1-2. Sose valjani te da sa amendar te haljova i knjiga Levitska?

O APOSTOL Pavle setinčerdža peklje terne amalje, e Timoteje, so „celo Ljil avela ando Devel hem korisno tano“ (2. Tim. 3:16). Ko odova Ljil tano hem i knjiga Levitska. So mislineja andi odija knjiga? Disave manuša mislinena so ki odija knjiga isi but pravilija kola avdije nane amendže korisna, ama amen na mislinaja adžahar.

² Iako i knjiga Levitska hine pisimi angljeder 3 500 berš, o Jehova arakhlja akija knjiga te šaj „te sikavi amen“ (Rimlj. 15:4). I knjiga Levitska pomožini amen te haljova sar o Jehova razmislini ando disave buča. Odoljese, amen valjani te da sa amendar te haljova sostar vačeri akija knjiga. Isi but buča kola šaj te sikljova andi akija knjiga koja avela ando Devel. Akana ka dikha štar buča.

3. Sose valjandže te den pe žrtve ko Dive ando pomirenje?

³ Prvo pouka: Te šaj o Jehova te prihvatini amare žrtve, amen valjani te ovel amen šukar odnos oljeja. Svako berš, ko Dive ando pomirenje, o Izraelcija čedindže pe, te šaj o prvosveštenik te del žrtve aso oljenge grehija. Odola žrtve pomožindže e Izraelcendže te haljon soj tane grešna hem so valjani te oven čistime ando greh. Ama, angljeder o prvosveštenik te anel o rat ando žrtve ki Svetinja upro svetinje, ov prvo valjandža te čerel jekh aver buti. Odija buti hine považno nego te oprostinen pe e narodose grehija.

4. Premali Levitska 16:12, 13, so o prvosvešteniko čerdža ked prvo puti khuvdža ki Svetinja upro svetinje ko Dive ando pomirenje? (Dikh i slika ko početko ando akava časopis.)

 ⁴ Čitinen Levitska 16:12, 13. Zamislin jekh situacija. Počmini o Dive ando pomirenje. O prvosveštenik khuvela ko sveto šator. Odova dive ov valjani trin putija te khuvel ki Svetinja upro svetinje. Akana khuvela o prvo puti. Ko jekh vas ičeri o čaro kuri tano o kad, a ko aver vas ičeri o žaro kova ljelja kotar oltari. Ov terdžola anglji zavesa koja učhari o ulaz ki Svetinja upro svetinje. Dži odova čerela, ov ko vilo osetini baro poštovanje premalo Devel. Ov khuvela ki Svetinja upro svetinje hem terdžola anglo kovčeg saveza. Ko jekh simbolično način, ov adžahar terdžola anglo Devel, o Jehova. Akana o svešteniko čhorela o sveto kad ko žaro hem ko odova than osetini pe šužo miris. * Palo odova, ov paljem khuvela ki Svetinja upro svetinje e rateja ando životinje kola hine dinde sar žrtva. Da li zapazindžan so angljeder te del o rat aso grehija, ov prvo tharela o kad?

5. So šaj te sikljova ando odova sar koristindža pe o kad ko Dive ando pomirenje?

⁵ So šaj te sikljova ando odova sar koristindža pe o kad ko Dive ando pomirenje? I Biblija mothovi soj tane o molitve ando e Jehovase verna sluge sar odova kad (Ps. 141:2; Otkr. 5:8). Setin tut so o prvosveštenik osetindža baro poštovanje ked andža o kad ki Svetinja upro svetinje. Isto adžahar, ked amen molinaja amen e Jehovase, ko amaro vilo isi amen baro poštovanje premalo oljeste. Amen hijam but zahvalna so šaj te ava anglo okova kova sa čerdža hem te ova paše oljeja, sar o čhavo pe dadeja (Jak. 4:8). Ov mangela amen te ova oljese amala (Ps. 25:14). Amen odobor ceninaja so isi amen akija čast so na mangaja te čera diso so ka čerel lje te ovel tužno.

6. So sikavi amen ando Isus odova so o prvosveštenik thardža o kad angljeder te del o žrtve?

⁶ Setin tut so o prvosveštenik valjandža te tharel o kad angljeder te del o žrtve. Sebepi so odova prvo čerdža, ov hine sigurno so o Jehova tano zadovoljno oljeja hem so ka prihvatini i žrtva. So akava sikavi amen ando Isus? Dži hine ki phuv, angljeder te del po dživdipe sar žrtva, o Isus valjandža te čerel diso but važno. Odova hine považno ando odova te spasini e manušen. So hine odova? Te šaj o Jehova te prihvatini oljesi žrtva, dži hine ki phuv, ov valjandža te ovel verno hem te šunel e Jehova celo poklo dživdipe. Ko odova način, o Isus mothovdža soj tano najšukar te šune e Jehova ko sa. Pana hari, o Isus ka mothovi so o Jehova isi lje pravo te vladini hem so oljeso način sar vladini tano najšukar.

