1. Premalo Matej 24:9, sose na valjani te ova iznenadime ked o manuša mrzinena amen?

O JEHOVA stvorinđa amen te manga averen, hem avera te mangen amen. Odolese, ked neko mrzini amen, odova šaj but te dukhal amen. Hem šaj te ćhivel amen te dara. Na primer, i phen koja vićini pe Georgina, hem koja živini ki Evropa, phenela: „Ked hine man 14 berš, mi daj mrzinđa man sebepi so služinava e Jehovase. Sebepi odova, hijum le but tužno hem osetinđum man so hijum kokri hem čak počminđum te mislinav so na hijum šukar osoba.“ * O phral kova vićini pe Danilo, pisini: „Ked o vojnikija khuvđe man, vređinđe man hem pretinđe maje sebepi so hijum e Jehovaso svedoko, but darandiljum hem osetinđum man poniženo.“ Ked o manuša mrzinena amen, odova dukhala. Ama, amen na hijam iznenadime sose o Isus phenđa so o manuša ka mrzinen amen. (Čitin Matej 24:9.)

2-3. Sose o manuša ko sveto mrzinena e Isusese učenikonen?

² O sveto mrzini e Isusese učenikonen, sose sar o Isus, hem amen „na hijam deo ando akava sveto“ (Jov. 15:17-19). Iako poštujinaja o vlastija, amen na mešinaja amen ki politika, na pozdravinaja i zastava hem na đilabaja i himna. Amen služinaja samo e Jehovase. Amen podržinaja e Jehovaso pravo te vladini iako o Beng hem oleso „potomstvo“ phenena so o Jehova nane le pravo te vladini (Post. 3:1-5, 15). Amen propovedinaja so jedino e Devleso Kraljevstvo ka rešini sa e manušenge problemija hem so pana hari odova Kraljevstvo ka cidel sa okolen kola protivinena pe olese (Dan. 2:44; Otkr. 19:19-21).  Odija vest tani šukar e krotko manušenđe ama nane šukar e lošnonenđe (Ps. 37:10, 11).

³ Isto ađahar, o manuša ko sveto mrzinena amen sebepi so amen živinaja premalo e Devlese zakonija. Odova so o Devel phenela soj tano šukar a soj tano lošno, but razlikujini pe ando odova so o manuša ko sveto phenena soj tano šukar a soj tano lošno. Na primer, đanaja so angleder, o Devel uništinđa e manušen ko Sodom hem i Gomora sebepi o nemoralna postupkija kola ćerđe (Jud. 7). Avdije, aso odola slična postupkija, o manuša na mislinena soj tane pogrešna. Sebepi so amen ko asavke nemoralna postupkija dikhaja isto sar o Devel, o manuša asana amenđe hem phenena so hijam but stroga (1. Petr. 4:3, 4).

4. Kola osobine šaj te pomožinen amen ked avera mrzinena amen?

⁴ So šaj te pomožini amen ked o manuša mrzinena amen hem ked vređinena amen? Amenđe valjani zorali vera ko odova so o Jehova ka pomožini amen. Sar o štit, amari vera šaj te „aćhavi sa e Lošnonese strele so thabljona“ (Ef. 6:16). Ama, uzi vera, amenđe valjani hem o mangipe. Odolese so o mangipe „na holjani sigate, sa podnosini hem sa trpini“ (1. Kor. 13:4-7, 13). Akana ka dikha, sar o mangipe premalo Jehova, premalo amare phralja hem phenja hem čak premalo amare neprijateljija, pomožini amenđe te istrajina ked avera mrzinena amen.

5. Sar o mangipe kova o Isus hine le premalo po Dad, pomožinđa lese?

⁵ I rat angleder olese neprijateljija te mudaren le, o Isus phenđa pe učenikonenđe: „Mangava me Dade, [odolese]... ćerava baš ađahar sar so mo Dad zapovedinđa maje“ (Jov. 14:31). O mangipe kova o Isus hine le premalo Jehova, pomožinđa lese te istrajini ko sa o pharipa kola hine anglo leste. Isto ađahar, hem amaro mangipe premalo Jehova, ka pomožini amenđe te istrajina ko amare pharipa.

