1. Save pharipa disave isi len?

 DA LI nekad hine tuće pharo te ispunine disavo duhovno cilj kova ćhivđan tuće? b Ako ja, na hijan jedino. Na primer, o Filip manglja olese molitve te oven pana pošukar hem te molini pe počesto. Ama, hine lese pharo te arakhi vreme aso odova. I Erika hine la cilj te resel ko vreme ko sastankija asi služba, ama skoro svako puti harinđa. O Tomaš nekobor puti probinđa te čitini celo Biblija. Ov phenela: „Te ovav iskreno, me na uživinđum đi čitinđum. Probinđum trin putija, ama na uspinđum. Svako puti bi resava đi i Levitska hem odothe bi ćhinavava.“

2. Sose na valjani te obeshrabrina amen ako isi amen disavo duhovno cilj kova pana na ispuninđam?

² Ako akana ćhivđan tuće disavo cilj hem na ispuninđan le, ma obeshrabrin tut. Ma bistri so hem aso disave tikne ciljija valjani vreme hem trud. Odova so mangeja te ispunine to cilj mothovi so cenineja to amalipe e Jehovaja hem so mangeja te de olese to najšukar. Naravno, ov na rodela amendar odova so našti te da le (Ps. 103:14; Mih. 6:8). Odolese, amaro cilj valjani te ovel razumno hem te da e Jehovase odova so ćaće šaj. Palo odova so ćhivđan tuće cilj, so šaj te ćere te ispunine le? Akana ka dikha disave predlogija.

3. Sose tani i želja but važno?

³ But tano važno te ovel amen bari želja te ispunina amare duhovna ciljija. Ked isi amen bari želja, tegani daja sa amendar  te ispunina len. Odija želja tani sar i bavlal koja phudela ko jedrija kola legarena o brodo. Ako i bavlal hem ponodri phudela, o mornari verovatno ka resel ko than kuri manglja. Ama, ako tani i bavlal zorali, tegani pana posig ka resel. Isto ađahar, soj tani amari želja pobari, najverovatno ka ispunina amare ciljija. Amaro phral o David ando Salvador, phenela: „Ked tu isi tut želja, tegani trudineja tut pana pobuter te ispunine te ciljija. Odolese, na mukheja nisose te ćhinavi tut te ispunine len.“ So šaj te ćere te ovel tut pana pobari želja te ispunine to cilj?

4. Aso so šaj te molina amen? (Filipljanima 2:13; dikh i slika.)

⁴ Molin tut e Jehovase te del tut želja te ispunine te ciljija. O Jehova prekalo po sveti duh šaj te del amen želja te ispunina amare ciljija. (Čitin Filipljanima 2:13.) Podijekh puti, amen šaj ćhivaja ciljija samo odolese so đanaja so valjani te ćera odova hem odova tano šukar. Ama, šaj nane amen bari želja te ispunina len. Ađahar hine hem amare phenjaja andi Uganda koja vićini pe Norina. Oj ćhivđa pese cilj te proučini nekasa i Biblija, ama na hine la bari želja te ispunini odova cilj odolese so mislinđa so nane šukar učitelj. So pomožinđa laće? Oj phenela: „Počminđum svako dive te molinav e Jehova te pomožini man te ovel man bari želja te proučinav nekasa i Biblija. Ko isto vreme, dinđum sa mandar te napredujinav sar učitelj. Palo nekobor masek, primetinđum so mi želja počminđa te barjol hem ko odova isto berš počminđum duj kursija.“

5. Sostar valjani te razmislina te šaj te ovel amen pana pobari želja te ispunina amare duhovna ciljija?

⁵ Razmislin ando odova so o Jehova ćerđa tuće (Ps. 143:5). O apostol Pavle razmislinđa ando bizaslužimo šukaripe kova o Jehova mothovđa lese hem odova podstakninđa le te del sa pestar olese ki služba (1. Kor. 15:9, 10; 1. Tim. 1:12-14). Isto ađahar, so pobuter razmislinaja ando odova so o Jehova ćerđa amenđe, pana pobari želja ka ovel amen te ispunina amare duhovna ciljija (Ps. 116:12). Te dikha so pomožinđa amare phenjaće koja živini ko Honduras te ispunini po cilj te služini sar stalni pionir. Oj phenela: „Razmislinđum odolestar kobor o Jehova mangela man. Ov pomožinđa man te upoznajinav olese narodo. Brinini pe mandar hem arakhi man. Ked razmislinava odolestar, mo mangipe premalo Jehova ovela pobaro hem isi man pana pobari želja te služinav sar stalno pioniri.“

