1. So o Jehova mukhela amen te čera?

O JEHOVA mukhela amen te odlučina sar ka živina. Ov sikavi amen sar te ana šukar odluke hem ako anaja odluke kola radujinena lje ov pomožini amendže te ova uspešna (Ps. 119:173). So pobuter koristinaja o mudra savetija ando e Devljeso Lafi, amen ka ana pošukar odluke (Jevr. 5:14).

2. So šaj te ovel amendže pharo te čera palo odova so andžam disavi odluka?

² Čak hem ako andžam šukar odluka, šaj tano pharo te završina odova so počmindžam. Hajde te dikha disave primerija: Jekh terno phral odlučindža te čitini celo Biblija. Nekobor kurče dželo ljese šukar, ama palo odova čhinavdža. Jekh phen odlučindža te ovel stalno pioniri, ama uvek pomerini o datum ked valjani te počmini. O starešinstvo ki jekh skupština odlučindža so pobuter ka džan ko pastirska posete ko phralja hem ko phenja, ama nakhlje nekobor masekija, a on pana na dželje koro ljende. Akala situacije tane različita, ama o problemi tano isto. O manuša anena o odluke, ama na čerena odova so odlučindže. O hrišćanja kola živindže ko prvo veko ko Korint, hine ljen slično problemi. Hajde te dikha so šaj te sikljova oljendar.

3. So odlučindže te čeren o hrišćanja ando Korint, ama so ulo?

³ Koro 55. berš, ki nevi era o hrišćanja ko Korint andže jekh važno odluka. On šundže so oljenge phralja ko Jerusalim hem ki Judeja isi ljen but pharipa hem soj tane čorore. Isto adžahar, šundže so avera skupštine čedena pare te pomožinen ljen. O hrišćanja ko Korint hine šukar hem phravde vastese, odoljese odlučindže hem on te pomožinen e phraljendže. On pučlje e Pavle sar šaj hem on te pomožinen. O Pavle dindža uputstvija e skupštinače hem čhivdža e Tite te pomožini te čeden pe o pare (1. Kor. 16:1, 2; 2. Kor. 8:6). Ama nekobor masekija palo odova, o Pavle  šundža so o hrišćanja ando Korint na čedindže o prilogija kola phendže so ka den. Odoljese, oljenge prilogija verovatno ne bi ovena spremna ked valjandže te bičhaljen pe ko Jerusalim zajedno e prilogencar ando avera skupštine (2. Kor. 9:4, 5).

4. Premali 2. Korinćanima 8:7, 10, 11, so o Pavle podstaknindža e hrišćanen ando Korint te čeren?

⁴ O hrišćanja ando Korint andže šukar odluka. O Pavle pohvalindža ljen sebepi so hine ljen zoralji vera hem so manglje te oven phravde vastese. Ama, ov podstaknindža ljen te završinen odova so počmindže. (Čitinen 2. Korinćanima 8:7, 10, 11.) Ando oljengo primer sikljovaja so čak hem e verno hrišćanendže šaj te ovel pharo te čeren odova so odlučindže.

5. Ko kola pučiba ka dobina odgovor?

⁵ Sar e hrišćanendže ando Korint hem amendže šaj te ovel pharo te čera odova so phendžam so ka čera. Sose? Odoljese so hijam nesavršena, amendže tano šaj polokho te mukha o buča te čera kasnije. Ja šaj ulo diso so na očekujindžam hem akana tano pharo te ičera amen ko odova so odlučindžam (Prop. 9:11; Rimlj. 7:18). So ako andžam disavi odluka hem akana dikhaja so valjani te menjina la? Sar šaj te završina odova so počmindžam te čera?

6. Ked šaj ka valjani te menjina amare odluke?

⁶ Disave važna odluke niked na ka menjina. Na primer, amen ičeraja amen ki amari odluka te služina e Jehovase hem hijam odlučna te ova verna amare romese ja romnjače (Mat. 16:24; 19:6). Ama, disave odluke šaj ka valjani te menjina. Sose? Odoljese so amare okolnostija menjinena pe. So šaj te pomožini amen te ana šukar odluke?

