SARE amen mangaja avera te dikhen amen sar šukar manuša. Ama, avdije tano but pharo te ove šukar. But manuša tane „bizo mangipe premalo šukaripe“ (2. Tim. 3:3). On kokri phenena soj tano šukar, a soj tano lošno hem but puča avela dži odova „e lošnipase phenena soj tano šukar, a e šukaripase phenena soj tano lošno“ (Isa. 5:20). Uzo odova, sarinen amen mučinena amare mane hem o buča kola čerdžam angljeder. Šaj osetinaja amen sar i En *, koja služini e Jehovase beršencar. Oj phenela: „Pana maje pharo kokri man te dikhav sar šukar manuš.“

Ama, sare amen šaj te ova šukar manuša. O šukaripe tano plod ando e Devljeso sveto duho. A oljeso duho tano pozoralo ando sa so šaj te čhinavi amen te ova šukar, bilo odova te ovel disavo uticaj kotar avera ja amen kokri. Ajde te dikha soj tano o šukaripe hem te sikljova sar šaj akija osobina te mothova la pana pošukar.

O šukaripe tani osobina koja mothovi so o manuš ičeri pe ko načelija hem so ano odova manuš nane ništa soj tano rumimo. O šukar manuš uvek dikhela sar šaj te pomožini averendže.

Sigurno dikhljan so neko viljeja čerela šukar buča pe porodicače hem pe amaljendže, ama da li te čerel pe šukaripe odnosini pe samo ko odova? Džandžola pe, niko amendar našti te ovel uvek ko sa šukar. I Biblija phenela so „nane ki Phuv pravedno manuš kova čerela samo šukar hem niked na grešini“ (Vač. 7:20). Hem o apostol Pavle iskreno priznajindža: „Džanava so ano mande, ko moklo telo, nane ništa šukar“ (Rim. 7:18). Odoljese, ako mangaja te barjačera akija osobina valjani te roda pomoć kotar Jehova.

O Jehova tano najšukar primer ando šukaripe. I Biblija oljese phenela: „Tu hijan šukar hem šukar čereja. Sikav man teklje zakonija“ (Ps. 119:68). Ajde te dikha duj buča ando e Jehovaso šukaripe koljendar vačeri pe ko akava stiho.

O Jehova tano šukar. O šukaripe tano deo kotar e Jehovasi ličnost. Razmislin odoljestar so ulo ked o Jehova vačerdža e Mojsijese: „Ka čerav sa moklo šukaripe te nakhel anglo toklo muj.“ Dži dikhlja e Jehovasi slava – isto adžahar hem oljeso šukaripe – o Mojsije šundža akala lafija: „Jehova, Jehova, Devel soj tano milostivo hem saosećajno, na holjani sigate, pherdo tano šukaripaja hem čačipaja, kova arakhi piklji milost e hiljadendže, oprostini o prestupija, i krivica hem o greh, ama nikas na oslobodini andi kazna“ (2. Moj. 33:19; 34:6, 7). Ando odova šaj te haljova so o Jehova tano šukar ko sa. Iako nijekh manuš na hine pošukar ando Isus, ov phendža: „Niko nane šukar, osim o jedino Devel“ (Luka 18:19).

E Jehovase delija tane šukar. O šukaripe dikhela pe ko sa so o Jehova čerela. I Biblija phenela: „O Jehova tano šukar premalo sare, hem o milosrđe oljeso tano upro sa odova so čerdža“ (Ps. 145:9). Odoljese so o Jehova tano šukar hem na dikhela koj tano ko, ov dela e manušendže o dživdipe hem sa so valjani oljendže (Čer. 14:17). Isto  adžahar, oljeso šukaripe dikhela pe hem ked oprostini amendže. O psalmista pisindža: „Tu, Jehova, hijan šukar hem spremno hijan te oprostine“ (Ps. 86:5). Amen šaj te ova sigurna so „o Jehova na ka čhinavi nijekh šukaripe okoljendže kola verno živinena“ (Ps. 84:11).

O Jehova čerdža amen te ova sar ov. Odova značini so šaj te ova šukar manuša hem te čera šukar buča (1. Moj. 1:27). Ama, akava našti te ovel kotar jekhvar. O Jehova phenela amendže te sikljova te čera odova soj šukar (Isa. 1:17). Ama, sar šaj amen te sikljova te čera odova soj šukar? Ka dikha trin načinja.

Sar prvo, šaj te molina amen te ovel amen sveti duh, kova šaj te pomožini amen te ova čače šukar manuša (Gal. 5:22). E Devljeso duho šaj te pomožini amen te manga odova soj šukar hem te mrzina odova soj lošno (Rim. 12:9). I Biblija phenela so o Jehova šaj te zorjačeri pe slugen „ko sa odova so čerena šukar hem so vačerena“ (2. Sol. 2:16, 17).

Sar dujto, valjani te čitina e Devljeso Lafi. Ako čitinaja i Biblija, o Jehova ka pomožini amen te haljova „sa soj tano ko drumo e šukaripaso“ hem te ova spremna te čera „svako šukar buti“ (Godž. 2:9; 2. Tim. 3:17). Amaro vilo tano sar jekh barvalo than (riznica). Ked čitinaja i Biblija hem hor razmislinaja ando odova so čitindžam, amen pheraja amaro vilo šukar bučencar ando Devel hem andi oljesi namera. Palo odova, akala šukar buča ka pomožinen amen (Luka 6:45; Efe. 5:9).

