1. Sar avera ki skupština šaj te dikhen upro terne phralja?

AKO tu hijan terno phral, sebepi i snaga koja isi tut, tu šaj te ćere but buća ki skupština (Posl. 20:29). Tu ćaće hijan blagoslov te skupštinaće. Šaj jedva ađićereja te služine sar sluga pomoćnik. Ama, šaj mislineja so avera dikhena upro tute sar upro neko ko nane zrelo hem ko nane le iskustvo te bi ćerela disavo važno zadatko. Iako hijan terno, isi diso so šaj te ćere te bi zaslužineja e phralengo hem e phenjengo poverenje hem poštovanje.

2. So ka dikha ko akava članko?

² Ko akava članko ka razmotrina e Davideso đivdipe. Isto ađahar, ka dikha disave buća ando kralj Asa hem kralj Josafat, kola hine kraljija ki Juda. Ka dikha kola izazovija hine len akala trin kraljija, sar reagujinđe hem so o terne phralja šaj te sikljon olendar.

3. Sar šaj o terne te pomožinen e phurenđe ki skupština?

³ Ði hine terno, o David razvijinđa disave veštine sebepi kola šajinđa te pomožini averenđe. Ov sigurno hine duhovno osoba. Isto ađahar, ov hine hem šukar muzičar hem sebepi odova šajinđa te pomožini e Saulese, kole o Jehova ćhivđa te ovel kralj (1. Sam. 16:16, 23). Da li hem tu sar terno phral isi tut disave veštine sebepi kola šaj te  pomožine averenđe ki skupština? Sigurno so isi tut. Na primer, sigurno đaneja šukar te koristine o elektronska uređaija. Odolese, šaj te pomožine e phurenđe ki skupština te šaj hem on te sikljon te koristinen odola uređaija ked isi len lično proučibe hem ked učestvujinena ko sastankija.

4. Sar o David, kola osobine o terne phralja valjani te razvijinen? (Dikh i slika ki naslovno strana.)

⁴ Ko po đivdipe, o David mothovđa soj tano odgovorno. Ked hine terno, ov arakhlja pe dadese bakren. Odova hine but opasno zadatko. Ki jekh prilika, o David phenđa e Saulese: „Ked to sluga arakhlja pe dadese bakren, jekhvar alo o lav, a aver puti alo o medved hem legarđa e bakre ando stado. Me pođinđum palo leste, napadinđum le hem ikalđum e bakre ando oleso muj. A ked ov man napadinđa, me dolinđum le andi men, peravđum le hem mudarđum le“ (1. Sam. 17:34, 35). O David hine odgovorno hem šukar brininđa pe ando bakre, čak hem hrabro borinđa pe te bi zaštitini len. O terne phralja, šaj te oponašinen e Davide ked trudinena pe te ćeren o zadatko kova dobinđe.

5. Premalo Psalam 25:14, koja tani jekh andi najvažno buti koja o terne phralja valjani te ćeren?

⁵ Sar terno, o David hine but paše amal e Jehovaja. Odova so hine paše e Jehovaja hine považno nego li odova so hine hrabro hem so šukar bašalđa i harfa. E Davidese, o Jehova na hine samo Devel, već hem oleso paše Amal. (Čitin Psalam 25:14.) Hem tumen, terne phraljalen, jekh andi najvažno buti koja šaj te ćeren tani te oven paše e Jehovaja. Sebepi odova šaj ka ovel tumen pobare odgovornostija ki skupština.

6. So disave manuša mislinđe ando David?

⁶ O David morandilo te borini pe jekhe problemeja. Disave manuša mislinđe olestar soj tano terno hem neodgovorno. Ked o David manglja te borini pe e Golijateja, o kralj Saul na manglja te mukhel le hem phenđa lese: „Pana hijan ćhavoro“ (1. Sam. 17:31-33). Hari angleder odova, oleso phral phenđa lese soj tano neodgovorno (1. Sam. 17:26-30). Ama, o Jehova na mislinđa ando David soj tano nezrelo hem neodgovorno. O Jehova but šukar đanđa e Davide hem sebepi so o David  osloninđa pe upro Jehova, ov uspinđa te mudari e Golijate (1. Sam. 17:45, 48-51).

7. So šaj te sikljova ando izveštaj kotar o David?

⁷ Ando David šaj te sikljova so valjani te ova strpljiva. Šaj ka valjani te nakhel disavo vreme, okolenđe kola đanena tut sar ćhavoro te dikhen upro tute sar upro neko ko barilo. Ama, šaj te ove uverimo so o Jehova na dikhela samo ko odova sar izgledineja. Umesto odova, ov šukar penđari tut hem đanela so tu šaj te ćere a so na (1. Sam. 16:7). Odolese, zorjaćer to amalipe e Jehovaja. O David ćerđa odova ađahar so dikhlja so šaj te sikljol ando Jehova kotar o buća kola ov stvorinđa (Ps. 8:3, 4; 139:14; Rimlj. 1:20). Aver buti koja šaj te ćere tani te moline tut e Jehovase ako isi tut dijekh problemi. Šaj te amala ki škola marena tuće muj so hijan e Jehovaso svedoko. Ako tano ađahar, molin tut e Jehovase te del tut snaga. Uzo odova, primenin o savetija kola arakheja ki Biblija, ko amare publikacije hem ko video materijali. Svako puti ked ka dikhe so o Jehova pomožini tuće, to poverenje upro leste ka barjol. Isto ađahar, svako puti ked ka oslonine tut upro Jehova, avera ka ovel len pobaro poverenje upro tute.