7. Aso so valjani te molina amen hem sose?

⁷ Molin tut asi mudrost. O Jehova phendža e Jakovese te pisini: „Ako nekase tumendar valjani mudrost, nek rodel ando Devel, sose ov celone viljeja but dela sarinendže“ (Jak. 1:5). Sarinendže amendže ko disave buča „valjani mudrost“. Odoljese rode e Jehovastar pomoć ked aneja i odluka, ama hem ked valjani te menjine i odluka koja andžan. Tegani, o Jehova ka pomožini tut te ane mudro odluka.

8. So valjani te čere angljeder so aneja disavi odluka?

⁸ Razmislin šukar hem istražin sa o buča. Rode savet ko e Devljeso Lafi, čitin o publikacije andi e Jehovasi organizacija hem vačer e manušencar kola ka den tut šukar savet (Posl. 20:18). Akala buča tane but važna ked odlučineja te menjine tiklji buti, te seline tut ja ked valjani te birine ki koja škola ka dža te šaj kasnije te arakhe buti koja ka pomožini tut te čere tiklji služba.

9. Sose tano šukar te ova iskrena premalo amende?

⁹ Puč tut sose mangeja te ane odija odluka. E Jehovase tano važno sose amen čeraja disave buča (Posl. 16:2). Ov mangela amen uvek te ova iskrena. Odoljese ked odlučinaja diso, valjani iskreno te priznajina hem amendže hem averendže sose adžahar odlučindžam. Ako na hijam iskrena šaj te ovel amendže pharo te čera odova so odlučindžam. Na primer, jekh terno phral odlučini te ovel stalno pioniri. Ama palo disavo vreme, oljese tano pharo te pherel o satija kola valjani te ovel lje sar pioniri hem ov više na uživini ki služba. Ov šaj mislindža so ulo pioniri sose manglja te čerel e Jehova bahtalo. Ama, šaj ulo pioniri samo sebepi so manglja te radujini pe roditeljen ja nekas avere.

10. So valjani amendže te šaj te čera promene?

 ¹⁰ Zamislin jekhe manuše kova proučini i Biblija. Ov odlučini te čhinavi o cigare. Iako tano oljese pharo, ov na pušini jekh ja duj kurče. Ama, ov paljem počmini te pušini. Ko krajo, uspini te čhinavi o cigare! O mangipe premalo Jehova hem oljesi želja te čerel e Jehova bahtalo pomožindže lje te cidel pe andi odija lošno navika (Kol. 1:10; 3:23).

11. Sose valjani te ovel tut jasna ciljija?

¹¹ Teklje ciljija nek oven jasna. Ako tane teklje ciljija jasna, tegani ka ovel tuče polokho te završine odova so počmindžan te čere. Na primer, šaj odlučindžan svako dive te čitine i Biblija. Ama, ako na čerdžan tuče raspored ked ka čitine, verovatno na ka čere odova so planirindžan. * Ja o starešine ki skupština odlučindže te džan pobuter ko pastirska posete, ama o vreme nakhela, a on pana na počmindže te čeren odova. Te šaj te čeren odova so odlučindže, on šaj te pučen pe: „Da li razmislindžam hem da li ko amaro plan čhivdžam e phraljen hem e phenjen kas valjani te posetina? Da li odredindžam tačno vreme ked ka dža te posetina ljen?

12. So šaj ka valjani te čere hem sose?

¹² Ma očekujin tutar but. Niko amendar nane lje vreme, materijalna buča ja snaga te čerel sa so bi mangela. Odoljese ma očekujin tutar but hem ov razumno. Disavo puti, šaj ka valjani te menjine tiklji odluka odoljese so haljiljan so našti te čere odova so phendžan (Prop. 3:6). Zamislin so tu haljiljan so valjani te menjine disavi odluka, menindžan la hem dičhola tuče so šaj te čere odova so akana odlučindžan. Hajde te dikha pandž buča kola šaj te pomožinen tut te završine odova so počmindžan.

13. Sar šaj te dobine snaga te čere odova so odlučindžan?

¹³ Molin tut asi snaga te čere odova so odlučindžan. O Devel šaj te del amen snaga te ičera amen ki amari odluka (Fil. 2:13). Molin e Jehova prekalo poklo sveti duh te del tut snaga koja valjani tuče. Ma čhinav te moline tut čak hem ako dičhola tuče so o odgovor ko teklje molitve harini. Sar so o Isus phendža: „Molinen, hem ka del pe tumendže [o sveti duh]“ (Luka 11:9, 13).