6. So šaj pana te pomožini amen te ovel amen bari želja te ispunina disavo cilj?

⁶ Razmislin ando odova sar ka pomožini tuće odova so ka ispunine to cilj. Te dikha so pomožinđa e Erikaće, kola angleder pominđam, te ispunini po cilj te na harini ko sastankija asi služba. Oj phenela: „Haljijum so but buća našalava sose  harinava ko sastankija. Ako bi resava porano, šaj te pozdravinav man e phralencar hem phenjencar hem te vaćerav olencar. Tegani bi šunava sa o predlogija kolendar vaćeri pe hem odova bi pomožini maje te ovav pana pošukar ki služba.“ I Erika razmislinđa odolestar sose tano šukar te ovel tačno hem uspinđa te ispunini po cilj. Sostar tu valjani te razmisline? Na primer, ako ćhivđan tuće cilj redovno te čitine i Biblija hem te moline tut, razmislin kobor odova ka zorjaćeri to amalipe e Jehovaja (Ps. 145:18, 19). Ako ćhivđan tuće cilj te razvijine disavi osobina, razmislin kobor odova ka pomožini tuće te ovel tut pošukar odnos averencar (Kol. 3:14). Sose ko jekh lil ne bi pisineja sose mangeja te ispunine to cilj? Palo odova, redovno dikh odova lil. O Tomaš, kole angleder pominđam, phenela: „So pobuter razlogija isi man te ispuninav disavo cilj, pana pobuter ka dav sa mandar te ispuninav le.“

7. So pomožinđa e Hulijose hem olese romnjaće te ispuninen po cilj?

⁷ Družin tut okolencar kola ka ohrabrinen tut te ispunine te duhovna ciljija (Posl. 13:20). Te dikha so pomožinđa e Hulijose hem olese romnjaće te ispuninen po cilj te služinen odothe kuri tani pobari potreba. Ov phenela: „Družinđam amen okolencar kola ohrabrinđe amen te ispunina odova cilj hem vaćerđam olencar sar šaj te ćera odova. But olendar već ispuninđe but slična ciljija hem odolese šaj hine te den amen šukar predlogija sar šaj amen te ćera odova. Sar đelo o vreme, disavo puti pućlje amen sar napredujinena amare planija hem ohrabrinđe amen tegani ked valjanđa amenđe odova.“

8. Sose na valjani te trudina amen te ispunina amaro cilj samo ked isi amen želja? (Dikh i slika.)

⁸ Podijekh puti, nane amen želja te ispunina amaro cilj. Ama, da li odova značini so našti te ispunina le? Na. Aće jekh primer: I bavlal šaj te ovel but zorali hem šaj te legari o brodo đi o than kaj valjani. Ama, podijekh puti na phudela bavlal. Da li odova značini so o brodo našti te resel đi o than kaj valjani? Na. Na primer, ko disave brodija o mornarija koristinena o motorija ili o veslija te šaj te resen đi o than kuri valjani. Amari želja tani isto sar i bavlal. Podijekh puti isi amen bari želja te ispunina amaro cilj, a podijekh puti nane amen. Ama, ako trudinaja amen te ispunina amaro cilj samo ked isi amen bari želja, šaj niked na ka ispunina le. Tegani, so valjani te ćera? Sar so o mornarija arakhena načinija te resen uduri kaj pođinđe hem amen valjani te arakha načinija sar te ispunina amaro cilj, čak hem ked nane amen želja te ćera odova. Naravno, odova na ka ovel lokho, ama ako ka ispunina amaro cilj, ka ova but bahtale. Angleder te vaćera odolestar so šaj te ćera, te dikha kova pućibe šaj te pojavini pe.

