1-2. Ko šaj te pomožini e studentese te napredujini đi o krštenje?

I EJMI, koja živini ko Fidži, phenela: „But sviđinđa pe maje odova so sikljiljum andi Biblija. Ðanđum so odova tano ćaćipe. Ama, počminđum te menjinav man hem te napredujinav premalo krštenje tek ked počminđum te družinav man e phralencar hem e phenjencar.“ So sikljovaja ando olako iskustvo? O studentija ka napredujinen đi o krštenje ako avera ki skupština pomožinena len.

² Svako objavitelj ki skupština šaj te pomožini jekhe manušese kova proučini te ovel deo andi skupština (Ef. 4:16). I pionirka, koja vićini pe Lejlani hem koja živini ko Vanuatu, phenela: „Jekh poslovica phenela: ’Valjani tuće celo gav te šaj te barjaćere jekhe ćhave.‘ Ađahar tano hem ked ćeraja učenikonen. Valjani tuće celo skupština te šaj te pomožine jekhe manušese te napredujini đi o krštenje.“ Sare – hem o roditeljija, hem avera rođakija, hem o amala hem o učiteljija ki škola – isi len važno uloga te pomožinen e ćhavese te ovel zrelo manuš. On odova ćerena ađahar so pohvalinena le hem ađahar so sikavena le ando razna važna buća. Isto ađahar, o phralja hem o phenja ki skupština šaj te den savet, šaj te ohrabrinen, šaj te den šukar primer okolenđe kola proučinena. Ađahar on pomožinena lenđe te napredujinen đi o krštenje (Posl. 15:22).

3. So sikljiljan ando odova so phenđe i En, o Dorin hem i Lejlani?

³ Sose okova kova vodini o kurs valjani te ovel bahtalo ked avera ki skupština pomožinena e studentese? Dikh so i  phen, i En, koja služini sar specijalno pionir, ki Moldavija, phenela: „E studentese valjani but bari pomoć. Ako samo jekh manuš pomožini lese, odova tano but pharo.“ O phral Dorin, kova služini ki isto phuv sar specijalno pioniri, phenela: „But putija o phralja hem o phenja phenena diso so khuvela ko e manušeso vilo. On phenena odova so maje niked na bi avela ki godi te phenav.“ I Lejlani phenela sose pana šaj te ova bahtale ked avera ki skupština pomožinena: „Ked o studentija dikhena kobor o phralja hem o phenja andi skupština mangena len hem kobor brininena pe olendar, on ćaće šaj te haljon so amen hijam e Jehovaso narodo“ (Jov. 13:35).

4. Sostar ka vaćera ko akava članko?

⁴ Ama, šaj pućeja tut: „Sar šaj me te pomožinav nekase ked me na proučinava odola osobaja?“ Ko akava članko, ka dikha so šaj te ćera ked neko vićini amen te đa oleja ko kurs hem so šaj te ćera ked o student počmini te avel ko amare sastankija? Isto ađahar, ka dikha sar šaj o starešine te pomožinen nekase te napredujini đi o krštenje.

5. Koja tani ti uloga ked hijan vićimo ko e bibiljako kurs?

⁵ Ko kurs, o učitelj tano odgovorno aso odova te pomožini e studentese te haljol e Devleso Lafi. Ama, ako neko vićini tut ko e biblijako kurs, tegani tu hijan oleso partneri. Ti uloga tani te pomožine lese (Prop. 4:9, 10). Odolese, kola buća tu šaj te ćere te šaj te pomožine ko odova e biblijako kurs?

6. Sar šaj te primenine o načelo ando Poslovice 20:18, ked hijan vićimo ko e biblijako kurs?

⁶ Pripremin tut aso kurs. Šaj te puće e učitelje te phenel tuće diso ando odova studenti. (Čitin Poslovice 20:18.) Šaj te puće le: „Šaj li te phene maje diso ando odova studenti? Andi koja tema ka proučina? So mangeja te sikave le ko akava kurs? Da li isi diso so valjani ja so na valjani te phenav ko kurs? Sar šaj me te ohrabrinav e studente te napredujini?“ Naravno, o učitelj na ka vaćeri ando privatna buća ando oleso studenti. Ama, odova so ka phenel, šaj ka ovel korisno. I misionarka koja vićini pe Džoj vaćeri ando akala buća okolencar kasa đala ki služba. Oj phenela: „Odova so vaćerava me partnerese, pomožini lese te ovel le želja te pomožini e studentese hem te đanel so te phenel ko kurs.“