14. Sar o načelo ando Poslovice 21:5 šaj te pomožini tut te čere odova so odlučindžan?

¹⁴ Čer tuče plan. (Čitinen Poslovice 21:5 fusn.) Te šaj te završine bilo so so počmindžan te čere, valjani te čere tuče plan. Palo odova, valjani te ičere tut ko toklo plan. Isto adžahar, ked aneja dijekh odluka, ko jekh ljil pisin sa so valjani te čere te šaj te čere odova so odlučindžan. Ked isi tut diso pharo te čere, delin odova ko nekobor tikne zadatkija. Svako puti ked ispunineja jekh ando odola tikne zadatkija, tegani šaj te dikhe kobor već čerdžan. O Pavle podstaknindža e hrišćanen ando Korint „svako prvo dive ko kurko“ te čhiven hari pare ki strana aso prilogija, a na te adžičeren te čeden o prilogija ked ov ka resel (1. Kor. 16:2). Ked dijekh pharo zadatko delineja ko nekobor potikne zadatkija, tegani na ka osetine so isi tut but pharo zadatko kova našti te čere.

15. So valjani te čere palo odova so čerdžan tuče plan?

¹⁵ Ako pisindžan odova so planirindžan te čere, tegani ka ovel tuče polokho te čere odova so odlučindžan (1. Kor. 14:40). Na  primer, o starešinstvo isi lje uputstvo te birini jekhe starešina kova ka pisini sa o odluke kola o starešinstvo andža, so uključini hem odova kase tani odija buti dodelimi hem dži ked valjani te završini pe. Ked o starešine pisinena odova, oljendže tano polokho te čeren odova so odlučindže te čeren (1. Kor. 9:26). Diso adžahar hem tu šaj te čere. Na primer, šaj te pisine ko jekh ljil so valjani te čere svako dive hem ko početko ando odova spisko pisin koja buti valjani prvo te čere. Akava šaj te pomožini tut, na samo te završine odova so počmindžan te čere, nego hem te čere diso pobuter aso pohari vreme.

16. So valjani te čere te šaj te ičere tut ko odova so odlučindžan hem so odoljestar vačeri pe ko Rimljanima 12:11?

¹⁶ De sa tutar. Valjani te trudine tut te šaj te ičere tut ko toklo plan hem te završine odova so počmindžan. (Čitinen Rimljanima 12:11.) O Pavle phendža e Timotejese te del sa pestar te ovel pošukar učitelj hem te istrajini ko odova. Akava savet isto važini hem aso avera duhovna ciljija (1. Tim. 4:13, 16).

17. Sar šaj o lafija ando Efešanima 5:15, 16 te pomožinen tut te čere odova so odlučindžan te čere?

¹⁷ Mudro koristin to vreme. (Čitinen Efešanima 5:15, 16.) Birin o vreme ked ka čere odova so odlučindžan hem ma menjin lje. Ma adžičer o okolnostija te oven savršena pa te počmine te čere odova so phendžan, sose sigurno niked na ka ovel tut savršena okolnostija (Prop. 11:4). Pazin o buča kola nane važna te na ljen to vreme hem ti snaga koja valjani tuče te čere o považna buča (Fil. 1:10). Ako šaj, birin o vreme ked avera na ka čhinaven tut ko odova so čereja. Vačer averendže so valjani tuče vreme te ove kokri. Isključin to telefoni hem proverin te poruke pokasno. *

18-19. So šaj te pomožini tut te nastavine te čere odova so odlučindžan iako nane lokho?

¹⁸ Razmislin kola šukar buča ka ovel tut ked ka završine to zadatko. Odova šaj te uporedina sar ked podžindžan ko drumo hem mangeja te rese ko jekh than. Ako čače mangeja te rese ko odova than, tegani o phanlo drumo na ka čhinavi tut. Tu ka arakhe aver drumo. Ako razmislineja kola šukar buča ka ovel tut sebepi i odluka koja andžan, tegani na ka odustajine odobor lokho ked ka ovel tut pharipa (Gal. 6:9).

¹⁹ Šaj te ovel tuče pharo te ane šukar odluke, a te čere odova so odlučindžan šaj te ovel pana popharo. Ama, o Jehova šaj te del tut dovoljno snaga hem dovoljno mudrost te završine odova so počmindžan.