odolese, on hine len finansijska problemija. I Su Hing phenđa so više na hine la snaga nisose. Phravđa po vilo e Jehovase hem rodinđa lestar pomoć. Palo disavo vreme, jekh doktori manglja te pomožini lenđe. Sebepi odova, dobinđe pomoć andi država hem than kaj šaj te živinen. Palo sa odova, i Su Hing phenela: „Dikhljam e Jehovaso vas ko amaro životi. Ov tano ćaće Devel kova ’šunela o molitve.‘“ (Ps. 65:2).

15. So pomožinđa jekha phenjaće te haljol so o Jehova odgovorini ko olake molitve?

¹⁵ O Jehova na odgovorini ko amare molitve ko disavo neobično način. Ama, ked odgovorini, ov dela amen baš odova so valjani amenđe te šaj te aćhova lese verna. Odolese, valjani te haljova sar o Jehova odgovorini ko amare molitve. Jekh phen koja vićini pe Joko, mislinđa so o Jehova na odgovorini ko olake molitve. Ki jekh sveska, pisinđa aso kola buća molinđa pe e Jehovase. Palo disavo vreme, dikhlja ki odija sveska hem haljilji so o Jehova odgovorinđa laće ko but molitve, čak hem ko okola kola oj bisterđa. Hem amen valjani te razmislina sar o Jehova odgovorini ko amare molitve (Ps. 66:19, 20).

16. Sar šaj te mothova vera ked tane ko pućibe amare molitve? (Jevrejima 11:6)

¹⁶ Amen mothovaja vera na samo ked molinaja amen e Jehovase, nego hem  ked prihvatinaja oleso odgovor ko amare molitve, bizo obzir savo tano. (Čitin Jevrejima 11:6.) Te dikha o primer ando phral o Majk hem olesi romni i Krisi. On hine len cilj te služinen ko Betel. O Majk phenela: „Beršencar dinđam molba aso Betel hem but molinđam amen e Jehovase aso amaro cilj, ama niked na hijam le vićime.“ O Majk hem i Krisi hine uverime so o Jehova đanela sar šaj ko najšukar način te koristini len. On dinđe sa pestar ki služba e Jehovase. Služinđe sar stalna pionirija uduri kaj hine pobari potreba hem pomožinđe ki gradnja. Akana tane ki putujućo služba. O Majk phenela: „O Jehova na odgovorinđa uvek ko amare molitve ađahar sar so očekujinđam. Ama, odgovorinđa amenđe ko pošukar način nego so šaj hine te zamislina.“

17-18. Premalo Psalam 86:6, 7, ko so šaj te ova uverime?

¹⁷ Čitin Psalam 86:6, 7. O David hine sigurno so o Jehova šunela hem odgovorini ko olese molitve. Amen isto šaj te ova sigurna ko odova. O primerija kola dikhljam ko akava članko, uverinena amen so o Jehova šaj te del amen mudrost hem snaga te istrajina. Isto ađahar, ov šaj te pomožini amen prekalo amare phralja hem phenja, čak hem prekalo manuša kola na služinena lese.

¹⁸ O Jehova na ka odgovorini ko amare molitve uvek ađahar sar so amen mangaja, ama šaj te ova sigurna so ov ka odgovorini amenđe. Ov ka del amen baš odova so valjani amenđe, ko vreme ked odova valjani. Odolese, valjani hem ponodri te molina amen hem te ova uverime so ov ka brinini pe amendar. Isto ađahar, šaj te ova sigurna so ko nevo sveto sarinenđe ka del odova so mangena (Ps. 145:16).