7. Sose valjani te pripremine tut ked hijan vićimo ko e biblijako kurs?

⁷ Ked hijan vićimo ko e biblijako kurs, šukar bi ovela te pripremine o materijali kova ka proučinen (Jezd. 7:10). O Dorin, kolestar vaćerđam angleder, phenela: „But ceninava ked mo partneri pripremini pe  aso kurs. Tegani, ov šaj te phenel diso šukar.“ Uzo odova, odoleja so hem tu hem to partneri pripreminena tumen aso e biblijako kurs, ka den but šukar primer e manušese kova proučini. Čak hem ako našti detaljno te pripremine tut, šukar tano te odvojine barem hari vreme, te dikhe kola tane o glavna mislija ki odija lekcija.

8. So šaj te ćere te šaj te ove konkretno đi molineja tut ko e biblijako kurs?

⁸ I molitva tani važno deo ko e biblijako kurs. Odolese, razmislin so ka phene ki molitva. Odova ka pomožini tuće te ove konkretno đi molineja tut (Ps. 141:2). I Hana, koja živini ko Japan, pana setini pe ki jekha phenjaki molitva. Oj phenela: „Osetinđum kobor olako amalipe e Jehovaja tano zoralo hem mangljum te ovav sar oj. Isto ađahar, ked spominđa mo anav ki molitva osetinđum so mangela man.“

9. Premali Jakovljeva 1:19, so šaj te ćere te šaj te pomožine ko kurs?

⁹ Pomožin e učiteljese ko kurs. I phen i Omamujovi, koja služini sar specijalno pionir, ki Nigerija, phenela: „Jekh šukar partneri pažljivo šunela đi trajini o kurs. Ov vaćeri diso šukar, ama na vaćeri but, sose haljola so o učitelj tano okova kova vodini o kurs.“ Sar šaj te đana ked hem so valjani te vaćera? (Posl. 25:11). Šun pažljivo đi o učitelj hem o student vaćerena. (Čitin Jakovljeva 1:19.) Tegani ka ove spremno te vaćere odova so valjani ko pravo vreme. Naravno, tu mora te razmisline so ka vaćere. Na primer, na ka vaćere but, na ka ćhinave e učitelje đi objasnini diso, ja te počmine te vaćere andi aver tema. Ama, ako spomineja diso kratko, koristineja disavi ilustracija ili pućibe, šaj te pomožine disavi misao te ovel pojasno. Podijekh puti šaj na ka ovel tut so te vaćere. Ama, ako pohvalineja e studente hem ako mothoveja so hijan zainteresimo olese, šaj but te pomožine lese ko odova te napredujini.

10. Sar šaj to iskustvo te pomožini e studentese?

¹⁰ Vaćer to iskustvo. Ako odova ka pomožini e studentese, vaćer kratko sar upoznajinđan o ćaćipe, so pomožinđa tut te ikljove ko krajo te problemencar, ja sar o Jehova pomožinđa tuće (Ps. 78:4, 7). To iskustvo šaj te ovel baš odova so valjani e studentese. Šaj te zorjaćeri olesi vera ja te ohrabrini le te nastavini te napredujini đi o krštenje. Isto ađahar, odova šaj te mothovi lese sar ov šaj te ikljol ko krajo pe problemencar (1. Petr. 5:9). O Gabrijel, kova živini ko Brazil, hem kova akana služini sar pionir, setini pe so pomožinđa lese đi proučinđa i Biblija. Ov phenela: „Ked šunđum e phralenge iskustvija, haljiljum so o Jehova dikhela save problemija isi amen. Ako olenđe pomožinđa,  sigurno hijum so hem maje ka pomožini.“

11-12. Sose valjani vilestar te pozdravina e studente kova alo ko sastanak?