8-9. So pomožinđa e Davidese te ovel strpljivo đi na počminđa te vladini sar kralj hem so o terne phralja šaj te sikljon olestar?

⁸ Hajde te dikha pana jekh izazov kova o David hine le. Palo odova so o David hine birimo te ovel kralj, ov morandilo te ađićeri but berša te bi počmini te vladini ki Juda (1. Sam. 16:13; 2. Sam. 2:3, 4). Ama, so pomožinđa lese strpljivo te ađićeri? Ði trajinđa odova vreme, o David na obeshrabrinđa pe već dikhlja ko odova so šaj te ćerel. Ði živinđa ki Filisteja, ov borinđa pe protiv e Izraelcenge neprijateljija. Odoleja, ov zaštitinđa o granice andi Juda (1. Sam. 27:1-12).

⁹ So o terne phralja šaj te sikljon ando David? Koristin o prilike kola isi tut te služine te phralenđe. Zapazin so ulo e phraleja kova vićini pe Rikardo. * Ked hine le oko 10 berš, ov hine le but bari želja te ovel stalno pionir. Ama, na hine spremno. Umesto te odustajini andi pi želja, ov đelo pana pobuter ki služba. Ov phenela: „Ked razmislinava ando odova period, dikhava so valjanđum te ćerav disave promene. Trudinđum man te đav ki svako naknadno poseta hem te spreminav man asi svako poseta. Čak počminđum hem mo prvo biblijako kurs. So pobuter đeljum ki služba, na hine man više odobor bari trema.“ O Rikardo tano akana but šukar pioniri hem služini sar sluga pomoćnik.

10. So ćerđa o David ki jekh prilika angleder te anel jekh važno odluka?

¹⁰ Hajde te dikha pana jekh izveštaj ando e Davideso životi. Ði garavđa pe ando Saul, ki Filisteja, ov hem olese manuša aćhavđe pe porodicen ćhere hem đelje ko maribe. Tegani alje o neprijateljija hem lelje sa so on hine len hem olenge porodicen legarđe ko ropstvo. O David šajinđa te oslonini pe upro pe sposobnostija kola hine le sar ratniko hem kokri te ćerel plan sar ka izbavini len. Umesto odova, o David rodinđa pomoć ando Jehova. Prekalo svešteniko Avijatar, ov pućlja e Jehova: „Da li te pođinav palo odola razbojnikija?“ O Jehova phenđa lese so valjani te ćerel odova hem uverinđa le so ka ovel uspešno (1. Sam. 30:7-10). So šaj te sikljova ando odova izveštaj?

11. So šaj te ćere angleder te ane o odluke?

 ¹¹ Rode savet angleder te ane disavi važno odluka. Šaj te vaćere te roditeljencar. Isto ađahar, šukar savet šaj te dobine ando iskusna starešine. O Jehova isi le poverenje upro lende hem odolese hem tu šaj te ovel tut. O Jehova upro lende dikhela sar „dar“ ki skupština (Ef. 4:8). Tu šaj te ane šukar odluke ako oponašineja olengi vera hem ako primenineja o mudra savetija kola on dinđe tut. Akana ka dikha so šaj te sikljova ando kralj Asa.

12. Kola osobine hine le o kralj Asa ked počminđa te vladini?

¹² Sar terno, o Asa hine ponizno hem hrabro. Na primer, ked nasledinđa pe dade, e Avija, ov čistinđa i phuv ando idolija. Isto ađahar, „zapovedinđa e Judejcenđe te roden e Jehova, e Devle ando pe dada hem te ićeren pe ko Zakoni hem ko zapovestija“ (2. Let. 14:1-7). Ked o Zara, o Etiopljanin, hem jekh milioni vojnikija alje upri Juda, o Asa rodinđa pomoć ando Jehova. Ov phenđa: „Jehova, tu šaj te pomožine e narodose kova tano zoralo, ama hem e narodose kova nane zoralo. Pomožin amenđe, Jehova, Devla amaro, sose upro tute uzdajinaja amen.“ Akala šuže lafija mothovena kobor o Asa hine le poverenje upro Jehova, so ov šaj te spasini ole hem olese narodo. O Asa verujinđa pe nebesko Dadese hem o „Jehova pobedinđa e Etiopljaninen“ (2. Let. 14:8-12).