7. Sose o Jehova hine zadovoljno e Isuseja?

⁷ Dži hine ki phuv, o Isus ko sa šundža pe Dade, e Jehova. Iako nakhlja prekalo bare pharipa hem džandža so ka merel ko bare dukha, ov hine odlučno te mothovi so oljeso Dad vladini ko najšukar način (Fil. 2:8). Ked hine lje pharipa, o Isus molindža pe „bare dukhaja hem asvencar“ (Jevr. 5:7). Oljese molitve kola hine vačerde ando vilo, mothovdže soj tano verno e Jehovase hem pomožindže lje te ovel poslušno oljese. E Jehovase, e Isusese molitve hine sar jekh šužo miris kova avela ando kad. O Jehova hine  zadovoljno oljeja, sose peklje dživdipaja o Isus mothovdža so o Jehova isi lje pravo te vladini.

8. Sar šaj te oponašina e Isuse?

⁸ Amen šaj te oponašina e Isuse adžahar so ka da sa amendar te šuna e Jehova hem te ova verna oljese. Ked isi amen pharipa, amen ando vilo molinaja amen o Jehova te pomožini amen sose mangaja te šuna lje. Ked odova čeraja, amen mothovaja so o Jehova isi lje pravo te vladini. Amen haljovaja so o Jehova na ka šunel amare molitve ako čeraja diso so ov mrzini. Ama, ako čeraja o buča kola ov mangela, šaj te ova sigurna so amare molitve e Jehovase ka oven sar o šužo miris kova tegani alo ando kad. Isto adžahar, amen šaj te ova sigurna so ked hijam oljese verna hem ked šunaja lje ov tano zadovoljno amencar (Posl. 27:11).

9. Sose o Izraelcija dindže o žrtve zajedništva?

⁹ Dujto pouka: Amen služinaja e Jehovase sose hijam ljese zahvalna. Te šaj te haljova kobor tano odova važno, akana ka sikljova ando žrtve zajedništva kola o Izraelcija dindže. * I knjiga Levitska sikavi amen so ked jekh Izraelco dindža i žrtva zajedništva, ov adžahar mothovdža „piklji zahvalnost“ (Lev. 7:11-13, 16-18). Ov na dindža akija žrtva sebepi so morandilo, nego sose manglja te čerel odova. Akija žrtva šajindža te del svako manuš sose odoljeja mothovdža so mangela e Jehova, peklje Devlje. O manuš kova  dindža i žrtva, oljesi porodica hem o sveštenikija šajindže te han o mas kotar akija žrtva. Ama, disave delovija kotar i žrtva valjandže te den pe samo e Jehovase. Kola delovija hine odola?

10. Sose o žrtve zajedništva andi Levitska 3:6, 12, 14-16 uporedinena pe e Isusese službaja?

¹⁰ Trito pouka: De e Jehovase toklo najšukar sebepi so mangeja lje. E Jehovase, o najšukar deo andi životinja hine i khoni. Ov phendža so pana disave delovija, sar soj tane o bubregija, tane važna oljese. (Čitinen Levitska 3:6, 12, 14-16.) O Jehova hine but bahtalo ked jekh Izraelco spremno dindža e Jehovase akala delovija andi životinja hem i khoni. O Izraelco kova dindža odova e Jehovase, mothovdža so isi lje bari želja te del poklo najšukar e Devljese. Ko slično način, o Isus spremno dindža e Jehovase poklo najšukar, adžahar so celone viljeja služindža oljese (Jov. 14:31). Ov uživindža te čerel e Devljesi volja hem but manglja oljese zakonja (Ps. 40:8). O Jehova hine but bahtalo dži dikhlja e Isuse sar spremno čerela oljesi volja.

11. Sar tani amari služba sar odola žrtve zajedništva hem sar šaj odova te utešini amen?

¹¹ Amari služba e Jehovase tani sar odola žrtve zajedništva, sose adžahar mothovaja ljese kobor mangaja lje. Amen daja e Jehovase amaro najšukar sose mangaja lje celone viljeja. O Jehova tano but bahtalo ked dikhela so but manuša tane spremna te služinen oljese sose mangena olje hem oljese zakonja. Amen šaj but te utešini odova so o Jehova dikhela hem cenini na samo odova so čeraja već hem sose čeraja. Na primer, ako hijan phuro hem više našti te čere odova so angljeder šajindžan te čere, šaj te ove sigurno so o Jehova haljola tut. Šaj mislineja so našti te čere odobor but e Jehovase, ama o Jehova hor ano tute dikhela o mangipe kova čhivela tut te čere odova so šaj te čere. Ov uvek ka prihvatini toklo najšukar so šaj te čere oljese.

12. Sar o Jehova dikhlja ko žrtve zajedništva hem sar odova ohrabrini amen?

¹² So šaj te sikljova ando žrtve zajedništva? Dži i jag tharela hine o najšukar delovija andi životinja, o čuro džala hine upre hem odova mothovdža so o Jehova hine zadovoljno. Isto adžahar, ov sigurno so o Jehova tano zadovoljno tuvaja ked spremno deja oljese toklo najšukar (Kol. 3:23). Šaj samo te zamisline kobor tu čereja e Jehova te ovel bahtalo! Nane važno da li tu šaj te čere but ja hari e Jehovase. Odova so tu čereja oljese tano but važno hem ov niked na ka bistrel odova (Mat. 6:20; Jevr. 6:10).