6. Premalo Rimljanima 5:3-5, sar e Jehovase sluge dikhena ko odova so o manuša ko sveto mrzinena len?

⁶ O mangipe premalo Devel, uvek pomožinđa e Jehovase slugenđe te istrajinen ked tane progonime. Na primer, ked o jevrejsko vrhovno sud naredinđa e apostolenđe te ćhinaven te propovedinen, o mangipe podstakninđa len „e Devle sar vladare te šunen, a na e manušen“ (Dela 5:29; 1. Jov. 5:3). Asavko mangipe, hem avdije pomožini amare phralenđe hem e phenjenđe te aćhon verna, ked o moćna hem o okrutna vlastija progoninena len. Ked o manuša mrzinena amen, amen na hijam obeshrabrime. Amen hijam bahtale. (Dela 5:41; čitin Rimljanima 5:3-5.)

7. Sar valjani te reagujina ked neko andi amari porodica protivini pe amenđe?

⁷ Jekh andi najbari kušnja amenđe šaj te ovel ked neko andi amari porodica, protivini pe amenđe. Ked on dikhena so amen mangaja te sikljova ando Jehova, disave šaj te mislinen so hijam prevarime. Avera šaj te phenen so dilindiljam (Uporedin e stihoja ando Marko 3:21). A disave čak šaj te oven nasilna premalo amende. Ama, asavki reakcija na valjani te iznenadini amen, sose o Isus phenđa: „E manušese neprijateljija ka oven olese ćherutne“ (Mat. 10:36). Ama bizo obzir ko odova sar amare rođakija dikhena upro amende, amen na mrzinaja len. Umesto odova, sar so amaro mangipe premalo Jehova barjola, ađahar hem amaro mangipe premalo manuša ka ovel sa pobaro (Mat. 22:37-39). Ama, amen niked na ka ćhinava te ićera amen ko e Devlese zakonija hem načelija samo te šaj te ugodina e manušenđe.

8-9. So pomožinđa jekha phenjaće te aćhol zorali iako doživinđa but baro progonstvo?

⁸ I Georgina kolatar vaćerđam angleder, uspinđa te aćhol zorali iako olaki daj but protivinđa pe olaće. I Georgina phenela: „Mi daj  hem me zajedno počminđam te proučina i Biblija e Jehovase svedokonencar. Ama, šov masek palo odova, ked mangljum te počminav te đav ko sastankija, me dajako stav but promeninđa pe. Oj šunđa odova so o otpadnikija vaćerđe hem koristinđa olenge hovavne sikljoviba đi vaćerđa mancar. Isto ađahar, oj bi vređini man, bi cidela me bala, bi tasavi man hem bi fordela o publikacije kola hine man. Palo odova so pherđum 15 berš, me krstinđum man. Mi daj pokušinđa te ćhinavi man te služinav e Jehovase ađahar so ćhivđa man ko jekh Dom aso problematična ćhave. Disave ando odola ćhave, uduri drogirinđe pe hem ćerđe razna lošna buća. But tano pharo te istrajine ked protivini pe tuće neko ko valjani te mangel tut hem te brinini pe tutar.“

⁹ So pomožinđa akala phenjaće te istrajini? I Georgina phenela: „Odova dive ked mi daj počminđa te protivini pe maje, me završinđum o čitibe andi celo Biblija. Hijum le potpuno uverimi so arakhljum o pravo ćaćipe hem osetinđum so hijum but paše e Jehovaja. But putija molinđum man olese hem ov šunđa me molitve. Ði živinđum ko odova dom, jekh phen vićinđa man koro peste ćhere. Amen duj hor proučinđam e Devleso Lafi. Ði trajinđa sa odova, o phralja hem o phenja andi skupština, but zorjaćerđe man. On ćerđe te osetinav man so hijum deo ando olenge porodice. Tegani dikhljum so o Jehova tano pozoralo ando amare protivnikija, bizo obzir ko odova koj tane on.“

10. Ko so šaj te ova uverime ked isi amen problemija?

¹⁰ O apostol Pavle pisinđa so ništa našti te ulavi amen ando „e Devleso mangipe kova ov mothovi amenđe prekalo Hrist Isus, amaro Gospod“ (Rimlj. 8:38, 39). Iako disavo vreme šaj isi amen but problemija, o Jehova uvek ka ovel uzo amende te utešini amen hem te zorjaćeri amen. Hem sar so mothovi amenđe o primer andi phen Georgina, isto ađahar, o Jehova ka pomožini amenđe prekalo amare phralja hem phenja andi skupština.