Sar trito, amen daja sa amendar te oponašina „okova soj tano šukar“ (3. Jov. 11). Ki Biblija isi manuša koljengo primer šaj te oponašina. Džandžola pe, o najšukar primerija tane o Jehova hem o Isus. Ama, šaj te razmislina hem averendar kola hine pendžarde sar šukar manuša. Duj oljendar hine i Tavita hem o Varnava (Čer. 9:36; 11:22-24). Ako proučinaja so i Biblija phenela oljendar, but ka sikljova. Šaj te dikha kola buča on čerdže te pomožinen averen. Dži proučineja, razmislin so tu šaj te čere te pomožine nekase ki ti porodica ja ki ti skupština. Isto adžahar, dikh kola šukar buča ulje e Tavitače hem e Varnavese odoljese so hine šukar premalo avera. Hem tu šaj odova te doživine.

Isto adžahar, amen šaj te razmislina ando manuša kola avdije čerena odova soj šukar. Na primer, razmislin ando starešine kola mangena o šukaripe hem but žrtvujinena pe e skupštinače. Na valjani te bistra ni e verno phenjen kola pe lafencar hem odoljeja so čerena sikavena „averen  odova soj tano šukar“ (Tit. 1:8; 2:3). I phen koja vičini pe Roslin phenela: „Mi amaljin but trudini pe te pomožini averen ki skupština hem te zorjačeri ljen. Oj razmislini ando oljenge okolnostija hem but puča dela ljen nesavo tikno poklon ja pomožini ljen ko odova so valjani oljendže. Maje oj tani čače šukar manuš.“

O Jehova podstaknini amen te roda načinja te čera odova soj šukar (Am. 5:14). Ako čeraja adžahar, amen na samo so ka manga oljese merilija, nego ka ovel amen pobari želja te čera odova soj šukar.

Te šaj te čera šukar buča na valjani te čera diso baro ja te čina diso skupo. Te uporedina odova jekha luludža: Te šaj i luludi te barjol, na valjani kotar jekhvar te čhora but pani, nego više puča te čhora pohari pani. Isto adžahar, ako amen čeraja nesave tikne buča averendže odova ka mothovi so hijam šukar.

I Biblija dela amen savet te ova spremna te čera odova soj šukar (2. Tim. 2:21; Tit. 3:1). Ako zapazinaja so valjani averendže, tegani ka arakha načinja te pomožina amare pašutnese „ko odova soj šukar te zorjačeri pe“ (Rim. 15:2). Možda ka da lje diso soj amaro (Godž. 3:27). Na primer, šaj džikas te vičina ko disavo habe ja te beša hem te vačera diso so šaj te zorjačeri amen. Ako tano neko nabormo, šaj te pisina ljese, te dža koro ljeste ja te vičina lje. Isi but načinja sar šaj nekas te zorjačera amare lafencar ja odoljeja so čeraja (Efe. 4:29).

Isto sar o Jehova, hem amen mangaja te čera odova soj šukar sarinendže. Odoljese amen na dikhaja koj tano ko. Najšukar način te mothova odova tano ked sarinendže vačeraja o šukar haberi ando Devljeso Kraljevstvo. Sar so o Isus phendža, amen mangaja te čera odova soj šukar hem premalo okoljende kola na mangena amen (Luka 6:27). Niked nane lošno te ova šukar premalo avera, odoljese so „protiv akava nane zakon“ (Gal. 5:22, 23). Disavo puti o manuša šaj te ponašinen pe lošno premalo amende ja amen šaj te oven amen problemija. Ama, ako amen hijam šukar premalo ljende, tegani odova šaj te pomožini ljen on te oven paše e Devljeja (1. Petr. 3:16, 17).

I Biblija phenela so o šukar manuš uživini ko odova so čerdža (Godž. 14:14). Ko so uživini? Na primer, ked amen hijam šukar premalo avera hem on ka oven šukar premalo amende (Godž. 14:22). Ama, čak ked avera na ponašinena pe premalo amende šukar, amen valjani te ova šukar premalo oljende. Odoljese on šaj te meninen po stav hem te oven pošukar premalo amende (Rim. 12:20).

But manuša phenena soj tano korisno te mothova šukaripe hem te na čera lošnipe. Na primer, jekh phen koja vičini pe Nensi phenela: „Ked hijum lje poterni nikastar hem nisostar na brinindžum man, hijum lje nemoralno hem nikas na poštujindžum. Ama, ked sikljiljum kola tane e Jehovase merilija ando odova soj tano šukar hem ked ičerdžum man ko odova, me uljum pobahtalji. Akana kokri man poštujinava.“

Najbaro razlog sose te barjačera o šukaripe tano odova so adžahar ka čera e Jehova bahtalo. Čak hem ako avera na dikhena so čeraja, o Jehova dikhela. Ov džanela svako puti ked amen čeraja šukar buča hem šukar razmislinaja (Efe. 6:7, 8). So ka anel amendže odova? „O šukar manuš isi lje e Jehovaso odobravanje“ (Godž. 12:2). Odoljese mangaja te da sa amendar te barjačera odija osobina, sose o Jehova dela amen po lafi: „A i slava, i čast hem o mir adžičeri svakone kova čerela okova soj tano šukar“ (Rim. 2:10).