13. Premali Levitska 9:23, 24, sar o Jehova mothovdža so akava sveštenstvo isi lje oljeso blagoslov?

¹³ Štarto pouka: O Jehova blagoslovini piklji organizacija koja tani akate ki phuv. Te dikha so ulo ko 1512. berš angljeder amari era ked hine čerdo o sveti šator ki gora Sinaj (Izl. 40:17). O Mojsije ičerdža i svečanost kuri o Aron hem oljese čhave hine postavime te oven sveštenikija. O Izraelcija čedisalje te dikhen sar o sveštenikija prvo puti ka den o žrtve (Lev. 9:1-5). Sar o Jehova mothovdža so akava sveštenstvo isi lje oljeso blagoslov? Dži o Aron hem o Mojsije blagoslovindže e narodo, o Jehova bičhaldža i jag ando nebo te tharel i žrtva  koja hine ko oltari. (Čitinen Levitska 9:23, 24.)

14. Sose odova so o Jehova podržindža o sveštenstvo ko Izrael tano važno amendže avdije?

¹⁴ Sose o Jehova bičhaldža i jag? O Jehova bičhaldža i jag te mothovi so ov mangela o Aron hem oljese čhave te oven sveštenikija hem so podržini ljen. Ked o Izraelcija dikhlje so o Jehova mangela te podržini akalje sveštenikonen, tegani haljilje so hem on valjani te podržinen ljen. Sose odova so o Jehova podržindža o sveštenstvo ko Izrael tano važno avdije amendže? Odoljese so odova sveštenstvo predstavini jekh pošukar hem pobaro sveštenstvo. O Isus tano o pobaro Prvosveštenik, a o 144 000 tane o sveštenikija hem kraljija kola ka služinen e Isuseja ko nebo (Jevr. 4:14; 8:3-5; 10:1).

15-16. Sar o Jehova mothovi so podržini e verno hem e razborito robo?

¹⁵ Ko 1919. berš, o Isus čhivdža jekh tikni grupa ando pomazana phralja te služinen sar „o verno hem razborito robo“. Odova robo predvodini ko propovedanje hem dela e Isusese učenikonendže „hrana ko pravo vreme“ (Mat. 24:45). Da li amen jasno dikhaja so o Devel podržini e verno hem e razborito robe?

¹⁶ O Beng hem oljeso sveto mangena te čhinaven akalje verno slugen te propovedinen. Bizi e Jehovasi pomoć akava robo našti te čerel akija buti. Ko sveto, već hine duj bare mariba hem bare finansijska problemija. Isto adžahar, but putija e Devljese narodose čerdže pe bare nepravde hem hine but progonimo. Iako sa odova ulo, o verno hem o razborito robo nastavindža te del duhovno hrana e Isusese  sledbenikonendže ki phuv. Razmislin samo odoljestar kobor literatura isi amen. Oj tani biparengo hem ikljola ko pobuter ando 900 čhibja. Sa akava tano jekh baro dokaz so o Jehova podržini akalje robo. Odova so vačeraja o šukar haberi tano pana jekh dokaz ando e Jehovaso blagoslov. O šukar haberi čače propovedini pe „ko celo sveto“ (Mat. 24:14). Šaj te ova sigurna so avdije o Jehova vodini hem but blagoslovini piklji organizacija.

17. Sar šaj te mothova so podržinaja e Jehovasi organizacija?

¹⁷ Šukar tano te puča amen akava: Da li hijum zahvalno so hijum deo andi e Jehovasi organizacija koja tani ki phuv? Ko e Mojsijeso vreme, o Jehova bičhaldža i jag kotar o nebo te mothovi so ov podržini okoljen soj tane čhivde te oven sveštenikija. Isto adžahar, o Jehova mothovi amendže jasno dokaz so ov avdije podržini piklji organizacija koja tani ki phuv. Čače, isi amen bare razlogija te ova zahvalna (1. Sol. 5:18, 19). Sar šaj te mothova so podržinaja e Jehovasi organizacija? Odova šaj te čera ako ičeraja amen ko odova so sikljovaja andi Biblija, ando publikacije, ko sastankija, ko pokrajinska sastankija hem ko kongresija. Uzo odova, kobor god šaj amen valjani te propovedina o šukar haberi hem te sikava averen (1. Kor. 15:58).

18. So hijan odlučno te čere?

¹⁸ Ov odlučno te koristine akava so sikljiljan kotar i knjiga Levitska. De sa tutar te ovel tut šukar odnos e Jehovaja te šaj ov te prihvatini teklje žrtve. Služin e Jehovase sose hijan zahvalno oljese. Uvek de e Jehovase toklo najšukar sose mangeja lje. De sa tutar te podržine i organizacija koja ov blagoslovini. Ked čereja sa akala buča tu mothoveja e Jehovase so cenineja i čast ove oljeso Svedoko.