11. Sar o mangipe kolestar o Isus vaćerđa ko Jovan 15:12, 13, pomožinđa olese učenikonenđe? Vaćer jekh primer.

¹¹ I rat angleder te merel, o Isus podstakninđa pe učenikonen te mangen jekh jekhe. (Čitin Jovan 15:12, 13.) Ov đanđa so o samopožrtvovano mangipe ka pomožini lenđe te aćhon ko jekhipe hem te istrajinen iako o manuša ko sveto ka mrzinen len. Te dikha o primer  ando phralja hem phenja ko Solun. Pana kotar o vreme ked i skupština ko Solun hine osnujimi, on hine progonime. Ama, sebepi so odola phralja hem phenja mothovđe vernost hem mangipe, on ulje amenđe baro primer (1. Sol. 1:3, 6, 7). O Pavle ohrabrinđa len hem ponodri te mothoven mangipe, čak „te ćeren odova pana pobuter“ (1. Sol. 4:9, 10). O mangipe bi podstaknini len te tešinen okolen soj tane obeshrabrime hem te pomožinen okolenđe kola tane slaba (1. Sol. 5:14). On ićerđe pe ko odova e Pavleso savet hem odolese ked o Pavle pisinđa po dujto lil, jekh berš palo odova, ov šajinđa te phenel olenđe: „O mangipe kova osetinena jekh premalo aver tano sa pobaro“ (2. Sol. 1:3-5). Olengo mangipe pomožinđa lenđe te istrajinen ko pharipa hem ko progonstvo.

12. Ði hine o maribe ki jekh phuv, sar o phralja hem o phenja mothovđe so mangena jekh jekhe?

¹² Hajde te dikha o primer ando Danilo kolestar vaćerđam angleder hem andi olesi romni. Ked ki olengi diz hine maribe, on hem ponodri đelje ko sastankija, propovedinđe kobor god šajinđe hem i hrana koja hine len, delinđe pe phralencar hem e phenjencar. Ama jekh dive, o naoružana vojnikija alje ko e Daniloso ćher. O Danilo phenela: „On rodinđe mandar te odrekninav man kotar mi vera. Ked odbinđum, on marđe man hem ćerđe pe so ka pucinen upro mande, ama, pucinđe upre. Ked pođinđe, pretinđe so ka irinen pe te silujinen me romnja. O phralja sigate ćhivđe amen ko voz te đa ki aver diz. Niked na ka bistrav o mangipe kova mothovđe odola phralja. Ked resljam ki aver diz, o phralja uduri dinđe amen hrana hem pomožinđe amenđe te arakha o stani hem i buti. Sebepi odova, amen šajinđam te primina avere phralen kola našlje ando maribe.“ Asavke iskustvija mothovena amenđe so o mangipe kova isi amen maškaro amende, pomožini amenđe te istrajina ked avera mrzinena amen.

13. Sar o sveti duh pomožini amen te istrajina đi služinaja e Jehovase čak ked o manuša mrzinena amen?

¹³ O Isus phenđa pe učenikonenđe te mangen pe neprijateljen (Mat. 5:44, 45). Odova nane lokho te ćera, ama sebepi so e Devleso sveti duh pomožini amen, amen šaj odova te ćera. Ko plod ando sveti duh tane o osobine sar soj tane, o mangipe, o strpljenje, i ljubaznost, i blagost hem i samokontrola (Gal. 5:22, 23). Odola osobine pomožinena amenđe te istrajina ked avera mrzinena amen. But  manuša kola angleder protivinđe pe, menjinđe po stav ked dikhlje sar olengi romni, sar olengo rom, ćhavo, ćhaj ja komšije, mothovena akala šukar osobine. But olendar ulje amare phralja hem phenja. Ako tano tuće pharo te mange okolen kola mrzinena tut sebepi so služineja e Jehovase, tegani molin tut aso sveti duh (Luka 11:13). Hem ov uverimo so jekh andi najšukar buti so šaj te ćere tani uvek te šune e Devle (Posl. 3:5-7).

14-15. Sar o lafija ando Rimljanima 12:17-21, pomožinđe e Džasminaće te mothovi mangipe premalo po rom iako ov protivinđa pe olaće?

¹⁴ Hajde te dikha o primer andi phen Džasmin. Ked oj ulji e Jehovaso svedoko, olako rom mislinđa so oj tani prevarimi hem čak pokušinđa te ćhinavi la te služini e Jehovase. Ov vređinđa la hem vićinđa olake rođakonen, jekhe manuše kova hine olengo versko vođa hem jekhe kova bahinđa odothe, te aven, te pretinen laće hem te optužinen la so oj razdvojini e porodica. Čak đi trajinđa o sastanko ki dvorana, olako rom vređinđa e phralen. Sebepi odova, i Džasmin but putija runđa sebepi so avera odobor lošno ponašinđe pe premalo late.