¹¹ Te šaj o student te napredujini đi o krštenje, ov valjani redovno te avel ko sastankija hem te sikljol diso ko odola sastankija (Jevr. 10:24, 25). O student prvo puti ka avel ki dvorana sebepi so o učitelj vićinđa le. Ama, ked avela, sarine amen šaj te ohrabrina le hem ponodri te avel ko amare sastankija. Sar šaj te ćera odova?

¹² Vilestar pozdravin e studente (Rimlj. 15:7). Ako e studentese ka ovel šukar ko amaro sastanko, ov verovatno hem ponodri ka mangel te avel ki dvorana. Ma ćer te ovel lese neprijatno. Vilestar pozdravin le hem upoznajin le averencar. Vaćer oleja, sose oleso učitelj šaj pana na alo ki dvorana, ja šaj isi le disave avera buća te ćerel. Ði o student vaćeri, šun le pažljivo hem mothov so hijan zainteresimo olese. Ked vilestar pozdravineja e studente, sar šaj odova te utičini upro leste? Te dikha o iskustvo ando Dmitrij, kova krstinđa pe angleder nekobor berša hem akana služini sar sluga pomoćnik. Ked setini pe upro poklo prvo sastanko, ov phenela: „Jekh phral dikhlja man sar nervozno terđovava angli dvorana hem khuvđa mancar andre. But manuša alje te pozdravinen man. Odova but iznenadinđa man. Odobor sviđinđa pe maje odova, so mangljum o sastanko te ovel svako dive. Diso ađahar niked ko mo životi na doživinđum.“

13. Sar to ponašanje šaj te utičini upro jekh student?

¹³ Ov šukar primer. To ponašanje šaj te pomožini e studentese te ovel uverimo so arakhlja o ćaćipe (Mat. 5:16). O Vitalij, kova akana služini sar pionir ki Moldavija, phenela: „Dikhljum sar avera ki skupština živinena, razmislinena hem sar ponašinena pe. Odova uverinđa man so e Jehovase svedokija tane pravo religija.“

14. Sar šaj to primer te pomožini nekase hem ponodri te napredujini?

¹⁴ Angleder so jekh student krstini pe, ov valjani te primenini odova so sikljola. Odova nane uvek lokho. Ama, ked o student dikhela kobor tano tuće šukar sebepi so primenineja e biblijake načelija, odova ka podstaknini le te oponašini tut (1. Kor. 11:1). Te dikha o iskustvo andi Hana, kolatar vaćerđam angleder. Oj phenela: „O phralja hem o phenja već ćerđe odova so me tek počminđum te sikljovav. Olendar sikljiljum sar te ohrabrinav averen, sar te oprostinav hem sar te mothovav mangipe. On uvek vaćerđe šukar averendar. Mangljum te oponašinav len.“

15. Sar o Poslovice 27:17 pomožinena amen te haljova sose tano šukar te ova amala e studenteja kova hem ponodri avela ko amare sastankija?

 ¹⁵ Ov amal e studenteja. Ði jekh student hem ponodri avela ko sastankija mothov so hijan zainteresimo olese (Fil. 2:4). Sose na bi ćereja diso te upoznajine le pošukar? Šaj te phene lese so hijan bahtalo sebepi so dikheja so ćerela promene. Isto ađahar, šaj te puće le sar đala oleso proučavanje, sar tani olesi porodica, sar tano lese ki buti. Ked ađahar vaćereja oleja, tegani ka ove popaše oleja. Ked hijan amal oleja, odova ka pomožini lese te napredujini đi o krštenje. (Čitin Poslovice 27:17.) I Hana akana služini sar stalno pioniri. Ked setini pe ko vreme ked počminđa te avel ko sastankija, oj phenela: „Ked arakhljum disave amala ki skupština, jedva ađićerđum te avav ko sastankija. Čak aljum ko sastankija hem ked hijum le umorno. Uživinđum te družinav man me neve amalencar hem odova pomožinđa maje te ćhinavav te družinav man e manušencar kola na služinena e Jehovase. Mangljum te ovav popaše e Jehovaja hem e phralencar hem e phenjencar. Ko krajo, odlučinđum te krstinav man.“

