1-2. (a) So ka pomožini amen hem ponodri te ikljova ko krajo e problemencar? Objasnin. (b) So ka dikha ko akava članko?

„KED razmislinava so sa nakhljum, džanava so me snagaja niked na bi šaj odova te čerav.“ Da li dijekhvar phendžan akava? But amendar phendže. Šaj akava phendžan palo odova so borindžan tut disave bare nabormipaja, ja mulo tutar neko kas but mangljan. Ked razmislineja ando akala problemija, haljoveja so tu šajindžan te ikljove ko krajo oljencar samo sebepi so e Jehovaso sveti duh dindža tut „but bari snaga“ (2. Kor. 4:7-9).

² Isto adžahar, amendže valjani o sveti duh te pomožini amen te borina amen protiv akalje svetoso lošno uticaj (1. Jov. 5:19). Uzo odova, amendže valjani snaga te borina amen protiv „o lošna duhovna sile“ (Ef. 6:12). Akana ka dikha duj načinja sar o sveti duh pomožini amen te borina amen akalje bučencar. Isto adžahar, ka dikha so valjani te čera te šaj o sveti duh te pomožini amen.

3. Kova tano jekh način sar o Jehova pomožini amen te istrajina ko pharipa?

³ E Jehovaso sveti duh pomožini amen adžahar so dela amen snaga ja zoraljipe te ispunina amare odgovornostija, iako isi amen pharipa. Iako hine lje problemija, o apostol Pavle haljilo so ov šaj hem ponodri te služini e Jehovase, sebepi so oslonindža pe ko „e Hristesi sila“ (2. Kor. 12:9). Ked hine ko poklo dujto misionarsko putovanje, ov na dželo samo ki služba već čerdža hem buti te šaj te platini peklje troškija. Ked hine ko Korint, ov hine ko Akila hem ki Priskila. Oljengi buti hine te čeren o šatorija. Odoljese so o Pavle džandža te čerel odija buti, nekobor dive čerdža  oljencar (Dela 18:1-4). O sveti duh dindža e Pavlese zoraljipe hem te čerel buti te šaj te platini pe troškija hem te džal ki služba.

4. Premalo 2. Korinćanima 12:7b-9, sova o Pavle borindža pe?

⁴ Čitinen 2. Korinćanima 12:7b-9. Ko so o Pavle mislindža ked phendža so isi lje „karo ano telo“? Ako dijekh puti posavdžan tut ko karo, tegani džaneja kobor odova dukhala. O Pavle phendža so isi lje disavo problemi kova mučindža lje. Ov phendža so akava problemi hine sar „e Bengeso anđeo“ kova stalno khuvdža lje. Šaj o Beng hem oljese demonja na čerdže e Pavlese problemija, kola hine sar o karo ked posavi. Ama, ked on dikhlje e Pavleso problemi on šaj manglje te čeren lje te ovel pana pobaro. Odova hine sar ked neko gurini o karo pana pohor. So čerdža o Pavle?

5. Sar o Jehova mothovdža so šundža e Pavlese molitve?

⁵ O Pavle manglja o Jehova te cidel ljestar odova „karo“. Ov phendža: „Trin putija molindžum e Gospode [e Jehova] te cidel mandar odova.“ Ama, iako o Pavle molindža pe, o Jehova na cidindža odova karo. Da li odova značindža so o Jehova na šundža e Pavlese molitve? Na. Ov šundža oljese molitve. O Jehova na cidindža oljeso problemi, ama dindža lje snaga te šaj te istrajini. Ov phendža ljese: „Miklji sila potpuno mothovi pe ked tu hijan slabo“ (2. Kor. 12:8, 9). Sebepi so o Jehova pomožindža e Pavlese, ov šajindža hem ponodri te ovel bahtalo hem te ovel lje mir (Fil. 4:4-7).

6. (a) Sar o Jehova šaj te mothovi tuče so šunela teklje molitve? (b) Sar o stihija kola tane ko odlomko zorjačerena tut?

⁶ Sar o Pavle, hem tu šaj dijekh puti molindžan e Jehova te cidel tutar dijekh problemi. Šaj nekobor putija ando vilo molindžan tut odoljese, a o problemi pana hine odothe ja čak ulo pobaro. Da li odova čhivdža tut te misline so o Jehova nane zadovoljno tuvaja? Ako osetineja tut adžahar, setin tut ko e Pavleso primer. Sar so o Jehova šundža oljese molitve, ov ka šunel hem teklje molitve. O Jehova šaj na ka cidel toklo problemi. Ama, prekalo sveti duh ov ka del tut snaga koja valjani tuče te šaj te istrajine (Ps. 61:3, 4). Šaj kotar sa o strane isi tut problemija, ama o Jehova na ka mukhel tut (2. Kor. 4:8, 9; Fil. 4:13).

7-8. (a) Ko kova način o sveti duh tano sar bavlal? (b) So o Petar phendža sar o sveti duh delujini?