9. Da li valjani hem ponodri te trudina amen te ispunina amare ciljija hem ked nane amen želja? Objasnin.

 ⁹ O Jehova mangela te ćera olesi volja hem te ova bahtale (Ps. 100:2; 2. Kor. 9:7). Ama, da li valjani hem ponodri te trudina amen te ispunina amare ciljija hem ked nane amen želja? Te dikha o primer ando apostol Pavle. Ov phenđa: „Kontrolišinava mo telo hem ićerava le te šunel man sar robo“ (1. Kor. 9:25-27). Čak ked na hine le želja te ćerel odova so o Jehova rodinđa olestar, o Pavle ćhivđa kokri pes te ćerel e Jehovasi volja. Da li o Jehova hine bahtalo ked o Pavle ćerđa odova? Naravno. O Jehova but blagoslovinđa le sose dinđa sa pestar te služini olese (2. Tim. 4:7, 8).

10. Sar ka pomožini amen odova so ka ispunina amaro cilj iako nane amen bari želja?

¹⁰ Isto ađahar, o Jehova tano bahtalo ked dikhela so amen trudinaja amen te ispunina amaro cilj, čak hem ked nane amen želja te ćera odova. Ov tano bahtalo odolese so đanela so amen, iako podijekh puti šaj na mangaja odova so ćeraja, amen ćeraja odova odolese so mangaja le. Sar so blagoslovinđa e Pavle, o Jehova hem amen ka blagoslovini odolese so trudinaja amen (Ps. 126:5). Ked osetinaja e Jehovaso blagoslov, tegani amari želja te ispunina amaro cilj ka ovel pobari. Jekh phen andi Poljska koja vićini pe Lucina, phenela: „Podijekh puti nane man želja te đav ki služba, posebno ked hijum umorno. Ama ked đava ki služba, i radost koja osetinava palo odova tani but bari.“ Hajde te dikha so šaj te ćera ked nane amen želja te ispunina amaro cilj.

11. Sar o Jehova šaj te pomožini amen te razvijina samokontrola?

¹¹ Molin tut asi samokontrola. I samokontrola tani sposobnost te kontrolišina amare osećanja hem odova so ćeraja. Odova so prvo avela amenđe ki godi tano so akija osobina ćhinavi amen te ćera diso soj tano lošno. Ama, i samokontrola šaj te podstaknini amen te ćera odova soj tano šukar, posebno ked isi amen disavo pharo zadatko ja ked nane amen želja te ćera le. Ama ma bistri so i samokontrola tani plod ando duho. Odolese molin tut e Jehovase te pomožini tut te šaj te barjaćere akija osobina (Luka 11:13; Gal. 5:22, 23). O David, kolestar angleder vaćerđam, phenela kobor pomožinđa lese i molitva. Ov manglja redovno te ovel le lično proučibe. Ov phenela: „Molinđum man e Jehovase te pomožini man te razvijinav akija osobina. Uzi Jehovasi pomoć, šaj hine te ćerav maje šukar raspored hem te ićerav man ko odova.

12. Sar o načelo ando Propovednik 11:4 pomožini amen te ispunina amare ciljija?

¹² Ma ađićer te oven tut savršena okolnostija. Ko akava sveto, našti te očekujina savršena okolnostija. Ako ađićeraja len, šaj niked nane te ispunina amare ciljija. (Čitin Propovednik 11:4.) Jekh phral kova vićini pe Daniel, phenela: „Na postojinena savršena okolnostija. Odolese na valjani te ađićera, već samo valjani te počmina te ćera ko amare ciljija.“ Jekh aver phral andi Uganda kova vićini pe Pol vaćeri pana jekh razlog sose na valjani te ađićera. Ov phenela: „Ked počminaja te ispunina amaro cilj, iako nane amenđe lokho, tegani daja e Jehovase diso so šaj te blagoslovini“ (Mal. 3:10).

13. Sose tano šukar ako najangleder ćhivaja amenđe tikne ciljija?

¹³ Počmin ando tikne buća. Šaj nane amen želja te ispunina amaro cilj odolese so izgledini amenđe soj tano but pharo. Ako hem tu ađahar osetineja tut, sose ne bi to cilj podelineja ko nekobor tikne ciljija? Na primer, ako isi tut cilj te razvijine disavi  osobina, sose ne bi počmineja te mothove la ko disave tikne buća? Ako isi tut cilj te čitine celo Biblija, sose ne bi ki početka odvojineja samo nekobor minutija aso odova? E Tomašese, kole pominđam ki početka, hine but pharo te čitini i Biblija jekhe beršese. Ov phenela: „Haljiljum so odova raspored hine maje but pharo. Odolese odlučinđum palem te počminav, ama akava puti hine man cilj svako dive te čitinav samo nekobor stihija hem te razmislinav olendar. Sar đelo o vreme, počminđum te uživinav ko odova.“ Odolese, o Tomaš počminđa te odvojini pobuter vreme aso čitibe hem ko krajo uspinđa te čitini celo Biblija. c