16. So šaj pana te ćere te šaj te pomožine e studentese te osetini pe soj tano deo andi skupština?

¹⁶ Ði o student nastavini te napredujini hem te ćerel promene, pomožin lese te osetini pe soj tano deo andi skupština. Odova šaj te ćere ađahar so ka vićine le koro tute (Jevr. 13:2). Ked setini pe ko vreme ked pana proučinđa, o Denis kova služini ki Moldavija, phenela: „Nekobor putija o phralja vićinđe man hem me romnja ko gostija. On vaćerđe amenđe sar o Jehova pomožinđa lenđe. Odova but ohrabrinđa amen. Sebepi odova, hijam le uverime so mangaja te služina e Jehovase hem so ađićeri amen but šukar đivdipe.“ Isto ađahar, ked o student ispunini o uslovija te ovel nekršteno objavitelj, šaj te vićine le te đal tuvaja ki služba. O Dijego ando Brazil, phenela: „But phralja vićinđe man te đav olencar ki služba. Odova hine najšukar način te upoznajinav len pošukar. Ði upoznajinđum len pošukar, uljum pana popaše e Jehovaja hem e Isuseja.“

17. Sar šaj o starešine te pomožinen e studentenđe?

¹⁷ Arakh vreme te vaćere e studentencar. Ked tumen o starešine mothovena so mangena e studenten hem so brininena tumen olendar, odova ka pomožini lenđe te napredujinen đi o krštenje. Ked hijan ko sastanko, šaj li te odvojine vreme redovno te vaćere e studentencar? On ka osetinen so hijan zainteresimo olenđe, ked pamtineja olengo anav, posebno ked on počminena te  den komentarija. Šaj li te odvojine vreme te đa e phraleja ja e phenjaja ko disavo kurs? Tu šaj te pomožine e studentese te napredujini pobuter nego li so mislineja. I pionirka koja vićini pe Džeki, hem koja živini ki Nigerija, phenela: „But studentija tane iznenadime ked šunena so o phral kova alo mancar ko olengo kurs tano starešina.“ Jekh student phenđa: „Mo pastor niked na bi ćerela odova. Ov đala samo ko barvale hem ko okola kola platinena lese.“ Odova student akana redovno avela ko amare sastankija.

18. Sar šaj o starešine te ispuninen i odgovornost koja tani olenđe dindi premalo Dela apostolska 20:28?

¹⁸ Sikav hem ohrabrin okolen kola vodinena o kurs. Tumen o starešine, isi tumen but bari odgovornost te pomožinen e objaviteljenđe pana pošukar te propovedinen hem te sikaven e manušen. (Čitin Dela apostolska 20:28.) Ako neko lađala anglo tumende te vodini o kurs, tegani tumen šaj te vodinen. I Džeki, kolatar vaćerđam angleder, phenela: „O starešine redovno pućena man aso me studentija. Ked isi man disavo izazov đi vodinava o kurs, on dena man savet.“ O starešine šaj but te ohrabrinen okolen kola vodinena o kurs te istrajinen (1. Sol. 5:11). I Džeki phenela: „But značini maje ked o starešine ohrabrinena man hem phenena maje so ceninena i buti koja ćerava. Olenge lafija maje tane sar čaša ando šudro pani ko tato dive. Olenge šukar lafija mothovena maje so šukar ćerava me studentencar hem ćerena man te ovav pana poradosno“ (Posl. 25:25).

19. Savi radost sare amen šaj te ovel amen?

¹⁹ Čak iako trenutno nane amen nijekh e biblijako kurs, amen šaj te pomožina e studentenđe te napredujinen. Nane potrebno te vaćere but, ama odoleja so šukar ka pripremine tut, šaj te pomožine e učiteljese. Ov amal e studentencar ked on avena ko sastankija hem ov šukar primer olenđe. O starešine šaj te ohrabrinen e studenten ađahar so ka odvojinen lenđe vreme. Isto ađahar, on šaj te pomožinen e učiteljenđe, ađahar so ka sikaven len hem so ka pohvalinen len. Ćaće, nane pobari radost ando odova te ćere jekh tikni buti te pomožine nekase ko proučini te zamangel e Jehova hem te služini amare Dadese, e Jehovase.