¹⁵ O phralja hem o phenja ki skupština utešinđe hem but zorjaćerđe amare phenja, e Džasmina. O starešine podstakninđe la te primenini o lafija ando Rimljanima 12:17-21. (Čitin.) I Džasmin phenela: „Na hine lokho, ama molinđum e Jehova te pomožini man hem dinđum sa mandar te primeninav odova so i Biblija phenela. Odolese, ked bi mo rom fordela diso melalo ki kuhinja, me bi lava hem bi čistinava odova. Ked vređinđa man, me irinđum lese šukaripnjaja. Ked hine nabormo, me brininđum man olestar.“

16-17. So sikljiljan andi phen Džasmin?

¹⁶ Sebepi so mothovđa mangipe premalo po rom, i Džasmin doživinđa diso šukar. „Mo rom počminđa sa pobuter te verujini maje, sose đanđa so uvek ka vaćerav o ćaćipe. Ked vaćerava ando odova ko so verujinava, ov mothovi maje poštovanje ađahar so šunela man. Čak složinđa pe so valjani te ćera ko odova te ovel mir ko ćher. Akana, ov podstaknini man te đav ko sastankija. Amaro odnos ulo but pošukar hem ko amaro ćher akana isi mir. Nadinava man so jekh dive hem mo rom ka prihvatini o ćaćipe hem so zajedno ka služina e Jehovase.“

¹⁷ O primer andi phen Džasmin, mothovi so o mangipe „sa podnosini... uvek nadini pe, sa trpini“ (1. Kor. 13:4, 7). Ked o manuša mrzinena amen, sebepi odova amen šaj te osetina amen lošno. Hem odova šaj te dukhal amen.  Ama, o mangipe tano but pozoralo. O mangipe osvojini averengo vilo hem anela radost e Jehovase. Ama, čak iako amare protivnikija hem ponodri mrzinena amen, amen šaj te aćhova bahtale. Sar?

18. Sose šaj te ova bahtale ked avera mrzinena amen?

¹⁸ O Isus phenđa: „Bahtale hijen ked o manuša mrzinena tumen“ (Luka 6:22). Na birinđam amen o manuša te mrzinen amen. Amen na uživinaja ked avera progoninena amen sebepi amari vera. Tegani, sose šaj te ova bahtale ked avera mrzinena amen? Te dikha trin razlogija. Sar prvo, ked istrajinaja, o Devel tano zadovoljno amencar (1. Petr. 4:13, 14). Sar dujto, amari vera tani ispitimi hem ovela pana pozorali (1. Petr. 1:7). Hem sar trito, amen ka dobina i dragoceno nagrada, o večno đivdipe ko raj ki phuv (Rimlj. 2:6, 7).

19. Sose o apostolija hine bahtale iako hine šibime?

¹⁹ Sigate palo odova so o Isus uskrsninđa, o apostolija doživinđe o bahtalipe kolestar o Isus vaćerđa. Palo odova so hine šibime hem palo odova so hine olenđe phendo te ćhinaven te propovedinen, on radujinđe pe „so hine dostojna te trpinen i lađ sebepi e Isuseso anav“ (Dela 5:40-42). Olengo mangipe premalo olengo učitelj, hine pobaro nego i dar ando olenge neprijateljija. On mothovđe mangipe ađahar so na ćhinavđe te vaćeren i šukar vest. But phralja hem phenja hem ponodri služinena e Jehovase iako isi len pharipa. On đanena so o Jehova na ka bistrel olengo trud hem o mangipe kova mothovđe premalo oleso anav (Jevr. 6:10).

20. Sostar ka vaćera ko aver članko?

²⁰ Sa đi trajini akava sveto, o manuša ka mrzinen amen (Jov. 15:19). Ama, amen na valjani te dara. Sar so ka dikha ko aver članko, o Jehova „ka zorjaćeri hem ka štitini okolen kola tane verna olese“ (2. Sol. 3:3). Odolese, hajde hem ponodri te manga e Jehova, amare phralen hem e phenjen hem čak amare neprijateljen. Ked ćeraja odova, amen ka aćhova ko jekhipe, amari vera ka ovel pozorali, ka da čast amare Devlese hem ka mothova so o mangipe tano pozoralo andi mržnja.