14. So šaj te ćhinavi amen te ispunina amare ciljija?

¹⁴ Nažalost, kobor god bari želja te ovel amen ili kobor god te ova disciplinovana, ipak šaj diso te ćhinavi amen. Na primer, odova šaj te oven o „događaija kola na očekujinaja“ kola šaj te len amaro vreme (Prop. 9:11). Šaj isi amen disavo pharipe sebepi kova hijam obeshrabrime hem kova lela amari snaga (Posl. 24:10). Isto ađahar, sebepi so hijam nesavršena šaj te ćera disave greške kola šaj te ćhinaven amen te ispunina amare ciljija (Rimlj. 7:23). Ili šaj hijam samo umorna (Mat. 26:43). So šaj te pomožini amenđe te ikljova ko krajo akale problemencar?

15. Sose na valjani te odustajina ako diso ćhinavi amen te ispunina amaro cilj? Objasnin. (Psalam 145:14)

¹⁵ Ako isi diso so ćhinavi tut te ispunine te duhovna ciljija, odova na značini so valjani te odustajine. Ki Biblija pisini so ka ovel amen problemija. Ama, uzi Jehovasi pomoć amen šaj te ispunina amare ciljija iako isi amen problemija. (Čitin Psalam 145:14.) O Filip, kolestar angleder vaćerđam, phenela: „Me na razmislinava odolestar kobor puti na uspinđum te ispuninav  mo cilj, nego ando odova ked palem počminđum te trudinav man te ispuninav le.“ O David, kolestar vaćerđam angleder, phenela: „Ked disavo puti na ispuninđum mo cilj ko odova na dikhljum sar neuspeh, nego sar prilika te mothovav kobor mangava e Jehova.“ Ked daja sa amendar te ispunina amaro cilj, iako nane amenđe lokho, tegani mothovaja so mangaja te radujina e Jehova. Ov tano but bahtalo ked dikhela so amen trudinaja amen te ispunina amaro cilj.

16. So šaj te sikljove ando odova so ćhinavđa tut te ispunine te ciljija?

¹⁶ Sikljov ando odova so ćhinavđa tut te ispunine te ciljija. Razmislin odolestar so ćhinavđa tut te ispunine to cilj hem puć tut: „Da li šaj diso te ćerav te na avel palem đi odova?“ (Posl. 27:12). Ama, ako disavo puti našti te ispunina amaro cilj, odova šaj te mothovi amenđe soj tano but baro. Ako hem tu ađahar osetineja tut, tegani valjani palem te razmisline ando to cilj hem te dikhe da li ćaće šaj te ispunine le. d Ama, ako našti, odova na značini so tu na vredineja anglo Jehovase jaćha (2. Kor. 8:12).

17. Sose na valjani te bistra odova so đi akana ćerđam?

¹⁷ Ma bistri odova so đi akana ćerđan. Ki Biblija pisini: „O Devel nane nepravedno te bistrel odova so ćerđan“ (Jevr. 6:10). Odolese, ni amen na valjani te bistra odova. Razmislin ando buća kola đi akana ćerđan – uljan paše e Jehovaja, propovedineja averenđe hem krstinđan tut. Sar so ispuninđan akala ciljija, ađahar šaj te ispunine hem o ciljija kola akana isi tut (Fil. 3:16).

18. So na valjani te bistra đi trudinaja amen te ispunina amaro cilj? (Dikh i slika.)

¹⁸ Sar so o mornari resela đi po cilj, uzi Jehovasi pomoć hem tu šaj te ispunine te ciljija. Ama, ma bistri so but mornarija uživinena đi putujinena. Isto ađahar, uvek trudin tut te dikhe sar o Jehova pomožini tut te ispunine to cilj, hem odova ka ćerel tut but bahtalo (2. Kor. 4:7). Ako na odustajineja, ka dobine bare blagoslovija (Gal. 6:9).