⁷ Sar šaj o sveti duh pana te pomožini amen? Amen šaj o sveti duh te uporedina sar ked i bavlal phudela ko more. Te šaj o brodo te resel dži i luka, čak ked ko more isi oluja, o brodo valjani te astari šukar bavlal. Isto adžahar, o sveti duh šaj te pomožini amen hem ponodri te služina e Jehovase, čak ked isi amen pharipa, sa dži na resaja ko nevo sveto.

⁸ O apostol Petar hine ribari hem odoljese džandža so značini te putujine brodoja ko more. Šaj sebepi odova, ked pisindža sar o sveti duh delujini, koristindža o lafija kola tane povezime odoljeja. Ov pisindža: „O proročanstvo niked na hine vačerdo ando manuša, nego o manuša vačerdže o lafija kola alje ando Devel sar o sveti duh ljegardža ljen.“ O grčko lafi kova tano prevodimo e lafeja „ljegardo“ doslovno značini „te ove akhardo; te mukhe diso te ljegari tut“ (2. Petr. 1:21).

9. So manglja o Petar te phenel ked koristindža o lafija „te mukhe diso te ljegari tut“?

⁹ So manglja o Petar te phenel ked koristindža o lafija „te mukhe diso te ljegari tut“? Slično grčko lafi koristindža hem o  pisac Luka, kova pisindža i knjiga Dela apostolska. Odolje lafencar ov manglja te opisujini o brodo kova mukhlja i bavlal te ljegari lje (Dela 27:15). Jekh manuš kova istražujini i Biblija phendža so ked o Petar pisindža so o sveti duh „ljegardža“ e manušen kola pisindže i Biblija, ov koristindža o lafija kola e manušen setinčerdže ki plovidba. Odolje lafencar o Petar manglja te phenel sar so i bavlal ljegari o brodo dži o than kuri valjani te resel, adžahar hem o sveti duh ljegardža e manušen kola pisindže i Biblija te čeren poklo zadatko. Isto adžahar, odova istraživači phendža so e biblijake piscija hine sar brodija kola valjandže „te phraven peklje jedrija.“ On hine spremna te čeren i buti sar so o sveti duh usmerindža ljen. O Jehova čerdža poklo deo. Ov dindža ljen „i bavlal“, ja o sveti duh. E biblijake piscija isto čerdže poklo deo. On mukhlje o sveti duh te ljegari ljen.

10-11. Kola duj buča valjani te čera te šaj te ova sigurna so o sveti duh ljegari amen? Vačer jekh primer.

¹⁰ O Jehova avdije na dela po sveti duh e manušendže te pisinen i Biblija. Ama, ov avdije pana koristini po sveti duh te ljegari pe slugen. O Jehova pana čerela poklo deo. Sar džanaja so e Jehovaso duho ljegari amen? Amen valjani te ova sigurna so amen čeraja amaro deo. Sar?

¹¹ Razmislin ando akava primer. Te šaj i bavlal te pomožini e mornarese, ov valjani te čerel duj buča. Sar prvo, oljeso brodo valjani te ovel ko than kuri phudela i bavlal. Džandžola pe, o brodo na ka podžini ako tano ki luka, dur ando than kuri i bavlal najviše phudela. Sar dujto, o mornari valjani te vazdel hem te phravel peklje jedrija kobor god šaj. Čak ked i bavlal phudela, oljeso brodo ka džal anglal samo ako o jedrija astarena i bavlal. Isto adžahar, amen šaj hem ponodri te služina e Jehovase  samo ako oljeso sveti duh pomožini amen. Te šaj o sveti duh te pomožini amen, valjani te čera duj buča. Sar prvo, amen valjani te mukha o sveti duh te utičini upro amende, adžahar so ka učestvujina ko duhovna aktivnostija. Sar dujto, amen valjani „te vazda amare jedrija“, adžahar so ka učestvujina ko duhovna aktivnostija kobor god šaj (Ps. 119:32). Ked sa akava čeraja, o sveti duh šaj te del amen snaga te dža anglal iako šaj isi amen razna pharipa te šaj te ačhova verna sa dži ko nevo sveto.

12. So ka dikha akana?

¹² Dži akana dikhljam duj buča ko kola o sveti duh pomožini amen. Ov šaj te zorjačeri amen hem te pomožini amen te ačhova verna dži borinaja amen e problemencar. Isto adžahar, o sveti duh šaj te podstaknini amen hem te pomožini amen te ačhova ko drumo kova ljegari ko večno dživdipe. Akana ka dikha štar buča kola valjani te čera te šaj o sveti duh potpuno te pomožini amen.

13. Premali 2. Timoteju 3:16, 17, sar šaj e Devljeso Lafi te pomožini amen hem so valjani te čera?

¹³ Sar prvo, proučin e Devljeso Lafi. (Čitinen 2. Timoteju 3:16, 17.) Prekalo sveti duh o Jehova čhivdža ko e manušengi godi peklje mislija te šaj te pisinen i Biblija. Ked amen čitinaja i Biblija hem razmislinaja odoljestar so čitindžam, tegani e Devljese lafija khuvena amendže ki godi hem ko vilo. Odola lafija pomožinena amen te čera promene ko amaro dživdipe koljencar čeraja e Jehova te ovel bahtalo (Jevr. 4:12). Ama, te šaj o sveti duh te pomožini amen, valjani te odvojina vreme redovno te proučina i Biblija hem hor te razmislina odoljestar so čitinaja. Tegani, e Devljeso Lafi ka utičini ko sa odova so vačeraja hem čeraja.

