But hrišćanija koristinena o elektronska uređaija te šaj te aćhon ko kontakt pe familijaja hem amare phralencar hem phenjencar. Ama, o zrela hrišćanija na bistrena o savet kova pisini ko Poslovice 27:12: „O gođalo manuš dikhela i opasnost hem cidela pe, a o neiskusno đala anglal hem trpini o posledice.“

Amen haljovaja so o Jehova mangela te zaštitini amen. Odolese, na družinaja amen okolencar kola ćerena podele, kola tane isključime ja kola sikavena hovavne sikljoviba (Rimlj. 16:17; 1. Kor. 5:11; 2. Jov. 10, 11). Hem disave kola tane deo andi skupština šaj na ićerena pe ko odova so phenela e Devleso Lafi (2. Tim. 2:20, 21). Ked birinaja ko ka oven amare amala valjani te ićera akava ki godi. Šaj te ovel amenđe pharo te đana ko šaj te ovel amaro šukar amal ako samo dopisinaja amen oleja.

Isto ađahar, ako dopisinaja amen nekasa ki bari grupa, šaj te ovel amenđe but pharo te đana ko šaj te ovel amaro šukar amal. Disave hrišćanija ulje deo ando odola bare grupe hem sebepi odova hine len bare posledice. Sar šaj jekh phral hem jekh phen te ovel oprezno ako ki odija grupa isi stotine ja hiljade manuša? Amen našti te đana save tane ćaće odola manuša ki odija grupa niti te đana savo tano olengo odnos e Jehovaja. Ko Psalam 26:4 pisini: „Na družinava man e manušencar kola vaćerena hovajbe, hem cidava man okolendar kola garavena save tane.“ Akava mothovi soj tano but pošukar te dopisina amen e manušencar kolen ćaće penđaraja.

Čak iako tani i grupa but tikni, amen mora te pazina kobor vreme đala amenđe ko odova dopisivanje hem sostar o manuša vaćerena đi dopisinena pe. Amen na valjani te mislina so valjani te odgovorina ki svako poruka, bizo obzir sostar vaćeri odija poruka hem kobor vreme ka đal amenđe ko odova. O apostol Pavle upozorinđa e Timoteje so disave manuša ka „ogovorinen hem ka mešinen pe ko tuđa buća“ (1. Tim. 5:13). Odova isto šaj te desini pe hem amenđe te ćera prekalo elektronska uređaija.

Jekh zrelo hrišćanin na ka vaćeri ni na ka šunel o negativna buća ando avera niti ka phenel averenđe o poverljiva informacije ando avera phralja hem phenja (Ps. 15:3; Posl. 20:19). Isto ađahar, na ka mangel te mothovi so o buća tane pološna nego soj tane ćaće ja te vaćeri ando buća aso kola nane sigurno so ćaće ulje (Ef. 4:25). Ko amaro sajt hem ko deo JW Broadcasting^® šaj te arakha sa o informacije hem o izveštaija kola tane tačna.

Disave phralja hem phenja koristinena o elektronska uređaija te biknen, te ćinen, te reklamirinen disavo proizvod ja te roden pese radnikonen asi buti. Odola tane poslovna buća hem nane povezime amare službaja e Jehovase. O hrišćanija kola nane len mangipe premalo pare niked na ka mangen te koristinen pe phralen te bi barvaljovena (Jevr. 13:5).

Da li amen prekalo poruke valjani te ćeda pare e phralenđe hem e phenjenđe kola doživinđe disavi prirodno katastrofa ja okolenđe kase tano odova potrebno? Amen mangaja te pomožina amare phralenđe hem e phenjenđe hem mangaja te ohrabrina len (Jak. 2:15, 16). Ama, so ako o phralja ki podružnica ja o starešine ki skupština već isi len disavo plan sar te pomožinen lenđe? Ama, sebepi amaro olenđe šaj te ovel popharo te organizujinen odola buća (1. Tim. 5:3, 4, 9, 10, 16). Amen na mangaja avera te mislinen so amen isi amen disavi posebno odgovornost te brinina amen averendar.

Amen mangaja sa so ćeraja te ćerel e Jehova te ovel bahtalo (1. Kor. 10:31). Odolese, ked odlučinaja da li ka koristina disavi aplikacija ja disavo elektronsko uređaj, amen valjani te ova oprezna hem te razmislina ko kola opasnostija šaj te ova.