13. So kasnije desinđa pe e Asase hem sose?

¹³ Sigurno ka složine tut, so te borine tut e vojskaja koja isi la jekh milioni vojnikija tano but baro izazov. Ama, sebepi so o Asa osloninđa pe upro Jehova, ov hine uspešno. Nažalost, ked hine le jekh aver problemi, ov na osloninđa pe upro Jehova. Ked o Vasa, o izraelsko kralj napadinđa le, ov rodinđa pomoć kotar o kralj andi Sirija. Sebepi odija odluka, desinđe pe but lošna buća. Prekalo prorok Ananije, o Jehova phenđa e Asase: „Sose uzdajinđan tut upro sirijsko kralj, a na uzdajinđan tut upro Jehova, to Devel, i vojska ando sirijsko kralj našlja ando te vasta.“ Kotar tegani, o Asa uvek hine ko maribe (2. Let. 16:7, 9; 1. Kralj. 15:32). So sikljovaja akalestar?

14. (a) Sar šaj te oslonine tut upro Jehova? (b) Premali 1. Timoteju 4:12, so ka ovel ako ćereja odova?

 ¹⁴ Aćhov ponizno hem ponodri oslonin tut upro Jehova. Ked krstinđan tut, tu mothovđan bari vera hem pouzdanje upro Jehova. Hem o Jehova hine bahtalo so uljan deo andi olesi porodica. Važno tano hem ponodri te oslonine tut upro Jehova. Šaj te dićhol soj tano lokho te oslonine tut upro Jehova ked aneja važna odluke. Ama, so ka ćere ked valjani te ane avera odluke, sar soj tane, savi zabava ka birine, savi buti ka ćere hem kola ciljija ka ovel tut? Ma oslonin tut upri ti mudrost. Umesto odova, rode o načelija andi Biblija kola ka pomožinen tut te ane o odluke hem palo odova ićer tut ko odova so odlučinđan (Posl. 3:5, 6). Ako ka ćere odova, o Jehova ka ovel bahtalo hem avera ki skupština ka poštujinen tut. (Čitin 1. Timoteju 4:12.)

15. Premali 2. Letopisa 18:1-3 hem 19:2, kola greške o kralj Josafat ćerđa?

¹⁵ Naravno, sar sare amen, hem tu hijan nesavršeno, hem podijekh puti ka ćere greške. Ama, odova na valjani te ćhinavi tut te ćere sa so šaj aso Jehova. Zapazin o primer ando kralj Josafat. Ov hine le but šukar osobine. Sar terno, „ov služinđa e Devlese ando po dad hem ićerđa pe ko olese zapovestija.“ Isto ađahar, ov bićhalđa e službenikonen ko dizja ki Juda te sikaven e manušen ando Jehova (2. Let. 17:4, 7). Ama, iako hine šukar manuš, o Josafat disavo puti anđa lošna odluke. Sebepi jekh asavki odluka, o Josafat morandilo te dobini savet ando Juj. (Čitin 2. Letopisa 18:1-3; 19:2.) So šaj te sikljove ando akava izveštaj?

16. So šaj te sikljova ando phral Radživ?

¹⁶ Razmislin hem primenin o savet. Šaj hem tuće sar avere terne phralenđe tano pharo te ćhive e Jehova ko prvo than. Ama, ma obeshrabrin tut. Razmislin ando jekh terno phral kova vićini pe Radživ. Ked razmislini ando berša ked hine tinejdžer, o Radživ phenela: „Ko odola berša na đanđum so te ćerav me đivdipaja. Sar hem avere ternen, više zaniminđa man o sport hem šukar te provodinav man nego li te đav ko sastankija hem ki služba.“ Ama, so pomožinđa lese? Jekh iskusno starešina  dinđa le savet. O Radživ phenela: „Ov vaćerđa mancar ando načelo andi 1. Timoteju 4:8.“ O Radživ hine ponizno, šunđa odova savet hem razmislinđa ando odova soj tano najvažno ko oleso đivdipe. Ko krajo, ov phenela: „Odlučinđum te ćhivav o duhovna ciljija ko prvo than ko mo životi. Sebepi odova, nekobor berša palo odova so dobinđum odova savet, ispuninđum o uslovija te služinav sar sluga pomoćnik.“

17. Sar o phure ki skupština dikhena upro terne phralja?

¹⁷ O phure ki skupština ceninena e terne phralen kola služinena e Jehovase zajedno olencar piko pikeja (Zah. 3:9). On but ceninena so tumen revno ćerena svako zadatko kova tano tumenđe dindo. Tumen terne phraljalen hijen but dragocena ko olenge jaćha (1. Jov. 2:14).

18. Premalo Poslovice 27:11, sar o Jehova osetini pe sebepi o terne phralja kola služinena olese?

¹⁸ Terne phraljalen, niked ma bistren so o Jehova mangela tumen hem so isi le poverenje upro tumende. Ov prorekninđa so ko poslednja dive ov ka ovel le vojska ando terne phralja kola spremno ka služinen lese (Ps. 110:1-3). Ov đanela so tumen mangena le hem so dena tumaro najšukar đi služinena olese. Ov strpljivo averencar, ama ov strpljivo hem kokri tuvaja. Ked ćereja greške, prihvatin o savet hem i disciplina koja tani tuće dindi. Hem ma bistri so sa odova avela ando Jehova (Jevr. 12:6). De sa tutar te ćere svako zadatko. Ked ćereja sa odova, to nebesko Dad ka ovel ponosno upro tute! (Čitin Poslovice 27:11.)