14. (a) Sose šaj te phena so e Jehovaso sveti duh delujini ko amare sastankija? (b) Sar o sveti duh ka pomožini amen?

¹⁴ Sar dujto, služin e Devljese zajedno te phraljencar. (Ps. 22:22). Ked hijam ko amare sastankija amen hijam ko than kuri e Jehovaso sveti duh delujini (Otkr. 2:29). Sose šaj te phena odova? Odoljese so ked resaja amen amare phraljencar hem e phenjencar amen molinaja amen aso e Jehovaso sveti duh, džilabaja džilja kola avena ando e Devljeso Lafi hem šunaja govorija kola ičerena amare phralja, kola tane naimenujime prekalo sveti duh. Odova isto duh pomožini hem amare phenjendže te pripreminen hem te čeren peklje zadatkija. Te šaj o sveti duh te pomožini amen, valjani angljeder te pripremina amen e sastankonendže te šaj te da komentarija. Ko asavko način, sar jekh brodo koljese jedrija tane phravde, hem amen ked hijam ko sastankija, hijam spremna o sveti duh te pomožini amen.

15. Sar o sveti duh pomožini amen ki služba?

¹⁵ Sar trito, vačer o šukar haberi. Ked koristinaja i Biblija te propovedina hem te sikava e manušen, amen adžahar mukhaja o sveti duh te pomožini amen (Rimlj. 15:18, 19). Te šaj o sveti duh potpuno te pomožini amen, valjani redovno te dža ki služba hem te koristina i Biblija ked god šaj. Jekh način sar šaj pošukar te vačera e manušencar tano te koristina o predlogija andi Radno sveska.

16. Ked o Jehova šaj te del amen poklo sveti duh?

¹⁶ Sar štarto, molin tut e Jehovase. (Mat. 7:7-11; Luka 11:13). Ako mangeja te dobine sveti duh, molin tut e Jehovase hem ov ka del tut poklo sveti duh. Ništa našti te čhinavi amare molitve te resen dži ko Jehova ja te čhinavi amen te dobina e  Jehovaso sveti duh – ni o phanljipe, ni o Beng (Jak. 1:17). Sar valjani te molina amen te šaj o sveti duh te pomožini amen? Te šaj te odgovorina ko akava pučibe, ka dikha jekh poređenje koljestar vačeri pe samo ko e Lukaso jevanđelje. *

17. So sikljovaja andi molitva ando e Isuseso poređenje kova tano ko Luka 11:5-9, 13?

¹⁷ Čitinen Luka 11:5-9, 13. E Isuseso poređenje mothovi sar valjani te molina amen aso sveti duh. Ko odova poređenje o manuš dobindža so valjandža ljese „sebepi so [hine] uporno.“ Ov na darandilo te pučel pe amalje te pomožini ljese iako hine but kasno račate. * So akava poređenje sikavi amen andi molitva? O Isus phendža: „Molinen, hem ka del pe tumendže! Roden, hem ka arakhen! Khuven, hem ka phravel pe tumendže!“ So šaj te sikljova akaljestar? Te šaj o sveti duh te pomožini amen, valjani te ova uporna dži molinaja amen.

18. So sikljovaja ando Jehova kotar e Isuseso poređenje?

¹⁸ Isto adžahar, e Isuseso poređenje pomožini amen te dikha sose o Jehova dela amen poklo sveti duh. O manuš ando e Isuseso poređenje manglja te ovel šukar domaćini. Ov džandža so valjani te del habe pe gostose kova alo račate, ama na hine lje ništa so te del lje. O Isus phendža so oljeso amal dindža lje maro sebepi so hine uporno. So o Isus manglja te sikavi amen? Ako jekh nesavršeno manuš tano spremno te pomožini pe amaljese kova tano uporno, kobor pana pobuter amaro nebesko Dad ka mangel te pomožini okoljendže kola uporno ki molitva rodena oljeso sveti duh. Odoljese šaj te ova sigurna so o Jehova ka šunel amare molitve ked amen rodaja oljeso sveti duh (Ps. 10:17; 66:19).

19. Sose šaj te ova sigurna so ka istrajina?

¹⁹ Amen šaj te ova sigurna so šaj te istrajina, iako o Beng niked na ka čhinavi te napadini amen. Sose? Odoljese so o sveti duh pomožini amen ko duj načinja. Sar prvo, ov dela amen zoraljipe kova valjani amendže te istrajina ko amare pharipa. Sar dujto, o sveti duh dela amen snaga koja pomožini amen te služina e Jehovase sa dži na avela o nevo sveto. Odoljese, mukh o sveti duh te pomožini tut.